Ua Kalonikali

7 Pea ʻi he hili pē ʻa e lotu ʻa Solomoné,+ naʻe ʻalu hifo ha afi mei he langí+ ʻo ne keina ʻa e feilaulau tutú mo e ngaahi feilaulaú, pea naʻe fakafonu ʻe he lāngilangi ʻo Sihová ʻa e falé.+ 2 Naʻe ʻikai lava ʻa e kau taulaʻeikí ke hū ki he fale ʻo Sihová koeʻuhí he naʻe fakafonu ʻe he lāngilangi ʻo Sihová ʻa e fale ʻo Sihová.+ 3 Pea naʻe mamata ʻa e kakai kotoa ʻo ʻIsilelí ki he ʻalu hifo ʻa e afí pea ko e lāngilangi ʻo Sihová naʻe ʻi he falé, pea naʻa nau punou ʻi he falikí ʻo hanga ki lalo ʻo nau fakatōmapeʻe ʻo fakamālō kia Sihova, “he ʻokú ne lelei; ko ʻene ʻofa mateakí ʻoku tolonga ʻo taʻengata.”

4 Ko ia naʻe ʻoatu ʻe he tuʻí mo e kotoa ʻo e kakaí ha ngaahi feilaulau ʻi he ʻao ʻo Sihová.+ 5 Naʻe ʻoatu ʻe Tuʻi Solomone ʻa e feilaulau ko e fanga pulu ʻe 22,000 mo e fanga sipi ʻe 120,000. Ko ia naʻe huufi ai ʻe he tuʻí mo e kotoa ʻo e kakaí ʻa e fale ʻo e ʻOtua moʻoní.+ 6 Naʻe tuʻu ʻa e kau taulaʻeikí ke fakahoko honau ngafá, pea pehē ki he kau Līvaí ʻa ia naʻa nau toʻo ʻa e ngaahi meʻalea naʻe ngāueʻaki ke tā ʻi he hiva kia Sihová.+ (Naʻe ngaohi ʻe Tuʻi Tēvita ʻa e ngaahi meʻaleá ni ke faiʻaki ʻa e fakamālō kia Sihová—“he ko ʻene ʻofa mateakí ʻoku tolonga ʻo taʻengata”—ʻi he taimi naʻe ʻoatu ai ʻe Tēvita ʻa e fakahīkihiki fakataha mo kinautolú.*) Pea naʻe ifiʻi leʻo-lahi ʻe he kau taulaʻeikí ʻa e ngaahi talupité+ ʻi muʻa ʻiate kinautolu, lolotonga ia naʻe tuʻu ʻa e kotoa ʻo e kau ʻIsilelí.

7 Pea naʻe fakatoputapuʻi ʻe Solomone ʻa e lotoʻā ʻa ia naʻe ʻi muʻa ʻi he fale ʻo Sihová, he naʻe pau ke ne ʻohake ai ʻa e ngaahi feilaulau tutú+ pea mo e ngaahi kongokonga ngako ʻo e ngaahi feilaulau feʻinasiʻakí, koeʻuhí ko e ʻōlita kopa+ naʻe ngaohi ʻe Solomoné naʻe ʻikai lava ke hao ai ʻa e ngaahi feilaulau tutú, mo e ngaahi feilaulau meʻakaí,*+ pea mo e ngaahi kongokonga ngakó.+ 8 ʻI he taimi ko iá naʻe fai ai ʻe Solomone ʻa e kātoangá ʻi he ʻaho ʻe fitu+ fakataha mo e kotoa ʻo ʻIsilelí, ko ha fuʻu fakatahaʻanga tokolahi ʻaupito mei Lipo-hēmati* ʻo aʻu hifo ki he Teleʻa* ʻo ʻIsipité.+ 9 Ka ʻi he ʻaho hono valú* naʻa nau fai ai ha fuʻu fakataha makehe,+ koeʻuhí he naʻa nau fakatapui ʻa e ʻōlitá ʻi he ʻaho ʻe fitu pea fai mo e kātoangá ʻi he ʻaho ʻe fitu. 10 Pea ʻi he ʻaho hono 23 ʻo e māhina hono fitú, naʻá ne tuku ange atu ai ʻa e kakaí ke nau ō ki honau ngaahi ʻapí ʻi he fiefia+ mo ha ongoʻi nēkeneka ʻo e lotó ʻi he lelei kuo fakahaaʻi ʻe Sihova kia Tēvita mo Solomone pea mo ʻIsileli ko hono kakaí.+

