Nehemaia

2 ʻI he māhina ko Nīsaní,* ʻi he taʻu hono 20+ ʻo e pule ʻa Tuʻi ʻAtaseasé,+ naʻe tuku atu ʻi hono ʻaó ʻa e uaine, pea hangē ko ia naʻe angamaheniʻakí naʻá ku toʻo hake ʻa e uainé ʻo ʻoange ki he tuʻí.+ Ka naʻe teʻeki ai ʻaupito te u mata mamahi ʻi hono ʻaó. 2 Ko ia naʻe pehē mai ʻe he tuʻí kiate au: “Ko e hā ʻokú ke mātuʻaki mata mamahi aí lolotonga ia ʻoku ʻikai te ke puke? ʻOku ʻikai mo ha toe meʻa ka ko e mamahi pē ʻo e lotó.” ʻI he meʻá ni naʻá ku hoko ai ʻo mātuʻaki ilifia.

3 Naʻá ku pehē ange leva ki he tuʻí: “Ke lākoifie ʻa e ʻAfioná! Ko e hā ka ʻikai te u mata mamahi ai lolotonga ia ko e koló, ʻa e feituʻu ʻoku tanu ai ʻeku fanga kuí, ʻoku ʻi he tuʻunga maumau lahi, pea ko hono ngaahi matapaá kuo keina ʻe he afí?”+ 4 Naʻe folofola mai leva ʻa e tuʻí kiate au: “Ko e hā ia ʻokú ke feinga ke faí?” Naʻá ku lotu leva ʻi he taimi ko iá ki he ʻOtua ʻo langí.+ 5 Naʻá ku pehē ange leva ki he tuʻí: “Kapau ʻoku hā lelei ki he ʻAfiona pea kapau ʻoku leleiʻia ʻa e ʻAfioná ʻi hoʻo sevānití, fekau muʻa au ki Siuta, ki he kolo ʻoku tanu ai ʻeku fanga kuí, koeʻuhi ke u toe langa ia.”+ 6 Naʻe pehē mai leva ʻe he tuʻí kiate au, lolotonga ia ʻoku tangutu ʻa hono uaifi fakatuʻí* ʻi hono tafaʻakí: “Ko e hā hono fuoloa ʻa hoʻo fonongá, pea te ke foki maí ʻafē?” Ko ia naʻe hōifua ʻa e tuʻí ke fekau atu au,+ pea naʻá ku ʻoange kiate ia ha taimi pau.+

7 Pea naʻá ku pehē ange ki he tuʻí: “Kapau ʻoku hā lelei ki he ʻAfioná, ʻomi muʻa kiate au ha ngaahi tohi ke ʻave ki he kau kōvana ʻi he vahefonua ʻi he Tuʻa Vaitafé,*+ ke nau fakaʻatā au ke u fou atu ai kae ʻoua kuó u aʻu ki Siuta, 8 pea pehē foki ki ha tohi kia ʻĒsafe ko e tauhi ʻo e Paʻake Fakatuʻí,* koeʻuhi ke ne lava ʻo ʻomai kiate au ha papa ki he ngaahi pimi ʻo e ngaahi matapā ʻo e Feituʻu Fakakolotau+ ʻo e Falé* pea ki he ngaahi ʻā ʻo e koló+ pea mo e fale ko ia te u ʻalu ki aí.” Ko ia naʻe ʻomi ia ʻe he tuʻí kiate au,+ he naʻe tokoniʻi au ʻe hoku ʻOtuá.+

9 Naʻe faifai atu pē pea naʻá ku aʻu ki he kau kōvana ʻo e vahefonua ʻo e Tuʻa Vaitafé peá u ʻoange kiate kinautolu ʻa e ngaahi tohi ʻa e tuʻí. Naʻe fekauʻi foki ʻe he tuʻí ha kau ʻeikitau mo ha kau tangata heka hoosi ke nau ʻalu mo au. 10 ʻI he taimi naʻe fanongo ai ʻa Sanipalate+ mei Pete-holoní mo Tōpaia+ ko e ʻōfisa* ʻĀmoní+ ʻo fekauʻaki mo e meʻá ni, naʻá na mātuʻaki taʻefiemālie ki he haʻu ha taha ke fai ha meʻa lelei maʻá e kakai ʻo ʻIsilelí.

