le amanya Sheole le Hadese le mofuta wa loso lo batho ba tla tsosiwang mo go lone.a (Jobe 14:13; Ditiro 2:31; Tshenolo 20:13) Gape, Lefoko la Modimo le bontsha gore ba ba leng mo Sheole, kgotsa mo Hadese, ga se fela ba ba neng ba direla Jehofa mme gape ba akaretsa le ba bangwe ba bantsi ba ba neng ba sa mo direle. (Genesise 37:35; Pesalema 55:15) Ka jalo, Baebele e ruta gore go tlile go nna le “tsogo ya ba ba siameng mmogo le ba ba sa siamang.”—Ditiro 24:15.

GO TLA eng mo mogopolong wa gago fa o akanya ka Letsatsi la Katlholo? Batho ba le bantsi ba akanya gore dibilione tsa batho di tla tlisiwa ka bongwe ka bongwe fa pele ga setulo sa Modimo sa bogosi. Mme fa ba le fa pele ga sone, mongwe le mongwe o tla atlholwa. Bangwe ba tla segofadiwa ka go ya go tshela kwa legodimong, mme ba bangwe bone ba tla atlholelwa tlhokofatso ya bosakhutleng. Le fa go ntse jalo, Baebele yone e bua se sele gotlhelele fa e bua ka nako ya katlholo. Lefoko la Modimo le e tlhalosa e se nako e e boifisang, mme e le nako ya go nna le tsholofelo le ya go tsosolosiwa ga dilo tsotlhe.

Mo go Tshenolo 20:11, 12, re bala mafoko ano a ga moaposetoloi Johane a a tlhalosang Letsatsi la Katlholo: “Ka bona setulo sa bogosi se segolo se sesweu le yo o ntseng mo go sone. Lefatshe le legodimo tsa tshaba fa pele ga gagwe, mme tsa se ka tsa bonelwa bonno. Mme ka bona baswi, ba bagolo le ba bannye, ba eme fa pele ga setulo sa bogosi, mme dikwalo tsa momeno tsa bulwa. Mme lokwalo lwa momeno lo longwe lo ne lwa bulwa; ke lokwalo lwa momeno lwa botshelo. Mme baswi ba ne ba atlholwa go ya ka dilo tse di kwadilweng mo dikwalong tseno tsa momeno go ya ka ditiro tsa bone.” Moatlhodi yo go buiwang ka ene fano ke mang?

Jehofa Modimo ke ene Moatlhodi yo mogolo wa batho. Le fa go ntse jalo, o abetse mongwe o sele tiro ya gagwe ya go atlhola. Go ya ka Ditiro 17:31, moaposetoloi Paulo o ne a re Modimo “o tlhomile letsatsi le ka lone a ikaelelang go atlhola lefatshe le le nang le banni ka tshiamo ka monna yo a mo tlhomileng.” Moatlhodi yo o tlhomilweng yono ke Jesu Keresete yo o tsositsweng mo baswing. (Johane 5:22) Le fa go ntse jalo, Letsatsi le Katlholo le simolola leng? Le tsaya lobaka lo lo kae?

Buka ya Tshenolo e bontsha gore Letsatsi la Katlholo le simolola morago ga ntwa ya Aramagedona, fa tsamaiso ya ga Satane mo lefatsheng e tla bo e sentswe.a (Tshenolo 16:14, 16; 19:19–20:3) Morago ga Aramagedona, Satane le madimona a gagwe ba tla tsenngwa mo moleteng dingwaga di le sekete. Mo nakong eo, baruaboswa ba selegodimo ba ba 144 000 e tla bo e le baatlhodi e bile ba tla bo ba busa “e le dikgosi le Keresete dingwaga di le sekete.” (Tshenolo 14:1-3; 20:1-4; Baroma 8:17) Letsatsi la katlholo ga se letsatsi le le tlileng go feta ka bonako la diura tse 24. Le tsaya dingwaga di le sekete.

Mo nakong eo ya dingwaga tse di sekete, Jesu Keresete o tla “atlhola batshedi le baswi.” (2 Timotheo 4:1) “Batshedi” e tla bo e le “boidiidi jo bogolo” jo bo tla falolang Aramagedona. (Tshenolo 7:9-17) Gape, moaposetoloi Johane o ile a bona “baswi . . . ba eme fa pele ga setulo sa bogosi” sa katlholo. Fela jaaka Jesu a ile a solofetsa, ‘ba ba mo mabitleng a kgakologelo ba tla utlwa lentswe la ga Keresete mme ba tla tswa’ mo go one ka go tsosiwa mo baswing. (Johane 5:28, 29; Ditiro 24:15) Mme botlhe ba tla atlholwa mo motheong ofe?

