Nehemaia

9 ʻI he ʻaho hono 24 ʻo e māhina ko ení naʻe fakatahataha ai ʻa e kau ʻIsilelí; naʻa nau ʻaukai mo ʻai tauangaʻa pea mo fakaefuefu.+ 2 Ko kinautolu ko ia ko e kau tupuʻi ʻIsilelí naʻa nau fakamavaheʻi leva kinautolu mei he kotoa ʻo e kau mulí,+ pea naʻa nau tuʻu ʻo vete ʻenau angahalá pea mo e faihala ʻa ʻenau ngaahi tamaí.+ 3 Naʻa nau tuʻu hake leva ʻi honau tuʻuʻangá ʻo lau leʻo-lahi mei he tohi ʻo e Lao+ ʻa Sihova ko honau ʻOtuá ʻi ha vahe fā ʻe taha ʻo e taimi ʻahó;* pea ʻi ha toe vahe fā ʻe taha ʻo ia naʻa nau vetehia ai mo punou kia Sihova ko honau ʻOtuá.

4 Ko Sīsua, Pani, Katimieli, Sepanaia, Puni, Selepaia,+ Pani, mo Kinani naʻa nau tuʻu ʻi he tuʻuʻanga+ ʻo e kau Līvaí ʻa ia naʻe fokotuʻú, pea naʻa nau kalanga leʻo-lahi kia Sihova ko honau ʻOtuá. 5 Pea ko e kau Līvaí, ʻa Sīsua, Katimieli, Pani, Hasapaneia, Selepaia, Hotaia Sepanaia, mo Petahaia naʻa nau pehē: “Mou tuʻu hake pea fakahīkihikiʻi ʻa Sihova ko homou ʻOtuá ʻi he kotoa ʻo ʻitānití.*+ Pea tuku ʻe ʻOtua ke nau fakahīkihikiʻi ho huafa lāngilangiʻiá, ʻa ia ʻoku hakeakiʻi ʻo lahi ange ia ʻi he tāpuaki mo e fakahīkihiki kotoa pē.

6 “Ko koe pē ʻe Sihova;+ naʻá ke ngaohi ʻa e langí, ʻio, ʻa e langi ʻo e ngaahi langí pea mo e kotoa ʻo hono kongakaú, ʻa e māmaní mo e meʻa kotoa pē ʻoku ʻi aí, ʻa e tahí mo e meʻa kotoa pē ʻoku ʻi aí. Pea ʻokú ke fakatolonga kotoa ʻa ʻenau moʻuí, pea ʻoku punou atu kiate koe ʻa e kongakau ʻo langí. 7 Ko koe ʻe Sihova ʻa e ʻOtua moʻoní, ʻa ia naʻá ke fili ʻa ʻEpalame+ ʻo ʻomi mei ʻUa+ ʻo e kau Kalitiá pea ʻoange kiate ia ʻa e hingoa ʻĒpalahamé.+ 8 Naʻá ke ʻafioʻi ʻa e faitōnunga ʻa hono lotó ʻi ho ʻaó,+ ko ia naʻá ke fai ai ha fuakava mo ia ke foaki kiate ia ʻa e fonua ʻo e kau Kēnaní, kau Hetí, kau ʻĀmolí, kau Pēlisí, kau Siepusí, pea mo e kau Keakasá, ke foaki ia ki hono hakó;+ pea naʻá ke fai ki hoʻo talaʻofá, koeʻuhí he ʻokú ke māʻoniʻoni.

