Selalelo sa Morena Se na Le Bokao jo Bogolo mo go Wena

A SELALELO SA MORENA se na le bokao jo bo botlhokwa le jo bo nnelang ruri mo go wena? Go bona karabo, a re simolole pele ka go sekaseka gore Jesu Keresete ene o ne a tsaya tiragalo eno e e kgethegileng e na le bokao bofe.

Mo maitseboeng a Nisane 14, 33 C.E., Jesu o ne a na le baaposetoloi ba gagwe ba ba 12 mo phaposing nngwe e e kwa godimo kwa Jerusalema go keteka mokete wa ngwaga le ngwaga wa Tlolaganyo. Fa ba sena go ja dijo tsa Tlolaganyo, Judase yo o sa ikanyegeng o ne a tswa mo phaposing eo go ya go oka Jesu. (Johane 13:21, 26-30) Jesu o ne a tlhoma mokete wa “dijo tsa maitseboa tsa Morena” le baaposetoloi ba ba setseng ba le 11. (1 Bakorintha 11:20) Mokete ono gape o bidiwa Segopotso ka gonne Jesu o ne a laela balatedi ba gagwe jaana: “Dirang seno go nna segopotso sa me.” Eno ke yone fela tiragalo e Bakeresete ba laelwang go keteka segopotso sa yone.—1 Bakorintha 11:24, The Jerusalem Bible.

Go ya ka dikishinare ya Webster’s, segopotso ke sengwe se se thusang batho go “se lebale” kana “se se dirang gore ba nne ba gakologetswe sengwe.” Mo mafelong a le mantsi batho ba aga difikantswe kana ba tlhopha letsatsi le le rileng go ikgopotsa mongwe kana sengwe se se botlhokwa ka lone. Jesu le ene o ne a tlhoma sejo se e neng e tla nna segopotso—sejo se se neng se tla thusa barutwa ba gagwe gore ba se ka ba lebala ditiragalo tse di botlhokwa tsa letsatsi leo le legolo. Sejo seo sa segopotso se ne se tla gakolola dikokomana tsa mo isagweng tsa batho ba ba neng ba tla se keteka bokao jo bogolo jwa se Jesu a se dirileng mo bosigong joo, segolobogolo bokao jwa dilo tse a di dirisitseng mo moketeng oo. Jesu o ne a dirisa dilo dife, mme dilo tseo di kaya eng? A re sekasekeng pego ya Baebele ya se se diragetseng mo bosigong joo jwa 33 C.E.

Bokao Jwa Semoya

“A tsaya senkgwe, a leboga, a se ngathoganya, mme a se ba naya, a re: ‘Seno se kaya mmele wa me o ruri o tla ntshiwang mo boemong jwa lona. Nnang lo dire seno e le go nkgopola.’”—Luke 22:19.

Fa Jesu a ne a tsaya senkgwe a bo a re, “seno se kaya mmele wa me” o ne a bolela gore senkgwe se se sa bedisiwang se ne se tshwantshetsa kana se emela mmele wa gagwe wa nama o o se nang boleo o a neng a o ntsha “mo boemong jwa botshelo jwa lefatshe.” (Johane 6:51) Le fa gone dithanolo tse dingwe tsa Baebele di ranola mafoko ano di re “seno ke [es·tin ka Segerika] mmele wa me,” Greek-English Lexicon of the New Testament ya ga Thayer e bolela gore gantsi lediri leno le kaya “go emela, go tshwantshetsa, go supa.” Le naya kgopolo ya go emela sengwe kana go tshwantshetsa sengwe.—Mathaio 26:26.

Go ne go ntse jalo le ka beine. Jesu o ile a re: “Senwelo seno se kaya kgolagano e ntšha ka ntlha ya madi a me, a a tla tshololelwang lona.”—Luke 22:20.

Mo pegong ya ga Mathaio, Jesu o ile a bua jaana ka senwelo: “Seno se kaya ‘madi a kgolagano’ a me, a a tla tshololelwang ba le bantsi gore ba itshwarelwe maleo.” (Mathaio 26:28) Jesu o ne a dirisa beine e e neng e le mo teng ga senwelo go emela kana go tshwantshetsa madi a gagwe. Madi a gagwe a a tsholotsweng a ne a tla nna motheo wa “kgolagano e ntšha” e e neng ya dirwa le barutwa ba ba tloditsweng ka moya, ba ba tla busang e le dikgosi le baperesiti le ene kwa legodimong.—Jeremia 31:31-33; Johane 14:2, 3; 2 Bakorintha 5:5; Tshenolo 1:5, 6; 5:9, 10; 20:4, 6.

