Nōmipa

35 Naʻe hoko atu ʻa Sihova ʻo ne folofola kia Mōsese ʻi he toafa ʻo Mōapé ʻi he veʻe Sioataní,+ ofi ki Sielikō, ʻo pehē: 2 “Fakahinohino ki he kau ʻIsilelí ke nau foaki ki he kau Līvaí ha ngaahi kolo ke nau nofo ai mei he tofiʻa te nau maʻú,+ pea ʻoku totonu ke nau foaki ki he kau Līvaí ʻa e ngaahi kaikaiʻanga takatakai ʻi he ngaahi koló.+ 3 Te nau nofo ʻi he ngaahi koló, pea ko e ngaahi kaikaiʻangá ʻe ʻai ia ki heʻenau fanga manu lalatá, mo ʻenau ngaahi meʻa ke tokangaʻi ʻaki ʻenau fanga manú, pea mo e kotoa ʻo ʻenau fanga manu kehé. 4 Ko e ngaahi kaikaiʻanga ʻo e ngaahi koló ʻa ia te mou foaki ki he kau Līvaí ʻe lele ia ʻi he kiupite* ʻe 1,000 mei he ʻaá pea takatakai kotoa ʻi he koló. 5 Te mou fua ʻa e tuʻa koló ko e kiupite ʻe 2,000 ʻi he tafaʻaki fakahahaké, kiupite ʻe 2,000 ʻi he tafaʻaki fakatongá, kiupite ʻe 2,000 ʻi he tafaʻaki fakahihifó, pea kiupite ʻe 2,000 ʻi he tafaʻaki fakatokelaú, pea tuʻu ʻi loto-mālie ʻa e koló. ʻE hoko eni ko e ngaahi kaikaiʻanga ʻo honau ngaahi koló.

6 “Ko e ngaahi kolo te mou foaki ki he kau Līvaí ko e ngaahi kolo hūfanga ʻe 6,+ ʻa ia te mou foaki ke hola ki ai+ ʻa e tokotaha tāmate tangatá, pehē foki ki ha toe ngaahi kolo kehe ʻe 42. 7 Te mou foaki ki he kau Līvaí ʻa e ngaahi kolo fakakātoa ʻe 48, fakataha mo honau ngaahi kaikaiʻangá.+ 8 Ko e ngaahi kolo te mou foaki kiate kinautolú ʻe toʻo ia mei he tofiʻa ʻo e kau ʻIsilelí.+ Mei he kulupu tokolahi angé te mou toʻo mei ai ha meʻa lahi, pea mei he kulupu tokosiʻi angé te mou toʻo mei ai ha meʻa siʻi.+ Ko e kulupu taki taha te ne foaki atu ha konga ʻo hono ngaahi koló ki he kau Līvaí ʻo fakatatau ki he tofiʻa ʻokú ne maʻú.”

9 Naʻe hoko atu ʻa e folofola ʻa Sihova kia Mōsesé, ʻo ne pehē: 10 “Lea ki he kau ʻIsilelí ʻo tala kiate kinautolu, ‘Te mou kolosi ʻi Sioatani ki he fonua ko Kēnaní.+ 11 Te mou fili maʻamoutolu ha ngaahi kolo ʻoku feʻungamālie ke hoko ko ha ngaahi kolo hūfanga, ʻa ia ʻe hola ki ai ʻa e tokotaha tāmate tangata ʻokú ne tāmateʻi fāinoa ha tahá.+ 12 Ko e ngaahi koló ni ʻe hoko ia ko ha hūfangaʻanga maʻamoutolu mei he tokotaha faisāuni ʻo e totó,+ koeʻuhi ke ʻoua naʻa mate ʻa e tokotaha tāmate tangatá kae ʻoua kuó ne tuʻu ʻi he ʻao ʻo e fuʻu fakatahá+ ke fakamāuʻi. 13 Ko e ngaahi kolo hūfanga ʻe ono te mou foakí ʻe ngāueʻaki ia ki he taumuʻa ko ení. 14 Te mou foaki ʻa e kolo ʻe tolu ʻi he tafaʻaki ko eni ʻo Sioataní+ pea mo e kolo ʻe tolu ʻi he fonua ko Kēnaní+ ke hoko ko e ngaahi kolo hūfanga. 15 Ko e ngaahi kolo ʻe ono ko ení ʻe hoko ia ko ha hūfangaʻanga ki he kau ʻIsilelí, ki he mulí,+ pea ki he tokotaha nofo hili ʻi honau lotolotongá, ki ha taha pē ʻokú ne tāmateʻi fāinoa ha tahá+ ke ne hola ki ai.

16 “‘Ka ʻo kapau naʻá ne taaʻi ia ʻaki ha meʻa ukamea peá ne mate, ko ha tokotaha fakapō ia. Ko e tokotaha fakapoó ʻoku totonu ke mātuʻaki tāmateʻi ia.+ 17 Pea kapau naʻá ne taaʻi ia ʻaki ha maka ʻo malava ke ne fakatupunga ha mate peá ne mate ai, ko ha tokotaha fakapō ia. Ko e tokotaha fakapoó ʻoku totonu ke mātuʻaki tāmateʻi ia. 18 Pea kapau naʻá ne taaʻi ia ʻaki ha meʻa ngaohi mei he ʻakaú ʻo malava ke ne fakatupunga ha mate peá ne mate ai, ko ha tokotaha fakapō ia. Ko e tokotaha fakapoó ʻoku totonu ke mātuʻaki tāmateʻi ia.