9 “Ko ia naʻá ke ʻafioʻi ʻa e faingataʻaʻia ʻa ʻemau fanga kuí ʻi ʻIsipité,+ pea naʻá ke fanongo ki heʻenau tangi ʻi he Tahi Kulokulá. 10 Naʻá ke fakahoko leva ha ngaahi fakaʻilonga mo e ngaahi mana kia Felo mo e kotoa ʻo ʻene kau sevānití pea mo e kotoa ʻo e kakai ʻi hono fonuá,+ he naʻá ke ʻafioʻi naʻa nau ʻafungi+ kiate kinautolu. Naʻá ke ʻai ai ke ʻiloa ho huafá ʻa ia ʻoku kei tuʻu ʻo aʻu mai ki he ʻahó ni.+ 11 Pea naʻá ke fakamavaeua ʻa e tahí ʻi honau ʻaó, ko ia naʻa nau kolosi atu ai ʻi he tahí ʻi he fonua mōmoá,+ pea naʻá ke lī ʻa e kau tulimui kiate kinautolú ki he lolotó ʻo hangē ko hano lī ha fuʻu maka ki he tahi hoú.+ 12 Naʻá ke tataki kinautolu ʻi he ʻahó ʻaki ha pou ʻao, pea ʻi he poʻulí ʻaki ha pou afi, ke huluhulu kiate kinautolu ʻa e hala ke nau ʻalu aí.+ 13 Pea naʻá ke hāʻele hifo ki Moʻunga Sainai+ peá ke folofola kiate kinautolu mei langi+ ʻo ʻoange kiate kinautolu ʻa e ngaahi fakamaau māʻoniʻoni, ngaahi lao moʻoni,* ngaahi tuʻutuʻuni mo e ngaahi fekau lelei.+ 14 Naʻá ke ʻai ke nau ʻilo ʻa ho Sāpate*+ tapú, pea naʻá ke ʻoange kiate kinautolu ʻa e ngaahi fekau, ngaahi tuʻutuʻuni, pea mo ha lao ʻo fakafou ʻi hoʻo sevāniti ko Mōsesé. 15 Naʻá ke ʻoange haʻanau mā mei he langí ʻi heʻenau fiekaiá,+ pea naʻá ke ʻomi ha vai mei he makatuʻú ʻi heʻenau fieinuá,+ pea naʻá ke tala kiate kinautolu ke nau hū atu ʻo maʻu ʻa e fonua naʻá ke fuakava* ke foaki ange kiate kinautolú.

16 “Ka ko kinautolu, ʻa ʻemau fanga kuí, naʻa nau ʻafungi+ pea hoko ʻo loto-fefeka,*+ pea naʻe ʻikai te nau fanongo ki hoʻo ngaahi fekaú. 17 Naʻa nau fakafisi ke fanongo,+ pea naʻe ʻikai te nau manatuʻi ʻa e ngaahi ngāue fakaofo naʻá ke fakahoko ʻi honau lotolotongá, ka naʻa nau hoko ʻo loto-fefeka* ʻo nau fakanofo ha taki ke nau toe foki ai ki heʻenau nofo pōpula ʻi ʻIsipité.+ Ka ko ha ʻOtua koe ʻokú ke mateuteu ke fakamolemole,* manavaʻofa* mo mohu meesi, tuai ki he houhau pea fonu ʻi he ʻofa mateaki,*+ pea naʻe ʻikai te ke liʻaki kinautolu.+ 18 Naʻa mo e taimi naʻa nau ngaohi ai maʻanautolu ha ʻīmisi mētale* ʻo ha ʻuhikiʻi pulu pea nau pehē, ‘Ko eni ho ʻOtua naʻá ne taki mai koe mei ʻIsipité,’+ pea naʻa nau fai ʻa e ngaahi tōʻonga mātuʻaki taʻefakaʻapaʻapa, 19 naʻa mo e ʻi he taimi ko iá, ko koe, ʻi he lahi hoʻo mēsí, naʻe ʻikai te ke liʻaki kinautolu ʻi he toafá.+ Naʻe ʻikai ke mavahe ʻa e pou ʻaó meiate kinautolu ʻi he ʻahó ʻi hono tataki kinautolu ʻi he halá, pe ko e pou afí ʻi he poʻulí ke huluhulu kiate kinautolu ʻa e hala ke nau ʻalu aí.+ 20 Pea naʻá ke foaki ho laumālie leleí ke ʻoange kiate kinautolu ʻa e fakamaama,+ pea naʻe ʻikai te ke taʻofi hoʻo maná mei honau ngutú,+ pea naʻá ke ʻoange kiate kinautolu ʻa e vai ʻi heʻenau fieinuá.+ 21 Naʻá ke tokonaki ʻa e meʻakai kiate kinautolu ʻi he taʻu ʻe 40 ʻi he toafá.+ Naʻe ʻikai te nau masiva ʻi ha meʻa. Naʻe ʻikai ke popo ʻa honau kofú,+ pea naʻe ʻikai ke fefulofulai ʻa honau vaʻé.

