Tsela e Ntle e o Lebegang ka Yone

TSELA e o lebegang ka yone e bua go le gontsi ka wena. Le mororo Jehofa a bona pelo, gantsi batho bone ba dira ditshwetso ka “se se bonalang mo matlhong” fela. (1 Sam. 16:7) Fa o le phepa e bile o ipaakantse sentle mo mmeleng, ba bangwe ba tla swetsa ka gore o a itlotla, e bile seno se tla dira gore ba go reetse. Gape fa o apere sentle seno se tla dira gore bareetsi ba gago ba lebe phuthego e o e emelang ka tsela e e molemo ba bo ba nne le pono e ntle ka Modimo yo o mo obamelang.

Dikaelo Tse O ka Di Latelang. Baebele ga e tlhome melao e mentsintsi malebana le tsela e motho a tshwanetseng go lebega ka yone. Le fa go ntse jalo, e re naya melaometheo e e lekalekaneng e e ka re thusang go dira ditshwetso ka botlhale. Kaelo e e botlhokwa go di feta tsotlhe ke ntlha ya gore re ‘dire dilo tsotlhe kgalaletsong ya Modimo.’ (1 Bakor. 10:31) Ke melaometheo efe e e amegang fa go tsenwa mo kgannyeng ya tsela e re lebegang ka yone?

Santlha, Baebele e re kgothaletsa gore mebele le diaparo tsa rona di nne phepa. Mo Molaong wa gagwe o a neng a o naya Iseraele wa bogologolo, Jehofa o ne a ntsha ditaelo tse a neng a batla gore ba di diragatse malebana le bophepa. Ka sekai, fa baperesiti ba ne ba le mo tirong, ba ne ba tshwanetse go tlhapa ba bo ba tlhatswe diaparo tsa bone ka dinako dingwe tse di tlhomilweng. (Lefi. 16:4, 24, 26, 28) Bakeresete ga ba kafa tlase ga Molao wa ga Moshe, le fa go ntse jalo melaometheo e e mo go one e sa ntse e dira. (Joh. 13:10; Tshen. 19:8) Mebele ya rona, legano la rona le diaparo tsa rona di tshwanetse go nna phepa gore re se ka ra kgopisa batho ba bangwe segolobogolo fa re ya kwa lefelong la kobamelo kgotsa re le mo bodireding jwa tshimo. Ba ba neelang dipuo kgotsa ba ba dirang dipontsho fa pele ga phuthego ba tshwanetse go tlhoma sekao se se molemo mo go seno. Go tlhokomela tsela e re lebegang ka yone go bontsha go tlotla Jehofa le phuthego ya gagwe.

Sa bobedi, Baebele e re kgothaletsa go nna boingotlo le go nna le mogopolo o o itekanetseng sentle. Moaposetoloi Paulo o ne a kgothaletsa basadi ba Bakeresete go ‘ikgabisa . . . ka boingotlo le go itekanela sentle ga mogopolo, e seng ka ditsela tsa go loga moriri loetse le ka gouta kgotsa diperela kgotsa moaparo wa tlhwatlhwa e e kwa godimo thata, fa e se ka tsela e e tshwanelang basadi ba ba ipolelang fa ba tlotla Modimo.’ (1 Tim. 2:9, 10) Boingotlo le go itekanela sentle ga mogopolo go botlhokwa gape le mo moaparong le go ipaakanya mmele ga banna.

Motho yo o boingotlo o tlhokomela gore a se ka a kgopisa ba bangwe go sa tlhokege le gore a se ka a dira gore go tlhongwe mogopolo mo go ene ka tsela e e sa tshwanelang. Go itekanela sentle ga mogopolo go felela ka go dira tshwetso ka botlhale kgotsa ka tsela e e molemo. Motho yo o bontshang dinonofo tseno o dira dilo ka tekatekano ka gonne a tlotla melao ya Modimo. Go bontsha dinonofo tseno ga go bolele gore re se ka ra apara ka tsela e e kgatlhang mme go re thusa gore re lebege ka tsela e e siameng, e seng ka mokgwa o o feteletseng wa go apara le go ipaakanya mmele. (1 Joh. 2:16) Re batla go dirisa melaometheo eno fa re le kwa lefelong la kobamelo, fa re le mo bodireding jwa tshimo kgotsa mo ditirong tse dingwe. Tota le fa re apere diaparo tsa go iketla fela le gone go tshwanetse go bontsha boingotlo le go itekanela sentle ga mogopolo. Fa re le kwa sekolong kgotsa kwa tirong, re tla nna le ditshono tsa go neela bosupi jo e seng jwa ka tlwaelo. Le fa gone re tla bo re sa apara ka tsela e re aparang ka yone fa re le kwa dipokanong, kwa dikopanong tse dikgolo le kwa dikopanong tse dinnye, moaparo wa rona o sa ntse o tshwanelwa ke go nna bothakga, o le phepa e bile o le tekatekano.

