O ka Dira Kagiso Jang le Batho ba Bangwe?

BAEBELE e bolela jaana ka batho: “Botlhe ba leofile e bile ba tlhaela kgalalelo ya Modimo.” (Baroma 3:23) E re ka batho ba ba fetang dibilione tse supa ba ba mo lefatsheng ba sa itekanela, go tla nna le dikgotlhang gangwe le gape. Re ka dira kagiso jang le ba bangwe mo maemong a a ntseng jalo?

Baebele e re naya kgakololo e e molemo. E tlhalosa Mmopi, yo leina la gagwe e leng Jehofa, e le “Modimo wa kagiso.” (Bahebera 13:20; Pesalema 83:18) Modimo o batla gore bana ba gagwe ba ba mo lefatsheng ba dirisane ka kagiso. Mme o tlhoma sekao mo kgannyeng eno. Fa banyalani ba ntlha ba ne ba leofela Modimo, ka go dira jalo ba senya kagiso e ba neng ba na le yone le ene, o ne a tsaya kgato ka yone nako eo gore a letlane le batho ba a ba bopileng. (2 Bakorintha 5:19) Akanya ka dilo tse tharo tse o ka di dirang gore o dire kagiso le ba bangwe.

Itshwarele ba Bangwe o Gololesegile

Baebele ya reng? “Tswelelang lo itshokelana e bile lo itshwarelana lo gololesegile fa mongwe a na le lebaka la go ngongorega ka yo mongwe. Le eleng jaaka Jehofa a ne a lo itshwarela a gololesegile, jalo le lona dirang jalo.”—Bakolosa 3:13.

Ke eng se se ka dirang gore go nne thata? Gongwe o na le “lebaka” le le utlwalang “la go ngongorega” ka motho yo o go kgopisitseng mme o bona go siame go kgaotsa go dirisana le ene. Gape o ka nna wa akanya gore motho yo o go kgopisitseng ke ene a tshwanetseng go kopa maitshwarelo pele. Mme fa motho yoo a sa lemoge phoso ya gagwe kgotsa a dumela gore ke wena o phoso, kgang ya lona e ka nna fela e sa rarabololwa.

O ka dira eng? Latela kgakololo ya Baebele ka go itshwarela motho yoo o gololesegile, segolobogolo fa e se bothata jo bo masisi. Gakologelwa, fa Modimo a ne a ka nna a gopotse diphoso tsa rona, re ne re ka se eme fa pele ga gagwe. (Pesalema 130:3) Baebele ya re, “Jehofa o kutlwelobotlhoko e bile o pelontle, o bonya go galefa e bile o na le bopelonomi jo bogolo jwa lorato. Gonne o itse popego ya rona sentle, a gakologelwa gore re lorole.”—Pesalema 103:8, 14.

Gape ela tlhoko seane seno sa Baebele: “Temogo ya motho ruri e fokotsa bogale jwa gagwe, mme ke bontle mo go ene go tlhokomologa tlolo.” (Diane 19:11) Temogo e re thusa go bonela dilo kwa teng, go lemoga gore ke ka ntlha yang fa batho ba bua kgotsa ba dira dilo ka tsela e ba di dirang ka yone. Ka jalo ipotse jaana, ‘A motho yo o ntiretseng phoso o ne a lapile, a lwala kgotsa a le ka fa tlase ga kgatelelo?’ Go lemoga maitlhomo a mmatota a batho ba bangwe, maikutlo a bone le maemo a ba leng mo go one go ka nna ga kokobetsa bogale jwa gago mme ga go thusa gore o tlodise diphoso tsa bone matlho.

Bua ka Gone

Baebele ya reng? “Fa morwarrago a leofa, tsamaya o ye go baya molato wa gagwe mo pepeneneng fa gare ga gago le ene lo le losi. Fa a go reetsa, o gapile morwarrago.”—Mathaio 18:15.

