ʻIsikeli

22 Pea naʻe toe hoko mai kiate au ʻa e folofola ʻa Sihová, ʻo pehē: 2 “Ko e meʻa kiate koé, foha ʻo e tangata, ʻokú ke mateuteu ke fanongonongo ha fakamaau ki he* kolo halaia ʻi he totó+ pea ʻai ke ne ʻiloʻi ʻa e kotoa ʻo ʻene ngaahi meʻa fakalieliá?+ 3 Te ke lea ʻo pehē, ‘Ko e meʻa eni ʻoku folofolaʻaki ʻe he ʻEiki Hau ko Sihová: “ʻOiauē ʻa e kolo ʻoku lingitoto+ ʻi hono lotolotongá, ʻa ia kuo hoko mai hono taimí,+ ʻa ia ʻokú ne ngaohi ʻa e ngaahi ʻaitoli fakalielia* ke ʻuliʻi ʻaki ʻa ia tonu,+ 4 ko hoʻo lingitotó kuó ne ʻai koe ke ke halaia,+ pea ko hoʻo ngaahi ʻaitoli fakalieliá kuo nau ʻai koe ke ke taʻemaʻa.+ Kuó ke fakavaveʻi mai ʻa e ngataʻanga ʻo ho ngaahi ʻahó, pea kuo hoko mai ʻa e ngataʻanga ʻo ho ngaahi taʻú. Ko e ʻuhinga ia te u ʻai ai koe ko ha lumaʻanga ki he ngaahi puleʻangá pea ko ha manukiaʻanga ki he ngaahi fonuá kotoa.+ 5 Ko e ngaahi fonua ofi maí mo ia ʻoku mamaʻo meiate koé te nau manukiʻi koe,+ ʻa koe ʻoku taʻemaʻa ho hingoá pea fonu ʻi he māveuveú. 6 Vakai! Ko e ngaahi ʻeiki taki taha ʻo ʻIsileli ʻoku ʻi ho lotolotongá ʻokú ne ngāueʻaki ʻa hono mafaí ke lingitoto.+ 7 ʻOku nau taʻetokaʻi+ ʻiate koe ʻa ʻenau tamaí mo ʻenau faʻeé. ʻOku nau kākaaʻi ʻa e mulí, pea ʻoku nau ngaohikoviʻi ʻa e kiʻi tama tamai-maté* mo e uitoú.”’”+

8 “‘ʻOkú ke taʻefakaʻapaʻapaʻi ʻa hoku ngaahi feituʻu toputapú, pea ʻokú ke maumauʻi ʻa ʻeku ngaahi Sāpaté.+ 9 ʻOku ʻiate koe ʻa e kau laukovi loi ko ʻenau taumuʻá ke lingitoto.+ ʻOku nau kai ʻiate koe ʻa e ngaahi feilaulau ʻi he ngaahi moʻungá pea fai ʻa e tōʻonga fakalielia ʻi ho lotolotongá.+ 10 ʻOku nau taʻefakaʻapaʻapaʻi ʻiate koe ʻa e mohenga ʻo ʻenau tamaí,*+ pea ʻoku nau mohe* mo ha fefine ʻoku taʻemaʻa ʻi heʻene puke fakamāhiná.+ 11 ʻOku fai ʻiate koe ʻe ha tangata ʻe taha ha ngaahi tōʻonga fakalielia ki he uaifi ʻo hono kaungāʻapí,+ ʻoku ʻuliʻi ʻe he tangata ʻe taha ʻa hono ʻofefine-ʻi-he-fonó ʻaki ʻa e tōʻonga palakū,+ pea ʻoku tohotohoʻi ʻe ha tangata ʻe taha ʻa hono tuofefiné, ʻa e ʻofefine ʻo ʻene tamaí tonu.+ 12 ʻOku nau tali ʻiate koe ha totongi fufū ke lingitoto.+ ʻOkú ke tali nō ʻo hilifaki ki ai ha tupu+ pe ke maʻu ai ha tupu, pea ʻokú ke maʻu ha paʻanga ʻi he fakamālohi mei ho ngaahi kaungāʻapí.+ ʻIo, kuó ke mātuʻaki fakangaloʻi au,’ ko e fakahaaʻi ia ʻe he ʻEiki Hau ko Sihová.

13 “‘Vakai! ʻOku ou pasiʻi hoku nimá ʻi he fakaliliʻa ʻi he tupu kuó ke maʻu ʻi he taʻefaitotonú pea ʻi he ngaahi lingitoto ʻoku fai ʻi ho lotolotongá. 14 ʻE kei tuʻu maʻu ai pē hoʻo loto-toʻá* mo kei mālohi ai pē ho nimá ʻi he ngaahi ʻaho te u fai ai ha meʻa kiate koé?+ Ko au, Sihova tonu, kuó u leá, pea te u fai ha meʻa. 15 Te u fakamovetevete koe ʻi he lotolotonga ʻo e ngaahi puleʻangá pea ʻai ke ke mafola atu ʻi he lotolotonga ʻo e ngaahi fonuá,+ pea te u fakangata ʻa hoʻo taʻemaʻá.+ 16 Pea ʻe taʻefakalāngilangiʻi koe ʻi he ʻao ʻo e ngaahi puleʻangá, pea kuo pau ke ke ʻilo ai ko au Sihova.’”+

