Lesedi la Modimo le Leleka Lefifi!

“Jehofa ke ene a dirang gore lefifi la me le phatsime.”—2 SAMUELE 22:29.

 1. Lesedi le amana jang le botshelo?

“MODIMO a re: ‘A go nne lesedi.’ Mme ga nna lesedi.” (Genesise 1:3) Pego e e malebana le popo e e mo go Genesise e dirisa mafoko a a botlhokwa ao go tlhaola Jehofa jaaka motswedi wa lesedi, le kwantle ga lone go neng go ka se ka ga nna le botshelo mo lefatsheng. Gape, Jehofa ke motswedi wa lesedi la semoya le le botlhokwa go re kaela mo tseleng ya botshelo. (Pesalema 43:3) Kgosi Dafide o ne a bontsha kafa lesedi la semoya le botshelo di amanang thata ka gone fa a ne a kwala jaana: “O na le motswedi wa botshelo; re kgona go bona lesedi ka lesedi le le tswang mo go wena.”—Pesalema 36:9.

 2. Jaaka Paulo a bontshitse, lesedi le amana thata le eng?

² Dingwaga di ka nna 1 000 morago ga motlha wa ga Dafide, moaposetoloi Paulo o ne a umaka pego e e malebana le popo. Fa a ne a kwalela Bakeresete ba phuthego ya Korintha, o ne a re: “Modimo ke ene yo o neng a re: ‘A lesedi le phatsime mo lefifing.’” Morago ga moo Paulo o ne a bontsha gore lesedi la semoya le amana thata le kitso e e tswang kwa go Jehofa fa a ne a oketsa jaana: “O phatsimile mo dipelong tsa rona go di bonesa ka kitso e e galalelang ya Modimo ka sefatlhego sa ga Keresete.” (2 Bakorintha 4:6) Lesedi leno le fitlha jang mo go rona?

Baebele e re Naya Lesedi

 3. Jehofa o dirisa Baebele go re naya lesedi lefe?

³ Jehofa o re naya lesedi la semoya a dirisa thata Lefoko la gagwe le le tlhotlheleditsweng e leng Baebele. Ka jalo fa re ntse re ithuta Baebele e bile re bapala kitso e e tswang kwa Modimong, re letla lesedi la gagwe gore le re phatsimele. Jehofa o dirisa Baebele go re sedimosetsa ka maikaelelo a gagwe le go re bolelela kafa re ka dirang thato ya gagwe ka gone. Seno se dira gore botshelo jwa rona e nne jo bo nang le boikaelelo e bile se re thusa ka dilo tse re di tlhokang semoyeng. (Moreri 12:1; Mathaio 5:3) Jesu o ne a gatelela gore re tshwanetse go itlhokomela semoyeng fa a ne a nopola Molao wa ga Moshe a re: “Go kwadilwe ga twe, ‘Motho o tshwanetse go tshela, e seng ka senkgwe se le sosi, fa e se ka lefoko lengwe le lengwe le le tswang ka molomo wa ga Jehofa.’”—Mathaio 4:4; Duteronome 8:3.

 4. Jesu ke “lesedi la lefatshe” ka tsela efe?

⁴ Jesu o amanngwa thata le lesedi la semoya. Eleruri, o ne a re ke ene “lesedi la lefatshe” a ba a re: “Yo o ntshalang morago ga a kitla a tsamaya mo lefifing ka gope, mme o tla rua lesedi la botshelo.” (Johane 8:12) Mafoko ano a re thusa go tlhaloganya seabe sa konokono se Jesu a nang le sone mo go neyeng batho boammaaruri jwa ga Jehofa. Fa e le gore re batla go tila lefifi mme re tsamaye mo leseding la Modimo, re tshwanetse go reetsa sotlhe se Jesu a se buang re bo re latele sekao sa gagwe le dithuto tsa gagwe ka kelotlhoko tse di kwadilweng mo Baebeleng.

