A o Ne o Itse?

Ke eng fa batho ba re “amen” kwa bofelong jwa thapelo?

Lefoko “amen,” ka Setswana le ka Segerika, le ranotswe go tswa mo lefokong la Sehebera e leng ʼa·menʹ. Lefoko leno, le gantsi batho ba le buang fa ba reeditse thapelo, maikano, tshegofatso kgotsa phutso, totatota le raya “a go nne jalo” kgotsa “ruri.” Fa ba bua jalo seno se bontsha gore ba dumalana le dilo tse di neng di buiwa mo thapelong. Go ya ka buka nngwe ya ditshupiso, “lefoko leno le naya kgopolo ya gore se go buiwang ka sone se tla diragala, se boammaaruri, se a ikanyega e bile ga se belaetse.” Mo metlheng ya Baebele, lefoko leno le ne le kaya gore motho yo o le buang o dumalana le ikano le gore o dumela gore fa a sa dire go ya ka ikano eo o tla lebana le ditlamorago tsa yone.—Duteronome 27:15-26.

Fa Jesu a ne a rera le fa a ruta, o ne a tle a simolole ka go re “amen.” Ka go rialo, o ne a bontsha gore se a tlileng go se bua se ne se ka ikanngwa. Mo makgetlong a Jesu a dirisitseng lefoko leno mo go one fa a simolola go bua, lefoko la Segerika a·menʹ le ranotswe e le “ammaaruri.” (Mathaio 5:18; 6:2, 5) Fa Jesu a ne a bua lefoko leno gabedi, jaaka fa re bona mo Efangeleng ya ga Johane, mafoko ao a ranolwa e le “ammaaruri ammaaruri.” (Johane 1:51) Go bolelwa fa go dirisa ga ga Jesu lefoko amen ka tsela eno go sa tshwane le epe mo dibukeng tse di boitshepo.

Mo Dikwalong Tsa Bokeresete Tsa Segerika, Jesu o bidiwa “Amen” go bontsha gore bosupi jwa gagwe ‘bo a ikanyega e bile bo boammaaruri.’—Tshenolo 3:14.

Urime le Thumime e ne e le eng?

Go bonala kwa Iseraele wa bogologolo go ne go dirisiwa Urime le Thumime go bona gore Jehofa o ne a batla gore setšhaba kgotsa baeteledipele ba sone ba direng. Di ne di newa moperesiti yo mogolo mme di bewa mo kgetsaneng ya “letlatla la sehuba la katlholo.” (Ekesodo 28:15, 16, 30) Le fa Dikwalo di sa tlhalose sentle gore Urime le Thumime di ne di dirisiwa jang, go bonala ditemana tse di sa tshwaneng tsa Baebele di bontsha gore di ne di dirisiwa jaaka bola go bontsha gore Modimo o araba ka “ee,” ka “nnyaa,” kgotsa ga a arabe gotlhelele.

Sekai sengwe sa kafa Urime le Thumime di neng tsa dirisiwa jalo ka gone ke fa Dafide a ne a re Abiathare a mo tlisetse khiba ya moperesiti yo mogolo e e ka tswang e na le tsone. Dafide o ne a botsa Jehofa dipotso tseno tse pedi: ‘A Saulo o tla ntshala morago?’ le ‘A beng ba naga ba Keila ba tla ntsenya mo seatleng sa gagwe?’ Karabo ya dipotso tse pedi tseno e ne e le ee, mme seo se ne sa thusa Dafide gore a dire ditshwetso tse di siameng.—1 Samuele 23:6-12.

Pelenyana ga foo, Kgosi Saulo o ne a dirisitse Urime le Thumime go tlhomamisa gore a molato e ne e le wa batho kgotsa wa gagwe le Jonathane, mme o ne a di dirisa gape go bona gore a e ne e le ene kgotsa morwawe yo o neng a le molato. (1 Samuele 14:40-42) Moragonyana fa Modimo a ne a sa tlhole a amogela Saulo, o ne a sa tlhole a mo kaela, “e ka tswa e le ka ditoro kgotsa ka Urime kgotsa ka baporofeti.”—1 Samuele 28:6.

Go ya ka ngwao ya Bajuda, Urime le Thumime di ne tsa se ka tsa tlhola di dirisiwa fa tempele ya ga Jehofa e ne e senngwa ka 607 B.C.E.

[Setshwantsho mo go tsebe 27]

“Amen,” Tshenolo 3:14. The Codex Alexandrinus, ya lekgolo la botlhano la dingwaga C.E.