Baengele—Kafa ba re Amang ka Teng

MOPOROFETI Daniele o ne a kwala jaana fa a ne a tlhalosa ponatshegelo e a e boneng ya baengele ba Modimo: “Go ne go na le dikete di le sekete [tsa baengele] tse di neng di direla [Modimo], le dikete di le lesome di menagane ga dikete di le lesome tse di neng di eme fa pele ga gagwe.” (Daniele 7:10) Temana eno e senola maikaelelo a Modimo fa a ne a bopa baengele. Ba tshwanetse go mo direla mme ba nne ba iketleeleditse go diragatsa ditaelo tsa gagwe.

Modimo o dirisa baengele gore ba dire ditiro dingwe tse a batlang go di direla batho. Re tla sekaseka gore o ba dirisa jang go nonotsha le go sireletsa batho ba gagwe, go fetisetsa melaetsa kwa bathong le go diragatsa katlholo ya gagwe mo bathong ba ba bosula.

Baengele ba a Nonotsha e Bile ba a Sireletsa

Fa e sa le dibopiwa tsa semoya di bona lefatshe le batho ba ntlha ba bopiwa, di ne tsa simolola go kgatlhegela batho thata. Fa Jesu Keresete a ne a ise a tle go tshela mo lefatsheng o ne a bua jaana jaaka e kete go bua botlhale: “Dilo tse ke neng ke di rata di ne di na le bomorwa batho.” (Diane 8:31) Mme Baebele e re bolelela gore “baengele ba eletsa go tlhodumela” dilo dingwe tse di senoletsweng baporofeti ba Modimo ka Keresete le ka isagwe.—1 Petere 1:11, 12.

Fa nako e ntse e feta, baengele ba ne ba lemoga gore batho ba bantsi ba ne ba sa direle Mmopi wa bone yo o lorato. Seno se tshwanetse sa bo se ne sa hutsafatsa baengele bao ba ba ikanyegang! Gape, nako le nako fa moleofi a le mongwe a ikwatlhaya mme a boela kwa go Jehofa, “go tsoga boipelo mo baengeleng.” (Luke 15:10) Baengele ba rata thata gore dilo di tsamaele batho ba ba direlang Modimo sentle, mme Jehofa o ba dirisa gangwe le gape go nonotsha le go sireletsa batlhanka ba gagwe ba ba ikanyegang mo lefatsheng. (Bahebera 1:14) Sekaseka dikai dingwe.

Baengele ba le babedi ba ne ba thusa Lote yo o siameng le bomorwadie go falola tshenyego ya metse e e bosula ya Sodoma le Gomora ka go ba ntsha mo lefelong leo.a (Genesise 19:1, 15-26) Dingwaga di le dintsi morago ga foo, le fa moporofeti Daniele a ne a latlhetswe mo mongobong wa ditau, ga a ka a gobala. Ka ntlha yang? O ne a re: “Modimo wa me o ne a romela moengele wa gagwe mme a tswala molomo wa ditau.” (Daniele 6:22) Baengele ba ne ba thusa Jesu fa a ne a simolola bodiredi jwa gagwe mo lefatsheng. (Mareko 1:13) Nako e khutshwane pele ga Jesu a swa, moengele o ne a bonala kwa go ene mme a “mo nonotsha.” (Luke 22:43) A bo Jesu a ile a thusiwa thata jang ne ke moengele mo nakong eno e e bokete ya botshelo jwa gagwe! Le moaposetoloi Petere o ne a gololwa ke moengele mo kgolegelong.—Ditiro 12:6-11.

A baengele ba a re sireletsa gompieno? Fa re obamela Jehofa go ya ka Lefoko la gagwe, re tlhomamisegile gore baengele ba gagwe ba ba maatla ba ba sa bonaleng ba tla re sireletsa. Baebele e re solofetsa jaana: “Moengele wa ga Jehofa o thibelela go dikologa ba ba mmoifang, mme o a ba namola.”—Pesalema 34:7.

