Bontshang Lorato “ka Tiro le Boammaaruri”

 1. Ke mofuta ofe wa lorato o o gaisang e mengwe yotlhe mme ke eng fa go le jalo? (Bona setshwantsho se se simololang setlhogo.)

LORATO lo lo theilweng mo melaometheong e e siameng (a·gaʹpe), ke mpho e e tswang kwa go Jehofa. Ke ene Motswedi wa lone. (1 Joh. 4:7) Mofuta ono wa lorato o gaisa e mengwe yotlhe. Le fa gone lorato lono lo akaretsa go amega ka ba bangwe le go nna botsalano, lo bontshiwa thata ka go direla ba bangwe molemo. Buka nngwe e tlhalosa gore “tsela ya go lemoga gore lorato lo motho a lo bontshang ke [a·gaʹpe], ke ka go leba ditiro tsa gagwe.” Fa re bontsha ba bangwe lorato kgotsa re lo bontshiwa, re a itumela e bile botshelo jwa rona bo nna le bokao.

2, 3. Jehofa o bontshitse batho lorato jang?

² Jehofa ga a bolo go rata batho, tota le pele Adame le Efa ba bopiwa. O ne a bopa lefatshe gore batho ba tshelele ruri mo go lone e bile a dira gore e nne lefelo le mo go lone ba tla itumelelang botshelo ka botlalo. Jehofa o ile a dira jalo gore re tle re solegelwe molemo e seng gore ene a solegelwe molemo. Mo godimo ga moo, o ne a bontsha batho lorato ka go ba naya tshono ya go tshelela ruri mo Paradaiseng.

³ Fa Adame le Efa ba sena go tsuologa, Jehofa o ne a dira sengwe se se bontshang gore o rata batho fela thata. O ne a rulaganya gore ditlogolwana tsa ga Adame le Efa di rekololwe, a tlhomamisegile gore bangwe ba bone ba tla anaanela lorato lwa Gagwe. (Gen. 3:15; 1 Joh. 4:10) Tota e bile, go tloga ka nako ya fa Jehofa a ne a solofetsa batho gore mo isagweng go tla nna le Mmoloki, mo go ene thekololo e ne e setse e duetswe. Dingwaga di ka nna 4 000 morago ga moo, Jehofa o ne a latlhegelwa fela thata fa a ne a ntsha Morwawe yo o tsetsweng a le esi gore a swele batho botlhe. (Joh. 3:16) Ruri re lebogela tsela e e molemo e Jehofa a re bontshitseng lorato ka yone!

 4. Ke eng se se bontshang gore batho ba kgona go bontsha lorato?

⁴ Re kgona go bontsha lorato lwa mmatota ka gonne Modimo o re bopile mo setshwanong sa gagwe. Boleo bo dirile gore go nne thata go bontsha ba bangwe lorato, le fa go ntse jalo, seo ga se reye gore ga re tlhole re kgona go bontsha lorato. Abele o ne a bontsha gore o rata Modimo ka go mo ntshetsa setlhabelo sa maemo a kwa godimo. (Gen. 4:3, 4) Noa o ne a bontsha gore o rata batho ka go ba bolelela molaetsa wa Modimo dingwaga di le dintsi le fa ba ne ba sa mo reetse. (2 Pet. 2:5) Aborahame o ne a dira gore go rata Modimo e nne selo sa botlhokwa go feta tsela e a ikutlwang ka yone fa a ne a laelwa gore a ntshe morwawe e bong Isake e le setlhabelo. (Jak. 2:21) Fela jaaka banna bao ba ba ikanyegang, le rona re batla go bontsha lorato le fa go ka nna thata jang.

 5. Re ka bontsha lorato lwa mmatota ka ditsela dife?

⁵ Baebele e tlhalosa gore lorato lwa mmatota lo bontshiwa “e seng ka lefoko le fa e le ka loleme, mme ka tiro le boammaaruri.” (1 Joh. 3:18) A seno se raya gore ga re ka ke ra bolelela ba bangwe gore re a ba rata? Nnyaa! (1 Bathes. 4:18) Go na le moo, go raya gore ga re a tshwanela go tlhalosa fela gore re rata ba bangwe segolobogolo fa maemo a tlhoka gore re dire sengwe. Ka sekai, fa Mokeresetemmogo le rona a se na dilo tse di tlhokegang mo lapeng, ga go a lekana gore re mo reye fela re re go tla siama. (Jak. 2:15, 16) Ka tsela e e tshwanang, fa re rata Jehofa le baagelani ba rona, ga re kitla re kopa Modimo fela “gore a romele badiri mo thobong” mme le rona re tla nna le seabe ka botlalo mo tirong eno ya go rera.—Math. 9:38.