 5. Balatedi ba ga Jesu ba ne ba nna le boikarabelo bofe morago ga loso lwa gagwe?

⁵ Malatsi a le mmalwa pele ga loso lwa gagwe, Jesu, a ipitsa lesedi gape, o ne a raya barutwa ba gagwe a re: “Lesedi le tla nna mo gare ga lona ka lobakanyana. Tsamayang fa lo sa ntse lo na le lesedi, gore lefifi le se lo fekeetse; mme yo o tsamayang mo lefifing ga a itse kwa a yang gone. Fa lo sa ntse lo na le lesedi, supang tumelo mo leseding, gore lo nne bana ba lesedi.” (Johane 12:35, 36) Ba ba neng ba nna bana ba lesedi ba ne ba ithuta “sekao sa mafoko a a itekanetseng” a Baebele. (2 Timotheo 1:13, 14) Morago ga moo ba ne ba dirisa mafoko a a itekanetseng ano go ntsha batho ba bangwe mo lefifing ba dipelo tse di ikanyegang ba ba isa mo leseding la Modimo.

 6. Mo go 1 Johane 1:5, re bona boammaaruri bofe jo bo botlhokwa ka lesedi le lefifi?

⁶ Moaposetoloi Johane o ne a kwala jaana: “Modimo ke lesedi mme ga go na lefifi ka gope seoposengweng le ene.” (1 Johane 1:5) Ela tlhoko fano kafa lesedi le farologanang le lefifi ka gone. Lesedi la semoya le tswa kwa go Jehofa, mme ga a ka ke a amanngwa le lefifi la semoya. E le gore lefifi le tswa kwa go mang he?

Motswedi wa Lefifi la Semoya

 7. Motswedi wa lefifi la semoya le le aparetseng lefatshe ke mang, mme o tlhotlheletsa jang?

⁷ Moaposetoloi Paulo o ne a bua ka “modimo wa tsamaiso eno ya dilo.” Mafoko ao a gagwe a ne a raya Satane Diabolo. O ne a ba a bolela gore ene yono “o [foufaditse] megopolo ya ba ba sa dumeleng, gore go bonesa ga dikgang tse di molemo tse di galalelang ka ga Keresete, yo e leng setshwano sa Modimo, go se ka ga ba phatsimela.” (2 Bakorintha 4:4) Batho ba le bantsi ba bolela gore ba dumela mo Modimong; le fa go ntse jalo, palo e e ntseng e oketsega ya bone ga ba dumele gore Diabolo o teng. Ka ntlha yang? Ga ba batle go dumela gore go ka tswa go na le motho mongwe yo o bosula yo o fetang batho ka nonofo yo o ka tlhotlheletsang tsela e ba akanyang ka yone. Le fa go ntse jalo, fela jaaka Paulo a bontsha, tota Diabolo o teng e bile o tlhotlheletsa batho gore ba se ka ba bona lesedi la boammaaruri. Maatla a Satane a a dirisang go tlhotlheletsa tsela e batho ba akanyang ka yone a bontshiwa ke boporofeti jo bo mo tlhalosang gore ke “yo o tsietsang lefatshe lotlhe le le nang le banni.” (Tshenolo 12:9) Ka ntlha ya ditiro tsa ga Satane, boemo jo moporofeti Isaia a boleletseng pele ka jone jaanong bo diragalela batho botlhe kwantle ga ba ba direlang Jehofa: “Bona! lefifi le tla bipa lefatshe, le letobo le lentshontsho le tla bipa ditlhopha tsa ditšhaba.”—Isaia 60:2.

 8. Batho ba ba leng mo lefifing la semoya ba bontsha jang gore ba tlhakane tlhogo?

⁸ Motho ga a kgone go bona sepe fa a le mo lefifing le lentshontsho. O timela motlhofo fela kgotsa o tlhakana tlhogo. Ka tsela e e tshwanang, batho ba ba leng mo lefifing la semoya ga ba kgone go lemoga sepe mme go ise go ye kae, ba tlhakana tlhogo ka tsela ya semoya. Ba ka nna ba se ka ba kgona go farologanya boammaaruri le maaka, molemo le bosula. Moporofeti Isaia o ne a bua ka ba ba mo lefifing le le ntseng jalo fa a ne a kwala jaana: “A bo go latlhega ba ba reng molemo ke bosula le bosula ke molemo, ba ba bayang lefifi mo boemong jwa lesedi le lesedi mo boemong jwa lefifi, ba ba bayang bogalaka mo boemong jwa botshe le botshe mo boemong jwa bogalaka!” (Isaia 5:20) Ba ba nnang mo lefifing la semoya ba tlhotlhelediwa ke modimo wa lefifi, Satane Diabolo, mme ka jalo ba hularetse motswedi wa lesedi le botshelo.—Baefeso 4:17-19.