Ke boammaaruri gore rotlhe ga re apare ka tsela e e tshwanang. Ga go a lebelelwa gore re apare jalo. Batho ba rata dilo tse di farologaneng e bile ga go na molato ope ka seo. Le fa go ntse jalo melaometheo ya Baebele e tshwanetse go dirisiwa ka metlha.

Moaposetoloi Petere o ne a bontsha gore moaparo o o amanang le “motho wa sephiri wa pelo” ke one o o botlhokwa thata go gaisa mekgwa ya go ipaakanya moriri le diaparo tsa ka fa ntle. (1 Pet. 3:3, 4) Fa dipelo tsa rona di tletse ka lorato, boipelo, kagiso, bopelonomi le tumelo e e nonofileng, dilo tseno e tla nna diaparo tsa rona tsa semoya tse di tlotlang Modimo eleruri.

Sa boraro, Baebele e re kgothaletsa go sekaseka tebego ya rona gore a e rulagantswe sentle. Mo go 1 Timotheo 2:9, go umakiwa “diaparo tse di rulagantsweng sentle.” Le fa moaposetoloi Paulo a ne a bua ka diaparo tsa basadi, molaomotheo ono o a dira le mo banneng. Selo se se rulagantsweng sentle ke selo se se phepa e bile se le bothakga. Re ka kgona go ipoloka re le phepa le fa re humile kgotsa re humanegile.

Selo sa ntlha se batho ba se lemogang ka tebego ya rona ke moriri. O tshwanetse go nna phepa kgotsa go baakanngwa sentle. Ditlwaelo tsa lefelo le batho ba nnang mo go lone le mekgwa e ba e gotsitseng e ama tsela e ba ipaakanyang moriri ka yone. Mo go 1 Bakorintha 11:14, 15, re bona kgakololo ya ga moaposetoloi Paulo ka mekgwa ya go ipaakanya moriri, e go bonalang e ile ya akanyetsa dintlha tse pedi tseno. Le fa go ntse jalo, fa mokgwa wa motho wa go ipaakanya moriri o dira gore go bonale gore o leka go lebega jaaka motho wa bong bo sele, seno ga se tsamaisane le melaometheo ya Baebele.—Dute. 22:5.

Mo banneng, go lebega o le phepa go ka nna ga akaretsa le go beola ditedu. Mo mafelong a mo go one ditedu tse di fa godimo ga molomo di tsewang di tsenya motho seriti, mongwe le mongwe yo o nang le tsone o tshwanetse go di boloka di le dikhutshwane sentle.

Sa bonè, tebego ya rona ga e a tshwanela go dira gore re lebege re le ba ba ratang lefatshe le ditsela tsa lone. Moaposetoloi Johane o ne a tlhagisa jaana: “Lo se ka lwa bo lo rata lefatshe le fa e le dilo tse di mo lefatsheng.” (1 Joh. 2:15-17) Lefatshe leno le tletse ka dikeletso di le dintsi tsa boleo. Mo go dingwe tsa tsone, Johane o umaka keletso ya boleo ya nama le go bontsha ka mabela dilo tse motho a nang le tsone. Gape Dikwalo di bua ka moya wa botsuolodi, kgotsa go sa utlwe taolo. (Dia. 17:11; Baef. 2:2) Dikeletso tseno le maikutlo ano gantsi di bontshiwa ke tsela e batho ba aparang ka yone le go ipaakanya ka yone mo mmeleng. Ka ntlha ya moo, tsela e ba lebegang ka yone e ka nna ya nna e e sa kgatlheng, e e tsosang keletso ya tlhakanelodikobo, e e feteletseng e e botlhaswa. Jaaka batlhanka ba ga Jehofa, ga re batle go latela mekgwa e e ntseng jalo e e supang ditsela tseo tse e seng tsa Bokeresete.

Go na le gore re etse lefatshe, a bo go tla bo go le botoka jang ne go dira gore moaparo wa rona le go ipaakanya ga rona mo mmeleng go tlhotlhelediwe ke sekao se se molemo sa banna le basadi ba ba godileng ba Bakeresete mo phuthegong ya Bokeresete! Makawana a a solofetseng go nna dibui tsa phatlalatsa nako nngwe a ka leba kafa ba ba setseng ba tshwanelega jaaka dibui tsa phatlalatsa ba aparang ka gone. Botlhe ba ka ithuta ka sekao sa batho ba ba feditseng dingwaga di le dintsi ba nna le seabe ka boikanyegi mo bodireding jwa phatlalatsa.—1 Tim. 4:12; 1 Pet. 5:2, 3.