6, 7. (a) “Lorato lo lo se nang boitimokanyo” ke eng? (b) Naya dikai tsa batho ba ba neng ba bontsha lorato lwa boitimokanyi.

⁶ Moaposetoloi Johane o ne a re re tshwanetse go rata “ka tiro le boammaaruri.” Ka jalo, lorato lwa rona lo tshwanetse lwa nna “lo lo se nang boitimokanyo.” (Bar. 12:9; 2 Bakor. 6:6) Seno se raya gore re ka se kgone go bontsha lorato lwa mmatota mme gone re itira se re seng sone. Re ka nna ra ipotsa jaana: ‘A go na le lorato lo lo nang le boitimokanyi?’ Nnyaa. Seno e tla bo e se lorato, go na le moo, e tla bo e le boitimokanyi fela.

⁷ Akanya ka dikai dingwe tsa batho ba ba neng ba bontsha lorato lwa boitimokanyi. Kwa tshingwaneng ya Edene, Satane o ne a itira e kete o batlela Efa dilo tse di molemo fa tota a ne a le pelotshetlha e bile e le moitimokanyi. (Gen. 3:4, 5) Ka motlha wa ga Dafide, Ahitofele o ne a bontsha gore botsala jwa gagwe le Kgosi Dafide e ne e le jwa lefela. Ahitofele o ne a mo tlhanogela fa a sena go lemoga gore a ka iponela melemo mengwe. (2 Sam. 15:31) Le gompieno, batlhanogi le batho ba bangwe ba ba bakang dikgaogano mo phuthegong ba dirisa “puo e e borethe le polelo ya go boka” go dira gore go lebege e kete ke batho ba ba lorato fa tota maikaelelo a bone e le a bopelotshetlha.—Bar. 16:17, 18.

 8. Re tshwanetse go ipotsa potso efe?

⁸ Lorato lwa boitimokanyi lo tlhabisa ditlhong ka gonne lo farologane thata le lorato lwa go intsha setlhabelo lo Bakeresete ba tshwanetseng go nna le lone. Boitimokanyi jo bo ntseng jalo bo ka tsietsa batho mme e seng Jehofa. Tota e bile, Jesu o ne a re batho ba e leng baitimokanyi ba ne ba tla otlhaiwa “ka bopeloethata jo bogolo thata.” (Math. 24:51) Ke boammaaruri gore batlhanka ba ga Jehofa ba ka se batle go bontsha lorato lwa boitimokanyi. Le fa go ntse jalo, re tshwanetse go ipotsa jaana: ‘A ka metlha lorato lwa me ke lwa mmatota, lo lo sa bontsheng bopelotshetlha kgotsa boitimokanyi?’ A re sekasekeng ditsela di le robongwe tse di ka re thusang go bontsha lorato “lo lo se nang boitimokanyo.”

 9. Lorato lwa mmatota lo tla re tlhotlheletsa go dira eng?

⁹ Itumelele go direla ba bangwe ntle le go bonwa ke batho. Re tshwanetse go iketleeletsa go direla bakaulengwe ba rona dilo tse di molemo “mo sephiring” fa go kgonega. (Bala Mathaio 6:1-4.) Ananiase le Safira ba ne ba palelwa ke go dira jalo. Ga ba a ka ba kgotsofalela go ntsha moneelo mo sephiring, go na le moo, ba ne ba ikgogomosa ka go re ba ntshitse madi a mantsi mme ba ne ba otlhaelwa boitimokanyi jwa bone. (Dit. 5:1-10) Go farologana le seo, lorato lwa mmatota lo re tlhotlheletsa gore re itumelele go direla bakaulengwe ba rona ntle le go batla go bonwa ke batho. Ka sekai, bakaulengwe ba ba thusang Setlhopha se se Laolang go baakanya dithuto tsa boammaaruri, ba dira jalo mo sephiring mme ga ba batle gore ba tseelwe kwa godimo e bile ga ba senole tshedimosetso e ba berekileng ka yone.

10. Re ka tlhoma sekao jang mo go bontsheng ba bangwe tlotlo?

¹⁰ Tlhoma sekao mo go bontsheng ba bangwe tlotlo. (Bala Baroma 12:10.) Jesu o ne a re tlhomela sekao sa go tlotla ba bangwe ka go dira ditiro tsa maemo a a kwa tlase. (Joh. 13:3-5, 12-15) Fa le rona re batla go bontsha ba bangwe tlotlo ka tsela eo, re tlhoka go leka ka natla go nna boikokobetso. Pele baaposetoloi ba amogela moya o o boitshepo, ba ne ba sa tlhaloganye mabaka a go bo Jesu a dira ditiro tseo. (Joh. 13:7) Re ka bontsha ba bangwe gore re a ba tlotla ka go sa itseele kwa godimo ka ntlha ya tsela e re rutegileng ka yone, dithoto tsa rona kgotsa ditshiamelo tsa rona mo tirelong ya ga Jehofa. (Bar. 12:3) Gape, go na le gore re fufegele ba ba tlotlomadiwang, re tshwanetse go itumela le bone le fa re akanya gore le rona re tshwanelwa ke go newa tlotlo e e tshwanang ka gonne re nnile le seabe mo go se se dirilweng.