Kgwetlho ya go Tswa mo Lefifing Go ya Mo Leseding

 9. Tlhalosa gore badirabosula ba amana jang le lefifi ka tsela ya mmatota le ka tsela ya semoya.

⁹ Jobe yo o ikanyegang o ne a bontsha kafa badirabosula ba amanang le lefifi la mmatota ka gone fa a ne a re: “Fa e le leitlho la moakafadi lone, le ne la lebelela lefifi la maitseboa, a re, ‘Ga go na leitlho le le tla mponang!’ Mme o baya sebipo mo sefatlhegong sa gagwe.” (Jobe 24:15) Badirabosula gape ba mo lefifing la semoya, mme lefifi le le ntseng jalo le ka ba fekeetsa fela thata. Moaposetoloi Paulo o ne a re boitsholo jo bo maswe jwa tlhakanelodikobo, bogodu, bogagaru, botagwa, go gobolola le go tsaya dilo tsa ba bangwe ka dikgoka ke dilo tse ka tlwaelo di dirwang ke batho ba ba leng mo lefifing leo. Mme batho bape fela ba ba tlang mo leseding la Lefoko la Modimo ba ka fetoga. Paulo o tlhalosa ka phepafalo mo lekwalong le a neng a le kwalela Bakorintha gore go fetoga ka tsela e e ntseng jalo go a kgonega. Bakeresete ba le bantsi ba Bakorintha ba ne ba tle ba dire ditiro tsa lefifi, le fa go ntse jalo Paulo o ne a ba raya a re: “Mme lo tlhapisitswe lwa nna phepa, lo itshepisitswe, lo boletswe lo le ba ba siameng mo leineng la Morena wa rona Jesu Keresete le ka moya wa Modimo wa rona.”—Bakorintha 6:9-11.

10, 11. (a) Jesu o ne a bontsha jang gore o akanyetsa monna yo a neng a mo foufolola? (b) Ke eng fa batho ba le bantsi ba sa tlhophe lesedi?

¹⁰ Fa motho a tswa mo lefifing le lentshontsho a tsena mo leseding, ga go na pelaelo gore go tla tsaya nakonyana gore matlho a gagwe a tlwaele lesedi. Kwa Bethesaida, Jesu o ne a fodisa motho yo o foufetseng mme ka bopelonomi o ne a dira jalo kgato ka kgato. “A tshwara monna yo o foufetseng yono ka seatla, a mo ntshetsa ka kwa ntle ga motsana, mme, fa a sena go kgwela mathe mo matlhong a gagwe, a mmaya diatla mme a mmotsa a re: ‘A o bona sengwe?’ Mme monna yono a lelala mme a re: ‘Ke bona batho, ka gonne ke lemoga mo go bonalang e kete ditlhare, mme di a tsamayatsamaya.’ Go tswa foo a baya monna yono diatla gape mo matlhong, mme monna yono a bona sentle, mme a fola, mme o ne a bona sengwe le sengwe sentle.” (Mareko 8:23-25) Go bonala Jesu a ile a foufolola monna yono kgato ka kgato gore monna yono a tle a kgone go tlwaela lesedi le le phatsimang la letsatsi. Re ka akanya fela gore monna yoo o ne a itumetse jang fa a ne a kgona go bona.

¹¹ Le fa go ntse jalo, boitumelo jwa monna yoo bo gaisiwa ke boitumelo jwa batho ba ba thusiwang go tswa mo lefifing la semoya kgato ka kgato gore ba tsene mo leseding la boammaaruri. Fa re bona tsela e ba itumelang ka yone, re ka nna ra ipotsa gore ke ka ntlha yang fa ba bangwe ba ba oketsegileng ba sa ngokiwe ke lesedi leno. Jesu o ntsha lebaka la gone: “Ono ke motheo wa katlholo, gore lesedi le tlile mo lefatsheng mme batho ba ratile lefifi bogolo go lesedi, gonne ditiro tsa bone di ne di le boikepo. Gonne yo o ratang go dira dilo tse di bosula o tlhoile lesedi mme ga a tle mo leseding, gore ditiro tsa gagwe di tle di se ka tsa kgalemelwa.” (Johane 3:19, 20) Ee, batho ba le bantsi ba rata go dira “dilo tse di bosula”—tse di jaaka boitsholo jo bo sa siamang, go gatelela, go aka, go tsietsa le go utswa—mme lefifi la semoya la ga Satane ke lefelo le le ba siametseng sentle la go dira jaaka ba rata mo go lone.

