ʻUluaki Kalonikali

23 ʻI he tupu hake ʻa Tēvita ʻo motuʻa pea ofi ki he ngataʻanga ʻo ʻene moʻuí,* naʻá ne fakanofo hono foha ko Solomoné ke tuʻi ki ʻIsileli.+ 2 Naʻá ne fakatahatahaʻi leva ʻa e kotoa ʻo e houʻeiki ʻo ʻIsilelí, mo e kau taulaʻeikí,+ pea mo e kau Līvaí.+ 3 Ko e kau Līvai ko ia naʻe taʻu 30 ʻo faai ki ʻolungá naʻe lau honau tokolahí;+ ko honau tokolahí, ʻi hono lau fakafoʻiʻulu ʻa e tangata taki taha, naʻe toko 38,000. 4 ʻI he faʻahingá ni, naʻe ngāue ʻa e toko 24,000 ke nau tokangaʻi ʻa e ngāue ʻi he fale ʻo Sihová, pea ko e toko 6,000 ko e kau ʻōfisa mo e kau fakamaau,+ 5 pea naʻe ʻi ai ʻa e toko 4,000 ko e kau leʻo matapā,+ pea ko e toko 4,000 naʻa nau fai ʻa e fakahīkihiki+ kia Sihova ʻaki ʻa e ngaahi meʻalea ʻa ia naʻe pehē ʻe Tēvita, “Naʻá ku ngaohi ia ke fai ʻaki ʻa e fakahīkihikí.”

6 Pea naʻe fokotuʻutuʻu* ʻe Tēvita kinautolu ki he ngaahi vāhenga+ ʻo fakatatau ki he ngaahi foha ʻo Līvaí: Ko Kēsoni, Kōhate, mo Mēlali.+ 7 ʻI he haʻa Kēsoní ko Latana mo Simi. 8 Ko e ngaahi foha ʻo Lataná ko Siheli ko e ʻulú ia, mo Setami, pea mo Sioeli,+ ko e toko tolu. 9 Ko e ngaahi foha ʻo Simí ko Selomoti, mo Hasieli, pea mo Hālani, ko e toko tolu. Ko e ngaahi ʻulumotuʻa eni ʻo e ngaahi fale ʻo e ngaahi tamai kia Lataná. 10 Pea ko e ngaahi foha ʻo Simí ko Seati, Sina, Seusi, mo Peliʻa. Ko e toko fā ko ení ko e ngaahi foha kinautolu ʻo Simi. 11 Ko Seati ʻa e ʻulú pea ko Sisaha ʻa e fika uá. Ka koeʻuhi naʻe ʻikai ke tokolahi ʻa e ngaahi foha ʻo Seusi mo Peliʻá, naʻe lau pē kinaua ko e fale fakaetamai pē ʻe taha fakataha mo ha ngafa pē ʻe taha.

12 Ko e ngaahi foha ʻo Kōhaté ko ʻAmilami, ʻIsaʻā,+ Hepeloni, mo ʻOsieli,+ ko e toko fā. 13 Ko e ongo foha ʻo ʻAmilamí ko ʻĒlone+ mo Mōsese.+ Ka ko ʻĒlone naʻe fakamavaheʻi tuʻumaʻu+ ia ke ne fakatoputapuʻi ʻa e Potu Fungani Toputapú, ʻa ia mo hono ngaahi fohá, ke nau fai ʻa e ngaahi feilaulau ʻi he ʻao ʻo Sihová, ke nau tauhi kiate ia, pea ke nau tāpuakiʻi maʻu pē ʻa e kakaí ʻi hono huafá.+ 14 Ko e meʻa kia Mōsese ko e tangata ʻa e ʻOtua moʻoní, naʻe fakakau ʻa e hingoa ʻo hono ongo fohá ʻi he lotolotonga ʻo e matakali ʻo e kau Līvaí. 15 Ko e ongo foha ʻo Mōsesé ko Kēsomi+ mo ʻEliese.+ 16 ʻI he ngaahi foha ʻo Kēsomí, ko Sepueli+ ʻa e ʻulú. 17 ʻI he hako* ʻo ʻEliesé, ko Lehapaia+ ʻa e ʻulú; naʻe ʻikai ke toe ʻi ai ha ngaahi foha kehe ʻo ʻEliese, ka naʻe tokolahi ʻaupito ʻa e ngaahi foha ia ʻo Lehapaiá. 18 ʻI he ngaahi foha ʻo ʻIsaʻaá,+ ko Selomiti+ ʻa e ʻulú. 19 Ko e ngaahi foha ʻo Hepeloní ko Selaia ʻa e ʻulú, ko ʻAmalaia ʻa e fika uá, ko Sehesili ʻa e fika tolú, pea ko Sikamami+ ʻa e fika faá. 20 Ko e ongo foha ʻo ʻOsielí+ ko Maika ʻa e ʻulú pea ko ʻĪsia ʻa e fika uá.

