Ua Kolinitō

7 Ko ia ai, koeʻuhi ko ʻetau maʻu ʻa e ngaahi talaʻofá ni,+ siʻi faʻahinga ʻofeina, tuku ke tau fakamaʻa kitautolu mei he ʻuli kotoa pē ʻo e kakanó mo e laumālié,+ ʻo fakahaohaoa hotau tuʻunga māʻoniʻoní ʻi he manavahē ki he ʻOtuá.

2 Mou tali kimautolu ʻi homou lotó.+ Kuo ʻikai te mau faihala ki ha taha, kuo ʻikai te mau fakatupu ha maumau ki ha taha, kuo ʻikai te mau ngāuekākāʻaki ha taha.+ 3 ʻOku ʻikai te u leaʻaki ení ke fakahalaiaʻi kimoutolu. He kuó u ʻosi leaʻaki ki muʻa ʻoku mou ʻi homau lotó ke tau mate fakataha pea tau moʻui fakataha. 4 ʻOku ou maʻu ʻa e tauʻatāina lahi ʻo e leá ʻi he lea atu kiate kimoutolú. ʻOku ou pōlepole lahi ʻi he fekauʻaki mo kimoutolú. ʻOku ou fonu ʻi he fiemālie; ʻoku ou fonu mahuohua ʻi he fiefia ʻi he kotoa homau ngaohikoviá.+

5 Ko hono moʻoní, ʻi heʻemau aʻu ki Masitōniá,+ naʻe ʻikai maʻu ʻe homau sinó* ha fiemālie, ka naʻe hokohoko atu ke ngaohikovia kimautolu ʻi he founga kotoa pē—naʻe ʻi ai ʻa e ngaahi faitau ʻi tuʻa mo e ngaahi manavahē ʻi loto. 6 Ka ko e ʻOtuá, ʻa ia ʻokú ne fakafiemālieʻi ʻa e faʻahinga ʻoku loto-mafasiá,+ naʻá ne fakafiemālieʻi kimautolu fakafou ʻi he lava mai ʻa Taitusí; 7 ʻo ʻikai ʻi heʻene lava maí pē kae toe pehē foki ki he fakafiemālie naʻá ne maʻu koeʻuhi ko kimoutolú, ʻi heʻene fakamatala mai kiate kimautolu ʻo fekauʻaki mo hoʻomou fakatuʻotuʻa mai kiate aú, ko e lahi hoʻomou mamahí, mo hoʻomou tokanga fakamātoato mai kiate* aú; ko ia naʻe toe ʻāsili ai ʻeku fiefiá.

8 He neongo kapau naʻá ku fakalotomamahiʻi kimoutolu ʻi heʻeku tohí,+ ʻoku ʻikai te u fakaʻiseʻisa ai. Neongo kapau naʻá ku ʻuluaki fakaʻiseʻisa ai ki muʻa (ʻi he sio naʻe fakalotomamahiʻi kimoutolu ʻe he tohí, neongo ko e kiʻi taimi nounou pē), 9 ʻoku ou fiefia ʻi he taimí ni, ʻo ʻikai koeʻuhí pē naʻe fakalotomamahiʻi kimoutolu, ka koeʻuhí naʻe fakalotomamahiʻi kimoutolu ʻo iku ai ki he fakatomala. He naʻe fakalotomamahiʻi kimoutolu ʻi ha founga ʻoku hōifua ai ʻa e ʻOtuá, ke ʻoua te mou faingataʻaʻia ai ʻi ha maumau koeʻuhí ko e tupu meiate kimautolu. 10 He ko e mamahi ʻi ha founga ʻoku hōifua ai ʻa e ʻOtuá ʻoku tupu ai ʻa e fakatomala ʻo taki atu ki he fakamoʻuí, ʻa ia ʻe ʻikai hoko ai ha fakaʻiseʻisa;+ ka ko e ongoʻi mamahi hangē ko e kakai ʻo e māmaní ʻoku tupu ai ʻa e maté. 11 He vakai, he fua lahi ē ʻoku ʻomai ʻe he mamahi ʻi he founga ʻoku hōifua ai ʻa e ʻOtuá kiate kimoutolú, ko hono fakaʻataʻatā ʻo kimoutolú, ko hoʻomou fakaʻiseʻisa ʻi he faihalá, ko hoʻomou manavaheé, ko hoʻomou holi fakamātoató, ko hoʻomou faivelengá, ko hoʻomou fakatonutonu ʻa e halá!+ ʻI he tafaʻaki kotoa pē naʻa mou fakahāhā ai ʻa hoʻomou maʻá* ʻi he meʻá ni. 12 Neongo naʻá ku tohi atu kiate kimoutolu, naʻe ʻikai ke u fai iá ki he tokotaha naʻá ne fai ʻa e halá,+ pe ki he tokotaha naʻe fai ki ai ʻa e faihalá, ka koeʻuhí ke hoko hoʻomou fakamātoato ʻi he fakaongo ki he meʻa naʻa mau tala atú ʻo hā mahino ʻi homou lotolotongá ʻi he ʻafio mai ʻa e ʻOtuá. 13 Ko e ʻuhinga ia kuo mau hoko ai ʻo fiemālié.

Ka ʻi he tānaki atu ki heʻemau fiemālié, naʻe toe ʻāsili ʻemau fiefiá ʻi he fiefia ʻa Taitusí, koeʻuhí ko e kotoa ʻo kimoutolú naʻa mou fakaivifoʻou hono laumālié. 14 He kapau kuó u pōlepole ʻaki kimoutolu kiate ia, kuo ʻikai ke fakamaaʻi ai au; kae hangē tofu pē ko e moʻoni ʻa e ngaahi meʻa kotoa naʻa mau tala atu kiate kimoutolú, ʻoku pehē pē foki ʻa e fakamoʻoniʻi ʻoku moʻoni ʻemau pōlepole naʻe fai kia Taitusí. 15 Pehē foki, ʻoku toe lahi ange ʻene manavaʻofa loloto kiate kimoutolú ʻi heʻene manatuʻi ʻa e talangofua ʻa e kotoa ʻo kimoutolú,+ ʻa hoʻomou tali ia ʻi he manavahē mo e tetetete. 16 ʻOku ou fiefia koeʻuhi ʻi he founga kotoa pē ʻoku lava ke u falala pau ai kiate* kimoutolu.