Le fa go ntse jalo re tshwanetse go lemoga gore tiro ya baengele ke go direla Modimo, e seng batho. (Pesalema 103:20, 21) Ba dira dilo tse Modimo a reng ba di dire, e seng tse ba di kopiwang ke batho. Ke gone ka moo re tshwanetseng go kopa thuso mo go Jehofa Modimo, e seng mo baengeleng. (Mathaio 26:53) Mme gone, e re ka re sa bone baengele, re ka se itse gore Modimo o ba dirisa go le kana kang go thusa batho ka dilo tse di farologaneng. Mme re itse gore Jehofa o ‘bontsha ba pelo ya bone e feletseng mo go ene nonofo ya gagwe.’ (2 Ditiragalo 16:9; Pesalema 91:11) Gape re tlhomamisegile gore “go sa kgathalesege gore ke eng se re se kopang kafa thatong ya gagwe, [Modimo] o a re utlwa.”—1 Johane 5:14.

Gape Dikwalo di re bolelela gore dithapelo tsa rona le kobamelo ya rona di tshwanetse go lebisiwa fela kwa Modimong. (Ekesodo 20:3-5; Pesalema 5:1, 2; Mathaio 6:9) Baengele ba ba ikanyegang ba re kgothaletsa gore re dire jalo. Ka sekai, fa moaposetoloi Johane a ne a leka go obamela moengele, sebopiwa seo sa moya se ne sa mo kgalema, sa re: “O tlhokomele! O se ka wa dira jalo! . . . Obamela Modimo.”—Tshenolo 19:10.

Baengele ba Isa Melaetsa ya Modimo

Lefoko “moengele” le raya “morongwa,” mme eo ke tsela e nngwe e baengele ba direlang Modimo ka yone—ke barongwa ba gagwe ba a ba romelang kwa bathong. Ka sekai, “moengele Gabariele a romelwa go tswa kwa Modimong go ya kwa motseng wa Galalea o o bidiwang Nasaretha.” Ka ntlha yang? Gore a ye go bolelela morweetsana yo o bidiwang Marea gore le fa a ne a le lekgarebane, o ne a tla ima mme a tshole ngwana wa mosimane yo o neng a tla bidiwa Jesu. (Luke 1:26-31) Gape go ne ga romelwa moengele kwa nageng go ya go bolelela badisa gore “Keresete Morena” o ne a tshotswe. (Luke 2:8-11) Mo godimo ga moo, baengele ba ne ba isa melaetsa e e tswang kwa Modimong ba e isa kwa go Aborahame, Moshe, Jesu le batho ba bangwe ba ba umakiwang mo Baebeleng.—Genesise 18:1-5, 10; Ekesodo 3:1, 2; Luke 22:39-43.

Baengele ba direla e le barongwa ba Modimo jang gompieno? Akanya ka tiro e Jesu a neng a boleletse pele gore balatedi ba gagwe ba ne ba tla e dira pele ga bokhutlo jwa tsamaiso eno ya dilo. O ne a re: “Dikgang tse di molemo tseno tsa bogosi di tla rerwa mo lefatsheng lotlhe le le nang le banni gore e nne bosupi mo ditšhabeng tsotlhe; mme go tswa foo bokhutlo bo tla tla.” (Mathaio 24:3, 14) Ngwaga le ngwaga, Basupi ba ga Jehofa ba dirisa diura di feta bilione ba rera dikgang tse di molemo tsa Bogosi jwa Modimo. A mme o ne o itse gore baengele le bone ba na le seabe mo tirong eno? Moaposetoloi Johane o ne a bua ka ponatshegelo e a neng a e bone, a re: “Ka bona moengele . . . , o ne a tshotse dikgang tse di molemo tsa bosakhutleng go di bolela e le mafoko a a itumedisang mo go ba ba nnang mo lefatsheng, le mo setšhabeng sengwe le sengwe le lotso le teme le batho.” (Tshenolo 14:6, 7) Temana eno e tlhalosa tiro ya botlhokwatlhokwa e baengele ba e direlang batho gompieno.