11. Ke eng fa re tshwanetse go akgola ba bangwe go tswa pelong?

¹¹ Akgola bakaulengwe go tswa pelong. Re tshwanetse go batla ditshono tsa go akgola ba bangwe ka gonne mafoko ao a “molemo go aga.” (Baef. 4:29) Le fa go ntse jalo, re tshwanetse go dira jalo go tswa pelong. Fa re sa dire jalo, re tla bo re tsietsa motho yo re mo akgolang kgotsa re tlhokomologa maikarabelo a rona a go mo naya kgakololo e a e tlhokang. (Dia. 29:5) Go akgola mongwe mme re bo re bua maswe ka ene fa re na le batho ba bangwe, ke boitimokanyi. Moaposetoloi Paulo o ne a tila go dira jalo, mme a tlhoma sekao sa go bontsha lorato lwa mmatota ka go akgola ba bangwe go tswa pelong. Ka sekai, o ne a akgola Bakeresete ba kwa Korintha ka gonne ba ne ba itshwere sentle. (1 Bakor. 11:2) Le fa go ntse jalo, fa ba ne ba dira diphoso, o ne a ba naya mabaka a a utlwalang e bile a dira jalo ka bonolo.—1 Bakor. 11:20-22.

12. Re ka bontsha jang lorato lwa mmatota fa re amogela baeng?

¹² Amogela baeng. Jehofa o re laela gore re bontshe bakaulengwe le bokgaitsadi ba rona bopelotshweu. (Bala 1 Johane 3:17.) Le fa go ntse jalo, re tshwanetse go dira jalo ka maikaelelo a a siameng re se pelotshetlha. Re ka ipotsa jaana: ‘A ke amogela fela ditsala tsa me, batho ba maemo kgotsa batho ba ba ka kgonang go nthusa ka tsela nngwe? Kgotsa a ke leka go batla ditsela tsa go bontsha Bakeresetemmogo le nna bopelotshweu le fa gone ke sa ba itse kgotsa ba ka se nthuse ka tsela epe?’ (Luke 14:12-14) Gotweng fa Mokeresetemmogo le wena a tlhoka thuso ka gonne a sa rulaganya dilo sentle kgotsa a sa go leboge fa o sena go mo thusa? Mo maemong a a ntseng jalo, re tshwanetse go dirisa kgakololo e e reng: “Bontshanang moya wa go tshola baeng lo sa ngongorege.” (1 Pet. 4:9) Fa o dirisa kgakololo eno, o tla itumelela go bo o ile wa aba ka maikaelelo a a siameng.—Dit. 20:35.

13. (a) Ke leng go ka nnang thata go thusa ba ba bokoa? (b) Ke dilo dife tse re ka di dirang go thusa ba ba bokoa?

¹³ Thusa ba ba bokoa. Taelo eno ya Baebele e ka senola gore a lorato lwa rona ke lwa mmatota: “Tshegetsang ba ba bokoa, nnang pelotelele mo go botlhe.” (1 Bathes. 5:14) Le fa gone batho ba le bantsi ba ba bokoa ba feleletsa ba nonofa mo tumelong, ba bangwe ba tlhoka gore re tswelele re le pelotelele le bone. Seno se ka akaretsa go ba nonotsha ka Dikwalo, go dira le bone mo bodireding kgotsa go ipha nako ya go ba reetsa. Mo godimo ga moo, go na le go akanya gore mokaulengwe kgotsa kgaitsadi mongwe o “nonofile” kgotsa o “bokoa” re tshwanetse go itse gore go na le dilo tse re di kgonang le gore rotlhe re na le makoa. Tota le moaposetoloi Paulo o ne a tlhalosa gore o na le makoa. (2 Bakor. 12:9, 10) Ka jalo, rotlhe re ka solegelwa molemo ke go engwa nokeng ke Bakeresetemmogo le rona.

