Nōmipa

21 ʻI he fanongo ʻa e tuʻi Kēnani ʻo ʻĀlatí,+ ʻa ia naʻe nofo ʻi he feituʻu Nīkepí, kuo haʻu ʻa ʻIsileli ʻo fou mai ʻi he hala ʻo ʻAtalimí, naʻá ne ʻohofi ʻa ʻIsileli pea taki pōpula ʻa honau niʻihi. 2 Ko ia naʻe fai ai ʻe ʻIsileli ʻa e fuakava ko ení kia Sihova: “Kapau te ke tuku mai ʻa e kakaí ni ki hoku nimá, te u mātuʻaki tuku atu honau ngaahi koló ki he fakaʻauha.” 3 Ko ia naʻe fanongo ʻa Sihova ki he leʻo ʻo ʻIsilelí peá ne tuku ʻa e kau Kēnaní kiate kinautolu, pea naʻa nau tuku atu kinautolu mo honau ngaahi koló ki he fakaʻauhá. Ko ia naʻa nau ui ai ʻa e feituʻú ko Hoama.*+

4 ʻI he hoko atu ʻenau fonongá mei Moʻunga Hoa+ ʻi he hala ʻoku huʻu ki he Tahi Kulokulá koeʻuhi ke ʻoua te nau fou ʻi he fonua ko ʻĪtomí,+ naʻe hoko ai ʻa e kakaí ʻo ongosia ʻi he fonongá. 5 Pea naʻe hanganaki lea fakafepaki ʻa e kakaí ki he ʻOtuá pea kia Mōsese,+ ʻo pehē: “Ko e hā kuó mo ʻomi ai kimautolu mei ʻIsipite ke mau mate ʻi he toafá? ʻOku ʻikai ha meʻakai pea ʻoku ʻikai ha vai,+ pea kuo mau hoko ʻo fehiʻa* ʻi he mā palakū ko ení.”+ 6 Ko ia naʻe tuku mai ai ʻe Sihova ʻa e fanga ngata kona* ki he lotolotonga ʻo e kakaí, pea naʻa nau hanganaki uʻu ʻa e kakaí, ko ia naʻe mate ai ʻa e kau ʻIsileli tokolahi.+

7 Ko ia naʻe haʻu ʻa e kakaí kia Mōsese ʻo nau pehē: “Kuo mau faiangahala ʻi heʻemau lea fakafepaki kia Sihova pea kiate koé.+ Fai ha fakalaloa kia Sihova koeʻuhí ke ne toʻo ʻa e fanga ngatá meiate kimautolu.” Pea naʻe fai ʻe Mōsese ha fakalaloa maʻá e kakaí.+ 8 Naʻe folofola leva ʻa Sihova kia Mōsese: “Ngaohi ha tatau ʻo ha ngata kona* pea fokotuʻu ia ʻi ha vaʻakau. ʻI he taimi leva ʻe uʻu ai ha tahá, kuo pau ke ne sio ki ai koeʻuhí ke ne kei moʻui atu ai pē.” 9 Naʻe ngaohi leva ʻe Mōsese ha ngata kopa+ pea fokotuʻu ia ʻi he vaʻakaú,+ pea ʻi he taimi pē naʻe uʻu ai ʻe ha ngata ha tangata peá ne sio ki he ngata kopá, naʻá ne moʻui.+

10 ʻI he hili iá, naʻe mavahe ʻa e kau ʻIsilelí ʻo nau ʻapitanga ʻi ʻŌpote.+ 11 Naʻa nau mavahe leva mei ʻŌpote ʻo ʻapitanga ʻi Iʻi-ʻapalemi,+ ʻi he toafa ʻoku hanga ki Mōapé, ki he hahaké. 12 Naʻa nau mavahe mei ai ʻo ʻapitanga ʻi he veʻe Teleʻa* ko Saletí.+ 13 Naʻa nau mavahe mei ai ʻo ʻapitanga ʻi he feituʻu ʻo e teleʻa ʻAlanoní,+ ʻa ia ʻoku ʻi he toafa ʻoku lele mei he kauʻāfonua ʻo e kau ʻĀmolí, he ko e teleʻa ʻAlanoní ko e kauʻāfonua ia ʻo Mōape, ʻi he vahaʻa ʻo Mōape mo e kau ʻĀmolí. 14 Ko e ʻuhinga ia ʻoku lau ai ʻa e tohi ʻo e Ngaahi Tau ʻa Sihová fekauʻaki mo “Vahepi ʻi Sufaha mo e ngaahi teleʻa* ʻAlanoní, 15 pea mo e tahifo* ʻo e ngaahi teleʻá,* ʻa ia ʻoku lele ki he feituʻu ʻoku tuʻu ai ʻa ʻAlé pea fepikitaki mo e kauʻāfonua ʻo Mōapé.”

16 Ko hono hokó, naʻa nau ʻalu atu ki Pea. Ko e vaitupu eni ʻa ia naʻe folofola fekauʻaki mo ia ʻa Sihova kia Mōsese: “Fakatahataha mai ʻa e kakaí, pea tuku ke u ʻoange kiate kinautolu ha vai.”

17 ʻI he taimi ko iá, naʻe hivaʻi ʻe ʻIsileli ʻa e foʻi hiva ko ení:

“Puna hake, ʻe vaitupu ē!—Fai ha tali* ki ai!

