Kafa O ka Dirisang “Go Fetolana Ka Dikwalo” Ka Teng

Motlhala o o tshwanetsweng go latelwa mo go thuseng ba bangwe go tlhaloganya Bibela ke o o baakanyeditsweng ke Jesu Keresete le baaposetoloi ba gagwe. Mo go arabeleng dipotso, Jesu o ne a tsopola dikwalo mme ka dinako tse dingwe o ne a dirisa ditshwantsho tse di tshwanelang tseo di neng di tla thusa batho ba ba dipelo tse di ikanyegang go amogela seo Bibela e se buang. (Math. 12:1-12) Moaposetoloi Paulo o ne a go dira tlwaelo ya gagwe go ‘fetolana ka Dikwalo, a ranola le go rulaganyetsa’ se a neng a se ruta. (Dit. 17:2, 3) Boikitsiso jo bo tshotsweng ke buka eno bo ka go thusa go dira se se tshwanang.

Mo boemong jwa go baakanyetsa ka kakaretso e e atlabetseng, e e akaretsang kgang nngwe le nngwe, Go Fetolana Ka Dikwalo e lebisa tlhokomelo e ntsi thata mo dipotsong tseo di bodiwang ke batho ba bantsi gone jaanong.

Kgatiso eno ga e a baakanyediwa ka boikaelelo jwa go thusa ope go “fenya dikgaruru” le batho bao ba sa rateng boammaaruri. Go na le moo, e baakanyetsa ka boikitsiso jo bo mosola thata jo bo diretsweng go dirisiwa mo go fetolaneng le batho ka bongwe bao ba go letlelelang go dira jalo. Bangwe ba bone ba ka nna ba botsa dipotso tseo tota ba batlang dikarabo tse di kgotsofatsang tsa tsone. Ba bangwe, fa motlotlo o ntse o tsweletse, ba ka nna ba bolela seo ba se dumelang mme ba dira jalo ka tlhatswego pelo nngwe. A mme ke batho ba ba akanyang ba ba iketleeditseng go reetsa maikutlo a mangwe? Fa go ntse jalo, o ka abalana le bone seo Bibela e se buang, o dira jalo ka tlhatswego pelo ya gore e tla bona karabelo mo dipelong tsa barati ba boammaaruri.

O ka bona jang boikitsiso jo bo tsepameng jo o bo tlhokang mo bukeng eno e e thusang? Gantsi o tla bo bona fela ka bofefo fa o ka phutholola ka tlhamalalo mo setlhogong se segolo se se tshotseng kgang e e tlotliwang. Tlase ga ditlhogo tsotlhe tse dikgolo, dipotso tse dikgolo di motlhofo go tlhaolega; di ka mokwalo o montsho o o fitlhang kwa thoko kafa molemeng. Fa ka bofefo o sa bone se o se tlhokang, bona Ditlhogo tsa Dithuto kwa bofelong jwa buka.

Boipaakanyetso jwa go sa le nako bo mosola ka metlha. Mme fa e le gore ga o ise o tlwaelane le dikarolo tse di rileng tsa buka eno, o sa ntse o ka di dirisa sentle thata. Jang? Fa o bone potso eo e batlileng tota e nyalana le ntlha eo o batlang go e tlotla leba ditlhogwana dipe fela tse di leng kafa tlase ga yone. Ditlhogwana tseno di beilwe ka mokwalo o o sekameng o montsho mme di latela kafa tlase ga dipotso tseo di nyalanang le tsone. Fa e le gore o setse o na le kitso nngwe kaga kgang, poeletso ya ditlhogwana tseno le go leba ka bofefo fela mo dintlheng tse di mo tlase ga yone e ka nna gone gotlhe mo o go tlhokang, ka gobo di thadisa tsela e e thusang eo e ka dirisiwang mo go akantshaneng. Se etsaetsege go bua megopolo eno ka mafoko a a leng a gago.

