Re Ka Tswelela Jang Re Na Le “Boikutlo Jwa Go Leta”?

 1. Ke ka ntlha yang fa re ka tswa re fela pelo?

FA BOGOSI jwa Bomesia bo ne bo tlhomiwa ka 1914, seo se ne se bontsha gore tsamaiso ya ga Satane e mo malatsing a bofelo. Ka ntlha ya ntwa e e neng ya nna teng kwa legodimong, Jesu o ne a latlhela Diabolo le madimona a gagwe mo lefatsheng. (Bala Tshenolo 12:7-9.) Satane o a itse gore “o na le lobaka lo lokhutshwane lwa nako.” (Tshen. 12:12) Le fa go ntse jalo, ‘lobaka loo lwa nako’ ga lo bolo go tswelela ka masomesome a dingwaga, ka jalo, batho bangwe ba ka nna ba akanya gore metlha eno ya bofelo e tsere lobaka lo loleele. Fa re ntse re letile gore Jehofa a tseye kgato, a le rona re fela pelo?

 2. Re tlile go tlotla ka eng mo setlhogong seno?

² Go fela pelo go ka nna kotsi, ka gonne go ka dira gore re dire dilo ka lepotlapotla. Re ka dira jang gore re tswelele re na le boikutlo jwa go leta? Setlhogo seno se tla re thusa gore re ka dira seo jang ka go araba dipotso tse di latelang. (1) Re ka ithuta eng malebana le go nna pelotelele mo sekaong sa ga moporofeti Mika? (2) Ke ditiragalo dife tse di tla bontshang bokhutlo jwa go leta ga rona? (3) Re ka bontsha jang gore re anaanela bopelotelele jwa ga Jehofa?

 3. Mo motlheng wa ga Mika, maemo a ne a ntse jang kwa Iseraele?

³ Bala Mika 7:2-6. Moporofeti wa ga Jehofa e bong Mika, o ne a bona boemo jwa semoya jwa kwa Iseraele bo senyega go fitlha bo nna maswe thata fa ba ne ba busiwa ke Kgosi Ahase yo o boikepo. Mika o tshwantsha Baiseraele ba ba sa ikanyegeng le “mongana” le “legora la mitlwa.” Fela jaaka mongana kgotsa legora la mitlwa le tlhaba motho yo o tsamayang mo go lone, Baiseraele bao ba ba bosula ba ne ba gobatsa ope fela yo ba neng ba dirisana le ene. Bosula joo jwa bone bo ne jwa nna maswe le go feta mo e leng gore dikamano tsa malapa di ne tsa senyega. E re ka Mika a ne a lemoga gore ga go sepe se a ka se dirang ka boemo joo, o ne a bulela Jehofa mafatlha ka thapelo. Go tswa foo, o ne a leta Modimo ka bopelotelele gore a tseye kgato. Mika o ne a tlhatswegile pelo gore Jehofa o tla tsaya kgato ka nako ya Gagwe.

 4. Ke dikgwetlho dife tse re lebanang le tsone?

⁴ Fela jaaka Mika, le rona re tshwanelwa ke go tshela le batho ba ba ikakanyetsang ba le bosi. Bontsi jwa bone ke batho “ba ba sa lebogeng, ba ba sa ikanyegeng, ba ba se nang lorato lwa tlholego.” (2 Tim. 3:2, 3) Go ngomola pelo tota go bona batho ba re berekang le bone, ba re tsenang sekolo le bone le baagelani ba rona ba sa akanyetse batho ba bangwe. Le fa go ntse jalo, bangwe ba batlhanka ba Modimo ba lebane le kgwetlho e kgolo thata. Jesu o ne a re balatedi ba gagwe ba tla ganediwa ke ba lelapa, e bile o ne a dirisa mafoko a a tshwanang le a a mo go Mika 7:6 go tlhalosa gore molaetsa wa gagwe o ne o tla ama batho jang. Jesu o ne a re: “Ke tlile go baka kgaogano, monna kgatlhanong le rraagwe, le morwadi kgatlhanong le mmaagwe, le mosadi yo mmotlana kgatlhanong le matsalaagwe. Eleruri, baba ba motho e tla nna batho ba ntlo ya gagabo.” (Math. 10:35, 36) Ruri ke kgwetlho e kgolo go itshokela go sotliwa le go ganediwa ke ba lelapa ba e seng Basupi! Fa re lebane le teko e e ntseng jalo, a re se ka ra ineela fa re gatelelwa ke ba lelapa. Go na le moo, a re nneng re ikanyega mme re lete Jehofa ka bopelotelele gore a rarabolole mathata. Fa re nna re mo kopa gore a re thuse, o tla re naya maatla le botlhale gore re kgone go itshoka.