Basupi ba ga Jehofa ba bona bosupi jwa gore ba kaelwa ke baengele fa ba dira tiro ya bone ya go tsena ka ntlo le ntlo ba rera. Gantsi ba kopana le batho ba ba neng ba sa tswa go rapelela gore ba etelwe ke mongwe yo o tla ba thusang go tlhaloganya maikaelelo a Modimo. Ka gonne Basupi ba kaelwa ke baengele mme le bone ba iketleetsa, ngwaga le ngwaga diketekete tsa batho di ithuta ka Jehofa. E kete o ka solegelwa molemo ke tiro eno e e bolokang matshelo e e kaelwang ke baengele.

Baengele ba Diragatsa Katlholo ya Modimo

Le fa baengele ba sa letlelelwa go atlhola batho, ga se gore ba nna fela ba sa dire sepe. (Johane 5:22; Bahebera 12:22, 23) Mo nakong e e fetileng ba ne ba diragatsa dikatlholo tsa Modimo. Ka sekai, Modimo o ne a dirisa baengele fa a ne a lwantsha Baegepeto ba bogologolo ba ba neng ba dirile Baiseraele batshwarwa. (Pesalema 78:49) Mme mo bosigong bo le bongwe “moengele wa ga Jehofa” o ne a kgemetha masole a le dikete di le lekgolo le masome a robabobedi le botlhano mo bothibelelong jwa mmaba wa batho ba Modimo.—2 Dikgosi 19:35.

Mo isagweng, baengele ba tla diragatsa katlholo ya Modimo e e botlhoko. Jesu o tla tla “le baengele ba gagwe ba ba maatla mo molelong o o tutumang, jaaka a tlisa pusoloso mo go ba ba sa itseng Modimo le ba ba sa reetseng dikgang tse di molemo.” (2 Bathesalonika 1:7, 8) Le fa go ntse jalo, tshenyego eo e tla tlisiwa fela mo bathong ba ba sa amogeleng molaetsa o jaanong o rerwang mo lefatsheng lotlhe o o engweng nokeng ke baengele. Batho ba ba batlang Modimo le ba ba tshelang tumalanong le dithuto tsa Baebele ga ba na go senngwa.—Sefania 2:3.

Re ka itumelela go bo go na le baengele ba ba ikanyegang ba ba nnang ba dira se Modimo a se laelang! Jehofa o ba dirisa go thusa le go sireletsa batlhanka ba gagwe ba ba ikanyegang mo lefatsheng. Seno se a re nametsa ka gonne go na le dibopiwa tsa moya tse di bidiwang madimona tse di batlang go re gobatsa.

Madimona ke Bomang?

Makgolo a le 15 a dingwaga fa Satane a sena go tsietsa Efa kwa Edene, baengele ba Modimo ba ne ba lemoga gore Satane Diabolo o ne a kgonne go faposa batho botlhe mo Modimong kwantle fela ga ba sekae ba ba ikanyegang jaaka Abele, Enoke le Noa. (Genesise 3:1-7; Bahebera 11:4, 5, 7) Baengele bangwe le bone ba ne ba itetla go tlhotlhelediwa ke Satane. Baebele e ba tlhalosa e re ke meya e e neng e se na kutlo “mo malatsing a ga Noa.” (1 Petere 3:19, 20) Go tlhoka kutlo ga bone go ne ga bonala jang?

Mo motlheng wa ga Noa, baengele ba ditsuolodi ba palo ya bone e sa umakiweng ba ne ba tlogela lelapa la Modimo la kwa legodimong, ba tla mo lefatsheng mme ba itira batho. Ka ntlha yang? Ka gonne ba ne ba na le keletso ya go tlhakanela dikobo le basadi. Seno se ne sa felela ka gore ba nne le bana ba ba bidiwang Banefilime, ba ba neng ba nna mekaloba e e dikgoka. Gape, “bosula jwa motho bo ne bo le bogolo mo lefatsheng le tshekamelo nngwe le nngwe ya dikakanyo tsa pelo ya gagwe e ne e le bosula fela ka dinako tsotlhe.” Le fa go ntse jalo, Jehofa Modimo ga a ka a letlelela gore bosula joo bo tswelele pele. O ne a tlisa Morwalela mo lefatsheng lotlhe, o o neng wa gogola batho botlhe ba ba bosula mmogo le Banefilime. Batho ba ba neng ba tlogelwa ba tshela e ne e le batlhanka ba Modimo ba ba ikanyegang fela.—Genesise 6:1-7, 17; 7:23.

