ʻUluaki Kalonikali

27 Ko e tokolahi eni ʻo e kau ʻIsilelí, ʻa e ngaahi ʻulumotuʻa ʻo e ngaahi fale ʻo ʻenau ngaahi tamaí, mo e ngaahi ʻeiki ʻo e ngaahi toko afé mo e ngaahi toko teaú,+ pea mo ʻenau kau ʻōfisa naʻe faifatongia ki he tuʻí+ ʻi he meʻa kotoa pē fekauʻaki mo e ngaahi vāhenga naʻe haʻu mo ʻalu atu ʻi he māhina ki he māhina lolotonga ʻa e ngaahi māhina kotoa pē ʻo e taʻú; naʻe ʻi he vāhenga taki taha ʻa e toko 24,000.

2 Ko Sasopiami+ ko e foha ʻo Sapitielí naʻe pule ki he ʻuluaki vāhenga ʻo e ʻuluaki māhiná, pea ko e toko 24,000 naʻe ʻi heʻene vāhengá. 3 Ko ia ʻa e tokotaha mei he ngaahi foha ʻo Pēlesí+ naʻe ʻulu ki he kotoa ʻo e kau pule ʻo e ngaahi kulupu naʻe vaheʻi ke ngāue lolotonga ʻa e ʻuluaki māhiná. 4 Ko Totai+ ko e hako ʻo ʻĀhoí+ naʻe pule ki he vāhenga ʻo e māhina hono uá, pea naʻe taki ai ʻa Mikeloti, pea ko e toko 24,000 naʻe ʻi heʻene vāhengá. 5 Ko e pule ʻo e kulupu hono tolu naʻe vaheʻi ke ngāue lolotonga ʻa e māhina hono tolú ko Penaia+ ko e foha ʻo Sihoiata+ ko e taulaʻeiki lahí, pea ko e toko 24,000 naʻe ʻi heʻene vāhengá. 6 Ko Penaia ko ení ko ha tangata ʻi he toko tolungofulu naʻe toʻa ʻi he taú pea naʻe pule ki he toko tolungofulú, pea naʻe pule ki heʻene vāhengá ʻa hono foha ko ʻAmisapatí. 7 Ko e pule hono faá ki he māhina hono faá ko ʻAsaeli,+ ko e tokoua ʻo Sioapé,+ pea naʻe hoko atu ʻiate ia ʻa hono foha ko Sepataiá, pea ko e toko 24,000 naʻe ʻi heʻene vāhengá. 8 Ko e pule hono nimá ki he māhina hono nimá ko Samahuti mei he haʻa ʻIsilaiá, pea ko e toko 24,000 naʻe ʻi heʻene vāhengá. 9 Ko e pule hono onó ki he māhina hono onó ko ʻIla+ ko e foha ʻo ʻĪkesi ko e tangata Tēkoá,+ pea ko e toko 24,000 naʻe ʻi heʻene vāhengá. 10 Ko e pule hono fitú ki he māhina hono fitú ko Helesi+ ko e tangata Pēloni mei he haʻa ʻIfalemí, pea ko e toko 24,000 naʻe ʻi heʻene vāhengá. 11 Ko e pule hono valú ki he māhina hono valú ko Sipekai+ ko e tangata Husá mei he haʻa Salá,+ pea ko e toko 24,000 naʻe ʻi heʻene vāhengá. 12 Ko e pule hono hivá ki he māhina hono hivá ko ʻApiesa+ ko e tangata ʻAnatotí+ mei he haʻa Penisimaní, pea ko e toko 24,000 naʻe ʻi heʻene vāhengá. 13 Ko e pule hono hongofulú ki he māhina hono hongofulú ko Mahalai+ ko e tangata Netofá mei he haʻa Salá,+ pea ko e toko 24,000 naʻe ʻi heʻene vāhengá. 14 Ko e pule hono 11 ki he māhina hono 11 ko Penaia+ ko e tangata Pilatoní mei he ngaahi foha ʻo ʻIfalemí, pea ko e toko 24,000 naʻe ʻi heʻene vāhengá. 15 Ko e pule hono 12 ki he māhina hono 12 ko Heletai ko e tangata Netofá, ko e hako ʻo ʻOtenili, pea ko e toko 24,000 naʻe ʻi heʻene vāhengá.