5, 6. Jehofa o ne a duela Mika jang, mme gone Mika ga a ka a bona eng?

⁵ Jehofa o ne a duela Mika ka gonne a ne a le pelotelele. Mika o ne a bona fa Kgosi Ahase a ne a fedisiwa le puso ya gagwe e e boikepo. O ne a bona fa morwa wa ga Ahase e bong Kgosi Hesekia yo o molemo, a tlhomiwa mo setulong sa bogosi mme a tsosolosa kobamelo e e itshekileng. Molaetsa wa ga Jehofa wa katlholo kgatlhanong le Samarea o o neng wa bolelwa ke Mika, o ne wa diragadiwa fa Baasiria ba ne ba tlhasela bogosi jwa Iseraele jwa kwa bokone.—Mik. 1:6.

⁶ Le fa go ntse jalo, Mika ga a ka a bona go diragadiwa ga sotlhe se Jehofa a neng a mo tlhotlheleditse gore a se porofete. Ka sekai, Mika o ne a re: “Go ela kwa bokhutlong jwa metlha . . . thaba ya ntlo ya ga Jehofa e tla tlhomamisiwa thata kwa godimo ga ditlhoa tsa dithaba, mme eleruri e tla tsholelediwa kwa godimo ga dithota; mme ditšhaba di tla ologela kwa go yone. Mme ditšhaba di le dintsi di tla ya mme di re: ‘Tlang, a re tlhatlogeleng kwa thabeng ya ga Jehofa.’” (Mik. 4:1, 2) Mika o ne a swa lobaka lo loleele pele ga boporofeti joo bo diragadiwa. Le fa go ntse jalo, o ne a ikemiseditse go nna a ikanyega mo go Jehofa go fitlha a swa, go sa kgathalesege gore batho ba a neng a tshela le bone ba ne ba dira eng. Mika o ne a bua jaana, malebana le seo: “Ditšhaba tsotlhe, di tla tsamaya sengwe le sengwe mo leineng la modimo wa sone; mme fa e le rona, re tla tsamaya mo leineng la ga Jehofa Modimo wa rona ka bosakhutleng, le ka bosaengkae.” (Mik. 4:5) Mika o ne a kgona go leta ka bopelotelele mo dinakong tseo tse di ngomolang pelo, ka gonne a ne a tlhatswegile pelo gore Jehofa o tla diragatsa ditsholofetso tsotlhe tsa Gagwe. Moporofeti yono yo o ikanyegang o ne a ikanya Jehofa.

7, 8. (a) Ke ka ntlha yang fa re na le lebaka la go ikanya Jehofa? (b) Ke eng se se tla dirang gore nako e fete ka bonako?

⁷ A le rona re ikanya Jehofa ka tsela eo? Re na le lebaka le le utlwalang la go mo ikanya. Re iponetse ka matlho go diragadiwa ga boporofeti jwa ga Mika. Mo “bokhutlong jwa metlha,” dimilione tsa batho tse di tswang mo ditšhabeng tsotlhe le lotso le teme di ologetse kwa ‘thabeng ya ntlo ya ga Jehofa.’ Le fa gone baobamedi bano ba tswa mo ditšhabeng tse di sa utlwaneng, ba thudile “ditšhaka tsa bone ba di dira magale a megoma” mme ga ba tlhole ba batla go “ithuta ntwa gape.” (Mik. 4:3) Ruri ke tshiamelo go bo le rona re le bangwe ba batho ba ga Jehofa ba ba nang le kagiso!   

