ʻAisea

61 ʻOku ʻiate au ʻa e laumālie ʻo e ʻEiki Hau ko Sihová,+

Koeʻuhi naʻe pani au ʻe Sihova ke u talaki ʻa e ongoongo leleí ki he kau anga-vaivaí.+

Naʻá ne fekauʻi mai au ke u haʻihaʻi ʻa e kau loto-mafesí,

Ke u fanongonongo ha tauʻatāina ki he pōpulá

Pea ke ʻai ke mātuʻaki ʻā ʻa e mata ʻo e nofo pilīsoné,+

 2 Ke fanongonongo ʻa e taʻu ʻo e hōifua* ʻa Sihová

Mo e ʻaho ʻo e sāuni ʻa hotau ʻOtuá,+

Ke fakafiemālieʻi ʻa kinautolu kotoa ʻoku mamahí,+

 3 Ke fai ha tokonaki maʻá e faʻahinga ʻoku mamahi koeʻuhi ko Saioné,

Ke ʻoange kiate kinautolu ha pūlou ke fetongiʻaki ʻa e efuefú,

Ko e lolo ʻo e fiefia ke fetongiʻaki ʻa e mamahí,

Ko e kofu ʻo e fakahīkihiki ke fetongiʻaki ʻa e laumālie mafasiá.

Pea ʻe ui kinautolu ko e ʻuluʻakau lalahi ʻo e māʻoniʻoní,

Ko e ʻakau naʻe tō ʻe Sihova, koeʻuhí ke fakalāngilangiʻi ai ia.*+

 4 Te nau toe langa ʻa e ngaahi maumau ʻo e kuonga muʻá;

Te nau fokotuʻu ʻa e ngaahi feituʻu naʻe maomaonganoa ʻi he kuohilí,+

Pea te nau toe fakafoʻou ʻa e ngaahi kolo kuo maumaú,+

ʻA e ngaahi feituʻu naʻe tuʻu maomaonganoa mei he toʻutangata ki he toʻutangata.+

 5 “ʻE tuʻu hake ha kau sola ʻo tauhi ʻa hoʻomou fanga sipí,

Pea ko e kau mulí+ te nau hoko ko hoʻomou kau ngoue mo hoʻomou kau tauhi ngoue kālepi.+

 6 Ka ko kimoutolu, ʻe ui kimoutolu ko e kau taulaʻeiki ʻa Sihova;+

Te nau ui kimoutolu ko e kau tauhi ʻa hotau ʻOtuá.

Te mou kai ʻa e koloa ʻa e ngaahi puleʻangá,+

Pea te mou pōlepole ʻo fekauʻaki mo honau lāngilangí.*

 7 ʻE fetongi ʻa e fakamaá ʻaki hoʻomou maʻu ʻa e ʻinasi lōua,

Pea ʻe fetongi ʻa e ongoʻi maá ʻaki ʻenau kaila fiefia koeʻuhí ko honau ʻinasí.

 8 He ko au Sihova ʻoku ou manako ki he fakamaau totonú;+

ʻOku ou fehiʻa ʻi he kaihaʻá mo e taʻemāʻoniʻoní.+

Te u faitotonu ʻo ʻoange kiate kinautolu ʻa ʻenau totongí,

Pea te u fai ha fuakava taʻengata mo kinautolu.+

 9 ʻE ʻiloʻi ʻa ʻenau fānaú* ʻi he lotolotonga ʻo e ngaahi puleʻangá+

Pea mo honau ngaahi hakó ʻi he lotolotonga ʻo e ngaahi kakaí.

Ko e faʻahinga kotoa te nau sio kiate kinautolú te nau ʻiloʻi,

Ko e fānau* kinautolu kuo faitāpuekina ʻe Sihova.”+

He kuó ne fakakofu au ʻaki ʻa e ngaahi kofu ʻo e fakamoʻuí;+

Kuó ne fakatui ʻiate au ʻa e pulupulu* ʻo e māʻoniʻoní,

ʻO hangē ha tangata mali ʻokú ne ʻai ha faʻufaʻu hangē ko e faʻufaʻu ʻo ha taulaʻeikí,+

Pea hangē ha taʻahine mali ʻokú ne teuteuʻaki ʻa ʻene ngaahi meʻa-teuteú.

11 He hangē pē ko e tupu hake ʻi he māmaní ʻa hono hulí

Pea hangē ko hono ʻai ʻe he ngoué ʻa e meʻa kuo tūtuuʻi aí ke tupu maí,

ʻE pehē pē ʻa e hanga ʻe he ʻEiki Hau ko Sihová

ʻO ʻai ʻa e māʻoniʻoní+ mo e fakahīkihikí ke tupu mai+ ʻi he ʻao ʻo e ngaahi puleʻangá kotoa.