Go ya ka ponatshegelo e moaposetoloi Johane a e boneng, ‘dikwalo tsa momeno di ne tsa bulwa’ mme “baswi ba ne ba atlholwa go ya ka dilo tse di kwadilweng mo dikwalong tseno tsa momeno go ya ka ditiro tsa bone.” A dikwalo tseno tsa momeno ke pego ya ditiro tsa batho bano tsa nako e e fetileng? Nnyaa, batho ga ba kitla ba atlholwa ka se ba neng ba se dira pele ba swa. Re itse seo jang? Baebele ya re: “Yo o suleng o golotswe mo boleong.” (Baroma 6:7) Ka jalo, re ka re ba ba tsosiwang ba simolola botshelo sesha. Ka jalo, seno se raya gore dikwalo tsa momeno di tshwanetse tsa bo di raya dilo tse dingwe tse Modimo a batlang batho ba di dira. Gore bafalodi ba Aramagedona le batho ba bangwe ba ba tsositsweng mo baswing ba kgone go tshelela ruri, ba tla tshwanelwa ke go ikobela ditaelo tsa Modimo, go akaretsa le ditaelo dipe tse dingwe tse disha tse Jehofa a tla ba nayang tsone mo nakong ya dingwaga tse di sekete. Ka jalo, batho ba tlile go atlholwa ka se ba se dirang mo nakong ya Letsatsi la Katlholo.

Letsatsi la Katlholo le tla naya dibilione tsa batho tshono ya bone ya ntlha ya go ithuta thato ya Modimo le go tshela tumalanong le yone. Seno se raya gore go tla dirwa tiro e kgolo tota ya go ruta batho. Ee ruri, “banni ba naga e e ungwang ruri ba tla ithuta tshiamo.” (Isaia 26:9) Le fa go ntse jalo, ga se botlhe ba ba tla ratang go tshela tumalanong le thato ya Modimo. Isaia 26:10 ya re: “Le fa moikepi a ka utlwelwa botlhoko, ruri ga a kitla a ithuta tshiamo. Mo lefatsheng la tshiamo o tla dira ka tshiamololo mme ga a kitla a bona tlotlomalo ya ga Jehofa.” Baikepi bano ba tlile go bolaelwa ruri mo nakong ya Letsatsi la Katlholo.—Isaia 65:20.

Kwa bokhutlong jwa Letsatsi la Katlholo, batho ba ba tla bong ba sa ntse ba tshela ba tla bo ba “tshela” ka botlalo e le batho ba ba itekanetseng. (Tshenolo 20:5) Ka jalo, mo Letsatsing la Katlholo, batho ba tla busediwa gape mo boemong jwa bone jwa go itekanela. (1 Bakorintha 15:24-28) Morago ga moo go tla latela teko ya bofelo. Satane o tla gololwa mo kgolegelong ya gagwe a bo a letlwa gore a leke go tsietsa batho la bofelofelo. (Tshenolo 20:3, 7-10) Botlhe ba ba sa tsamaisaneng le ene ba tla ipelela ka botlalo go diragadiwa ga tsholofetso e e mo Baebeleng e e reng: “Basiami ba tla rua lefatshe, mme ba tla aga mo go lone ka bosakhutleng.” (Pesalema 37:29) Ee, Letsatsi la Katlholo le tla solegela batho botlhe ba ba ikanyegang molemo!

MASOMESOME a dingwaga pele ga 1914, baithuti ba Baebele ba ne ba tlhalosa gore ditiragalo dingwe tse di botlhokwa di ne di tlile go direga ka ngwaga oo. E ne e le ditiragalo dife tseo, mme ke bosupi bofe jo bo bontshang gore 1914 e ne e le ngwaga o o botlhokwa jalo?

Jaaka go kwadilwe mo go Luke 21:24, Jesu o ne a re: “Jerusalema o tla gatakwa ke ditšhaba, go fitlha dinako tse di tlhomilweng tsa ditšhaba [“metlha ya Baditšhaba,” King James Version] di fela.” Jerusalema e ne e le motsemoshate wa Bajuda—lefelo le dikgosi tse di tswang mo ntlong segosi ya ga Kgosi Dafide di neng di busa mo go