14. Re tshwanetse go iketleeletsa go dira eng gore re agisane le Bakeresetemmogo le rona?

¹⁴ Agisana le ba bangwe. Re dira sotlhe se re ka se kgonang go agisana le Bakeresetemmogo le rona, tota le fa re akanya gore ga re a tlhaloganngwa kgotsa ga re a tshwarwa sentle. (Bala Baroma 12:17, 18.) Go kopa maitshwarelo go ka dira gore motho yo re mo utlwisitseng botlhoko a ikutlwe botoka mme re tshwanetse go dira jalo go tswa pelong. Ka sekai, go na le go mo raya o re: “Intshwarele go bo o ikutlwa jalo,” o ka amogela gore o phoso ka go re: “Intshwarele go bo ke go utlwisitse botlhoko ka se ke se buileng.” Kagiso e botlhokwa mo lenyalong. Banyalani ga ba a tshwanela go itira e kete ba a ratana fa ba le mo bathong, mme fa ba le bosi ba bo ba utlwisana botlhoko ka go sa buisane, go raana mafoko a a botlhoko kgotsa go lwa.

15. Re ka bontsha jang gore re itshwarela ba bangwe go tswa pelong?

¹⁵ Itshwarele o gololesegile. Re dira jalo ka go itshwarela mongwe yo o re diretseng phoso le ka go se mo tshware ka pelo. Fa re ‘itshokelana ka lorato, re leka ka natla ka tlhoafalo go boloka bongwefela jwa moya mo sebofong se se kopanyang sa kagiso,’ re ka kgona go itshwarela batho ba ba sa lemogang gore ba re diretse phoso. (Baef. 4:2, 3) Fa re batla go itshwarela ba bangwe go tswa pelong, re tshwanetse go laola tsela e re akanyang ka yone gore re se “nnele go gopola kutlwisobotlhoko.” (1 Bakor. 13:4, 5) Fa re ngala kgotsa re tshwara ba bangwe ka pelo, kamano ya rona le Bakeresetemmogo le rona le kamano ya rona le Jehofa e tla senyega. (Math. 6:14, 15) Gape, re ka bontsha gore ruri re itshwarela ba ba re diretseng diphoso ka go ba rapelela.—Luke 6:27, 28.

16. Re tshwanetse go leba jang ditshiamelo tse re di newang mo tirelong ya ga Jehofa?

¹⁶ Baya dilo tse ba bangwe ba tshwenyegileng ka tsone kwa pele ga tsa gago. Fa re newa ditshiamelo mo tirelong ya ga Jehofa, re tshwanetse go di leba e le tshono ya go bontsha lorato lwa mmatota ka go ‘batla, e seng molemo wa rona, fa e se wa batho ba bangwe.’ (1 Bakor. 10:24) Ka sekai, kwa dikopanong tse dinnye le tse dikgolo, batlhokomedi ba goroga kwa lefelong la kopano pele ga batho botlhe. Go na le gore ba dirise seno e le tshono ya iponela manno a a kwa pele le go batlela ba malapa a bone manno a a siameng, bontsi jwa bakaulengwe bano ba tlhopha go nna kwa mannong a a kwa morago a a mo karolong e ba e abetsweng. Fa ba dira seno, ba bontsha lorato lo lo se nang bopelotshetlha. O ka etsa jang sekao sa bone se se molemo?

17. Fa motho a dirile boleo jo bo masisi, lorato lwa mmatota lo tla mo tlhotlheletsa go dira eng?

¹⁷ Ipolele maleo. Bakeresete bangwe ba ba ileng ba dira maleo a a masisi ba leka go a fitlha gore ba se ka ba tlhabiwa ke ditlhong kgotsa ba swabisa ba bangwe. (Dia. 28:13) Le fa go ntse jalo, go dira jalo ga go bontshe lorato ka gonne go utlwisa moleofi botlhoko le ba bangwe. Go ka kgoreletsa moya o o boitshepo wa Modimo gore o se ka wa dira ka kgololesego mme ga tsenya kagiso ya phuthego yotlhe mo kotsing. (Baef. 4:30) Lorato lwa mmatota lo tlhotlheletsa Bakeresete ba ba dirileng maleo a a masisi gore ba bolelele bagolwane gore ba tle ba ba thuse.—Jak. 5:14, 15.

18. Lorato lwa mmatota lo botlhokwa go le kana kang?

¹⁸ Lorato ke nonofo e e di gaisang tsotlhe. (1 Bakor. 13:13) Lo supa gore re balatedi ba ga Jesu le gore re baetsi ba Motswedi wa lorato e bong Jehofa. (Baef. 5:1, 2) Paulo o ne a re: “Fa ke . . . se na lorato, ga ke sepe.” (1 Bakor. 13:2) A re tsweleleng re bontsha lorato “e seng ka lefoko” fela mme le “ka tiro le boammaaruri.”