Natefelwa ke Lefoko la Modimo

GO ITUMELA motho yo o ‘natefelwang ke molao wa ga Jehofa.’ Motho yoo o balela Lefoko la Modimo “kwa tlase motshegare le bosigo.” (Pes. 1:1, 2) A le wena o go natefela jalo? O ka oketsa jang boitumelo jo Lefoko la Modimo le go tlisetsang jone?

O se ka wa bala mafoko fela. Leka go bona dilo tse o balang ka tsone ka leitlho la mogopolo. Ikakanye o utlwa mantswe a ba ba nopolwang. Fa o ntse o bala dikgaolo tsa ntlha tsa Baebele, utlwa Jehofa ka boene a senola kgato ka kgato se se dirwang gore lefatshe le tshwanele go nna batho. Reetsa jaaka a bolelela Morwawe, e bong Modiri yo o Setswerere, gore jaanong nako e tlile ya go bopa batho ba ntlha. Bona tiragalo eno mo mogopolong wa gago: Adame le Efa ba a tsuologa, Modimo o a ba atlhola mme morago ga moo, o ba leleka mo Paradaiseng. (Genesise, dikg. 1-3) Utlwa fela gore go tshosa jang fa o bala o utlwa gore lentswe le le tswang kwa legodimong le tlhalosa gore Jesu Keresete ke Morwa Modimo, yo o rategang, yo o romilweng ke Modimo gore a tle go swela batho. (Math. 3:16, 17) Leka go bona kafa moaposetoloi Johane a tsibogang ka gone fa a utlwa Jehofa a bolela jaana: “Bona! Ke dira dilo tsotlhe disha.” (Tshen. 21:5) Eleruri, go bala Lefoko la Modimo ka tsela eno ke selo se se itumedisang!

Tswelela pele o bale pego e e tlhotlheleditsweng, mme o tla itse Jehofa e le motho yo o tlotlometseng le yo o boitshegang. O tla ikutlwa o gogelwa go nna gaufi thata le Yono yo o re ratang, yo o dirisanang le rona ka bopelotlhomogi, yo o re thusang fa re nna re leka go dira thato ya gagwe ka boikokobetso, le yo o re bontshang kafa re ka atlegang ka gone mo go tsotlhe tse re di dirang.—Josh. 1:8; Pes. 8:1; Isa. 41:10.

Fa o dirisa nako e ntsi o bala Baebele, o tla kgotsofala fela thata fa o nna o itse go ya pele se thato ya Modimo ka wena e leng sone. Mme ga o na go itumelela seo fela. Fa go bala ga gago go go naya thuso e o e tlhokang go lebana le mathata ka botlhale, o tla ikutlwa jaaka mopesalema yo o neng a bolela jaana: “Dikgakololo tsa gago di molemo thata. Ke gone ka moo moya wa me o di bolokileng.” (Pes. 119:129) Le wena o tla itumela fa, ka go ithuta ga gago Dikwalo, o ntse o lemoga melaometheo e e thusang go bopa mogopolo wa gago le dikeletso tsa gago ka tsela ya bomodimo.—Isa. 55:8, 9.

Baebele e re naya kaelo mo dilong tse di malebana le boitsholo, kaelo e e re sireletsang mo dilong tse di gobatsang e bile e re bontsha tsela e e siameng. Fa re e bala, re a lemoga gore Jehofa ke Rre yo o itseng mathata a a tla re tlhagelang fa re ineela mo dikeletsong tsa nama e e sa itekanelang. Ga a batle re tlelwa ke ditlamorago tse di botlhoko tse di tla re tlelang fa re nyatsa ditekanyetso tsa gagwe tsa maemo a a kwa godimo tsa boitsholo. O amega ka rona e bile o batla gore re ipelele tsela e e molemolemo ya botshelo. Fa re bala Lefoko la gagwe, seno se re thusa go lemoga ka botlalo gore re lesego go le kana kang go bo a le Modimo wa rona le Rraarona wa selegodimo.

Mopesalema o ne a bua jaana ka motho yo o balang Lefoko la Modimo letsatsi le letsatsi: “Sengwe le sengwe se a se dirang se tla atlega.” (Pes. 1:3) Ee, le fa re sa itekanela go le kana kang, le fa re tshela mo tsamaisong e e boikepo ya dilo ya ga Satane, e bile le fa Diabolo a leka jang go re kometsa, go bala Lefoko la Modimo ka metlha le go le dirisa go tla re thusa gore re atlege mo go sengwe le sengwe se se amang kamano ya rona le Jehofa.