Sa botlhano, fa re dira tshwetso ya gore ke eng se se tshwanelang, re tshwanetse go gakologelwa gore “le Keresete tota o ne a se ka a iitumedisa.” (Bar. 15:3) Selo se Jesu a neng a tshwenyega thata ka sone e ne e le go dira thato ya Modimo. Gape Jesu o ne a dira gore go thusa ba bangwe e nne selo se se tlang pele mo go ene. Malebana le mekgwa mengwe ya go apara le go ipaakanya mo mmeleng, re tshwanetse go dirang fa e le gore go na le sengwe se se re kgoreletsang go bua le batho ba re ba rerelang? Go etsa boikokobetso jwa ga Keresete go tla re thusa go dira tshwetso ka botlhale. Moaposetoloi Paulo o ne a kwala molaomotheo o o reng: “Ka tsela epe ga re neye lebaka lepe la go kgopisa.” (2 Bakor. 6:3) Ka ntlha ya moo, re ka nna ra tlogela mekgwa mengwe ya go ipaakanya moriri kgotsa diaparo dingwe tse di ka nnang tsa dira gore batho ba re batlang go ba neela bosupi ba se ka ba reetsa.

Mokgwa o re Emang ka One. Tsela e ntle e re lebegang ka yone gape e akaretsa go ema sentle. Ke boammaaruri gore ga re ka ke ra ema ka tsela e e tshwanang rotlhe, e bile ga re leke go dumalana le mokgwa mongwe o o rileng wa gore re eme jang. Le fa go ntse jalo, go a lemotshega gore go ya kafa Baebele e dirisang lefoko leno ka gone, go ema o tlhamaletse go supa gore motho o na le seriti e bile o na le maikutlo a mantle. (Lefi. 26:13; Luke 21:28) Le fa go ntse jalo, ka ntlha ya go bo mokaulengwe kgotsa kgaitsadi a berekile dingwaga di le dintsi a iname kgotsa ka ntlha ya go bo a godile thata kgotsa a le bokoa mo mmeleng, a ka nna a se ka a kgona go ema a tlhamaletse kgotsa a ka nna a tlhoka go ikaega ka sengwe gore se mo tshegetse. Mme go akantshiwa gore ba ba kgonang go ema sentle ba tlhamaletse fa ba bua le ba bangwe ba dire jalo gore go se ka ga nna jaaka e kete ga ba kgatlhegele ba ba buang le bone. Ka tsela e e tshwanang, le fa go se phoso gore ka dinako tse dingwe sebui se beye diatla mo godimo ga tafole ya sebui, fa se sa ikaege ka yone, se tla bo se eme ka tsela e e tla dirang gore bareetsi ba nne le pono e ntle ka sone.

Didirisiwa Tse di Phepa. Ga se ponalo ya rona fela ya botho e e tshwanetseng go nna phepa le go rulaganngwa sentle mme dilo tsa rona tse re di dirisang mo tshimong le tsone di tshwanetse go nna phepa le go nna bothakga.

Akanya ka Baebele ya gago. Ga go kgonege gore mongwe le mongwe wa rona a nne le Baebele e ntšha fa e re nang le yone e onetse. Le fa go ntse jalo, go sa kgathalesege gore re feditse nako e e kana kang re dirisa Baebele e le yosi, e tshwanetse e bonale gore e ntse e tshwerwe sentle.

Ke boammaaruri gore go na le ditsela tse di farologaneng tsa go paka dilo tse re neelang bosupi ka tsone mo kgetsing, mme le yone e tshwanetse go nna phepa. A o kile wa bona go wa dipampiri mo teng ga Baebele fa mmoledi a ne a ipaakanyetsa go balela mong wa ntlo temana kgotsa gongwe fa mokaulengwe a ne a neetse puo mo phuthegong? Seno se ne sa go itaya tsebe, a ga go jalo? Fa e le gore dipampiri tse di bewang mo teng ga Baebele di itaya tsebe, go di baya go sele go tla dira gore o kgone go boloka didirisiwa tsa gago di rulagantswe sentle. Gape, ela tlhoko gore kwa dinageng tse dingwe, go baya Baebele kgotsa dikgatiso dingwe tsa bodumedi fa fatshe go lejwa e le go sa tlotle.

Go botlhokwa thata mo go rona go tlhokomela gore re lebega sentle. Gape go ama tsela e batho ba bangwe ba re lebang ka yone. Mme mo godimo ga tsotlhe, re go tlhokomela ka kelotlhoko ka gonne re eletsa go ‘kgabisa thuto ya Mmoloki wa rona, e bong Modimo, mo dilong tsotlhe.’—Tito 2:10.