Ua Kolinitō

11 ʻOku ou fakaʻamu ange te mou kātakiʻi au, neongo kapau ʻoku ou hā ngali ko ha vale. Ka, ko hono moʻoní, ʻoku mou kātakiʻi au! 2 He ʻoku ou fuaʻa koeʻuhi ko kimoutolu ʻaki ha fuaʻa fakaʻotua,* he naʻá ku ʻoatu kimoutolu ke fakamaʻu ke mali ki ha husepāniti ʻe taha, ke u ʻoatu ai kimoutolu ko ha tāupoʻou* ki he Kalaisí.+ 3 Ka ʻoku ou ilifia naʻa faifai ange, hangē ko ia ko hono fakataueleʻi ʻe he ngatá ʻa ʻIvi ʻaki ʻene kākaá,+ ʻo hoko homou ʻatamaí ʻo fakameleʻi ʻo mou afe ai mei he tuʻunga loto-moʻoni mo e anga-maʻa* ʻa ia ʻoku tuha mo e Kalaisí.+ 4 He hangē ko ia ʻoku hokó, kapau ʻoku haʻu ha taha ʻo malangaʻi ha Sīsū kehe ia mei he Sīsū naʻa mau malangaʻí, pe ʻoku mou maʻu ha laumālie kehe ia mei he laumālie naʻa mou maʻú, pe ko ha ongoongo lelei kehe ia mei he meʻa naʻa mou talí,+ ʻoku mou kātakiʻingofua ʻa e tokotaha ko iá. 5 He ʻoku ou pehē kuo ʻikai te u fakamoʻoniʻi ʻoku ou māʻulalo ange ʻi hoʻomou kau ʻapositolo makehe atú ʻi ha meʻa ʻe taha.+ 6 Ka neongo kapau ʻoku ʻikai te u pōtoʻi ʻi he leá,+ ʻoku ou maʻu ʻa e ʻilo fekauʻaki mo e ʻOtuá; ko e moʻoni naʻa mau fakamahino atu ia kiate kimoutolu ʻi he founga kotoa pē pea ʻi he meʻa kotoa pē.

7 Pe naʻá ku fakahoko koā ha angahala ʻi heʻeku fakatōkilaloʻi au kae lava ke hakeakiʻi ai kimoutolú, koeʻuhí ko ʻeku talaki fiefia atu ʻa e ongoongo lelei ʻa e ʻOtuá kiate kimoutolu ʻo taʻeʻiai hano totongí?+ 8 Naʻá ku fakamasivaʻi* ʻa e ngaahi fakatahaʻanga kehé ʻaki hono tali ʻa e ngaahi tokonaki* meiate kinautolú koeʻuhi ke u ngāue atu ai maʻamoutolu.+ 9 Neongo ia, ʻi he taimi naʻá ku ʻiate kimoutolu aí pea ʻi heʻeku fusimoʻomó, naʻe ʻikai te u hoko ko ha kavenga ki ha taha, he ko e fanga tokoua naʻe ōmai mei Masitōniá naʻa nau tokonaki lahi fau mai ʻeku ngaahi fiemaʻú.+ ʻIo, ʻi he tafaʻaki kotoa pē naʻá ku ʻai maʻu pē au ke ʻoua te u hoko ko ha kavenga kiate kimoutolu pea te u hokohoko atu ke fai pehē.+ 10 Hangē tofu pē ko e ʻiate au ʻa e moʻoni ʻa Kalaisí, ʻe ʻikai tuku ʻeku pōlepole+ ko eni ʻi he ngaahi vahefonua ʻo ʻĀkeiá. 11 Ki he ʻuhinga ko e hā? Koeʻuhí ʻoku ʻikai te u ʻofa ʻiate kimoutolu? ʻOku ʻafioʻi ʻe he ʻOtuá ʻoku ou ʻofa ʻiate kimoutolu.

12 Ka ko e meʻa ʻoku ou faí te u hokohoko atu ke fai ia,+ koeʻuhí ke u toʻo atu ʻa e fakaʻuhinga hala ʻa e faʻahinga ʻoku nau fiemaʻu ha makatuʻunga ke lau ai kinautolu ʻoku nau tatau mo kimautolu ʻi he ngaahi meʻa* ko ia ʻoku nau pōlepole aí. 13 He ko e kau tangata peheé ko e kau ʻapositolo loi, ko e kau ngāue kākā, ʻoku nau fakapuli mai kinautolu ko e kau ʻapositolo ʻa Kalaisi.+ 14 Pea ʻoku ʻikai ha ofo ai, he ko Sētane tonu ʻokú ne hanganaki fakapuli mai ko ha ʻāngelo ia ʻo e māmá.+ 15 Ko ia ai, ʻoku ʻikai ko ha meʻa ngalikehe ia kapau ʻoku toe hanganaki fakapuli mo ʻene kau faifekaú* ko e kau faifekau kinautolu ʻo e māʻoniʻoní. Ka ko honau ikuʻangá ʻe fakatatau ki heʻenau ngaahi ngāué.+

