ʻUluaki Kolinitō

12 Ko ia, ʻi he fekauʻaki mo e ngaahi meʻaʻofa fakalaumālié,+ fanga tokoua, ʻoku ʻikai te u loto ke mou hoko ʻo taʻeʻilo ki ai. 2 ʻOku mou ʻilo, ʻi he taimi naʻa mou kei hoko ai ko e kakai ʻo e ngaahi puleʻangá,* naʻe tākiekina mo takiheeʻi kimoutolu ki he ngaahi ʻaitoli ʻoku ʻikai te nau lava ʻo lea,+ ʻo muimui ʻi ha feituʻu pē naʻa nau taki kimoutolu ki aí. 3 Pea ʻoku ou loto ke mou ʻilo ʻa e meʻá ni, ʻoku ʻikai ha taha ʻoku lea ʻi he tokoni ʻa e laumālie ʻo e ʻOtuá te ne pehē: “Ko Sīsuú kuo malaʻia!” ʻI he tākiekina ʻa e laumālie māʻoniʻoní ʻe lava ai ʻe ha taha ke ne pehē: “Ko Sīsū ʻa e ʻEikí!”+

4 Pea ʻoku ʻi ai ʻa e ngaahi meʻaʻofa kehekehe, ka ʻoku mei he laumālie tatau pē;+ 5 pea ʻoku ʻi ai ʻa e ngaahi ngāue tokoni kehekehe,+ pea neongo ia ko e ʻEiki tatau ai pē; 6 pea ʻoku ʻi ai ʻa e ngaahi ngāue kehekehe, pea neongo ia ko e ʻOtua tatau pē ʻokú ne tokoniʻi ʻa e tokotaha kotoa pē ke ne fai ʻa e ngaahi meʻá ni kotoa.+ 7 Ka ko e tokoni ʻa e laumālie māʻoniʻoní ʻoku hā mahino ia ʻi he tokotaha kotoa, pea ʻoku foaki ia ʻe he ʻOtuá ke ʻaonga ki he tokotaha kotoa.+ 8 He ʻoku foaki ki he tokotaha ʻa e lea* ʻo e potó fakafou ʻi he laumālié, ki he tokotaha ʻa e lea ʻo e ʻiló ʻo fakatatau ki he laumālie tatau pē, 9 ki he tokotaha ʻa e tuí+ fakafou ʻi he laumālie tatau pē, ki he tokotaha ʻa e ngaahi meʻaʻofa ʻo e faifakamoʻuí+ fakafou ʻi he laumālie pē taha ko iá, 10 pea ki he tokotaha ʻa hono fakahoko ʻo e ngaahi ngāue fakaofó,+ ki he tokotaha ʻa hono fai ʻo e kikité, ki he tokotaha ʻa e ʻiloʻi ʻo e ngaahi lea fakamānavaʻí,+ ki he tokotaha ʻa e lea ʻi he ngaahi lea kehekehé,+ pea ki he tokotaha ʻa hono fakatonulea ʻo e ngaahi leá.+ 11 Ka ko e kotoa ʻo e ngaahi ngāué ni ʻoku fakahoko ia ʻe he laumālie tatau pē ko iá, ʻo tufotufa ki he tokotaha taki taha ʻo fakatatau ki he finangalo ʻo e ʻOtuá.*

12 He hangē tofu pē ko e taha ʻa e sinó ka ʻoku lahi hono ngaahi kupú, pea ko e kotoa ʻo e ngaahi kupu ʻo e sino ko iá, neongo ʻene lahí, ʻoku nau sino pē taha,+ ko ia ʻoku pehē pē foki ʻa e Kalaisí. 13 He naʻe papitaiso kotoa kitautolu ʻi he laumālie pē taha ke tau hoko ko e sino pē taha, pe ko e Siu pe Kalisi, pe ko e pōpula pe tauʻatāina, pea naʻe ʻai kotoa kitautolu ke tau inu ʻa e laumālie pē taha.

14 He ko e moʻoni, ko e sinó ʻoku ʻikai ke faʻuʻaki ha kupu pē taha ka ʻoku lahi.+ 15 Kapau ʻe pehē ʻe he vaʻé, “Koeʻuhí ʻoku ʻikai ko ha nima au, ʻoku ʻikai ko ha konga au ia ʻo e sinó,” ʻoku ʻuhinga iá ʻoku ʻikai ko ha konga ia ʻo e sinó? 16 Pea kapau ʻe pehē ʻe he telingá, “Koeʻuhí ʻoku ʻikai ko ha mata au, ʻoku ʻikai ko ha konga au ia ʻo e sinó,” ʻoku ʻuhinga iá ʻoku ʻikai ko ha konga ia ʻo e sinó? 17 Kapau naʻe mata ʻa e sinó kotoa, ʻe ʻi fē ʻa e ongoʻanga ko e fanongó? Kapau naʻe fanongo kotoa, ʻe ʻi fē ʻa e ongoʻanga ko e nanamú? 18 Ka ko eni kuo fokotuʻutuʻu ʻe he ʻOtuá ʻa e kupu taki taha ʻo e sinó ʻo fakatatau pē ki hono finangaló.