Go Gatela Pele mo Leseding

12. Go tla mo leseding go re solegetse molemo ka ditsela dife?

¹² Fa e sa le re nna le kitso e re e neilweng ke lesedi, re lemogile diphetogo dife mo go rona? Go molemo gore ka dinako tse dingwe re lebe kwa morago mme re sekaseke go bona gore re dirile kgatelopele e e ntseng jang semoyeng. Re latlhile mekgwa efe e e bosula? Re kgonne go baakanya mathata afe mo botshelong jwa rona? Dithulaganyo tsa rona tsa mo isagweng di fetogile jang? Ka nonofo ya ga Jehofa le ka thuso ya moya wa gagwe o o boitshepo, re ka kgona go tswelela pele re dira diphetogo mo bothong jwa rona le mo tseleng e re akanyang ka yone, e leng kgatelopele e e tla bontshang gore re tsaya lesedi leno tsia. (Baefeso 4:23, 24) Paulo o akgela jaana: “Lo kile lwa bo lo le lefifi, mme jaanong lo lesedi mo Moreneng. Tswelelang lo tsamaya jaaka bana ba lesedi, gonne maungo a lesedi a na le mofuta mongwe le mongwe wa se se molemo le tshiamo le boammaaruri.” (Baefeso 5:8, 9) Fa re itetla go kaelwa ke lesedi la ga Jehofa, seno se re naya tsholofelo le boikaelelo e bile se itumedisa matshelo a batho ba ba re dikologileng. A bo go dira diphetogo tse di ntseng jalo go itumedisa pelo ya ga Jehofa jang ne!—Diane 27:11.

13. Re ka bontsha jang gore re lebogela lesedi le Jehofa a re fileng lone, mme go tlhokega eng gore re kgone go dira jalo?

¹³ Re bontsha gore re lebogela botshelo jo bo itumedisang jo re bo tshelang ka go letla lesedi la ga Jehofa gore le phatsime—ka go tlotlela maloko a lelapa la rona, ditsala le baagelani ba rona ka se re se ithutileng mo Baebeleng. (Mathaio 5:12-16; 24:14) Ba ba ganang go reetsa, re ba kgalemela ka go rera ga rona le ka tsela ya rona e e tlhomang sekao ya botshelo jwa Bokeresete. Paulo o tlhalosa jaana: “Nnang lo tlhomamise se se amogelesegang mo Moreneng; mme tlogelang go kopanela le bone mo ditirong tse di sa ungweng tse e leng tsa lefifi, mme, go na le moo, lo ba kgalemele.” (Baefeso 5:10, 11) Go thusa ba bangwe gore ba tswe mo lefifing mme ba tlhophe lesedi go re tlhoka bopelokgale. Se se botlhokwa go feta, go re tlhoka go nna kutlwelobotlhoko le go amega ka ba bangwe le go nna le keletso e e tswang pelong ya go ba abela lesedi la boammaaruri gore ba solegelwe molemo ka bosakhutleng.—Mathaio 28:19, 20.

Itise mo Leseding le le Timetsang!