Beine e e neng e le mo senwelong gape e re gopotsa gore batho ba ka ‘itshwarelwa maleo’ ka madi a a tsholotsweng a ga Jesu, e leng selo se se bulelang batho ba ba jang senkgwe le go nwa beine tshono ya go bilediwa go tshela kwa legodimong e le baruaboswa le Keresete. Ka gone, batho ba ba bileditsweng go tshela kwa legodimong—ba palo ya bone e lekanyeditsweng—ke bone fela ba ba jang senkgwe le go nwa beine ka nako ya Segopotso.—Luke 12:32; Baefeso 1:13, 14; Bahebera 9:22; 1 Petere 1:3, 4.

Le fa go ntse jalo, go tweng ka balatedi botlhe ba ga Jesu ba ba seng mo kgolaganong e ntšha? Bano ke “dinku tse dingwe” tsa Morena, ba tsholofelo ya bone e leng go tshelela ruri mo lefatsheng la paradaise, e seng go ya go busa le Keresete kwa legodimong. (Johane 10:16; Luke 23:43; Tshenolo 21:3, 4) E re ka e le “boidiidi jo bogolo” jwa Bakeresete ba ba ikanyegang ba ba ‘direlang Modimo tirelo e e boitshepo motshegare le bosigo,’ ba itumelela go nna babogedi ba ba bontshang kanaanelo ka nako ya Selalelo sa Morena. Tota re ka re ba bolela jaana ka mafoko a bone le ka ditiro: “Poloko re e neilwe ke Modimo wa rona, yo o ntseng mo setulong sa bogosi, le ke Kwana.”—Tshenolo 7:9, 10, 14, 15.

Se Tshwanetse go Ketekwa ga Kae?

“Nnang lo dire seno e le go nkgopola.”—Luke 22:19.

Segopotso se tshwanetse go ketekwa ga kae e le gore loso lwa ga Keresete lo se ka lwa lebalwa? Jesu ga a ka a tlhalosa ka tlhamalalo gore se ketekiwe ga kae. Le fa go ntse jalo, e re ka Jesu a ile a tlhoma Sejo sa Morena sa Maitseboa ka Nisane 14, ka letsatsi la Tlolaganyo, le Baiseraele ba neng ba le keteka gangwe ka ngwaga, go a bonala gore o ne a batla gore Segopotso se ketekiwe ka yone tsela eo. Le fa Baiseraele ba ne ba keteka go gololwa ga bone mo bokgobeng kwa Egepeto, Bakeresete bone ba keteka go gololwa ga bone mo bokgobeng jwa boleo le loso gangwe ka ngwaga.—Ekesodo 12:11, 17; Baroma 5:20, 21.

Batho ba tlwaetse go keteka segopotso sa tiragalo nngwe ya botlhokwa gangwe ka ngwaga. Ka sekai, banyalani ba na le go keteka segopotso sa lenyalo la bone kana naga e na le go ikgopotsa tiragalo nngwe ya botlhokwa mo hisitoring ya yone. Gantsi mokete wa go ikgopotsa tiragalo eo o dirwa gangwe ka ngwaga ka letsatsi le e diregileng ka lone. Morago ga loso lwa ga Keresete, go ne ga feta makgolokgolo a dingwaga batho ba le bantsi ba ba ipitsang Bakeresete ba bidiwa gore ke Ba-Quartodeciman, ke go re, “Batho ba Letsatsi la bo14,” ka gonne ba ne ba keteka segopotso sa loso lwa ga Jesu gangwe ka ngwaga, ka Nisane 14.

Mokete O o Sa Raraanang Mme o le Botlhokwa

Moaposetoloi Paulo o ne a tlhalosa gore go keteka Selalelo sa Morena go ne go tla thusa barutwa ba ga Jesu go ‘nna ba bolela loso lwa Morena.’ (1 Bakorintha 11:26) Ka gone, mokete ono wa segopotso o ne o tla gatelela seabe se se botlhokwa se Jesu a ileng a nna le sone mo go diragatseng maikaelelo a Modimo ka loso lwa gagwe.