⁸ Go a utlwala go bo re batla gore Jehofa a fedise tsamaiso eno e e boikepo ka bonako. Le fa go ntse jalo, fa re batla go leta ka bopelotelele, re tshwanetse go leba dilo ka tsela e Jehofa a di lebang ka yone. O beile letsatsi le ka lone a tlileng go atlhola batho a dirisa Jesu Keresete, “monna yo a mo tlhomileng.” (Dit. 17:31) Le fa go ntse jalo, pele ga moo, Modimo o naya batho tshono ya gore ba nne le ‘kitso e e leng ya boammaaruri,’ le gore ba dire dilo go dumalana le kitso eo mme ba bolokiwe. Matshelo a a botlhokwa a mo kotsing. (Bala 1 Timotheo 2:3, 4.) Fa re nna re tshwaregile ka go thusa batho gore ba nne le kitso ya boammaaruri ka Modimo, nako e e setseng ya gore Jehofa a tlise katlholo e feta ka bonako thata. Go ise go ye kae, nako eo e tla bo e fetile. Fa e fetile, ruri re tla bo re itumetse gonne re ile ra nna re tshwaregile mo tirong ya go rera ka Bogosi!

9-11. A 1 Bathesalonika 5:3 e setse e diragaditswe? Tlhalosa.

⁹ Bala 1 Bathesalonika 5:1-3. Mo bogautshwaneng, ditšhaba di tla re: “Kagiso le polokesego!” Fa re sa batle gore le rona re tsiediwe, re tshwanetse go ‘nna re tsogile re bo re nne re thantse mo ditlhaloganyong.’ (1 Bathes. 5:6) Gore re kgone go nna re thantse semoyeng, a re sekasekeng ka bokhutshwane ditiragalo tse di nnang teng pele ga go dirwa kitsiso eno e e kgethegileng.

¹⁰ Morago ga dintwa tsa lefatshe tse pedi, ditšhaba di ne tsa goa di batla gore go nne le kagiso. Morago ga ntwa ya ntlha ya lefatshe, go ne ga tlhomiwa lekgotla la Kgolagano ya Ditšhaba ka tsholofelo ya gore go tla nna le kagiso mo lefatsheng. Morago ga ntwa ya bobedi ya lefatshe, lekgotla la Ditšhaba Tse di Kopaneng e ne ya nna lone le le itsegeng thata le go neng go solofelwa gore le tla dira gore go nne le kagiso mo lefatsheng. Baeteledipele ba puso le ba bodumedi ba ntse ba lebeletse gore mekgatlho eno e tlisetse batho kagiso. Ka sekai, ka 1986, lekgotla la Ditšhaba Tse di Kopaneng le ne la ntsha tumalano e e neng e bontsha gore ngwaga oo ke Ngwaga wa Boditšhabatšhaba wa Kagiso. Ka one ngwaga oo, baeteledipele ba ba tswang mo ditšhabeng di le dintsi le ba madumedi a mantsi ba ne ba kopanela le moeteledipele wa Kereke ya Katoliki kwa Assisi kwa Italy go tla go rapelela kagiso.

¹¹ Le fa go ntse jalo, kitsiso ya kagiso le polokesego le tse dingwe tse di tshwanang le yone ga di a kgona go diragatsa boporofeti jo mo go 1 Bathesalonika 5:3. Ka ntlha yang? Ka gonne “tshenyego ya tshoganyetso” e go boleletsweng pele ka yone ga e ise e diragale.

