Baebele ya Reng

O ka Kgotsofatsa Keletso ya Gago ya Semoya

BATHO ba na le keletso ya dilo tsa semoya e e botlhokwa fela jaaka ya dijo. Le fa go ntse jalo, fa go tla mo kgannyeng ya dikotla, re na le dilo tse dintsi tse re ka di tlhophang tse di siameng ka gonne go na le dijo tse dintsi tse di farologaneng tse di re thusang go tshela. A go ntse jalo le ka dilo tsa semoya? Go na le ditlwaelo tse dintsi tsa setso le tsa bodumedi tse go tweng di re kgotsofatsa semoyeng.

Ba le bantsi ba akanya gore fa fela o dira sengwe sa semoya, ga go kgathalesege gore o tlhopha go dumela eng kgotsa o mo kobamelong e e ntseng jang. Wena o akanya eng? A go a kgathalesega gore o kgotsofatsa jang keletso ya gago ya semoya? Baebele ya reng?

Se Bomoya Jwa Boammaaruri bo se Akaretsang

Mo go Genesise 1:27, Baebele e senola lebaka la go bo re batla go kgotsofatsa keletso ya rona ya semoya jaana: “Modimo a bopa motho mo setshwanong sa gagwe, a mmopa mo setshwanong sa Modimo; a ba bopa monna le mosadi.” E re ka Jehofa Modimo e le moya, seno ga se kaye go tshwana ga mmele ka tsela epe, mme go buiwa ka go tshwana ga dinonofo. Jaaka Mmopi wa gagwe, monna wa ntlha e bong Adame, o ne a kgona go anaanela le go bontsha dinonofo tse di jaaka lorato lo lo se nang bopelotshetlha, bopelonomi, kutlwelobotlhoko, tshiamiso le boikgapo. Mme gape o ne a filwe segakolodi, e leng boikutlo jo bo siameng ka boitsholo, se se neng se tla mo kaela go dirisa kgololesego ya gagwe ya go itlhophela go dumelana le melao ya Modimo. Dinonofo tseno di dirile gore a farologane le diphologolo mme tsa dira gore e nne ene fela a kgonang go diragatsa go rata ga Mmopi wa gagwe.—Genesise 1:28; Baroma 2:14.

Baebele e tlhalosa sengwe se se botlhokwa se se ka re thusang mo dilong tsa semoya. 1 Bakorintha 2:12-15, e tlhalosa motho wa semoya e le yo o amogelang moya o o tswang kwa Modimong. Moya ono ke maatla a a dirang a Modimo, mme go dira ga one go botlhokwa gore motho a itse dilo tsa semoya. Ka tsela eo, motho o kgona go sekaseka le go tlhaloganya dilo go ya ka tsela ya semoya. Go farologana le seo, motho yo o se nang moya wa Modimo o bidiwa motho wa senama, e leng motho yo o tsayang dilo tsa semoya e le boeleele. Ka ntlha ya seo, ditshwetso tsa gagwe di ikaegile fela ka botlhale jo bo tswang mo bathong.

Ka jalo, le fa gone re kgona go nna batho ba ba ratang dilo tsa semoya ka go bo re bopilwe mo setshwanong sa Modimo, re ka se ka ra nna batho ba semoya ba mmatota ka go ikitse, ka ntlha ya botlhale jwa batho kgotsa ka ntlha ya dilo tse re di fitlheletseng. Re tlhoka go tlhotlhelediwa ke moya wa Modimo o o boitshepo. Tota e bile, batho ba ba ganang go tlhotlhelediwa ke moya wa Modimo, ba ba tlhophang bogolo go latela dikeletso tsa bone le dilo tse e seng tsa bomodimo, ba tlhalosiwa e le batho ba e seng ba semoya. Ba tlhotlhelediwa ke dikeletso le go rata dilo tsa senama.—1 Bakorintha 2:14; Jude 18, 19.