Jesu Keresete o ile a tlotlomatsa Jehofa Modimo ka go ikanyega ga gagwe go fitlha a swa, a supa gore Jehofa ke Mmopi yo o lorato le yo o botlhale le gore ke Molaodimogolo yo o tshiamo. Jesu o ne a se ka a tshwana le Adame, ene o ile a supa fa Satane a le maaka, a bontsha gore motho a ka kgona go ikanyega mo Modimong tota le fa a lebane le diteko tse di boitshegang.—Jobe 2:4, 5.

Gape Selalelo sa Morena se re thusa go nna re anaanela lorato lwa ga Jesu lwa go intsha setlhabelo. Jesu o ile a tswelela a ikobela Rraagwe ka botlalo le fa a ne a lebane le diteko tse di masisi. Ka gone, o ne a kgona go ntsha botshelo jwa gagwe jwa motho yo o itekanetseng go duelela ditshenyegelo tse dikgolo tse di bakilweng ke boleo jwa ga Adame. Jesu ka boene o ne a tlhalosa gore, o tletse “go ntsha moya wa gagwe e le thekololo gore a bone ba le bantsi.” (Mathaio 20:28) Ka jalo, botlhe ba ba dumelang mo go Jesu ba ka itshwarelwa maleo a bone le go bona botshelo jo bo sa khutleng go dumalana le se Jehofa a neng a ikaeletse sone ka batho kwa tshimologong.—Baroma 5:6, 8, 12, 18, 19; 6:23; 1 Timotheo 2:5, 6.a

Seno sotlhe gape se gatelela bomolemo le bopelotlhomogi jo bo sa re tshwanelang jwa ga Jehofa jwa go direla batho tsela ya go bona poloko. Baebele ya re: “Lorato lwa Modimo lo ne lwa bonadiwa ka seno mo go rona, ka gonne Modimo o ne a romela Morwawe yo o tsetsweng a le esi mo lefatsheng gore re bone botshelo ka ene. Lorato lo ka tsela eno, e seng gore re ratile Modimo, mme gore o re ratile mme a romela Morwawe go nna setlhabelo sa thuanyo sa maleo a rona.”—1 Johane 4:9, 10.

Ee, ruri Segopotso ke mokete o o molemo tota! Ke mokete o o sa raraanang o o ka ketekwang mo lefatsheng lotlhe le mo maemong otlhe, mme gone o na le bokao jo bo botlhokwa thata jaana mo o ka nnang segopotso mo bathong ka lobaka lo loleele.

Bokao Jwa Sone mo go Wena

Loso lwa setlhabelo lwa Morena wa rona Jesu Keresete lo ne lwa mo tlhoka gore ene le Rraagwe, e bong Jehofa ba latlhegelwe thata. E re ka Jesu e ne e le motho yo o itekanetseng, ga a ka a swa loso lo a lo gotsitseng mo batsading jaaka rona. (Baroma 5:12; Bahebera 7:26) O ne a ka tswelela a tshela go ya go ile. Go ne go se ope yo o neng a ka mo amoga botshelo kwantle ga gore ene a letle seo. O ne a re: “Ga go na ope yo o tsereng [botshelo jwa me] mo go nna, mme ke [bo] neela ka bogame.”—Johane 10:18.

Le fa go ntse jalo, Jesu o ne a ntsha botshelo jwa gagwe jwa motho yo o itekanetseng ka go rata go nna setlhabelo, gore “ka loso lwa gagwe a tle a nyeletse ene yo o nang le dithata tsa go baka loso, ke gore, Diabolo; le gore a tle a golole botlhe ba, ka ntlha ya go boifa loso, ba neng ba le mo botlhankeng botshelo jotlhe jwa bone.” (Bahebera 2:14, 15) Lorato lwa ga Keresete lwa go intsha setlhabelo lo bonala gape mo losong lo a neng a ineela go swa ka lone. O ne a itse sentle tsela e a neng a tlile go boga le go swa ka yone.—Mathaio 17:22; 20:17-19.

Gape Segopotso se re gakolola tsela e e di gaisang tsotlhe e Rraarona wa selegodimo Jehofa a re bontshitseng lorato ka yone. Go tshwanetse ga bo go ne go ngomola pelo tota mo go Jehofa, yo a leng ‘pelonomi tota mo go bontsheng lorato e bile a le kutlwelobotlhoko,’ go utlwa le go bona “dilelo tse dikgolo le dikeledi” tsa ga Jesu kwa tshimong ya Gethesemane, a setlakwa ka tshotlo, a bapolwa ka tsela e e setlhogo le go swa loso lo lo botlhoko ka iketlo. (Jakobe 5:11; Bahebera 5:7; Johane 3:16; 1 Johane 4:7, 8) Le mororo go setse go fetile makgolokgolo a dingwaga, le gompieno batho ba le bantsi ba sa ntse ba utlwisiwa botlhoko thata ke go akanya ka loso lwa gagwe.

