Nōmipa

14 Naʻe hiki hake leva ʻe he fuʻu fakatahá kotoa ʻa honau leʻó, pea naʻe hanganaki kalanga mo tangi ʻa e kakaí ʻi he pō kotoa ko iá.+ 2 Ko e kau ʻIsilelí kotoa naʻe kamata ke nau lāunga ʻo fakafepaki kia Mōsese mo ʻĒlone,+ pea ko e fuʻu fakatahá fakakātoa naʻa nau lea fakafepaki ʻo kau kiate kinaua, ʻo pehē: “Pehē ange mai naʻa tau mate ʻi he fonua ko ʻIsipité, pe pehē ange mai naʻa tau mate ʻi he toafá ni! 3 Ko e hā ʻoku ʻomi ai ʻe Sihova kitautolu ki he fonuá ni ke tau tō ʻi he heletaá?+ ʻE hoko ʻo ʻave fakamālohi+ ʻa hotau ngaahi uaifí mo ʻetau fānaú. ʻIkai ʻe lelei ange ke tau foki ki ʻIsipite?”+ 4 Naʻe aʻu ʻo nau fepehēʻaki: “Tau fakanofo hatau taki pea tau foki ki ʻIsipite!”+

5 Naʻe tō foʻohifo leva ʻa Mōsese mo ʻĒlone ki he kelekelé ʻi he ʻao ʻo e fakatahaʻanga fakakātoa ʻo ʻIsileli naʻe fakatahataha aí. 6 Ko Siosiua+ ko e foha ʻo Nuní mo Kēlepi+ ko e foha ʻo Sīfuné, ʻa ia naʻá na kau ʻi he faʻahinga naʻa nau asiasi ʻa e fonuá, naʻá na hae ʻa hona kofú, 7 pea naʻá na leaʻaki eni ki he fuʻu fakataha kotoa ʻo e kau ʻIsilelí: “Ko e fonua naʻa mau ʻalu atu ai ke asiasí ko ha fonua lelei ʻaupito, ʻaupito.+ 8 Kapau ʻoku hōifua ʻa Sihova ʻiate kitautolu, ko e moʻoni te ne ʻave kitautolu ki he fonuá ni pea foaki mai ia maʻatautolu, ko ha fonua ʻa ia ʻoku mahutafea ʻi he huʻakau mo e hone.+ 9 Ka kuo pau ke ʻoua naʻa mou angatuʻu kia Sihova, pea kuo pau ke ʻoua naʻa mou manavahē ki he kakai ʻo e fonuá,+ he te tau keina kinautolu.* Kuo toʻo ʻa honau maluʻangá meiate kinautolu, pea ʻoku kau ʻa Sihova mo kitautolu.+ ʻOua ʻe manavahē kiate kinautolu.”

10 Kae kehe, naʻe fealēleaʻaki ʻa e fuʻu fakatahá kotoa ke tolomakaʻi kinaua.+ Ka ko e lāngilangi ʻo Sihová naʻe hā ia ʻi he tēniti feʻiloakiʻangá ki he kakai kotoa ʻo ʻIsilelí.+

11 Naʻe folofola ange leva ʻa Sihova kia Mōsese: “ʻE tuku ʻafē ʻa e taʻefakaʻapaʻapa+ ʻa e kakaí ni kiate aú, pea ʻe tuku ʻafē ʻa ʻenau taʻetui kiate au neongo ʻa e ngaahi mana* kotoa naʻá ku fakahoko ʻi honau lotolotongá?+ 12 Tuku ke u taaʻi kinautolu ʻaki ʻa e mahaki fakaʻauha pea fakaʻauha ʻosi kinautolu, pea tuku ke u ngaohi koe ko ha puleʻanga lahi ange mo mālohi ange ʻiate kinautolu.”+