12. Re itse eng ka kitsiso ya “Kagiso le polokesego”?

¹² Ke mang mo isagweng yo o tla dirang kitsiso eno e kgolo ya “Kagiso le polokesego”? Baeteledipele ba madumedi a a ipitsang a Bokeresete le ba madumedi a mangwe ba tla nna le seabe sefe? Baeteledipele ba dipuso tse di farologaneng ba tla nna le seabe sefe mo kitsisong eno? Dikwalo ga di re bolelele sepe ka kgang eo. Se re se itseng ke gore, go sa kgathalesege gore kitsiso eo e tla tla ka tsela efe, kgotsa e tla dira gore batho ba tlhatswege pelo go le kana kang, e tla bo e se kagiso ya mmatota. Tsamaiso eno ya bogologolo e tla bo e sa ntse e laolwa ke Satane. E bodile gotlhelele mme e tla tswelela e ntse jalo. Ruri go tla bo go utlwisa botlhoko fa ope wa rona a ka dumela maaka a ga Satane mme a itetla go tsaya letlhakore mo dipolotiking!

13. Ke eng fa baengele ba ngangatletse diphefo tse di senyang?

¹³ Bala Tshenolo 7:1-4. Fa re ntse re letetse go diragadiwa ga 1 Bathesalonika 5:3, baengele ba ba maatla ba ngangatletse diphefo tse di senyang tsa pitlagano e kgolo. Ba letetse eng? Tiragalo nngwe e kgolo e ba e letetseng e tlhalosiwa ke moaposetoloi Johane—go tshwaiwa labofelo ga “batlhanka ba Modimo wa rona” ba ba tloditsweng.a Fa ba setse ba tshwailwe, baengele ba tla tlogela diphefo tse di senyang. Go tswa foo go tla diragala eng?

14. Ke eng se se bontshang gore go wa ga Babelona yo Mogolo go gaufi?

¹⁴ Babelona yo Mogolo yo e leng mmusomogolo wa bodumedi jwa maaka, o tla fedisiwa ka tsela e e mo tshwanetseng. “Batho le boidiidi le ditšhaba le diteme,” ba ka se ka ba kgona go mo ema nokeng. Gone jaanong re setse re bona ditiragalo tse di bontshang gore go senngwa ga gagwe go gaufi. (Tshen. 16:12; 17:15-18; 18:7, 8, 21) Tota e bile, re setse re kgona go bona mo metsweding ya dikgang gore Babelona ga a tlhole a engwa nokeng, ka gonne bodumedi le baeteledipele ba jone ba ntse ba tlhaselwa. Le fa go ntse jalo, baeteledipele ba Babelona yo Mogolo ba akanya gore ga ba mo kotsing epe. A bo ba fositse jang ne! Morago ga kitsiso ya “Kagiso le polokesego!” ka bonako fela mekgatlho ya dipolotiki ya tsamaiso ya ga Satane e tla tlhasela bodumedi jwa maaka mme e bo e bo fedisa. Babelona yo Mogolo ga a kitla a tlhola a bonwa gape! Ruri go tla bo go le molemo gore re letele ka bopelotelele ditiragalo tseo tse di botlhokwa.—Tshen. 18:8, 10.

15. Ke ka ntlha yang fa Jehofa a sa ka a potlakela go tsaya kgato?

¹⁵ Go sa kgathalesege gore batho ba kgoba leina la ga Jehofa go le kana kang, o ntse a letile ka bopelotelele gore nako e e tshwanetseng ya gore a tseye kgato e fitlhe. Jehofa ga a batle gore ope wa batho ba gagwe ba ba dipelo di ikanyegang a senngwe. (2 Pet. 3:9, 10) A le rona re ikutlwa jalo? Pele ga letsatsi la ga Jehofa le tla, re ka kgona go bontsha gore re anaanela bopelotelele jwa gagwe ka ditsela tse di latelang.

16, 17. (a) Ke eng fa re tshwanetse go thusa ba ba tsidifetseng? (b) Ke eng fa go potlakile gore batho ba ba tsidifetseng ba boele kwa go Jehofa?