14. Ke tlhagiso efe e e kaga lesedi e re tshwanetseng go e tsaya tsia?

¹⁴ Batho ba ba leng mo lewatleng bosigo ba anaanela thata lesedi lepe fela le ba ka le bonang. Mo metlheng ya bogologolo, go ne go gotswa melelo mo dipharong tsa mafika a Engelane go supa kwa go neng go ka tshabelwa gone fa go tsoga ditsuatsue. Batsamaya ka dikepe ba ne ba itumelela go kaelwa ke masedi ano a a neng a ba bontsha boemakepe jo bo bolokesegileng. Le fa go ntse jalo, melelo mengwe e ne e le e e timetsang. Dikepe tse dintsi ga di a ka tsa fitlhela boemakepe bope, mme di ne tsa timediwa tsa ba tsa thubegela mo losing lo lo tletseng maje mme merwalo ya tsone ya utswiwa. Mo lefatsheng leno le le tletseng tsietso, re tshwanetse go nna kelotlhoko gore re se ka ra ngokiwa ke masedi a a timetsang a a ka dirang gore re senyegelwe ke bomoya jwa rona. Re bolelelwa gore “Satane ka boene o nna a iphetola moengele wa lesedi.” Ka tsela e e tshwanang, batlhanka ba gagwe, go akaretsa le batlhanogi, ke “badiri ba ba tsietsang” ba “le bone ba [nnang] ba iphetola badiredi ba tshiamo.” Fa re amogela dikgopolo tsa maaka tsa batho ba ba ntseng jalo, tsholofelo e re nang le yone mo Lefokong la ga Jehofa la boammaaruri e bong Baebele e ka koafala e bile re ka nna ra swa mo tumelong.—2 Bakorintha 11:13-15; 1 Timotheo 1:19.

15. Ke eng se se tla re thusang go nna mo tseleng e e isang botshelong?

¹⁵ Mopesalema o ne a kwala jaana: “Lefoko la gago ke lobone lwa lonao lwa me, le lesedi la tsela ya me.” (Pesalema 119:105) Ee, ‘tsela e tshesane e e isang botshelong’ e bonesitswe sentle ke Modimo wa rona yo o lorato, Jehofa, “yo thato ya gagwe e leng gore batho ba mefuta yotlhe ba bolokwe mme ba tle mo kitsong e e leng yone, ya boammaaruri.” (Mathaio 7:14; 1 Timotheo 2:4) Go dirisa ditaelo tsa Baebele go tla re sireletsa gore re se ka ra fapoga mo tseleng eo e tshesane ra tsena mo ditseleng tsa lefifi. Paulo o ne a kwala jaana: “Lokwalo lotlhe lo tlhotlheleditswe ke Modimo e bile lo tswela mosola mo go ruteng, mo go kgalemeleng, mo go tlhamalatseng dilo, mo go otlhayeng ka tshiamo.” (2 Timotheo 3:16) Fa re ntse re gola semoyeng, re rutiwa ka Lefoko la Modimo. Re ka kgona go ikgalemela ka go dirisa lesedi le le tswang mo Lefokong la Modimo, kgotsa fa go tlhokega, re ka kgalemelwa ke badisa ba ba lorato mo phuthegong. Ka tsela e e tshwanang, re ka kgona go tlhamalatsa dilo re bo ka boikokobetso re amogela go otlhaiwa ka tshiamo gore re nne re tsamaye mo tseleng e e isang botshelong.

Tsamaya mo Leseding ka Tebogo

16. Re ka bontsha jang gore re lebogela thulaganyo e e molemolemo ya go bo Jehofa a re neile lesedi?

¹⁶ Re ka bontsha jang gore re lebogela thulaganyo e e molemo ya ga Jehofa ya go re naya lesedi? Johane kgaolo 9 e re bolelela gore fa Jesu a ne a fodisa monna yo o tsetsweng e le sefofu, monna yoo o ne a tlhotlheletsega go bontsha kafa a neng a leboga ka gone. Jang? O ne a dumela mo go Jesu gore ke Morwa Modimo a bo a itsise phatlalatsa gore ke “moporofeti.” Mo godimo ga moo, o ne a bua ka bopelokgale kgatlhanong le ba ba neng ba leka go nyatsa kgakgamatso ya ga Jesu. (Johane 9:17, 30-34) Moaposetoloi Petere o bitsa maloko a a tloditsweng a phuthego ya Bokeresete a re ke “setlhopha sa batho ba ba ruilweng ka tsela e e kgethegileng.” Ka ntlha yang? Ka gonne ba na le moya wa go leboga fela jaaka monna yo o neng a tsalwa e le sefofu mme a fodisiwa. Ba bontsha gore ba leboga Jehofa, Modiramolemo wa bone, ka go ‘bolela dinonofo tse di molemolemo gongwe le gongwe tsa yo o neng a ba bitsa mo lefifing a ba isa mo leseding la gagwe le le gakgamatsang.’ (1 Petere 2:9; Bakolosa 1:13) Ba ba nang le tsholofelo ya go tshela mo lefatsheng ba leboga ka tsela e e tshwanang, mme ba tshegetsa bomorwarraabone ba ba tloditsweng mo go boleleng “dinonofo tse di molemolemo” tsa ga Jehofa phatlalatsa. A bo Modimo o neile batho ba ba sa itekanelang tshiamelo e e ka se kang ya bapisiwa le epe jang ne!

