Tangata Malanga

8 Ko hai ʻoku hangē ko e tangata potó? Ko hai ʻokú ne ʻilo ʻa e fakaleleiʻanga ki ha palopalema?* Ko e poto ʻo e tangatá ʻokú ne fakamaama ʻa hono matá mo fakavaivaiʻi ʻa hono fōtunga anga-fefeká.

2 ʻOku ou pehē: “Ke talangofua ki he ngaahi tuʻutuʻuni ʻa e tuʻí+ koeʻuhí ko e fuakava kuo fai ki he ʻOtuá.+ 3 ʻOua naʻá ke fakavave ke mavahe mei hono ʻaó.+ ʻOua naʻá ke kau ʻi ha faʻahinga meʻa ʻoku kovi;+ he ʻokú ne malava ke fai ha meʻa pē ʻokú ne finangalo ki aí, 4 koeʻuhi ko e folofola ʻa e tuʻí ʻoku pulé;+ ko hai ʻe malava ke ne pehē kiate ia, ‘Ko e hā ʻokú ke fai ai ení?’”

5 Ko e tokotaha ʻokú ne tauhi ʻa e tuʻutuʻuní ʻe ʻikai te ne hokosia ha kovi,+ pea ko e loto-potó te ne ʻilo ʻa e taimi totonú mo e fokotuʻutuʻu totonú.*+ 6 He ko e meʻa kotoa pē ʻoku ʻi ai hono taimi mo hono fokotuʻutuʻu,*+ koeʻuhi he ʻoku lahi fau ʻa e faingataʻaʻia ʻa e faʻahinga ʻo e tangatá. 7 Koeʻuhi ʻoku ʻikai ke ʻilo ʻe ha taha ʻa e meʻa ʻe hoko maí, ko hai ʻe lava ke ne tala kiate ia ʻa e anga ʻene hoko maí?

8 Hangē pē ko e ʻikai ha mālohi ʻo e tangatá ke pule ki he laumālié* pe malava ke taʻotaʻofi ʻa e laumālié, ko ia ai ʻoku ʻikai ha taha ʻokú ne pule ki he ʻaho ʻo e maté.+ Hangē pē ko e ʻikai ke tuku ange ha tokotaha lolotonga ʻa e taú, ʻoku pehē ʻa e ʻikai ke fakaʻatā ʻe he fulikivanú ke hao ʻa e faʻahinga ʻoku nau tōʻongaʻaki ʻa e fulikivanú.*

9 Ko e ngaahi meʻá ni kotoa kuó u mamata ki ai, peá u tuku hoku lotó ki he ngāue kotoa pē kuo fai ʻi he lalo laʻaá, lolotonga ʻa e taimi kuo pule ai ha tangata ki ha tangata ko e kovi* pē ʻokú ne ʻomi kiate iá.+ 10 Pea naʻá ku mamata ki hono tanu ʻo e kau fulikivanú, ʻa e faʻahinga naʻa nau faʻa ʻalu atu mo haʻu mei he feituʻu toputapú, ka naʻe vave ʻa e ʻikai manatua kinautolu ʻi he kolo naʻa nau tōʻonga fulikivanu aí.+ Ko e muna mo eni foki.

11 Koeʻuhi ko e ʻikai ke fakahoko vave ʻa e tautea ʻo ha ngāue kovi,+ kuo fakalotolahiʻi ai ʻa e loto ʻo e tangatá ke fai ʻa e meʻa ʻoku koví.+ 12 Neongo ʻe tuʻo teau ʻa e faikovi ʻa ha tokotaha angahala pea kei moʻui fuoloa pē, ka ʻoku ou ʻiloʻi ʻe ʻosi angé ʻoku iku lelei pē ʻa e faʻahinga ia ʻoku manavahē ki he ʻOtua moʻoní, koeʻuhí ʻoku nau manavahē kiate ia.+ 13 Ka ʻe ʻikai iku lelei ʻa e tokotaha fulikivanú,+ pe te ne fakalōloa hono ngaahi ʻahó ʻa ia ʻoku hangē ha ʻatá,+ koeʻuhi ʻoku ʻikai te ne manavahē ki he ʻOtuá.

14 ʻOku ʻi ai ha faʻahinga meʻa muna* ʻoku hoko ʻi he māmaní: ʻOku ʻi ai ʻa e kakai māʻoniʻoni ʻoku fai ʻa e fakafeangai kiate kinautolu ʻo hangē naʻa nau fai ha tōʻonga fulikivanú,+ pea ʻoku ʻi ai ʻa e kakai fulikivanu ʻoku fai ʻa e fakafeangai kiate kinautolu ʻo hangē naʻa nau fai ha tōʻonga māʻoniʻoní.+ ʻOku ou pehē ko e muna mo eni foki.

15 Ko ia ʻoku ou fakavīkivikiʻi ai ʻa e fiefiá,+ koeʻuhi ʻoku ʻikai ha meʻa ʻe lelei ange ki he tangatá ʻi he lalo laʻaá ka ke ne kai mo inu mo fiefia; ʻoku totonu ke feʻao eni mo ia ʻi heʻene ngāue mālohi lolotonga ʻa e ngaahi ʻaho ʻo ʻene moʻuí,+ ʻa ia kuo foaki kiate ia ʻe he ʻOtua moʻoní ʻi he lalo laʻaá.

16 Naʻá ku tuku hoku lotó ke u maʻu ʻa e potó pea ke u vakai ki he ngaahi ngāue kotoa ʻoku hoko ʻi he māmaní,+ ʻo aʻu ʻo ʻikai te u mohe ʻi he ʻaho mo e pō.* 17 Naʻá ku fakakaukau leva ki he ngāue kotoa ʻa e ʻOtua moʻoní, peá u fakatokangaʻi ʻoku ʻikai lava ke makupusi ʻe he faʻahinga ʻo e tangatá ʻa e ngaahi meʻa ʻoku hoko ʻi he lalo laʻaá.+ Neongo pe ko e hā ʻa e lahi ʻo e feinga ʻa e tangatá, heʻikai malava ke nau makupusi ia. Naʻa mo haʻanau taukaveʻi ʻo pehē ʻoku nau maʻu ha poto feʻunga ke ʻilo iá, heʻikai moʻoni ke malava ke nau makupusi ia.+