E re ka re gateletswe ke tsamaiso eno ya bogologolo, go monya dikakanyo tsa Mmopi le fa e ka nna ka metsotso e sekaenyana fela letsatsi le letsatsi go ka re nonotsha. Bangwe ba ba neng ba tsentswe mo kgolegelong ka ntlha ya tumelo ya bone ba ne ba kgona go bona fela ditemana dingwe tse di neng di nopotswe mo ditlhogong tsa makwalodikgang. Ba ne ba di kgaola mo makwalodikgannyeng a di neng di kwadilwe mo go one, ba dira gore ba di tshwarelele ka tlhogo, ba bo ba tlhatlhanya ka tsone. Jehofa o ne a segofatsa maiteko a bone ka gonne ba ne ba dira se maemo a bone a neng a ba letla go se dira gore ba anye kitso go tswa mo Lefokong la Modimo. (Math. 5:3) Le fa go ntse jalo, ba le bantsi ba rona re gololesegile thata go feta bone. Ga re a tshwanela go swetsa ka gore go bala temana e le nngwe ya Baebele ka bonako fela gangwe ka letsatsi, ka bogone go tla re tlisetsa dikgakgamatso. Le fa go ntse jalo, re tla segofadiwa fa re rulaganya dilo tsa rona gore re bale karolo nngwe ya Baebele letsatsi le letsatsi, re akanye ka yone, re bo re e dirise mo matshelong a rona.

Ke boammaaruri gore le fa re ka rulaganya dilo sentle jang, go tla nna le dinako tse dithulaganyo tsa rona di kgoreletsegang ka tsone. Fa seo se direga, re tla dira gore dilo tse tota di leng botlhokwa e nne tsone di tlang pele. Ka sekai, ga re ke re fetsa letsatsi lotlhe kgotsa malatsi a le mmalwa fela ka boomo re sa nwe metsi. Ka jalo, le fa go ka tswa go direga eng mo matshelong a rona, re tshwanetse go ipha nako ya go itapolosa ka metsi a boammaaruri.—Dit. 17:11.

A o badile Baebele yotlhe? Bangwe ba tshosiwa ke kgang fela ya go bala go tswa kwa go Genesise go fitlha kwa go Tshenolo. Ka gone batho ba le bantsi ba ba neng ba batla go bala Baebele yotlhe ba ne ba simolola ka go bala pele Dikwalo Tsa Bokeresete Tsa Segerika. Ka ntlha yang? Gongwe e ne e le ka gonne ba ne ba kgona go bona ka bonako kafa dibuka tseo tsa Baebele di ba amang ka gone jaaka batho ba ba batlang go tsamaya mo dikgatong tsa ga Keresete. Kgotsa gongwe e ne e le ka gonne Dikwalo Tsa Bokeresete Tsa Segerika di ne di bonala di se dintsi go le kalo go di bala—e le karolonyana e e kwa godingwana fela ga nngwennèng ya Baebele yotlhe. Mme fa ba fetsa go bala dibuka tseo tse 27, ba ne ba ya kwa dibukeng tse 39 tsa Dikwalo Tsa Sehebera mme ba simolola go di bala le go di itumelela. Ka nako ya fa ba fetsa Dikwalo Tsa Sehebera, ba a bo ba setse ba itiretse thulaganyo ya go bala Baebele ka metlha, ka jalo ba a tswelela, ba bala Dikwalo Tsa Bokeresete Tsa Segerika lekgetlho la bobedi, mme ga ba ise ba ko ba tlogele go dira jalo fa e sale. E kete le wena o ka dira gore go bala Lefoko la Modimo letsatsi le letsatsi e nne mokgwa wa gago wa botshelo jotlhe.

A go na le mongwe mo lelapeng la gaeno kgotsa mo phuthegong ya lona yo o sa itseng go bala? Ke ka ntlha yang fa o sa ithaopele go balela motho yoo Baebele ka metlha? O tla solegelwa molemo, mme le ene o tla solegelwa molemo fa a tlhatlhanya ka se a se utlwang a bo a se dirisa mo botshelong jwa gagwe.—Tshen. 1:3.

