Ua Sāmiuela

15 ʻI he hili kotoa ʻa e ngaahi meʻá ni, naʻe maʻu mai ʻe ʻApisalome maʻana ha saliote, mo ha fanga hoosi pea mo ha kau tangata ʻe toko 50 ke nau lele muʻomuʻa ʻiate ia.+ 2 Naʻe tuʻu pongipongia hake ʻa ʻApisalome ʻo ne tuʻu ʻi he veʻehala ki he matapā ʻo e koló.+ ʻIlonga ha tangata naʻe ʻi ai haʻane meʻa ke fakamāuʻi ʻa ia naʻe ʻamanaki ke ʻalu atu ki he tuʻí ki ha faifakamaau,+ naʻe ui ia ʻe ʻApisalome ʻo ne pehē: “Ko fē ʻa e kolo ʻokú ke haʻu mei aí?” Pea naʻá ne pehē: “Ko hoʻo sevānití ʻoku mei he taha ʻo e ngaahi matakali ʻo ʻIsilelí.” 3 Naʻe pehē ʻe ʻApisalome kiate ia: “Vakai, ko e ngaahi meʻa ʻokú ke taukaveʻí ʻoku totonu mo taau, ka ʻoku ʻikai ha taha mei he tuʻí ke fanongo ki hoʻo meʻá.” 4 Naʻe pehē ange ʻe ʻApisalome: “Taumaiā naʻe fakanofo au ke u hoko ko ha fakamaau ʻi he fonuá! Pea ko e tangata kotoa pē ʻoku ʻi ai haʻane meʻa ke fakatonutonu pe fiemaʻu ke fai ai ha fakamaau ʻe lava ke ne haʻu kiate au, pea te u fakapapauʻi ʻoku fai kiate ia ʻa e fakamaau totonú.”

5 Pea ʻi he taimi naʻe fakaofi mai ai ha tangata ke punou kiate iá, naʻe ala atu ʻa ʻApisalome ʻo ne puke ia peá ne ʻuma kiate ia.+ 6 Naʻe fai ʻe ʻApisalome ʻa e meʻá ni ki he kotoa ʻo e kau ʻIsileli naʻa nau omi ki he tuʻí ki ha faifakamaau; ko ia naʻe hanganaki kaihaʻasi ʻe ʻApisalome ʻa e loto ʻo e kau tangata ʻo ʻIsilelí.+

7 ʻI he ngataʻanga ʻo e taʻu ʻe fā,* naʻe pehē ʻe ʻApisalome ki he tuʻí: “Tuku muʻa ke u ʻalu ki Hepeloni+ ke fakahoko ʻeku fuakava ʻa ia naʻá ku fai kia Sihová. 8 He naʻe fai ʻe hoʻo sevānití ʻa e fuakava mafatukituki+ ko ení ʻi he taimi naʻá ku nofo ai ʻi Kēsuli+ ʻi Sīliá: ‘Kapau ʻe fakafoki mai au ʻe Sihova ki Selusalema, te u fai ha feilaulau* kia Sihova.’” 9 Ko ia naʻe pehē ange ʻe he tuʻí kiate ia: “ʻAlu ʻi he fiemālie.” Ko ia naʻá ne mālanga hake ʻo ʻalu ki Hepeloni.

10 Pea naʻe fekauʻi atu ʻe ʻApisalome ha kau asiasi ki he kotoa ʻo e ngaahi matakali ʻo ʻIsilelí, ʻo ne pehē: “ʻI hoʻomou fanongo pē ki he leʻo ʻo e meʻaifí, mou fanongonongo, ‘Kuo tuʻi ʻa ʻApisalome ʻi Hepeloni!’”+ 11 Pea naʻe ō ki ai mo ʻApisalome ha kau tangata ʻe toko 200 mei Selusalema; naʻe fakaafeʻi kinautolu pea naʻa nau ʻalu fāinoa ʻo ʻikai te nau ʻilo ki he meʻa naʻe hokó. 12 ʻIkai ko ia pē, ʻi heʻene ʻoatu ʻa e ngaahi feilaulaú, naʻe fekau ʻe ʻApisalome ke haʻu ʻa ʻAhitofeli+ ko e tangata Kiló, ʻa e tokotaha faleʻi ʻa Tēvitá,+ mei hono kolo ko Kiló.+ Naʻe fakalalahi ai pē ʻa e faʻufaʻufonó, pea ko e kakai naʻa nau poupouʻi ʻa ʻApisalomé naʻe fakautuutu honau tokolahí.+