A ko o akanye fela gore Jehofa Modimo le Jesu Keresete ba dueletse boleo jwa rona ka tlhwatlhwa e kgolo go le kana kang! (Baroma 3:23) Letsatsi le letsatsi re lebana le matswela a a botlhoko a boleo le bosaitekanelang jwa rona. Le fa go ntse jalo, re ka kgona go kopa Modimo gore a re itshwarele maleo fa re dumela mo setlhabelong sa thekololo sa ga Jesu. (1 Johane 2:1, 2) Seno se dira gore re kgone go buisana le Modimo ka kgololesego le gore re nne le segakolodi se se phepa. (Bahebera 4:14-16; 9:13, 14) Mo godimo ga moo, re ka nna le tsholofelo ya go tshela ka bo sa khutleng mo lefatsheng la paradaise. (Johane 17:3; Tshenolo 21:3, 4) Re kgona go bona masego ano otlhe le a mangwe a mantsi ka ntlha ya tiro eno e kgolo go gaisa tsotlhe ya go intsha setlhabelo ga ga Jesu.

Go Bontsha go Anaanela Selalelo sa Morena

Ga go pelaelo gore Selalelo sa Morena ke tsela e e molemo tota e re bontshitsweng “bopelonomi jo bo sa re tshwanelang jo bogolo thata jwa Modimo” ka yone. Mme thulaganyo ya ga Jehofa Modimo ya setlhabelo sa thekololo—e e nnileng gone ka ntlha ya lorato lwa ga Jesu lwa go intsha setlhabelo—ruri ke “mpho ya gagwe ya mahala e e ka se kang ya tlhalosiwa.” (2 Bakorintha 9:14, 15) A ditsela tseno tse Modimo a re bontshitseng bomolemo jwa gagwe ka tsone ka Jesu Keresete ga di go tlhotlheletse gore o nne le tebogo le kanaanelo e kgolo?

Re solofela gore di a go tlhotlheletsa. Ka gone, re go laletsa ka lorato gore o kopanele le Basupi ba ga Jehofa go keteka Segopotso sa loso lwa ga Jesu. Monongwaga Segopotso se tla ketekwa ka Laboraro, ka April 16, fa letsatsi le sena go phirima. Basupi ba ga Jehofa ba lefelo la lona ba tla itumelela go go itsise gore tiragalo eno e e botlhokwatlhokwa e tla tshwarwa ka nako mang le gore e tla tshwarelwa kae.

[Ntlha e e kwa tlase]

[Lebokoso/Ditshwantsho mo go tsebe 6]

A E TSHWANETSE GO NNA “SENO KE MMELE WA ME” KGOTSA “SENO SE KAYA MMELE WA ME”?

Ga go ope yo o neng a tsaya gore Jesu ke kgoro kana mofine wa mmatota fa a ne a re, “ke nna kgoro” le fa a ne a re, “ke nna mofine wa boammaaruri.” (Johane 10:7; 15:1) Ka tsela e e tshwanang, fa The New Jerusalem Bible e nopola Jesu fa a re: “Senwelo seno ke kgolagano e ntšha,” seo ga se dire gore re akanye gore senwelo ka bosone e ne e le kgolagano e ntšha ka tsela ya mmatota. Ga go pelaelo gore le fa a ne a re senkgwe “ke” mmele wa gagwe, o ne a bolela gore senkgwe se ne se emela kana se tshwantshetsa mmele wa gagwe. Ke gone ka moo thanolo ya ga Charles B. Williams e reng: “Seno se emela mmele wa me.”—Luke 22:19, 20.

[Setshwantsho mo go tsebe 5]

Senkgwe se se sa bedisiwang le beine ke dilo tse di tshwanelang sentle go emela mmele wa ga Jesu o o se nang boleo le madi a gagwe a a tsholotsweng

[Setshwantsho mo go tsebe 7]

Segopotso se re gopotsa lorato lo logolo lo Jehofa Modimo le Jesu Keresete ba re lo bontshitseng