Fakamaau

3 Ko e ngaahi puleʻanga eni naʻe fakaʻatā ʻe Sihova ke kei toe koeʻuhi ke siviʻi ʻaki ʻa e faʻahinga kotoa ʻo ʻIsileli naʻe ʻikai te nau hokosia ha tau pē mo Kēnani+ 2 (naʻe hoko ʻení koeʻuhi ke hokosia ʻe he ngaahi toʻutangata hoko mai ʻo e kau ʻIsilelí ʻa e taú, ʻa kinautolu naʻe ʻikai te nau hokosia ha ngaahi meʻa pehē ki muʻá): 3 Ko e ngaahi ʻeiki ʻe toko nima ʻo e kau Filisitiá+ mo e kotoa ʻo e kau Kēnaní, mo e kau Saitoní,+ pea mo e kau Hevi+ naʻe nofo ʻi Moʻunga Lepanoní+ mei Moʻunga Pēali-heamoni ʻo aʻu ki Lipo-hēmati.*+ 4 Naʻa nau hoko ko ha siviʻanga ʻo ʻIsileli ke fakapapauʻi ai pe ʻe talangofua ʻa ʻIsileli ki he ngaahi fekau ʻa Sihova naʻá ne ʻoange ki heʻenau ngaahi tamaí fakafou ʻia Mōsesé.+ 5 Ko ia naʻe nofo ʻa e kau ʻIsilelí ʻi he lotolotonga ʻo e kau Kēnaní,+ mo e kau Hetí, mo e kau ʻĀmolí, mo e kau Pēlisí, mo e kau Heví, pea mo e kau Siepusí. 6 Naʻe ʻomai ʻe he kau ʻIsilelí ʻa e ngaahi ʻofefine ʻo e ngaahi puleʻangá ni ke hoko ko honau ngaahi uaifi, pea nau ʻoatu honau ngaahi ʻofefine ʻonautolú ki he ngaahi foha ʻo e ngaahi puleʻangá ni, pea naʻe kamata ke nau tauhi ki honau ngaahi ʻotuá.+

7 Ko ia naʻe fai ʻe he kau ʻIsilelí ʻa e meʻa naʻe kovi ʻi he vakai mai ʻa Sihová, pea naʻe ngalo ʻiate kinautolu ʻa Sihova ko honau ʻOtuá pea nau tauhi ʻa e ngaahi Pēalí+ pea mo e ngaahi pou ʻakau toputapú.*+ 8 ʻI he meʻá ni naʻe kakaha ai ʻa e houhau ʻa Sihová ki ʻIsileli, peá ne fakatau atu kinautolu ki he nima ʻo Kusani-lisataimi ko e tuʻi ʻo Mesopotēmiá.* Naʻe tauhi ʻa e kau ʻIsilelí kia Kusani-lisataimi ʻi he taʻu ʻe valu. 9 ʻI he taimi naʻe ui tokoni+ ai ʻa e kau ʻIsilelí kia Sihová, naʻe fokotuʻu ʻe Sihova ha tokotaha faifakahaofi ke ne fakahaofi ʻa e kau ʻIsilelí,+ ko ʻOtenili+ ia ko e foha ʻo Kēnasi, ko e tehina ʻo Kēlepí. 10 Naʻe hoko mai ʻa e laumālie ʻo Sihová kiate ia,+ pea naʻá ne hoko ko e fakamaau ʻo ʻIsileli. ʻI he taimi naʻá ne ʻalu atu ai ke faitaú, naʻe tuku ʻe Sihova ʻa Kusani-lisataimi ko e tuʻi ʻo Mesopotēmiá* ki hono nimá, ko ia naʻá ne ikunaʻi ai ʻa Kusani-lisataimi. 11 ʻI he hili iá, naʻe nonga* ʻa e fonuá ʻi he taʻu ʻe 40. Pea naʻe mate ʻa ʻOtenili ko e foha ʻo Kēnasí.

12 Naʻe toe kamata ke fai ʻe he kau ʻIsilelí ʻa e meʻa naʻe kovi ʻi he vakai mai ʻa Sihová.+ Ko ia naʻe hanga ʻe Sihova ʻo fakaʻatā ʻa ʻEkeloni ko e tuʻi ʻo Mōapé+ ke ne ikunaʻi ʻa ʻIsileli, koeʻuhi naʻa nau fai ʻa e meʻa naʻe kovi ʻi he vakai mai ʻa Sihová. 13 ʻIkai ko ia pē, naʻá ne tuku atu kiate kinautolu ʻa e kau ʻĀmoní+ mo e kau ʻAmalekí.+ Naʻa nau ʻohofi ʻa ʻIsileli pea nau hamu ʻa e kolo ʻo e ʻulu pāmé.+ 14 Naʻe ngāue ʻa e kau ʻIsilelí kia ʻEkeloni ko e tuʻi ʻo Mōapé ʻi he taʻu ʻe 18.+ 15 Naʻe ui tokoni+ leva ʻa e kau ʻIsilelí kia Sihova, ko ia naʻe fokotuʻu ʻe Sihova ha tokotaha faifakahaofi+ maʻanautolu, ko ʻĒhuti+ ko e foha ʻo Kela, ko ha hako ʻo Penisimani+ ko ha tokotaha naʻe hema.+ ʻI he faai atu ʻa e taimí, naʻe ʻoatu ʻe he kau ʻIsilelí ha ngaahi tukuhau fakafou ʻiate ia kia ʻEkeloni ko e tuʻi ʻo Mōapé. 16 Lolotonga ení, naʻe ngaohi ʻe ʻĒhuti ha heletā fakatou mata maʻana, ko ha kiupite* ʻe taha hono lōloá, pea naʻá ne noʻo ia ʻi loto ʻi hono kofú ki hono alanga toʻomataʻú. 17 Naʻá ne ʻoatu leva ʻa e meʻaʻofá kia ʻEkeloni ko e tuʻi ʻo Mōapé. Pea ko ʻEkeloní ko ha tangata naʻe fuʻu sino ʻaupito.