11 Naʻe faai atu pē peá u aʻu ki Selusalema, pea naʻá ku nofo ai ʻi he ʻaho ʻe tolu. 12 Naʻá ku tuʻu poʻuli hake mo ha kau tangata tokosiʻi pē naʻe ʻiate aú, pea naʻe ʻikai te u tala ki ha taha ʻa e meʻa kuo ʻai ʻe hoku ʻOtuá ki hoku lotó ke u fai maʻa Selusalemá, pea naʻe ʻikai ke ʻi ai ha monumanu te u ʻalu mo ia tuku kehe pē ʻa e monumanu ko ia naʻá ku heka aí. 13 Pea naʻá ku hū poʻuli atu ʻi he Matapā Teleʻá,+ ʻo fakalaka atu ʻi muʻa ʻi he Matavai ʻo e Ngata Lahí ki he Matapā Vevé,+ pea naʻá ku vakaiʻi ʻa e ngaahi ʻā ko ia ʻo Selusalema naʻe maumaú pea mo hono ngaahi matapā naʻe keina ʻe he afí.+ 14 Pea naʻá ku fou atu ai pē ki he Matapā Faunitení+ pea ki he Vai ʻa e Tuʻí, pea naʻe ʻikai ke ʻataʻatā feʻunga ke fou atu ai ʻa e monumanu naʻá ku heka aí. 15 Ka naʻá ku ʻalu hake ai pē ʻi he teleʻá*+ ʻi he poʻulí, pea naʻá ku toutou vakaiʻi ai pē ʻa e ʻaá, ʻi he hili iá naʻá ku foki mai ʻo hū atu ʻi he Matapā Teleʻá, peá u foki leva.

16 Naʻe ʻikai ʻilo ʻe he kau tokoni pulé+ ʻa e feituʻu naʻá ku ʻalu ki aí pea mo e meʻa naʻá ku faí, he naʻe teʻeki ai te u leaʻaki ha meʻa ʻe taha ki he kau Siú, mo e kau taulaʻeikí, mo e kau houʻeikí, mo e kau tokoni pulé, pea mo e toenga ʻo e kau ngāué. 17 Faifai atu pē peá u pehē ange kiate kinautolu: “ʻOku lava ke mou sio ki he tuʻunga faingataʻa ʻoku tau ʻi aí, ʻa e hoko ʻa Selusalema ko e koto maumaú pea ko hono ngaahi matapaá kuo tutu ʻaki ʻa e afí. Mou haʻu ke tau toe langa ʻa e ngaahi ʻā ʻo Selusalemá, koeʻuhi ke ʻoua ʻe kei hokohoko atu ʻa e tuʻunga fakamaá ni.” 18 Naʻá ku tala ange leva kiate kinautolu ʻa hono tokoniʻi au+ ʻe hoku ʻOtuá pea pehē ki he ngaahi lea naʻe folofolaʻaki ʻe he tuʻí kiate aú.+ ʻI he meʻá ni naʻa nau pehē mai: “Tau tuʻu hake ʻo fai ʻa e langá.” Ko ia naʻa nau fakaivimālohiʻi kinautolu* ki he ngāue leleí ni.+

19 Pea ʻi he fanongo ai ʻa Sanipalate mei Pete-holoní, mo Tōpaia+ ko e ʻōfisa* ʻĀmoní,+ pea mo Kēsemi mei ʻAlepeá,+ naʻe kamata ke nau lumaʻi kimautolu+ mo fakahaaʻi mai ʻenau taʻetokaʻí pea nau pehē mai: “Ko e hā hoʻomou meʻa ʻoku faí? ʻOku mou fakafepaki ki he tuʻí?”+ 20 Kae kehe, naʻá ku tali atu: “Ko e ʻOtua ʻo langí ʻa e Tokotaha te ne tuku ke mau lavameʻá,+ pea ko kimautolu ko ʻene kau sevānití te mau tuʻu hake ʻo fai ʻa e langá; ka ʻoku ʻikai hamou kaunga pe totonu pe ko hamou fakamanatu ʻi Selusalema.”+