A o ikutlwa o tlhoka mo go oketsegileng—ka gongwe dikwalo tota ka sebele, megopolo eo o ka e dirisang malebana le dikwalo tseo, ditshwantsho dingwe tse di ka go thusang go phepafatsa go utlwala ga seo Bibela e se buang, jalo le jalo? Fa go le jalo, o ka batla go bontsha motho yo o buisanang le ene se buka eno e se tshotseng mme go tswa foo le bale mmogo karolo e e dirisanang le potso e a e boditseng. Le eleng fa o sa ithuta kgang eo go le pele, o ka e dirisa go neela karabo e e kgotsofatsang. Sengwe le sengwe se teng tota mo bukeng e, se tlhalositswe motlhofo le ka mokgwa o o tlhamaletseng.

Gakologelwa gore buka eno ke thuso fela. Bibela ke yone motheo. Ke Lefoko ja Modimo. Fa ditsopolo mo bukeng eno di dirwa go tswa mo Bibeleng, gatelela ntlha eno go bao o buisanang le bone. Gongwe le gongwe kwa go kgonegang, ba kope gore ba tle le Bibela ya bone mme o ba kope gore ba lebe dikwalo e le gore ba tle ba bone gore se o se buang tota se mo dikaelong tsa bone tsa Dikwalo. Fa e le gore dithanolo tse di dirisiwang thata tsa Bibela di baya dikgang tsa konokono tsa dintlha tse di rileng ka tsela e e farologaneng, go tlhokomedisiwa seno gantsinyana, mme go baakanyeditswe gape le ka go balega mo go farologaneng ga dithanolo gore o di bapise.

Tumalanong le sekao se se neng sa tlhongwa ke moaposetoloi Paulo mo go lebiseng go sebeso sa “MODIMO MOÑWE O O SA ITSIWEÑ” le mo go tsopoleng metswedi mengwe ya selefatshe e gantsi e amogelesegang fa a ne a rerela Baathena (Dit. 17:22-28), buka eno e tsopola ka tekanyo mekwalo ya ditiragalo tsa selefatshe, di-encyclopedia, dibuka tsa tshupiso tsa bodumedi le dibuka-mantswe tsa Bibela. Ka gone, mo boemong jwa go dira diphopholetso fela tsa tshimologo ya ditlwaelo tsa maaka tsa bodumedi, thaego ya dithuto dingwe tsa motheo, le bokao jwa mareo a Sehebera le a Segerika, buka e e bontsha mabaka a dipolelo tse di dirilweng. Lefa go ntse jalo, e lebisa tlhokomelo go Bibela jaaka motswedi wa konokono wa boammaaruri.

Jaaka dithuso tse dingwe gape tsa go bula tsela ya go abalana boammaaruri jwa Bibela le bangwe, dikarolo tse di bulang tsa buka eno di baakanyetsa ka lenaneo la “Diketapele Tsa go Dirisiwa mo Bodiheding jwa Tshimo” le phutho ya dikakantsho tsa “Kafa O Ka Arabelang Ka Gone Bao ba Ka Nnang Ba Kgoreletsa Puisano.” Dilo tse dingwe tse dintsi tse di ka nnang tsa “kgoreletsa puisano” di amana le ditumelo tse di rileng, mme tseno di akanyediwa kwa bofelong jwa dikarolo dingwe le dingwe tse dikgolo tse di dirisanang le ditumelo tseo. Ga go a ikaelelwa gore o tshware dikarabo tseno ka tlhogo, mme kwa ntle ga pelaelo o tla go fitlhela go thusa go tlhatlhobisa gore ke goreng ba bangwe ba ile ba di fitlhela di tswelela sentle; go tswa foo o bo o tlhalosa dintlha tseno ka mafoko a gago.

Tiriso ya buka eno e e thusang e tshwanetse go go thusa go tlhagolela kgono ya go fetolana ka Dikwalo le go di dirisa ka matsetseleko mo go thuseng ba bangwe go ithuta ka ga “ditihō tse dikgolo tsa Modimo.”—Dit. 2:11.