13 ʻI he faai atu ʻa e taimí, naʻe haʻu ai ha tokotaha talatalaaki kia Tēvita, ʻo ne pehē: “Kuo tafoki ʻa e loto ʻo e kau tangata ʻo ʻIsilelí kia ʻApisalome.” 14 Naʻe pehē ange leva ʻe Tēvita ʻi he taimi pē ko iá ki he kotoa ʻo ʻene kau sevāniti naʻe ʻiate ia ʻi Selusalemá: “Tuʻu hake, pea tau hola,+ koeʻuhí heʻikai ha taha ʻo kitautolu ʻe hao meia ʻApisalome! Fakavave telia naʻa vave ʻene maʻu kitautolú ʻo ne fakahoko mai ha kovi kiate kitautolu peá ne taaʻi ʻa e koló ʻaki ʻa e heletaá!”+ 15 Naʻe tali ange ʻe he kau sevāniti ʻa e tuʻí ki he tuʻí: “ʻIlonga ha meʻa ʻoku tuʻutuʻuni ʻe homau ʻeiki ko e tuʻí, ʻoku mateuteu ʻa hoʻo kau sevānití ke fai ia.”+ 16 Ko ia naʻe ʻalu atu ʻa e tuʻí pea muimui atu ʻiate ia ʻa e kotoa ʻo hono fāmilí, ka naʻe tuku ʻe he tuʻí ha kau sinifu ʻe toko hongofulu+ ke nau tokangaʻi ʻa e falé.* 17 Pea naʻe hoko atu ʻa e tuʻí ʻi heʻene fonongá ʻo muimui atu ʻa e kakaí kotoa, pea naʻa nau afe ʻi Pete-mehaki.

18 Ko e kotoa ʻo ʻene kau sevāniti naʻe mavahe fakataha mo iá* pea mo e kotoa ʻo e kau Kēletí, mo e kau Pēlití,+ pea mo e kau Kati,+ ko e kau tangata ʻe toko 600 ʻa ia naʻa nau muimui mai ʻiate ia mei Katí,+ naʻa nau fakalaka hake lolotonga ia hono ʻaʻahi kinautolu ʻe he tuʻí.* 19 Pea naʻe pehē ʻe he tuʻí kia ʻĪtai+ ko e tangata Katí: “Ko e hā ka ke ka ʻalu ai koe mo kimautolú? Foki ʻo nofo mo e tuʻi foʻoú, he ko ha muli koe pea ko ha tokotaha fakaheeʻi foki koe mei ho feituʻú. 20 Naʻá ke haʻu ʻaneafi, ko ia te u ʻai koā koe ke ke ʻalu fano holo mo kimautolu he ʻahó ni, ke ke ʻalu ʻi he taimi kuo pau ke u ʻalu aí pea ki he feituʻu kuo pau ke u ʻalu ki aí? Foki peá ke ʻalu mo ho fanga tokouá, pea ʻofa ke fakahaaʻi atu ʻe Sihova kiate koe ʻa e ʻofa mateaki mo e faitōnunga!”+ 21 Ka naʻe tali ange ʻe ʻĪtai ki he tuʻí: “ʻOku ou fuakava ʻia Sihova ko e ʻOtua moʻuí, pea ʻoku ou fuakava ʻi hoku ʻeiki ko e tuʻí, ʻilonga ha feituʻu ʻe ʻi ai ʻa hoku ʻeiki ko e tuʻí, pe ko e mate pe ko e moʻui, ko e feituʻu ia ʻe ʻi ai ʻa hoʻo sevānití!”+ 22 Ko ia naʻe pehē ʻe Tēvita kia ʻĪtai:+ “ʻAlu peá ke kolosi atu.” Ko ia naʻe kolosi atu ʻa ʻĪtai ko e tangata Katí, fakataha mo ʻene kau tangatá kotoa pea mo e fānaú.