Go Kgotsofatsa Keletso Eo

Go nna le kgotsofalo ya mmatota ya semoya go simologa ka go dumela gore Jehofa ke Mmopi le go dumela gore re teng ka ntlha ya gagwe. (Tshenolo 4:11) Ka gone, re lemoga gore botshelo jwa rona bo na le bokao, fela go ya kafa re dirang go rata ga gagwe ka teng. (Pesalema 115:1) Go dira go rata ga Modimo go dira gore botshelo jwa rona bo nne le boikaelelo, e leng karolo ya keletso ya rona ya dilo tsa semoya e e leng botlhokwa fela jaaka dijo tsa mmatota tse re di tlhokang. Ke ka lebaka leo Jesu, yo o neng a itsege e le monna wa semoya, a neng a ka bolela jaana: “Dijo tsa me ke gore ke dire thato ya yo o nthomileng.” (Johane 4:34) Go dira go rata ga Modimo go ne go mo nonotsha, go dira gore a lapologelwe le gore a kgotsofale.

E re ka re bopilwe mo setshwanong sa Modimo, go nna le kgotsofalo ya mmatota ya semoya le gone go ikaegile ka gore re dire gore botho jwa rona bo tshwane le jwa gagwe. (Bakolosa 3:10) Ka go dira jalo, re tila boitsholo jo bo re tlontlololang kgotsa jo bo senyang kamano ya rona le ba bangwe. (Baefeso 4:24-32) Go tlhopha go tshela ka melao ya ga Jehofa go tokafatsa matshelo a rona e bile go dira gore re nne le kagiso ya mmatota ya mogopolo, ka gonne re tla bo re sa tshwenngwe ke segakolodi se se molato.—Baroma 2:15.

Jesu o ne a senola boammaaruri jo bongwe jwa konokono malebana le go kgotsofatsa keletso ya rona ya semoya fa a ne a re: “Motho o tshwanetse go tshela, e seng ka senkgwe se le sosi, fa e se ka lefoko lengwe le lengwe le le tswang ka molomo wa ga Jehofa.” (Mathaio 4:4) Re tlhoka go nna re sekaseka bomoya jwa rona. Ka go dirisa Baebele, Jehofa o re naya dikarabo tsa dipotso tse di malebana le botshelo—dipotso tse batho botlhe ba di botsang.—2 Timotheo 3:16, 17.

Motswedi wa Boitumelo Jwa Mmatota

Motho a ka nna a thiba tlala ka go ja dijo tse di se nang dikotla. Ka tsela e e tshwanang, re ka “iphepa” ka dilo kgotsa difilosofi tse di bonalang di kgotsofatsa keletso ya rona ya semoya. Mme fela jaaka go sa je sentle go baka phepelotlase, bolwetse kgotsa le e leng se se maswe le go feta, go palelwa ke go kgotsofatsa keletso ya rona ya semoya sentle, kgabagare go tla re tsenya mo kotsing.

Le fa go ntse jalo, fa e le gore re simolola go nna le kamano le Jehofa Modimo, re batla go dira go rata ga gagwe le go latela kaelo ya gagwe, re ka bona boammaaruri jwa mafoko ano a Baebele: “Go itumela ba ba tshwenyegang ka se ba se tlhokang semoyeng.”—Mathaio 5:3.

A O KILE WA IPOTSA GORE. . .

◼ Ke eng se se dirang gore o nne le keletso ya dilo tsa semoya?—Genesise 1:27.

◼ A re ka kgona go kgotsofatsa keletso ya rona ya semoya ka borona?—1 Bakorintha 2:12-15.

◼ Ke eng se re tshwanetseng go se dira go kgotsofatsa keletso ya rona ya semoya?—Mathaio 4:4; Johane 4:34; Bakolosa 3:10.

[Mafoko a a mo go tsebe 13]

Go palelwa ke go kgotsofatsa keletso ya rona ya semoya sentle, kgabagare go tla re tsenya mo kotsing