18 ʻI he ʻosi hono ʻoatu ʻe ʻĒhuti ʻa e meʻaʻofá, naʻá ne fekau ʻa e kakai ko ia naʻa nau toʻo ʻa e meʻaʻofá ke nau ō. 19 Ka ʻi he hili ʻa e aʻu ki he ngaahi ʻīmisi kuo tongi* ʻi Kilikalí,+ naʻá ne foki atu ʻo ne pehē: “ʻOku ou haʻu mo ha fekau fakapulipuli ki he ʻAfioná, ʻe hoʻo ʻAfio.” Ko ia naʻe pehē ʻe he tuʻí: “Fakalongolongo!” ʻI he meʻa ko iá naʻe mavahe leva ʻa ʻene kau tauhí kotoa meiate ia. 20 Ko ia naʻe ʻalu atu ʻa ʻĒhuti kiate ia lolotonga ʻene ʻafio toko taha pē ʻi hono loki mokomoko ʻi he funga falé. Naʻe pehē ange leva ʻe ʻĒhuti: “ʻOku ou haʻu mo ha fekau mei he ʻOtuá ki he ʻAfiona.” Ko ia naʻá ne mālanga hake leva mei hono taloní.* 21 Naʻe unuhi hake leva ʻe ʻĒhuti ʻa e heletaá mei hono alanga toʻomataʻú ʻaki hono nima toʻohemá ʻo ne hokaʻi ʻaki ia hono keté. 22 Naʻe hū atu ki loto ʻa e mata mo e kau ʻo e heletaá, pea naʻe ʻufiʻufi ʻe he ngakó ʻa e mataʻi-helé, he naʻe ʻikai te ne taʻaki ki tuʻa ʻa e heletaá mei hono keté, pea naʻe haʻu ki tuʻa ʻa e kinohaʻá. 23 Naʻe hū ki tuʻa ʻa ʻĒhuti ʻi he falefakatoló,* ʻo ne tāpuni ʻa e ngaahi matapā ʻo e loki ʻi he funga falé ʻo lokaʻi ia. 24 ʻI he hili ʻene mavahé, naʻe foki mai ʻa e kau sevānití ʻo nau sio ʻoku lokaʻi ʻa e ngaahi matapā ʻo e loki ʻi he funga falé. Ko ia naʻa nau pehē: “ʻOku pau pē ʻokú ne ʻalu ki tuaʻā ʻi he loki mokomoko ʻi lotó.” 25 Naʻa nau tatali ai pē ʻo aʻu ʻo nau ongoʻi fakamāʻia, ka ʻi heʻenau sio naʻe teʻeki ai pē ke ne fakaava ʻa e ngaahi matapā ʻo e loki ʻi he funga falé, naʻa nau toʻo mai ʻa e kií ʻo fakaava ia pea nau sio atu ʻoku tokoto mai honau ʻeikí ʻi he falikí* kuo mate!

26 Naʻe hola ʻa ʻĒhuti he lolotonga ʻenau kei tatalí, pea naʻá ne fakalaka atu ʻi he ngaahi ʻīmisi kuo tongí*+ ʻo ne hao ki Seila. 27 ʻI heʻene aʻu atú, naʻá ne fakaongo atu ʻa e meʻaifí+ ʻi he feituʻu moʻungaʻia ʻo ʻIfalemí;+ pea naʻe ʻalu hifo ʻa e kau ʻIsilelí mei he feituʻu moʻungaʻiá, pea ko ia naʻá ne taki ʻiate kinautolú. 28 Naʻá ne pehē ange leva kiate kinautolu: “Mou muimui mai ʻiate au, koeʻuhi kuo tuku atu ʻe Sihova homou ngaahi filí, ʻa e kau Mōapé, ki homou nimá.” Ko ia naʻa nau muimui ʻiate ia ʻo nau puke ʻa e ngaahi ʻāhanga ʻo Sioataní telia ʻa e kau Mōapé, pea naʻe ʻikai te nau fakaʻatā ha taha ke kolosi ai. 29 Naʻa nau taaʻi ʻi he taimi ko iá ha kau Mōape+ ʻe toko 10,000 nai, ko e kau tangata mālohi mo toʻa kotoa; naʻe ʻikai ha foʻi toko taha ʻe hao.+ 30 Ko ia naʻe fakavaivaiʻi ʻa Mōape ʻi he ʻaho ko iá ki he nima ʻo ʻIsilelí; pea naʻe nonga* ʻa e fonuá ʻi he taʻu ʻe 80.+

31 ʻI he hili ʻa ʻĒhutí, naʻe hoko ai ʻa Samikā+ ko e foha ʻo ʻĀnatí, ʻa ia naʻá ne taaʻi ha kau tangata Filisitia+ ʻe toko 600 ʻaki ha tao fakateka pulu;+ naʻá ne fakahaofi foki ʻa ʻIsileli.