Baengele ba ditsuolodi ba ne ba falola tshenyego ka nako ya Morwalela. Ba ne ba boa ba iphetola baengele mme ba boela legodimong e le dibopiwa tsa moya. Go tswa foo ba ne ba simolola go bidiwa madimona. Ba eme Satane Diabolo nokeng, yo e leng “mmusi wa madimona.” (Mathaio 12:24-27) Madimona fela jaaka mmusi wa one a eletsa go obamelwa ke batho.

Madimona a kotsi, mme ga go tlhokege gore re a tshabe. Ba na le maatla, mme e seng ka mo go feletseng. Fa baengele ba ba se nang kutlo ba ne ba boela kwa legodimong, ga ba ka ba letlelelwa gore ba boe ba kopane le baengele ba Modimo ba ba ikanyegang. Go na le moo, ba ne ba tlogelwa fela ba le mo lefifing ba sa newe tshedimosetso epe ya semoya ke Modimo, bokamoso jwa bone bo le letobo. Ba ne ba tswaletswe mo lefifing la semoya le le bidiwang Tatarase. (2 Petere 2:4) Jehofa o ne a ba thibetse ka “dikgole tsa bosakhutleng,” gore ba nne mo lefifing la semoya. Gape jaanong ga ba kgone go iphetola batho.—Jude 6.

O Tshwanetse go Dirang?

A madimona a sa ntse a kgona go tlhotlheletsa batho? Ee, a dira jalo ka go dirisa “maano a boferefere” a a tshwanang le a a dirisiwang ke mmusi wa bone Satane Diabolo. (Baefeso 6:11, 12) Le fa go ntse jalo, fa re dirisa kgakololo ya Lefoko la Modimo, re ka ema re nitame kgatlhanong le madimona. Le fa go ntse jalo, baengele ba ba maatla ba sireletsa batho ba ba ratang Modimo.

Go botlhokwa thata gore o ithute se Modimo a se batlang jaaka se kwadilwe mo Baebeleng mme o dirise se o se ithutang! O ka ithuta dilo tse dintsi ka se Baebele e se rutang ka go ikgolaganya le Basupi ba ga Jehofa mo lefelong la gaeno kana ka go kwalela bagatisi ba makasine ono. Basupi ba ga Jehofa ba tla itumelela go ithuta Baebele le wena mahala ka nako e e go siametseng.

[Ntlha e e kwa tlase]

[Lebokoso mo go tsebe 6]

KAFA BAENGELE BA RULAGANTSWENG KA TENG

Jehofa o rulagantse lelapa la gagwe le legolo la baengele jaana:

Moengele yo o maatla le yo o nang le taolo go ba feta botlhe ke Mikaele moengele yo mogolo, kana Jesu Keresete. (1 Bathesalonika 4:16; Jude 9) Boserafe, ditšheruba le baengele ba bangwe ba kafa tlase ga taolo ya gagwe.

Boserafe ba mo maemong a a kwa godimo thata mo thulaganyong ya Modimo. Ba direla kwa setulong sa Modimo sa bogosi. Tiro e nngwe ya bone ke go bolela gore Modimo o boitshepo le go boloka batho ba gagwe ba le phepa semoyeng.—Isaia 6:1-3, 6, 7.

Ditšheruba di direla fa setulong sa Modimo sa bogosi mme di tlotlomatsa bogolo jo bo boitshegang jwa ga Jehofa.—Pesalema 80:1; 99:1; Esekiele 10:1, 2.

Baengele ba bangwe ke baemedi ba ga Jehofa, mme ba diragatsa thato ya Modimo.

[Setshwantsho mo go tsebe 4]

Baengele ba ne ba namola Lote le bomorwadie

[Setshwantsho mo go tsebe 5]

Fa moaposetoloi Johane a ne a leka go obamela moengele, o ne a bolelelwa jaana: “O se ka wa dira jalo!”

[Setshwantsho mo go tsebe 6]

Baengele ba diragatsa katlholo ya Modimo

[Setshwantsho mo go tsebe 7]

A o solegelwa molemo ke tiro ya go rera e e kaelwang ke baengele?