23 Ko e tokotaha kotoa ʻi he fonuá naʻa nau tangi leʻo-lahi lolotonga ia ʻa e kolosi atu ʻa e kakaí ni kotoa, pea naʻe tuʻu ʻa e tuʻí ʻi he veʻe Teleʻa Kitiloné;+ naʻe kolosi atu ʻa e kakaí kotoa ki he hala ʻoku huʻu atu ki he toafá. 24 Naʻe ʻi ai foki ʻa Sātoki+ pea naʻe ʻiate ia ʻa e kau Līvaí+ kotoa ʻo nau fua ʻa e ʻaʻake+ ʻo e fuakava ʻa e ʻOtua moʻoní;+ pea naʻa nau tuku hifo ʻa e ʻAʻake ʻa e ʻOtua moʻoní; pea ko ʻĀpaiata+ naʻá ne ʻalu hake, lolotonga ia ʻa e fakaʻosiʻosi ʻa e kolosi atu ʻa e kakaí kotoa mei he koló. 25 Ka naʻe pehē ʻe he tuʻí kia Sātoki: “Fakafoki ʻa e ʻAʻake ʻa e ʻOtua moʻoní ki he koló.+ Kapau ʻe hōifua ʻa Sihova ʻiate au, te ne toe fakafoki mai au pea tuku ke u sio ki ai mo hono tukuʻangá.+ 26 Ka ʻo kapau te ne folofola, ‘ʻOku ʻikai te u hōifua ʻiate koe,’ pea tuku leva ke ne fai kiate au ha meʻa pē ʻoku hā lelei ʻi heʻene vakaí.” 27 Naʻe pehē ʻe he tuʻí kia Sātoki ko e taulaʻeikí: “ʻIkai ko ha matalōloa+ koe? Foki ki he koló ʻi he fiemālie, peá ke ʻave ʻa homo ongo fohá ke mou ō, ʻa ʻAhimaasi ko ho fohá tonu pea mo Sionatane+ ko e foha ʻo ʻĀpaiatá. 28 Vakai, te u nofo pē ʻi he ngaahi veʻe ʻāhanga ofi ki he toafá kae ʻoua ke u maʻu meiate kimoutolu ha fakamatala.”+ 29 Ko ia naʻe fakafoki ʻe Sātoki mo ʻĀpaiata ʻa e ʻAʻake ʻa e ʻOtua moʻoní ki Selusalema, pea naʻá na nofo ai.

30 ʻI he ʻalu hake ʻa Tēvita ʻi he Moʻunga ʻŌlivé,+ naʻá ne tangi pē ʻi heʻene ʻalu haké; naʻe pūlou hono ʻulú, pea naʻá ne lue laʻivaʻe pē. Ko e kakai kotoa naʻe ʻiate iá naʻa nau pūlou foki honau ʻulú, pea nau tangi ʻi heʻenau ʻalu haké. 31 Pea naʻe fakahā kia Tēvita: “Ko ʻAhitofeli ē ʻoku kau ʻi he faʻahinga ʻoku faʻufaʻufono+ mo ʻApisalomé.”+ ʻI he meʻá ni naʻe pehē ʻe Tēvita: “ʻAi muʻa ʻe Sihova+ ke hoko ko e vale+ ʻa e faleʻi ʻa ʻAhitofelí!”

32 ʻI he aʻu ʻa Tēvita ki he tumutumú ʻa ia ʻoku faʻa punou ai ʻa e kakaí ki he ʻOtuá, naʻe ʻi ai ʻa Hūsai+ ko e tangata mei he haʻa ʻĀlekí+ ke fakafetaulaki kiate ia, kuo haehae hono kofú pea fakaefuefu hono ʻulú. 33 Kae kehe, naʻe pehē ʻe Tēvita kiate ia: “Kapau te ke ʻalu fakataha mo au, te ke hoko ko e kavenga kiate au. 34 Ka ʻo kapau te ke foki ki he koló peá ke pehē kia ʻApisalome, ‘Ko hoʻo sevāniti au ʻe hoʻo ʻAfio. Ko e sevāniti au ʻa hoʻo tamaí ʻi he kuohilí, ka ko eni kuó u hoko ko hoʻo sevāniti,’+ ʻe lava leva ai ke ke veuveuki maʻaku ʻa e faleʻi ʻa ʻAhitofelí.+ 35 ʻIkai ʻoku ʻi ai ʻa Sātoki mo ʻĀpaiata ko e ongo taulaʻeikí fakataha mo koe? Kuo pau ke ke tala kia Sātoki mo ʻĀpaiata ko e ongo taulaʻeikí ʻa e meʻa kotoa pē te ke fanongo ai mei he fale ʻo e tuʻí.+ 36 Vakai! ʻOkú na ʻi ai fakataha mo hona ongo fohá, ʻa ʻAhimaasi+ ko e foha ʻo Sātokí mo Sionatane+ ko e foha ʻo ʻĀpaiatá, pea fakahoko mai fakafou ʻiate kinaua ʻa e meʻa kotoa pē te mou fanongo aí.” 37 Ko ia ko Hūsai, ʻa e kaungāmeʻa*+ ʻo Tēvitá, naʻá ne hū ki he koló feʻunga ia mo e hū atu ʻa ʻApisalome ki Selusalemá.