17, 18. (a) Motho mongwe le mongwe o na le boikarabelo bofe? (b) Mokeresete mongwe le mongwe o kgothalediwa go etsa Timotheo ka go tila go dira eng?

¹⁷ Go botlhokwa gore re lebogele lesedi la boammaaruri go tswa pelong. Gakologelwa gore ga go ope wa rona yo o tsalwang a itse boammaaruri. Bangwe ba bo ithuta ba setse ba godile, mme ka bonako ba lemoga kafa lesedi le fekeetsang lefifi ka gone. Ba bangwe ba na le tshiamelo e kgolo ya go godisiwa ke batsadi ba ba boifang Modimo. Go ka nna motlhofo gore ba ba ntseng jalo ba tseye lesedi motlhofo. Mosupi mongwe yo batsadi ba gagwe ba neng ba ntse ba direla Jehofa pele a tsalwa o dumela gore go ne ga mo tsaya nako le maiteko a magolo go tlhaloganya ka botlalo tsela e boammaaruri jo a neng a bo rutilwe go tswa boseeng bo neng bo le botlhokwa ka yone. (2 Timotheo 3:15) Mongwe le mongwe wa rona, bannye le bagolo, o tshwanetse go lebogela thata boammaaruri jo Jehofa a bo senotseng.

¹⁸ Timotheo wa lekawana o ne a rutilwe “mekwalo e e boitshepo” a sa le lesea, mme go iteka ka natla mo bodireding ke gone go neng ga dira gore a nne Mokeresete yo o godileng. (2 Timotheo 3:15) Ya nna gone a nnang mo boemong jwa go ka thusa moaposetoloi Paulo, yo o neng a mo kgothatsa jaana: “Dira bojotlhe jwa gago go itlhagisa o amogelwa ke Modimo, modiri yo o se nang sepe se se ka mo tlhabisang ditlhong, o tshwere lefoko la boammaaruri sentle.” Jaaka Timotheo, e kete rotlhe re ka tila go dira sepe fela se se ka re tlhabisang ditlhong—kgotsa sa dira gore Jehofa a re tlhabelwe ke ditlhong!—2 Timotheo 2:15.

19. (a) Jaaka Dafide, rotlhe re tshwanetse go reng? (b) Go tla tlotliwa ka eng mo setlhogong se se latelang?

¹⁹ Re na le mabaka a a utlwalang a go baka Jehofa, yo o re neileng lesedi la boammaaruri jwa gagwe. Jaaka Kgosi Dafide, re bua jaana: “O lobone lwa me, wena Jehofa, mme Jehofa ke ene a dirang gore lefifi la me le phatsime.” (2 Samuele 22:29) Le fa go ntse jalo, le ka motlha ga re batle go tsaya dilo motlhofo, e re ka seno se ka nna sa dira gore re boele kwa lefifing le re namotsweng mo go lone. Ka jalo, setlhogo se se latelang se tla re thusa go sekaseka gore re tsaya boammaaruri jwa Modimo bo le botlhokwa go le kana kang mo matshelong a rona.

O Ithutileng?

• Jehofa o re naya lesedi la semoya jang?

• Lefifi la semoya le le re dikologileng le re gwetlha ka tsela efe?

• Re tshwanetse go tila dikotsi dife?

• Re ka bontsha jang gore re lebogela lesedi la boammaaruri?

[Setshwantsho mo go tsebe 8]

Jehofa ke motswedi wa lesedi la mmatota le la semoya

[Setshwantsho mo go tsebe 10]

Jaaka Jesu a ne a fodisa monna yo o foufetseng kgato ka kgato, le rona o re thusa go tswa mo lefifing la semoya

[Setshwantsho mo go tsebe 11]

Go tsiediwa ke lesedi le le timetsang la ga Satane go felela ka gore re senyegelwe ke bomoya jwa rona