13 Ka naʻe pehē ʻe Mōsese kia Sihova: “Tā ʻe fanongo+ leva ʻa e kau ʻIsipité, ʻa ia naʻá ke ʻomi ʻa e kakaí ni mei honau lotolotongá ʻaki ho mālohí, 14 pea te nau talanoa fekauʻaki mo ia ki he kakai ʻo e fonuá ni. Ko e faʻahingá ni foki kuo nau fanongo ai ko koe, ʻe Sihova, ʻokú ke ʻi he lotolotonga ʻo e kakaí ni+ pea kuó ke hā kiate kinautolu mata ki he mata.+ Ko Sihova koe, pea ko hoʻo ʻaó ʻoku tuʻu ʻi ʻolunga ʻiate kinautolu, pea ʻokú ke hāʻele ʻi muʻa ʻiate kinautolu ʻi he pou ʻao ʻi he ʻahó pea ʻi he pou afi ʻi he poʻulí.+ 15 Kapau te ke tāmateʻi fakaʻangataha* ʻa e kakaí ni, ko e ngaahi puleʻanga kuo nau fanongo fekauʻaki mo ho ongoongó te nau leaʻaki eni: 16 ‘Naʻe ʻikai malava ʻe Sihova ke ʻave ʻa e kakaí ni ki he fonua naʻá ne fuakava ke foaki kiate kinautolú, ko ia naʻá ne tāmateʻi ai kinautolu ʻi he toafá.’+ 17 Kātaki muʻa ʻe Sihova, tuku ke lahi ho mālohí ʻo hangē ko hoʻo talaʻofá, ʻi hoʻo pehē: 18 ‘Ko Sihová, ʻoku tuai ki he houhau pea fonu ʻi he ʻofa mateaki,*+ ʻokú ne fakamolemoleʻi ʻa e faihalá mo e laka halá, ka ʻe ʻikai ʻaupito te ne tuku taʻetautea ʻa e halaiá, ʻokú ne ʻomai ʻa e tautea ki he faihala ʻa e ngaahi tamaí ʻo hilifaki ki he ngaahi fohá, ki he toʻutangata hono tolú pea ki he toʻutangata hono faá.’+ 19 Fakamolemoleʻi muʻa ʻa e faihala ʻa e kakaí ni ʻo fakatatau ki he lahi ʻo hoʻo ʻofa mateakí, ʻo hangē pē ko hoʻo fakamolemoleʻi ʻa e kakaí ni mei ʻIsipite ʻo aʻu mai ki he taimi ní.”+

20 Naʻe folofola leva ʻa Sihova: “ʻOku ou fakamolemoleʻi kinautolu ʻo fakatatau ki hoʻo leá.+ 21 Ka ʻi he tafaʻaki ʻe tahá, ʻoku ou fuakava ʻiate au,* ko e māmaní kotoa ʻe fonu ʻi he lāngilangi ʻo Sihová.+ 22 Kae kehe, ʻe ʻikai ha taha ʻo e kau tangata kuo nau mamata ki hoku lāngilangí mo ʻeku ngaahi mana*+ naʻá ku fakahoko ʻi ʻIsipite pea ʻi he toafá ka nau kei hanganaki ʻahiʻahiʻi pē au+ ʻo tuʻo hongofulu ko ení pea kuo ʻikai te nau fanongo ki hoku leʻó+ 23 ʻe faifai ange pea nau sio ʻi he fonua ʻa ia naʻá ku fuakava fekauʻaki mo ia ki heʻenau ngaahi tamaí. ʻIo, heʻikai ha taha ʻi he faʻahinga ʻoku nau taʻefakaʻapaʻapa kiate aú ʻe sio ai.+ 24 Ka koeʻuhi ko ʻeku sevāniti ko Kēlepí+ naʻá ne maʻu ha laumālie kehe pea hanganaki muimui ʻaufuatō kiate au, ko e moʻoni te u ʻave ia ki he fonua ʻa ia naʻá ne ʻalu ki aí, pea ʻe maʻu ia ʻe hono hakó.+ 25 Koeʻuhi ko e nofo ʻa e kau ʻAmalekí mo e kau Kēnaní+ ʻi he teleʻá,* ʻoku totonu ke mou tafoki ʻapongipongi ʻo fononga ki he toafá ʻo fou atu ʻi he hala ki he Tahi Kulokulá.”+

26 Naʻe folofola leva ʻa Sihova kia Mōsese mo ʻĒlone: 27 “ʻE tuku ʻafē ʻa e hanganaki lāunga ko eni ʻa e fuʻu fakataha koví ni ʻo fakafepaki mai kiate aú?+ Kuó u fanongo ʻi he meʻa ʻoku lāunga ʻaki ʻe he kau ʻIsilelí ʻo kau kiate aú.+ 28 Tala kiate kinautolu, ‘“ʻOku ou fuakava ʻiate au,”* ko e fakahaaʻi ia ʻe Sihová, “te u fai kiate kimoutolu ʻa e meʻa tofu pē kuó u fanongo ai ʻoku mou leaʻakí!+ 29 ʻE tō ʻa homou ʻangaʻangá ʻi he toafá ni,+ ʻio, ʻa homou tokolahi kotoa mei he taʻu 20 ʻo faai ki ʻolunga ʻa ia naʻe lēsisitá, ʻa kimoutolu kotoa kuo mou lāunga ʻo fakafepaki kiate aú.+ 30 ʻE ʻikai hū ha taha ʻo kimoutolu ki he fonua naʻá ku fuakava* ke mou nofo aí+ tuku kehe pē ʻa Kēlepi ko e foha ʻo Sīfuné mo Siosiua ko e foha ʻo Nuní.+

