Ua Kalonikali

3 Ko ia naʻe kamata ke langa ʻe Solomone ʻa e fale ʻo Sihová+ ʻi Selusalema ʻi Moʻunga Molaia,+ ʻa ia naʻe hā ai ʻa Sihova ki heʻene tamai ko Tēvitá,+ ʻi he feituʻu naʻe teuteu ʻe Tēvita ʻi he ʻauʻauʻanga uite ʻa ʻOlanani+ ko e Siepusí. 2 Naʻá ne kamata ʻa e langá ʻi he ʻaho hono ua ʻo e māhina hono uá, ʻi he taʻu hono fā ʻo ʻene pulé. 3 Pea ko e fakavaʻe naʻe fakatoka ʻe Solomone ki hono langa ʻa e fale ʻo e ʻOtua moʻoní naʻe kiupite ʻe 60 hono lōloá pea kiupite ʻe 20 hono fālahí,+ ʻo fakatatau ki he muʻaki fuá.* 4 Ko e fale-hūʻanga ʻi muʻá naʻe kiupite ʻe 20 hono lōloá, ʻo tatau mo e fālahi ʻo e falé,* pea naʻe 20* ʻa hono māʻolungá; pea naʻá ne ʻaofi ia ʻi loto ʻaki ʻa e koula haohaoa.+ 5 Naʻá ne holisi ʻa e loki lahí* ʻaki ʻa e papa siunipa, ʻi he hili iá naʻá ne ʻaofi ia ʻaki ʻa e koula lelei,+ peá ne toki teuteuʻi ia ʻaki ʻa e fakatātā ʻo e ʻulu paame+ mo e ngaahi sēini.+ 6 ʻIkai ko ia pē, naʻá ne teuteuʻi ʻa e falé ʻaki ʻa e ngaahi maka mahuʻinga fakaʻofoʻofa;+ pea ko e koula+ naʻá ne ngāueʻakí ko e koula mei Palevaimi. 7 Naʻá ne ʻaofi ʻa e falé, ko e ngaahi saá, ko e tuʻunga matapaá, ko hono holisí, pea mo hono ngaahi matapaá ʻaki ʻa e koula;+ pea naʻá ne tongi ha ngaahi selupimi ʻi he holisí.+

8 Naʻá ne ngaohi leva ʻa e loki* ko e Potu Fungani Toputapú;+ ko hono lōloá naʻe tatau ia mo e fālahi ʻo e falé, ko e kiupite ʻe 20, pea ko hono fālahí naʻe kiupite ʻe 20. Naʻá ne ʻaofi ia ʻaki ʻa e talēniti* ʻe 600 ʻo e koula lelei.+ 9 Ko e mamafa ʻo e koula ki he ngaahi faʻó naʻe sikeli* ʻe 50; pea naʻá ne ʻaofi ʻa e ngaahi loki ʻi ʻolungá ʻaki ʻa e koula.

10 Naʻá ne ngaohi leva ʻi he loki* ko e Potu Fungani Toputapú ha ʻīmisi ʻo e ongo selupimi, peá ne kofu ia ʻaki ʻa e koula.+ 11 Ko e lōloa fakakātoa ʻo e kapakau ʻo e ongo selupimí+ naʻe kiupite ʻe 20; ko e kapakau ʻe taha ʻo e ʻuluaki selupimí naʻe kiupite ʻe nima ʻa hono lōloá pea naʻe lave ki he holisi ʻo e falé, pea ko hono kapakau ʻe tahá naʻe kiupite ʻe nima hono lōloá pea naʻe lave ia ki he taha ʻo e ongo kapakau ʻo e selupimi ʻe tahá. 12 Pea ko e kapakau ʻe taha ʻo e selupimi ʻe tahá naʻe kiupite ʻe nima hono lōloá pea naʻe lave ki he faʻahi holisi ʻe taha ʻo e falé, pea ko hono kapakau ʻe tahá naʻe kiupite ʻe nima hono lōloá pea naʻe lave ia ki he taha ʻo e ongo kapakau ʻo e ʻuluaki selupimí. 13 Ko e kapakau ʻo e ongo selupimi ko ení naʻe mafola atu ia ʻaki ʻa e kiupite ʻe 20; pea naʻá na tuʻu ʻaki hona vaʻé ʻo na hanga ki loto.*

14 Naʻá ne ngaohi foki mo e puipuí+ ʻaki ʻa e filo pulū, filo fulufuluʻisipi vāleti, filo kulokula mālohi, mo e tupenu lelei, pea tui ki ai ʻa e ngaahi fakatātā ʻo e selupimi.+

15 Naʻá ne ngaohi leva ʻa e ongo fuʻu pou+ ʻi muʻa ʻi he falé, ʻo kiupite ʻe 35 hono lōloá, pea ko e ʻuluʻi-pou ʻi he fuʻu pou taki taha naʻe kiupite ʻe nima.+ 16 Pea naʻá ne ngaohi ha ngaahi sēini, ʻo hangē ha ngaahi kahoá, ʻo ne fokotuʻu ia ʻi ʻolunga ʻi he ongo fuʻu poú, peá ne ngaohi mo e foʻi pomikānite ʻe 100 ʻo ne fokotuʻu ia ʻi he ngaahi sēiní. 17 Naʻá ne fokotuʻu ʻa e ongo fuʻu poú ʻi muʻa ʻi he temipalé, ko e taha ʻi he toʻomataʻú* pea ko e taha ʻi he toʻohemá;* peá ne fakahingoa ʻa e taha ʻi he toʻomataʻú ko Siakini* pea ko e taha ʻi he toʻohemá ko Pōasi.*