E Nonofile go Gaisa Gouta e e Itshekileng

GOUTA e batliwa thata ka ntlha ya bontle jwa yone le go nonofa ga yone. Lebaka la go bo e ratwa thata jaana ke ka go bo e nna e ntse e phatsima e bile e sa senyege mo go bonalang e le ya goyagoile. Go ntse jalo ka gonne gouta e kgona go emelana le tlhaselo ya metsi, okosejene, sulefura le mo e ka nnang sengwe le sengwe fela. Dilwana tse dintsi tsa bogologolo tse di dirilweng ka gouta tse di fitlhetsweng mo dikepeng tse di nwetseng le mo dilong di sele di sa ntse di phatsima ka tsela e di neng di le ka yone dingwaga tse di makgolokgolo tse di fetileng.

Le fa go ntse jalo, se se kgatlhang ke gore Baebele e bolela gore go na le sengwe se se nonofileng e bile se le “tlhwatlhwakgolo thata go feta gouta e e nyelelang le fa [se] lekwa ka molelo.” (1 Petere 1:7) Gouta e e ‘lekilweng’ kana e e itshekisitsweng ka molelo le ka ditsela tse dingwe e ka nna e itshekile ka diperesente di le 99,9. Le fa go ntse jalo, tota le gouta e e itshekisitsweng e a nyelela, kana e a gakologa, fa e tsenngwa mo teng ga aqua regia e leng (metsi a a pududu), motswako wa dikarolo tse tharo tsa esiti ya hydrochloric le karolo e le nngwe ya esiti ya nitric. Ka gone, Baebele e bua boammaaruri go ya ka saense fa e bolela gore ‘gouta e a nyelela.’

Go farologana le seo, tumelo ya boammaaruri ya Bokeresete ‘e boloka moya o tshela.’ (Bahebera 10:39) Batho ba ka kgona go bolaya motho yo o nang le tumelo e e nonofileng, jaaka ba dirile ka Jesu Keresete. Mme batho ba ba nang le tumelo ya mmatota ba newa tsholofelo eno: “Itshupe o ikanyega go ya losong, mme ke tla go naya serwalo sa botshelo.” (Tshenolo 2:10) Ba ba swelang mo tumelong, Modimo o nna a ba gakologelwa mme o tla ba tsosa mo baswing. (Johane 5:28, 29) Ga go na selekanyo sepe sa gouta se se ka kgonang go dira seo. Mo kgannyeng eno, tota tumelo e tlhwatlhwakgolo thata go feta gouta. Le fa go ntse jalo, gore tumelo e nne le boleng jo bo molemo jalo e tshwanetse ya tlhotlhomisiwa kana ya lekwa. Tota e bile, Petere o ile a re ke ‘boleng jo bo lekilweng jwa tumelo’ jo bo leng tlhwatlhwakgolo go gaisa gouta. Basupi ba ga Jehofa ba ka itumelela go go thusa go ithuta Baebele gore o tle o kgone go nna le tumelo e e nonofileng mo Modimong wa boammaaruri e bong Jehofa le mo go Morwawe e bong Jesu Keresete. Go ya ka Jesu, seno se raya “botshelo jo bo sa khutleng.”—Johane 17:3.