¹⁶ Thusa ba ba tsidifetseng. Jesu o ne a re, go nna le boitumelo kwa legodimong fa nku e le nngwe e e latlhegileng e bonwa. (Math. 18:14; Luke 15:3-7) Ga go pelaelo gore Jehofa o amega thata ka batho botlhe ba ba ileng ba bontsha gore ba rata leina la gagwe, tota le fa gone jaanong ba sa mo direle. Fa re thusa batho bano gore ba boele mo phuthegong, re nna le seabe mo go direng gore Jehofa le baengele ba gagwe ba itumele.

¹⁷ A le wena o mongwe wa batho ba gone jaanong ba sa direleng Modimo? Gongwe mongwe mo phuthegong o ne a go kgopisa mme ka ntlha ya seo, o ne wa tlogela go kopanela le phuthego ya ga Jehofa. E re ka go ka tswa go setse go fetile nako e e rileng, ipotse jaana: ‘A gone jaanong botshelo jwa me bo na le bokao go feta pele e bile ke itumetse go gaisa mo nakong e e fetileng? A Jehofa ke ene a nkgopisitseng kgotsa ke kgopisitswe ke motho yo o sa itekanelang? A go na le sengwe se Jehofa Modimo a se dirileng se se nkutlwisitseng botlhoko?’ Boammaaruri ke gore, ka metlha Jehofa o re direla dilo tse di molemo. Tota le fa re sa tshelele boineelo jwa rona, o re letla gore re itumelele dilo tse di molemo tse a re tlamelang ka tsone. (Jak. 1:16, 17) Go ise go ye kae, letsatsi la ga Jehofa le tla goroga. Jaanong, eno ke nako ya go boela mo diatleng tse di lorato tsa Rraarona le mo phuthegong ya gagwe—lefelo le le nosi le le babalesegileng mo metlheng eno ya bofelo.—Dute. 33:27; Baheb. 10:24, 25.

18. Ke ka ntlha yang fa re tshwanetse go ema nokeng ba ba re eteletseng pele?

¹⁸ Ema nokeng ba ba eteletseng pele. E re ka Jehofa e le Modisa yo o lorato, o a re kaela le go re sireletsa. O tlhomile Morwawe go nna Modisa yo Mogolo wa letsomane. (1 Pet. 5:4) Bagolwane mo diphuthegong di feta 100 000 ba dirisa nako ya bone go tlhokomela nku nngwe le nngwe ya Modimo. (Dit. 20:28) Fa re ema nokeng ka botlalo ba ba tlhomilweng gore ba re etelele pele, re bontsha gore re anaanela sotlhe se Jehofa le Jesu ba re diretseng sone.

19. Re ka kgona jang go emelana le Satane?

¹⁹ Atamalanang. Seno se kaya eng? Fa masole a a katisitsweng sentle a tlhaselwa ke mmaba, a a atamalana gore go se ka ga nna le diphatlha tse mmaba a ka tsenang mo go tsone. Ka go dira jalo, ba itirela tshireletso e e ka se kang ya senngwa. Satane o nonotsha tsela e a tlhaselang batho ba Modimo ka yone. Eno ga se nako ya gore re lwantshane. Ke nako ya gore re atamalane re itlhokomolose makoa a ba bangwe mme re bontshe gore re ikanya tsela e Jehofa a re etelelang pele ka yone.

20. Ke eng se re tshwanetseng go se dira gone jaanong?

²⁰ A rotlhe re nneng re thantse semoyeng mme re bontshe boikutlo jwa go leta. A re nneng pelotelele mme re letele kitsiso ya “Kagiso le polokesego!” le go tshwaiwa labofelo ga ba ba tlhophilweng. Morago ga foo, baengele ba le banè ba tla tlogela diphefo tse di senyang mme Babelona yo Mogolo o tla senngwa. Fa re ntse re letetse ditiragalo tseno tse dikgolo, a re amogeleng kaelo ya ba ba tlhomilweng go re etelela pele mo phuthegong ya ga Jehofa. A re emelaneng le Diabolo le madimona a gagwe! Eno ke nako ya gore re reetse kgakololo eno ya mopesalema: “Nnang pelokgale, mme e kete pelo ya lona e ka nonofa, lona lotlhe ba lo letileng Jehofa.”—Pes. 31:24.