17 Pea naʻe toe hoko mai kiate au ʻa e folofola ʻa Sihová, ʻo pehē: 18 “Foha ʻo e tangata, kuo hoko ʻa e fale ʻo ʻIsilelí ʻo hangē ha veve taʻeʻaonga kiate aú. Ko kinautolú kotoa ko e kopa mo e kapa mo e ukamea mo e pulu ʻi ha fōnise. Kuo nau hoko ko e veve mei he silivá.+

19 “Ko ia ai, ko e meʻa eni ʻoku folofolaʻaki ʻe he ʻEiki Hau ko Sihová: ‘Koeʻuhí kuo mou hoko kotoa ʻo hangē ha veve taʻeʻaongá,+ ʻoku ou tānaki fakataha kimoutolu ʻi loto Selusalema. 20 Hangē ko e siliva mo e kopa mo e ukamea mo e pulu mo e kapa ʻoku tānaki ʻi ha loto fōnise koeʻuhí ke puhi ki ai ha afi ʻo fakavaiaʻí, ʻe pehē pē ʻa ʻeku tānaki fakataha kimoutolu ʻi heʻeku ʻitá mo ʻeku tuputāmakí, pea te u puhi kimoutolu ʻo ʻai ke mou vaia.+ 21 Te u fakatahatahaʻi kimoutolu pea puhi kiate kimoutolu ʻa e afi ʻo ʻeku ʻitá,+ pea te mou vaia ʻi loto ʻi he koló.+ 22 Hangē ko e vaia ʻa e silivá ʻi ha fōnisé, ʻe pehē pē ʻa hoʻomou vaia ʻi loto ʻi he koló; pea kuo pau ke mou ʻilo ai ko au, Sihova tonu, kuó u huaʻi atu ʻa ʻeku ʻitá kiate kimoutolu.’”

23 Pea naʻe toe hoko mai kiate au ʻa e folofola ʻa Sihová, ʻo pehē: 24 “Foha ʻo e tangata, lea kiate ia, ‘Ko ha fonua koe ʻa ia ʻe ʻikai ke fakamaʻa pe tō ki ai ha ʻuha ʻi he ʻaho ʻo e tuputāmakí. 25 Ko ʻene kau palōfitá kuo nau faʻufaʻufono ʻiate ia,+ hangē ha laione ngungulu ʻokú ne haehae ʻa e manu ʻokú ne poó.+ ʻOku nau keina ʻa e kakaí. ʻOku nau faʻao ʻa e koloá mo e ngaahi meʻa mahuʻingá. Kuo nau ʻai ke tokolahi ʻa e kau uitoú ʻiate ia. 26 Ko ʻene kau taulaʻeikí kuo nau maumauʻi ʻa ʻeku laó,+ pea ʻoku nau hanganaki taʻefakaʻapaʻapaʻi ʻa hoku ngaahi feituʻu toputapú.+ ʻOku ʻikai te nau ʻai ke ʻi ai ha kehekehe ʻi he vahaʻa ʻo e meʻa ʻoku toputapú mo e meʻa anga-mahení,+ pea ʻoku ʻikai te nau ʻai ke ʻilo ʻa e meʻa ʻoku taʻemaʻá mo ia ʻoku maʻá,+ pea ʻoku nau fakafisi ke tauhi ʻa ʻeku ngaahi Sāpaté, pea ʻoku taʻefakaʻapaʻapaʻi au ʻi honau lotolotongá. 27 Ko ʻene kau houʻeiki ʻi hono lotolotongá ʻoku nau hangē ko e fanga ulofi ʻoku nau haehae ʻa e manu kuo nau poó; ʻoku nau lingitoto pea tāmateʻi ʻa e kakaí ke maʻu ai ha tupu ʻi he taʻefaitotonu.+ 28 Ka ko ʻene kau palōfitá kuo nau palasitaaʻi ʻaki ʻa e lahe ʻa ʻenau ngaahi ngāué. ʻOku nau mata vīsone loi pea fai ʻa e talotalo loi,+ pea ʻoku nau pehē: “Ko e meʻa eni ʻoku folofolaʻaki ʻe he ʻEiki Hau ko Sihová,” lolotonga ia kuo ʻikai ke folofola mai ʻa Sihova. 29 Ko e kakai ʻo e fonuá kuo nau kākā mo kaihaʻa,+ kuo nau ngaohikoviʻi ʻa e tuʻutāmakí mo e masivá, pea kuo nau kākaaʻi ʻa e mulí pea ʻikai fai kiate ia ʻa e fakamaau totonú.’

30 “‘Naʻá ku fakasio ha tangata ʻi honau lotolotongá ʻa ia te ne monomono ʻa e ʻā maká pe tuʻu ʻi hoku ʻaó ʻi he feituʻu ʻo e ʻaá ʻa ē ʻoku avá koeʻuhí ko e fonuá ke ʻoua naʻa fakaʻauha ia,+ ka naʻe ʻikai te u maʻu ha taha. 31 Ko ia te u huaʻi atu ʻa ʻeku ʻitá kiate kinautolu pea fakaʻauha ʻosi kinautolu ʻaki ʻa e afi ʻo ʻeku tuputāmakí. Te u ʻomi ʻa e ngaahi nunuʻa ʻo honau ʻalungá ki honau tumuʻakí,’ ko e fakahaaʻi ia ʻe he ʻEiki Hau ko Sihová.”