11 Ko ia naʻe ʻosi ai hono langa ʻe Solomone ʻa e fale ʻo Sihová mo e fale* ʻo e tuʻí;+ pea ko e meʻa kotoa pē naʻe haʻu ki he loto ʻo Solomoné ke ne fai fekauʻaki mo e fale ʻo Sihová mo hono fale ʻoʻoná naʻá ne fakahoko lavameʻa ia.+ 12 Pea naʻe hā ʻa Sihova kia Solomone+ lolotonga ʻa e poó ʻo ne folofola kiate ia: “Kuó u fanongo ki hoʻo lotú, pea kuó u fili ʻa e feituʻú ni moʻoku ko ha fale ki he feilaulaú.+ 13 ʻI heʻeku tāpuni ʻa e langí pea ʻikai ha ʻuhá pea ʻi heʻeku fekauʻi atu ʻa e fanga heʻé ke nau keina ʻa e fonuá pea kapau te u tuku atu ha mahaki fakaʻauha ki he lotolotonga ʻo hoku kakaí, 14 kapau ʻe hanga ʻe hoku kakai ʻoku uiʻaki hoku hingoá+ ʻo fakatōkilaloʻi kinautolu+ pea nau lotu ʻo kumi kiate au pea tafoki mei heʻenau ngaahi ʻalunga koví,+ pea te u toki fanongo mei he langí ʻo fakamolemoleʻi ʻenau angahalá pea fakamoʻui honau fonuá.+ 15 Ko eni te u hāngaifofonga atu peá u fakaongo atu ki he lotu ʻoku fai ʻi he feituʻú ni.+ 16 Pea ko eni kuó u fili mo fakatoputapuʻi ʻa e falé ni koeʻuhí ke ʻi ai maʻu pē ʻa hoku hingoá,+ pea ko hoku matá mo hoku lotó ʻe ʻi ai maʻu ai pē.+

17 “Pea ko koe, kapau te ke ʻaʻeva ʻi hoku ʻaó ʻo hangē ko e ʻaʻeva ʻa hoʻo tamai ko Tēvitá ʻaki hono fai ʻa e meʻa kotoa pē kuó u fekau kiate koé, peá ke talangofua ki heʻeku ngaahi tuʻutuʻuní mo ʻeku ngaahi fakamāú,+ 18 te u toki fokotuʻu maʻu ʻa e taloni ʻo ho tuʻunga-tuʻí,+ ʻo hangē tofu pē ko e fuakava naʻá ku fai mo hoʻo tamai ko Tēvitá,+ ʻo pehē, ‘ʻE ʻikai ʻaupito ke taʻehoko hake ha tangata ʻi ho hakó ʻo pule ki ʻIsileli.’+ 19 Ka ʻo kapau te mou tafoki pea liʻaki ʻeku ngaahi tuʻutuʻuni mo ʻeku ngaahi fekau kuó u tuku ʻi homou ʻaó, pea mou ʻalu ʻo tauhi ʻa e ngaahi ʻotua kehé pea punou kiate kinautolu,+ 20 te u taʻaki ʻa ʻIsileli mei hoku fonua ʻa ia kuó u foaki kiate kinautolú,+ pea ko e fale ko eni kuó u fakatoputapuʻi maʻa hoku hingoá te u siʻaki mei hoku ʻaó, pea te u ʻai ia ko ha lumaʻanga* pea mo ha manukiaʻanga ʻi he lotolotonga ʻo e ngaahi kakaí kotoa.+ 21 Pea ko e falé ni ʻe hoko ko e fokotuʻunga maumau. Ko e tokotaha kotoa pē ʻe ʻalu atu aí te ne sio mo fakaofoʻia+ pea te ne pehē, ‘Ko e hā naʻe fai ai ʻe Sihova ʻa e meʻa ko iá ki he fonuá ni pea mo e falé ni?’+ 22 Pea te nau pehē, ‘Koeʻuhí he naʻa nau liʻaki ʻa Sihova+ ko e ʻOtua ʻo ʻenau fanga kuí, ʻa ia naʻá ne ʻomi kinautolu mei he fonua ko ʻIsipité,+ pea naʻa nau tali ʻa e ngaahi ʻotua kehe pea punou kiate kinautolu mo tauhi kiate kinautolu.+ Ko e ʻuhinga ia kuó ne ʻomi ai ʻa e kotoa ʻo e fakatamakí ni kiate kinautolú.’”+