19 Kapau naʻe tatau pē ʻa e ngaahi kupú kotoa, naʻe mei fēfē ʻa e sinó? 20 Ka ko eni ʻoku lahi ʻa e ngaahi kupú, ka ʻoku taha pē ʻa e sinó. 21 ʻE ʻikai lava ʻe he matá ke ne pehē ki he nimá, “ʻOku ʻikai te u fiemaʻu ʻe au koe,” pehē foki, ʻe ʻikai lava ʻe he ʻulú ke ne pehē ki he ongo vaʻé, “ʻOku ʻikai te u fiemaʻu ʻe au kimoua.” 22 ʻI hono kehé, ko e ngaahi kupu ʻo e sinó ʻa ia ʻoku hā ngali vaivai angé ʻoku mātuʻaki fiemaʻu ia, 23 pea ko e ngaahi konga ʻo e sinó ʻa ia ʻoku tau fakakaukau ʻoku siʻi hono ngeiá ʻoku tau ʻoange ki ai ʻa e ngeia lahi ange,+ ʻoku pehē pē mo hotau ngaahi konga ʻoku ʻikai matamataleleí ʻoku fai ʻa e fakafeangai ki ai ʻaki ʻa e anga-fakanānā lahi ange, 24 lolotonga ia ko hotau ngaahi konga ʻoku matamataleleí ʻoku ʻikai fiemaʻu ki ai ha meʻa. Ka neongo ia, kuo faʻu ʻe he ʻOtuá ʻa e sinó ke pehē, ʻo ne ʻoange ʻa e ngeia lahi ange ki he konga ʻoku ʻikai ke ngeiá, 25 koeʻuhi ke ʻoua naʻa ʻi ai ha māvahevahe ʻi he sinó, ka ʻoku totonu ke tauʻaki fetokangaʻaki ʻa hono ngaahi kupú.+ 26 Kapau ʻoku faingataʻaʻia ha kupu ʻe taha, ʻoku faingataʻaʻia fakataha mo ia ʻa e ngaahi kupu kehé kotoa;+ pea kapau ʻoku fakalāngilangiʻi ha kupu ʻe taha, ʻoku kaungā-fiefia mo ia ʻa e ngaahi kupu kehé kotoa.+

27 Pea ko eni ko kimoutolú ko e sino ʻo Kalaisi,+ pea ko e tokotaha taki taha ko ha kupu ʻo hono sinó.+ 28 Pea kuo vaheʻi ʻe he ʻOtuá ʻa e faʻahinga kehekehe ʻi he fakatahaʻangá: ʻUluakí, ko e kau ʻapositolo;+ ko hono uá, ko e kau palōfita;+ ko hono tolú, ko e kau faiako;+ hoko ai ʻa e faʻahinga ʻoku nau fai ʻa e ngaahi ngāue fakaofo;+ hoko ai ʻa e faʻahinga ʻoku nau maʻu ʻa e meʻaʻofa ke faifakamoʻui;+ faʻahinga ʻoku nau fai ʻa e ngaahi ngāue tokoni; faʻahinga ʻoku nau maʻu ʻa e ngaahi malava ke fakahinohino+ mo e faʻahinga ʻoku nau lea ʻi he ngaahi lea kehekehe.+ 29 ʻOku ʻikai ke ʻapositolo kotoa, ʻikai ko ia? ʻOku ʻikai ke palōfita kotoa, ʻikai ko ia? ʻOku ʻikai ke faiako kotoa, ʻikai ko ia? ʻOku ʻikai ke fakahoko kotoa ʻa e ngaahi ngāue fakaofo, ʻikai ko ia? 30 ʻOku ʻikai ke maʻu ʻe he faʻahinga kotoa ʻa e ngaahi meʻaʻofa ko e faifakamoʻuí, ʻikai ko ia? ʻOku ʻikai ke lea kehekehe kotoa, ʻikai ko ia?+ ʻOku ʻikai ke fakatonulea* kotoa, ʻikai ko ia?+ 31 Kae hanganaki feinga* ki he ngaahi meʻaʻofa ʻoku lahi angé.+ Pea te u toe fakahā atu kiate kimoutolu ha ʻalunga ʻoku mahulu haké.+