31 “‘“Pea te u ʻave ki ai hoʻomou fānaú, ʻa ia naʻa mou pehē ʻe hoko ʻo ʻave fakamālohí,+ pea te nau hoko ʻo maheni mo e fonua kuo mou siʻakí.+ 32 Ka ko e ʻangaʻanga ʻo kimoutolú ʻe tō ia ʻi he toafá ni. 33 Ko eni ʻe hoko homou ngaahi fohá ko e kau tauhi-sipi ʻi he toafá ʻi he taʻu ʻe 40,+ pea kuo pau ke nau fua ʻa e nunuʻa ʻo hoʻomou ngaahi tōʻonga taʻefaitōnungá* kae ʻoua ke tō ʻa e ʻangaʻanga fakamuimui taha ʻiate kimoutolú ʻi he toafá.+ 34 Fakatatau ki he lahi ʻo e ngaahi ʻaho naʻa mou asiasi ai ʻa e fonuá, ko e ʻaho ʻe 40,+ ko e ʻaho ki he taʻu, ko e ʻaho ki he taʻu, te mou fua ai ʻa e nunuʻa ʻo hoʻomou ngaahi faihalá ʻo taʻu ʻe 40,+ he te mou ʻilo ai ʻa e meʻa ʻe hoko ʻi he fakafepaki kiate aú.*

35 “‘“Ko au Sihova, kuó u leá. Ko e meʻa eni te u fai ki he kotoa ʻo e fuʻu fakataha koví ni, ʻa e faʻahinga kuo nau fakatahataha ʻo fakafepaki kiate aú: Te nau hoko ʻi he toafá ni ki honau ikuʻangá, pea ko eni te nau mate aí.+ 36 Ko e kau tangata naʻe fekauʻi atu ʻe Mōsese ke nau asiasi ʻa e fonuá pea kuo nau fakatupunga ʻa e fuʻu fakatahá fakakātoa ke nau lāunga ʻo fakafepaki kiate ia ʻi heʻenau foki mai mo ha fakamatala kovi ʻo fekauʻaki mo e fonuá,+ 37 ʻio, ʻa e kau tangata naʻa nau ʻomi ʻa e fakamatala kovi fekauʻaki mo e fonuá ʻe taaʻi kinautolu ʻo nau mate ʻi he ʻao ʻo Sihová.+ 38 Ka ko Siosiua ko e foha ʻo Nuní mo Kēlepi ko e foha ʻo Sīfuné, ʻa ia naʻá na kau ʻi he faʻahinga naʻa nau ʻalu atu ʻo asiasi ʻa e fonuá, ko e moʻoni ʻe hokohoko atu ʻena moʻuí.”’”+

39 ʻI he leaʻaki ʻe Mōsese ʻa e ngaahi leá ni ki he kotoa ʻo e kau ʻIsilelí, naʻe kamata ke mamahi lahi ʻa e kakaí. 40 ʻIkai ko ia pē, naʻa nau tuʻu pongipongia hake ʻo feinga ke ʻalu hake ki he tumutumu ʻo e moʻungá, ʻo nau pehē: “Ko kimautolu eni ʻoku mau mateuteu ke ʻalu hake ki he feituʻu naʻe folofola ʻa Sihova ʻo fekauʻaki mo iá, he kuo mau faiangahala.”+ 41 Ka naʻe pehē ʻe Mōsese: “Ko e hā ʻoku mou fakalaka ai ʻi he tuʻutuʻuni ʻa Sihová? ʻE ʻikai ke lavameʻa eni. 42 ʻOua te mou ʻalu hake, he ʻoku ʻikai ke kau ʻa Sihova mo kimoutolu; pea ʻe ikunaʻi kimoutolu ʻe homou ngaahi filí.+ 43 He ko e kau ʻAmalekí mo e kau Kēnaní ʻoku nau ʻi ai ke fehangahangai mo kimoutolu,+ pea te mou tō ʻi he heletaá. Koeʻuhi ko hoʻomou tafoki mei he muimui kia Sihová, ʻe ʻikai ke kau ʻa Sihova mo kimoutolu.”+

44 Kae kehe, naʻa nau ʻalu atu ʻi he ʻafungi ki he tumutumu ʻo e moʻungá,+ ka naʻe ʻikai mavahe ʻa e ʻaʻake ʻo e fuakava ʻa Sihová pea mo Mōsese mei he loto-mālie ʻo e ʻapitangá.+ 45 Ko e kau ʻAmalekí leva mo e kau Kēnani ʻa ia naʻa nau nofo ʻi he moʻunga ko iá naʻa nau ʻalu hifo ʻo taaʻi kinautolu, ʻo nau movete atu ai ʻo aʻu ki Hoama.+