21 Ko e ongo foha ʻo Mēlalí ko Mahali mo Musi.+ Ko e ongo foha ʻo Mahalí ko ʻEliesa mo Kisi. 22 Naʻe mate ʻa ʻEliesa, ka naʻe ʻikai ke ʻi ai hano ngaahi foha, ko e ngaahi ʻofefine pē. Ko ia ko e ngaahi foha ʻo Kisí, ʻa honau kāingá,* naʻa nau ʻave kinautolu ke hoko ko honau uaifi. 23 Ko e ngaahi foha ʻo Musí ko Mahali, ʻEta, mo Selemoti, ko e toko tolu.

24 Ko e ngaahi foha eni ʻo Līvaí ʻo fakatatau ki he ngaahi fale ʻo ʻenau ngaahi tamaí, ko e ngaahi ʻulumotuʻa ia ʻo e ngaahi fale ʻo e ngaahi tamaí, ʻa e faʻahinga ko ia naʻe lēsisita ʻa ia naʻe lau pea fakahokohoko ʻa honau ngaahi hingoá pea naʻa nau fakahoko fatongia ki he ngāue ʻi he fale ʻo Sihová, mei he taʻu 20 ʻo faai ki ʻolunga. 25 He naʻe pehē ʻe Tēvita: “Ko Sihova ko e ʻOtua ʻo ʻIsilelí kuó ne tuku ha mālōlō ki hono kakaí,+ pea te ne ʻafio ʻi Selusalema ʻo taʻengata.+ 26 Pehē foki ʻe ʻikai fiemaʻu ki he kau Līvaí ke nau fua ʻa e tāpanekalé pe ko ha naunau pē naʻe fai ʻaki ʻa e ngāue aí.”+ 27 He fakatatau ki he ngaahi fakahinohino fakamuimui ʻa Tēvitá, ko e kau Līvai mei he taʻu 20 ʻo faai ki ʻolunga naʻe lau honau tokolahí. 28 Ko honau fatongiá ko e tokoni ki he ngaahi foha ʻo ʻĒloné+ ki he ngāue ʻi he fale ʻo Sihová, ke tokangaʻi ʻa e ongo lotoʻaá,+ ko e ngaahi loki kaí, ko hono fakamaʻa ʻa e meʻa toputapu kotoa pē, pea mo ha faʻahinga ngāue pē naʻe fiemaʻu ki he ngāue ʻi he fale ʻo e ʻOtua moʻoní. 29 Naʻa nau tokoni ʻi he meʻa fekauʻaki mo e fokotuʻunga maá,*+ mo e mahoaʻa lelei ki he feilaulau meʻakaí, pea mo e ngaahi foʻi mā manifinifi taʻelēvaní,+ mo e mā naʻe ngaohi ʻi he lauʻiʻumea taʻoʻanga meʻá, ko e takaonga kuo fio mo e loló,+ pea mo e faʻahinga fua mamafa mo e fua kotoa pē. 30 Naʻe fiemaʻu ke nau tuʻu ʻi he pongipongi ki he pongipongi+ ke fakamālō mo fakahīkihikiʻi ʻa Sihova pea fai pehē pē ʻi he efiafí.+ 31 Naʻa nau tokoni ʻi ha faʻahinga taimi pē naʻe ʻohake ai ʻa e ngaahi feilaulau tutu kia Sihová ʻi he ngaahi Sāpaté,+ ʻi he ngaahi māhina foʻoú,+ pea ʻi he lolotonga ʻa e ngaahi faʻahitaʻu kātoangá,+ ʻo fakatatau ki he lahi naʻe fiemaʻu ʻe he ngaahi tuʻutuʻuni fekauʻaki mo iá, ʻo fai tuʻumaʻu ia ʻi he ʻao ʻo Sihová. 32 Naʻa nau toe tokangaʻi ʻa honau ngaahi fatongia ki he tēniti feʻiloakiʻangá, ki he potu toputapú, pea ki honau fanga tokoua ko e ngaahi foha ʻo ʻĒloné ʻi he ngāue ʻi he fale ʻo Sihová.