Tangata Malanga

9 Ko e hā ʻoku maʻu ʻe he tokotaha ngāué mei he kotoa ʻo ʻene ngaahi feingá?+ 10 Kuó u mamata ʻi he ngāue kuo foaki ʻe he ʻOtuá ki he ngaahi foha ʻo e tangatá ke fakafemoʻuekinaʻi ai pē kinautolú. 11 Kuó ne ngaohi ʻa e meʻa kotoa pē ke fakaʻofoʻofa* ʻi hono taimi.+ Kuo aʻu ʻo ne ʻai ʻa ʻitāniti ki honau lotó; ka ʻe ʻikai ʻaupito ke ʻilo ʻe he faʻahinga ʻo e tangatá ʻa e ngāue kuo fai ʻe he ʻOtua moʻoní mei he kamatá ki heʻene ʻosi.

12 Kuó u fakamulitukuʻaki ʻoku ʻikai ha meʻa ʻe lelei ange kiate kinautolu ka ke nau fiefia pea ke nau failelei ʻi he lolotonga ʻenau moʻuí,+ 13 pehē foki ke kai mo inu mo maʻu ʻa e fiefia ʻe he tokotaha kotoa pē ʻi he kotoa ʻo ʻene ngāue mālohí. Ko e meʻaʻofa ia ʻa e ʻOtuá.+

14 Kuó u hoko ʻo ʻiloʻi ko e meʻa kotoa pē ʻoku ngaohi ʻe he ʻOtua moʻoní ʻe tolonga ia ʻo taʻengata. ʻOku ʻikai ha meʻa ke tānaki atu ki ai pea ʻoku ʻikai ha meʻa ke toʻo mei ai. Kuo ngaohi ia ʻe he ʻOtua moʻoní ʻi he foungá ni, koeʻuhí ke manavahē kiate ia ʻa e kakaí.+

15 ʻIlonga ha meʻa ʻoku hoko kuo ʻosi hoko ia, pea ko e meʻa ka hoko maí kuo ʻosi ʻi ai;+ ka ʻoku kumi ʻa e ʻOtua moʻoní ki he meʻa kuo ʻosi fai ʻa e tuli ki aí.*

16 Ko e meʻa foki eni kuó u mamata ki ai ʻi he lalo laʻaá: ʻI he feituʻu ʻo e fakamaau totonú naʻe ʻi ai ʻa e fulikivanú, pea ʻi he feituʻu ʻo e māʻoniʻoní naʻe ʻi ai ʻa e fulikivanú.+ 17 Ko ia naʻá ku pehē ai ʻi hoku lotó: “ʻE fakamāuʻi ʻe he ʻOtua moʻoní fakatouʻosi ʻa e māʻoniʻoní mo e fulikivanú,+ he ʻoku ʻi ai ha taimi ki he ngāue kotoa mo e meʻa kotoa ʻoku faí.”

18 Naʻá ku toe pehē foki ʻi hoku lotó fekauʻaki mo e ngaahi foha ʻo e tangatá ko e ʻOtua moʻoní te ne siviʻi kinautolu pea fakahā ange ʻoku nau hangē ko e fanga manú, 19 he ʻoku ʻi ai ha ikuʻanga ki he faʻahinga ʻo e tangatá mo ha ikuʻanga ki he fanga manú; ʻoku nau maʻu kotoa ʻa e ikuʻanga tatau.+ Hangē ko e mate ʻa e taha ko eé, ʻoku pehē ʻa e mate ʻa e taha ko eé; pea ʻoku nau maʻu kotoa ʻa e laumālie* pē ʻe taha.+ Ko ia ai, ʻoku ʻikai ke māʻolunga ange ʻa e tangatá ʻi he fanga manú, he ko e muna ʻa e meʻa kotoa pē. 20 ʻOku nau ʻalu kotoa pē ki he feituʻu tatau.+ Ko ʻenau haʻu kotoa pē mei he efú,+ pea ʻoku nau foki kotoa pē ki he efú.+ 21 Ko hai ʻokú ne ʻiloʻi moʻoni pe ʻoku ʻalu hake ʻa e laumālie ʻo e tangatá ki ʻolunga pe ʻoku ʻalu hifo nai ʻa e laumālie ʻo e fanga manú ki he māmaní?+ 22 Pea naʻá ku mamata ʻoku ʻikai ha meʻa ʻoku lelei ange ka ko hono maʻu ʻe ha tangata ʻa e fiefia ʻi heʻene ngāué,+ koeʻuhí ko hono palé ia;* he ko hai ʻe lava ke ne ʻai ia ke sio ki he meʻa ʻe hokó ʻi he hili ʻene puli atu ʻaʻaná?+