19 “‘Ko e tokotaha faisāuni ʻo e totó ʻa e tokotaha te ne tāmateʻi ʻa e tokotaha fakapoó. ʻI he taimi te ne fetaulaki ai mo iá, ko ia tonu te ne tāmateʻi iá. 20 Kapau naʻe hoko ʻa e maté koeʻuhi naʻá ne tekeʻi ia ʻi haʻane tāufehiʻa pe tolongi ia ʻaki ha meʻa ʻi ha taumuʻa fakalotokovi,*+ 21 pe tupu mei he tāufehiʻá naʻá ne taaʻi ai ia ʻaki hono nimá, peá ne mate ai, ko e tokotaha naʻá ne taaʻi iá ʻe mātuʻaki tāmateʻi. Ko ha tokotaha fakapō ia. Ko e tokotaha faisāuni ʻo e totó te ne tāmateʻi ʻa e tokotaha fakapoó ʻi he taimi te ne fetaulaki ai mo iá.

22 “‘Ka ʻo kapau naʻe taʻeʻamanekina pea ʻikai ʻi ha tāufehiʻa ʻa ʻene tekeʻi iá pe ʻikai ʻi ha taumuʻa fakalotokovi+ ʻa ʻene* tolongi ia ʻaki ha meʻá, 23 pe kapau naʻe ʻikai te ne sio kiate ia peá ne fakatupunga ke tō hifo ha maka ʻiate ia pea naʻe ʻikai ko ha fili ia pe te ne feinga ke fakalaveaʻi ia, pea mate ai ʻa e tokotahá, 24 ʻoku totonu leva ki he fuʻu fakatahá ke nau fai ha fakamaau ʻi he vahaʻa ʻo e tokotaha naʻá ne taaʻi iá pea mo e tokotaha faisāuni ʻo e totó ʻo fehoanaki mo e ngaahi fakamaau ko ení.+ 25 ʻOku totonu leva ki he fuʻu fakatahá ke nau fakahaofi ʻa e tokotaha tāmate tangatá mei he nima ʻo e tokotaha faisāuni ʻo e totó pea fakafoki ia ki hono kolo hūfanga ʻa ia naʻá ne hola ki aí, pea kuo pau ke ne nofo ai kae ʻoua ke mate ʻa e taulaʻeiki lahi naʻe pani ʻaki ʻa e lolo toputapú.+

26 “‘Ka ʻo kapau ʻe mavahe ʻa e tokotaha tāmate tangatá mei he ngataʻanga ʻo hono kolo hūfanga naʻá ne hola ki aí 27 pea maʻu ia ʻe he tokotaha faisāuni ʻo e totó ʻi tuʻa mei he ngataʻanga ʻo hono kolo hūfangá ʻo ne tāmateʻi ʻa e tokotaha tāmate tangatá, ʻoku ʻikai haʻane halaia ʻi he totó. 28 He kuo pau ke ne nofo ʻi hono kolo hūfangá kae ʻoua ke mate ʻa e taulaʻeiki lahí. Ka ʻi he hili ʻa e mate ʻa e taulaʻeiki lahí, ʻe lava ke toe foki ʻa e tokotaha tāmate tangatá ki he tofiʻa ʻoku ʻoʻoná.+ 29 Ko e ngaahi meʻá ni ʻe hoko ia ko ha tuʻutuʻuni fakaefakamaau maʻamoutolu ʻi he kotoa homou ngaahi toʻutangatá ʻi he kotoa homou ngaahi nofoʻangá.

30 “‘ʻIlonga ʻa ia ʻokú ne tāmateʻi ha taha ʻoku totonu ke tāmateʻi ia ʻi he tuʻunga ko ha tokotaha fakapō+ ʻi he fakamoʻoni ʻa ha* kau fakamoʻoni;+ ka ʻe ʻikai ke tāmateʻi ha taha ʻi he fakamoʻoni ʻa ha tokotaha fakamoʻoni pē ʻe taha. 31 Kuo pau ke ʻoua naʻa mou tali ha totongi huhuʻi ki he moʻui ʻa ha tokotaha fakapō ʻoku tuha mo e maté, he ʻoku totonu ke mātuʻaki tāmateʻi ia.+ 32 Pea kuo pau ke ʻoua naʻa mou tali ha totongi huhuʻi ki ha taha kuo hola ki hono kolo hūfangá, ʻo fakaʻatā ia ke ne toe nofo ʻi hono tofiʻá ki muʻa ʻi he mate ʻa e taulaʻeiki lahí.

33 “‘Kuo pau ke ʻoua naʻa mou ʻuliʻi ʻa e fonua ʻoku mou nofo aí, he ʻoku ʻuliʻi ʻe he totó ʻa e fonuá,+ pea ʻe ʻikai fai ha feilaulau ʻufiʻufi angahala maʻá e toto kuo lilingi ʻi he fonuá tuku kehe pē ʻaki ʻa e toto ʻo e tokotaha naʻá ne lilingi iá.+ 34 Kuo pau ke ʻoua naʻá ke ʻuliʻi ʻa e fonua ʻoku mou nofo aí, ʻa ia ʻoku ou nofo aí; he ko au Sihova, ʻoku ou nofo ʻi he lotolotonga ʻo e kakai ʻo ʻIsilelí.’”+