16 Ko e kau taki eni ʻo e ngaahi matakali ʻo ʻIsilelí: Mei he haʻa Lūpení, ko ʻEliese ko e foha ʻo Sikelí naʻe takí; mei he haʻa Simioné, ko Sefataia ko e foha ʻo Māká; 17 meia Līvaí, ko Hasapaia ko e foha ʻo Kemiuelí; meia ʻĒloné, ko Sātoki; 18 meia Siutá, ko ʻIlaiū+ ko e taha ʻi he fanga tokoua ʻo Tēvitá; meia ʻĪsaká, ko ʻOmilai ko e foha ʻo Maikelí; 19 meia Sepuloní, ko ʻIsimaia ko e foha ʻo ʻOpataiá; meia Nafitalaí, ko Selimoti ko e foha ʻo ʻAsililí; 20 mei he haʻa ʻIfalemí, ko Hōsia ko e foha ʻo ʻAsasiá; mei he vaeua ʻo e matakali ʻo Manasé, ko Sioeli ko e foha ʻo Petaiá; 21 mei he vaeua ʻo e matakali ʻo Manasé ʻi Kiliatí, ko ʻIto ko e foha ʻo Sākalaiá; meia Penisimaní, ko Sesieli ko e foha ʻo ʻĀpiná;+ 22 meia Taní, ko ʻAsalili ko e foha ʻo Seloamí. Ko e houʻeiki eni ʻo e ngaahi matakali ʻo ʻIsilelí.

23 Naʻe ʻikai ke lau ʻe Tēvita ʻa e faʻahinga naʻe taʻu 20 ʻo faai ki laló, koeʻuhí naʻe talaʻofa ʻe Sihova te ne ʻai ʻa ʻIsileli ke hangē hono tokolahí ko e ngaahi fetuʻu ʻo e langí.+ 24 Naʻe kamata ke fai ʻe Sioape ko e tama ʻa Seluvaiá ʻa e laú, ka naʻe ʻikai ke ʻosi ia; pea naʻe hoko mai ʻa e houhau ʻa e ʻOtuá ki ʻIsileli* koeʻuhí ko e meʻá ni,+ pea naʻe ʻikai fakakau ʻa e fiká ni ʻi he fakamatala ʻo e hisitōlia ʻo e taimi ʻo Tuʻi Tēvitá.

25 Naʻe pule ki he ngaahi tukuʻanga koloa ʻa e tuʻí+ ʻa ʻAsimaveti ko e foha ʻo ʻAtielí. Ko Sionatane ko e foha ʻo ʻŪsaiá naʻe pule ki he ngaahi fale tukuʻanga koloa* naʻe ʻi ʻutá, ʻi he ngaahi kolo lalahí, ʻi he fanga kiʻi kolo īkí, pea ʻi he ngaahi tauá. 26 Naʻe pule ki he kau ngāue ʻi ʻuta ʻa ia naʻa nau ngoueʻi ʻa e kelekelé ʻa ʻĪseli ko e foha ʻo Kēlupí. 27 Ko Simi ko e tangata Lamá naʻe pule ki he ngaahi ngoue kālepí; naʻe pule ki he fua ʻo e ngoue kālepi ki he ngaahi tokonaki uainé ʻa Sapiti mei Sefamí.* 28 Naʻe pule ki he ngaahi ngoue ʻōlive mo e ʻulu sukamino+ ʻi he Sefelaʻá*+ ʻa Pēali-henani ko e tangata Ketelí; naʻe pule ki he tokonaki loló ʻa Sōasi. 29 Naʻe pule ki he fanga pulu naʻe kaikai ʻi Sāloní+ ʻa Sitilai ko e tangata mei Sāloní, pea ko Safati ko e foha ʻo ʻAtilaí naʻe pule ki he fanga pulu ʻi he ngaahi teleʻa lautoká.* 30 Naʻe pule ki he fanga kāmelí ʻa ʻŌpili ko e hako ʻo ʻIsimeʻelí; naʻe pule ki he fanga ʻasí* ʻa Setaia ko e tangata Melonotí. 31 Naʻe pule ki he fanga sipí ʻa Siasisi ko e hako ʻo Hekaʻaá. Ko e faʻahingá ni kotoa ko e kau pule kinautolu ki he koloa ʻa Tuʻi Tēvitá.

32 Ko Sionatane,+ ʻa e foha ʻo e tokoua ʻo Tēvitá, ko ha tokotaha faleʻi ia, ko ha tangata naʻá ne maʻu ʻa e mahino pea ko ha sekelitali, pea ko Siheli ko e foha ʻo Hakamoní naʻá ne tokangaʻi ʻa e ngaahi foha ʻo e tuʻí.+ 33 Ko ʻAhitofeli+ ko ha tokotaha faleʻi ia ʻa e tuʻí, pea ko Hūsai+ ko e tangata mei he haʻa ʻĀlekí ko e kaungāmeʻa* ia ʻo e tuʻí. 34 ʻI he hili ʻa ʻAhitofelí naʻe hoko atu ai ʻa Sihoiata ko e foha ʻo Penaiá+ pea mo ʻĀpaiata;+ pea ko Sioape+ ʻa e ʻeikitau ʻa e tuʻí.