Naʻa nau ʻalu leva mei he toafá ʻo hoko atu ki Matana, 19 pea mei Matana ʻo hoko atu ki Nahalieli, pea mei Nahalieli ʻo hoko atu ki Pāmoti.+ 20 Naʻa nau ʻalu mei Pāmoti ki he teleʻa ʻa ia ʻoku ʻi he feituʻu ʻo Mōapé,+ ʻi he tumutumu ʻo Pisikaá,+ ʻa ia ʻoku hanga ki Sesimoní.*+

21 Naʻe fekauʻi atu leva ʻe ʻIsileli ʻa e kau talafekau kia Sīhoni, ko e tuʻi ʻo e kau ʻĀmolí, ʻo pehē:+ 22 “Tuku muʻa ke mau fou atu ʻi ho fonuá. ʻE ʻikai te mau afe ki ha ngoueʻanga pe ko ha ngoue kālepi. ʻE ʻikai te mau inu ha vai mei ha vaitupu pē. Te mau laka atu ʻi he Hala Tuʻí kae ʻoua kuo mau fakalaka atu ʻi ho feituʻú.”+ 23 Ka naʻe ʻikai fakaʻatā ʻe Sīhoni ʻa ʻIsileli ke fou mai ʻi hono feituʻú. ʻI hono kehé, naʻe fakatahatahaʻi mai ʻe Sīhoni ʻa hono kakaí kotoa ʻo nau ʻalu atu ke fakafetaulaki ki ʻIsileli ʻi he toafá pea nau aʻu ki Siahasa ʻo kamata faitau ai mo ʻIsileli.+ 24 Ka naʻe ikunaʻi ia ʻe ʻIsileli ʻaki ʻa e heletaá+ peá ne maʻu ʻa hono fonuá+ mei he teleʻa ʻAlanoní+ ki he teleʻa Siapokí,+ ʻo ofi ki he kau ʻĀmoní, koeʻuhí ko Siasea+ ʻa e kauʻāfonua ʻo e feituʻu ʻo e kau ʻĀmoní.+

25 Ko ia naʻe toʻo ʻe ʻIsileli ʻa e ngaahi kolo kotoa ko ení, pea naʻa nau kamata nofo ʻi he ngaahi kolo kotoa ʻo e kau ʻĀmolí,+ ʻi Hesiponi mo hono ngaahi kolo takatakaí* kotoa. 26 He ko Hesiponí ko e kolo ia ʻo Sīhoni, ko e tuʻi ʻo e kau ʻĀmolí, ʻa ia naʻe faitau mo e tuʻi ʻo Mōapé peá ne toʻo hono fonuá kotoa meiate ia ʻo aʻu ki he teleʻa ʻAlanoní. 27 Ko e meʻa ia naʻá ne fakatupunga ʻa e lea fakaʻaluma fakaefakatātā ʻo pehē:

“Haʻu ki Hesiponi.

Tuku ke langa pea fokotuʻu maʻu ʻa e kolo ʻo Sīhoní.

28 He naʻe haʻu ha afi mei Hesiponi, ko ha ulo mei he kolo ʻo Sīhoní.

Kuó ne keina ʻa ʻAle ʻo Mōapé, kuó ne keina ʻa e ngaahi ʻeiki ʻo e ngaahi potu māʻolunga ʻo e teleʻa ʻAlanoní.

29 ʻOiauē ʻa koe, Mōape! ʻE fakaʻauha koe, ʻa e kakai ʻo Kīmosi!+

ʻOkú ne ʻai hono ngaahi fohá ko e kau hola holo pea mo hono ngaahi ʻofefiné ko e kau pōpula ʻa Sīhoni, ko e tuʻi ʻo e kau ʻĀmolí.

31 Ko ia naʻe kamata ke nofo ʻa ʻIsileli ʻi he fonua ʻo e kau ʻĀmolí. 32 Naʻe fekauʻi atu leva ʻe Mōsese ha kau tangata ke asiasi ʻi Siasea.+ Naʻa nau puke ʻa hono ngaahi kolo takatakaí* pea kapusi ʻa e kau ʻĀmoli naʻe ʻi aí. 33 ʻI he hili iá, naʻa nau tafoki ʻo ʻalu hake ʻi he Hala ʻo Pēsaní. Pea naʻe haʻu ʻa ʻOki+ ko e tuʻi ʻo Pēsaní mo hono kakaí kotoa ke fakafetaulaki kiate kinautolu ʻi he tau ʻi ʻEtileí.+ 34 Naʻe folofola ʻa Sihova kia Mōsese: “ʻOua naʻá ke ilifia kiate ia,+ he te u foaki atu ia mo e kotoa ʻo hono kakaí mo hono fonuá ki ho nimá,+ pea te ke fai kiate ia ʻo hangē tofu pē ko e meʻa naʻá ke fai kia Sīhoni ko e tuʻi ʻo e kau ʻĀmolí, ʻa ia naʻe nofo ʻi Hesiponí.”+ 35 Ko ia naʻa nau hanganaki taaʻi ia, fakataha mo hono ngaahi fohá mo hono kakaí kotoa, kae ʻoua kuo ʻikai hao moʻui ha taha ʻi hono kakaí,+ pea naʻa nau maʻu ʻa hono fonuá.+