Fa nako e ntse e ya, o ka nna wa batla go simolola diporojeke tse di kgethegileng malebana le go bala ga gago Baebele. Dingwe tsa tsone di ka go thusa go anaanela botokanyana kafa dikarolo tse di farologaneng tsa Baebele di amanang ka gone. Fa e le gore Baebele ya gago e na le ditshupiso, di ka nna tsa go isa kwa tshedimosetsong nngwe ya hisitori le kwa ditemaneng tse dingwe tse di buang ka tiragalo e e tshwanang. Di ka nna tsa go thusa go lemoga maemo a a neng a dira gore go kwalwe dipesalema tse di farologaneng mmogo le makwalo a a kwadilweng ke baaposetoloi ba ga Jesu Keresete. Insight on the Scriptures e na le tshedimosetso e e seng kana ka sepe ka batho, mafelo le dinonofo tse di umakiwang mo Baebeleng. Ditšhate di lebisa tlhokomelo kwa go diragadiweng ga boporofeti jwa Baebele, di bontsha gore ke dikgosi dife le baporofeti bafe ba ba neng ba tshela mo motlheng o le mongwe, e bile di bontsha matlha a go lekanyediwang gore ke a ditiragalo di le dintsi tsa Baebele.

Fa o ntse o tlhatlhanya ka se o se ithutang, o tla tlhaloganya mabaka a go bo go ne go tlhaga maemo mangwe mo gare ga batho ba Modimo. Gape o tla bona gore ke ka ntlha yang fa Jehofa a ile a dirisana le batho ba gagwe ka tsela e a neng a dirisana le bone ka yone. O tla bona kafa Jehofa a lebang ditiro tsa dipuso, ditšhaba le batho ka gone. Seno se tla go thusa go lemoga mogopolo wa gagwe ka mo go golwanyane.

Hisitori ya Baebele e tla go kgatlha le go feta fa o leka go bona ka leitlho la mogopolo mafelo a ditiragalo di diragaletseng kwa go one. Dimmapa tsa mafatshe a Baebele di bontsha popego ya lefelo le dikgala tse di neng di le teng fa gare ga mafelo a a farologaneng. Ka sekai, Baiseraele ba kgabagantse Lewatle le Lehibidu fa kae? Naga e e Solofeditsweng e ne e le bogolo jo bo kana kang? Jesu o ne a tsamaya sekgala se se kana kang fa a ntse a diragatsa bodiredi jwa gagwe jwa mo lefatsheng? Paulo o ne a bona mafelo a a ntseng jang mo maetong a gagwe a borongwa? Dimmapa le tsela e mafelo a a farologaneng a tlhalosiwang ka yone di ntsha dintlha tse di tla dirang gore mmalo wa gago o nne le botshelo. O ka bona kae dimmapa tsa mafatshe a Baebele? Dingwe tsa tsone di tlhaga mo Baebeleng ya Thanolo ya Lefatshe le Lesha ya Dikwalo Tse di Boitshepo. Dibolumo tsa Insight di na le dimmapa di ka nna 70, gape go na le intekese ya dimmapa kwa bokhutlong jwa bolumo ya ntlha. Dirisa Watch Tower Publications Index go bona dimmapa tse dingwe. Fa e le gore ga lo na dibuka tseno, dirisa dimmapa tse di gatisitsweng mo dimakasineng tsa Tora ya Tebelo gore di go thuse fa o bala Baebele.

Mo Dikwalong Tsa Sehebera, Kgosi Dafide o ne a baka Jehofa, a re: “A bo dikakanyo tsa gago di le tlhwatlhwakgolo jang ne mo go nna! Oo Modimo, a bo palo yotlhe ya tsone e le kana kang!” (Pes. 139:17) Mo Dikwalong Tsa Bokeresete Tsa Segerika, moaposetoloi Paulo o ne a baka Jehofa ka gonne O “phatsimile mo dipelong tsa rona go di bonesa ka kitso e e galalelang ya Modimo ka sefatlhego sa ga Keresete.” (2 Bakor. 4:6) Dafide o tshetse makgolokgolo a dingwaga pele ga Paulo; le fa go ntse jalo, ka bobedi jwa bone ba ne ba natefelwa ke Lefoko la Modimo. Le wena le ka go natefela fa o ipha nako ya go bala sotlhe se Jehofa a se go neileng mo ditsebeng tsa Lefoko la gagwe le le tlhotlheleditsweng.