Ke eng se se ka dirang gore go nne thata? Maikutlo a a sa siamang a a jaaka poifo, kgalefo le go tlhabiwa ke ditlhong a ka go thibela gore o ye kwa mothong yo o go diretseng phoso gore lo rarabolole bothata. Gape o ka nna wa raelesega go dira gore batho ba bangwe ba go tshegetse ka go ba bolelela ka bothata jwa lona, mme seo se ka nna sa dira gore kgotlhang eno e ame batho ba le bantsi mme e gakale.

O ka dira eng? Fa bothata bo le masisi mme o akanya gore o ka se ka wa bo tlodisa matlho, ya kwa mothong yoo mme lo bue ka gone. Leka go rarabolola bothata jono ka tsela e e latelang:

(1) Ka bonako: O se ka wa nnela go re ‘ke tla.’ Fa o dira jalo, bothata bo ka etegela. Leka go dirisa kgakololo eno ya ga Jesu: “[Fa] o tlisa mpho ya gago kwa sebesong mme o gakologelwa o le koo gore morwarraago o na le sengwe kgatlhanong le wena, tlogela mpho ya gago koo fa pele ga sebeso, mme o tsamaye; agisanya le morwarraago pele, go tswa foo, fa o boile, isa mpho ya gago tshupelo.”—Mathaio 5:23, 24.

(2) Lo le babedi fela: Tila go raelesega go seba le ba bangwe ka bothata jono. “Seka kgang ya gago le mongwe ka wena, mme o se ka wa senola puo ya sephiri ya yo mongwe.”—Diane 25:9.

(3) Ka kagiso: Tila mokgwa wa go batla go bona gore ke mang yo o phoso le gore ke mang yo o seng phoso. Maitlhomo a gago ke go dira kagiso, e seng go fenya kgotlhang. Leka go dirisa lefoko “nna” go na le lefoko “wena.” Go raya motho o re, “Ke utlwile botlhoko ka gonne . . .” go ka nna botoka go na le go re: “O nkutlwisitse botlhoko!” Baebele ya re: “[Latelela] dilo tse di isang kagisong le dilo tse di bakang go agana.”—Baroma 14:19.

Nna Pelotelele

Baebele ya reng? “Lo se ka lwa busetsa ope bosula ka bosula. . . . Mme, ‘fa mmaba wa gago a tshwerwe ke tlala, mo fepe; fa a nyorilwe, mo neye sengwe gore a nwe.’”—Baroma 12:17, 20.

Ke eng se se ka dirang gore go nne thata? Fa kwa tshimologong o leka go dira kagiso le motho mme a bo a gana, o ka nna wa raelesega go itlhoboga.

O ka dira eng? Se fele pelo. Batho ba na le botho jo bo sa tshwaneng e bile ga ba gole semoyeng ka tsela e e tshwanang. Ba bangwe ba tsaya nako e telele go wela makgwafo; ba bangwe ba sa ntse ba ithuta go bontsha dinonofo tsa bomodimo. Tswelela o ba bontsha bopelonomi le lorato. Baebele ya re: “Lo se ka lwa itetla gore lo fenngwe ke bosula, mme nnang lo fenye bosula ka molemo.”—Baroma 12:21.

Gore re kgone go dira kagiso le ba bangwe, re tlhoka go leka go bontsha boikokobetso, temogo, bopelotelele le lorato. Mme go nna le kagiso le ba bangwe ruri go botlhokwa!

A O KILE WA IPOTSA GORE . . .

● Ke eng se se tla go thusang go itshwarela motho yo mongwe o gololesegile?—Bakolosa 3:13.

● Ke eng se se ka go thusang gore o ye kwa mothong yoo mme lo bue ka bothata jwa lona?—Mathaio 5:23, 24.

● O ka dirang fa e le gore maiteko a gago a go dira kagiso ga a amogelwe?—Baroma 12:17-21.

[Mafoko a a mo go tsebe 11]

“Temogo ya motho ruri e fokotsa bogale jwa gagwe, mme ke bontle mo go ene go tlhokomologa tlolo.”—DIANE 19:11.