16 ʻOku ou toe pehē atu: Tuku ke ʻoua ʻe fakakaukau ha taha ʻoku ou vale. Ka neongo kapau ʻoku mou fakakaukau pehē, peʻi tali au ko ha tokotaha vale, koeʻuhí ke u hoko foki ai mo au, ʻo kiʻi pōlepole. 17 ʻOku ʻikai te u kei lea ʻo muimui ʻi he faʻifaʻitakiʻanga ʻa e ʻEikí, ka ʻoku ou lea ʻo hangē ha tokotaha vale, ʻa ia ʻoku falala kiate ia pē mo pōlepole. 18 Koeʻuhi ko e tokolahi ʻoku nau pōlepole ʻo fakatatau ki he kakanó,* te u pōlepole foki mo au. 19 Koeʻuhi ko hoʻomou fuʻu “potó,” ʻoku mou kātakiʻi fiefia ai ʻa e kau valé. 20 Ko hono moʻoní, ʻoku mou kātakiʻi ha taha pē ʻokú ne taki pōpula kimoutolu, ha taha pē ʻokú ne keina hoʻomou ngaahi koloá, ha taha pē ʻokú ne ʻave ʻa e meʻa ʻoku mou maʻú, ha taha pē ʻokú ne hakeakiʻi ia ʻo māʻolunga ʻiate kimoutolu, pea mo ha taha pē ʻokú ne paaʻi homou matá.

21 ʻOku fakamā ʻemau leaʻaki ʻa e meʻá ni, koeʻuhí ʻe hā ki he niʻihi ʻo kimoutolu ʻoku mau fuʻu fakavaivai ke ngāueʻaki totonu homau mafaí.

Ka ʻo kapau ʻoku ʻikai ongoʻi mā ha niʻihi ke pōlepole, tā heʻikai te u ongoʻi mā mo au ke pōlepole, neongo ʻa e vakai mai ʻa ha taha kiate au ko ha vale. 22 Ko e kau Hepelū kinautolu? ʻOku pehē pē foki mo au.+ Ko e kau ʻIsileli kinautolu? ʻOku pehē pē foki mo au. Ko e hako kinautolu ʻo ʻĒpalahame? ʻOku pehē pē foki mo au.+ 23 Ko e kau faifekau kinautolu ʻa Kalaisi? Ka u tali ʻo hangē ha tangata seselé, ʻoku ou toe ʻamo ange au ia: Kuó u fai ʻa e ngāue lahi ange,+ toutou tuku pōpula tuʻo lahi ange,+ tofanga ʻi he ngaahi haha taʻefaʻalaua, pea tuʻo lahi ʻeku meimei mate.+ 24 Naʻe tuʻo nima hono haha au ʻe he kau Siú ʻi he foʻi hapo ʻe 40 kae nounou ʻaki ʻa e taha,+ 25 naʻe tuʻo tolu hono haha au ʻaki ʻa e ngaahi ʻakau,+ naʻe tuʻo taha hono tolomakaʻi au,+ naʻe tuʻo tolu ʻeku hokosia ha vaka tūkia ʻi tahi,+ ne u ʻi he moaná ʻi ha pō mo ha ʻaho; 26 ne u faʻa fai ʻa e ngaahi fononga, ne u hokosia ai ʻa e ngaahi fakatuʻutāmaki ʻi he ngaahi vaitafé, mei he kau kaihaʻa fakamālohí, mei hoku kakaí tonu,+ mei he ngaahi puleʻangá,+ ʻi he koló,+ ʻi he toafá, ʻi tahi, ʻi he haʻohaʻonga ʻo e fanga tokoua loi, 27 ne u toe hokosia ʻa e ngāue lahi mo e fakaongosia, faʻa taʻemamohe ʻi ha ngaahi pō,+ ʻi he fiekaia mo e fieinua,+ toutou hala ha meʻakai,+ ʻi he mokosia mo e taʻemaʻu ha vala feʻunga.*

28 Tuku kehe ʻa e ngaahi meʻa ko ia ʻoku hoko mei tuʻá, ʻoku ʻi ai ʻa e meʻa ʻoku taulōfuʻu mai kiate au ʻi he ʻaho ki he ʻaho:* Ko e loto-moʻua fekauʻaki mo e kotoa ʻo e ngaahi fakatahaʻangá.+ 29 Ko hai ia ʻoku vaivai, ʻo ʻikai ke u vaivai ai? Ko hai ia ʻoku tūkia, ʻo ʻikai ke u ʻita ai?

30 Kapau ʻe pau ke u pōlepole, te u pōlepole ʻi he ngaahi meʻa ʻokú ne fakahaaʻi hoku vaivaiʻangá. 31 Ko e ʻOtua mo e Tamai ʻa e ʻEiki ko Sīsuú, ʻa e Tokotaha ʻa ia ʻe fakahīkihikiʻi ʻo taʻengatá, ʻokú ne ʻafioʻi ʻoku ʻikai te u loi. 32 ʻI Tāmasikusi naʻe leʻohi ʻe he kōvana ʻi he malumalu ʻo ʻAletasi ko e tuʻí ʻa e kolo ʻo e kau Tāmasikusí ke puke au, 33 ka naʻe tukutuku hifo au ʻi ha matapā ʻi he ʻā ʻo e koló ʻi ha kato*+ peá u hao ai mei hono nimá.