22 “Naʻá ke foaki kiate kinautolu ʻa e ngaahi puleʻanga mo e ngaahi kakai, ʻo vahevahe fakakongokonga atu ia,+ ko ia naʻa nau maʻu ai ʻa e fonua ʻo Sīhoní,+ ʻa ia ko e fonua ʻo e tuʻi ʻo Hesiponí,+ pea pehē ki he fonua ʻo ʻOki+ ko e tuʻi ʻo Pēsaní. 23 Pea naʻá ke ʻai ke tokolahi ʻa ʻenau fānaú ʻo hangē ko e ngaahi fetuʻu ʻo e langí.+ Pea naʻá ke ʻomai kinautolu ki he fonua naʻá ke talaʻofa ki heʻenau fanga kuí te nau hū atu ʻo maʻú.+ 24 Ko ia naʻe hū atu ʻa ʻenau fānaú ʻo maʻu ʻa e fonuá,+ pea naʻá ke fakavaivaiʻi ʻi honau ʻaó ʻa e kau Kēnaní,+ ʻa ia ko e kakai ia ʻo e fonuá, pea naʻá ke tuku kinautolu ki honau nimá, fakatouʻosi ʻa honau ngaahi tuʻí mo e ngaahi kakai ʻo e fonuá, ke nau fai kiate kinautolu ha meʻa pē naʻa nau loto ki ai. 25 Pea naʻa nau hamu ʻa e ngaahi kolo fakakolotau+ mo ha fonua mahu,+ pea naʻa nau maʻu ʻa e ngaahi fale naʻe fonu ʻi he meʻa lelei kehekehe, ngaahi lepa kuo keli, ngaahi ngoue kālepi, ngaahi ngoue ʻōlive,+ mo e ʻuluʻakau fua lahi. Ko ia naʻa nau kai ʻo mākona mo sisino, pea naʻa nau fiefia ʻi hoʻo fuʻu leleí.

26 Kae kehe, naʻa nau talangataʻa mo angatuʻu kiate koe+ pea sītuʻa ki hoʻo Laó.* Naʻa nau tāmateʻi ʻa hoʻo kau palōfita naʻa nau fakatokanga kiate kinautolu ke fakafoki mai kinautolu kiate koé, pea naʻa nau fai ʻa e ngaahi tōʻonga mātuʻaki taʻefakaʻapaʻapa.+ 27 ʻI he meʻá ni naʻá ke tuku ai kinautolu ki he nima ʻo honau ngaahi filí,+ ʻa ia naʻa nau hanganaki fakamamahiʻi kinautolu.+ Ka naʻa nau tangi atu kiate koe ʻi he taimi ʻo ʻenau mamahí, pea naʻá ke fanongo mai mei he langí; pea koeʻuhi ko e lahi hoʻo mēsí, naʻá ke ʻoange kiate kinautolu ha kau faifakahaofi ke fakahaofi kinautolu mei he nima ʻo honau ngaahi filí.+

28 “Ka ʻi heʻenau fiemālié pē, naʻa nau toe fai ʻa e meʻa ʻoku kovi ʻi ho ʻaó,+ pea naʻá ke liʻaki atu kinautolu ki he nima ʻo honau ngaahi filí, ʻa ia naʻa nau puleʻi kinautolu.*+ Pea naʻa nau foki leva ʻo ui tokoni+ kiate koe, pea naʻá ke fanongo mai mei he langí ʻo fakahaofi kinautolu ʻi he taimi ki he taimi koeʻuhí ko e lahi hoʻo mēsí.+ 29 Neongo naʻá ke fakatokanga kiate kinautolu koeʻuhi ke fakafoki mai kinautolu ki hoʻo Laó, naʻa nau ʻafungi pea fakafisi ke fanongo ki hoʻo ngaahi fekaú;+ pea naʻa nau faihala ki hoʻo ngaahi tuʻutuʻuní, ʻa ē ʻe moʻui ai ha tangata kapau te ne tauhi ki ai.+ Ka naʻa nau anga-fefeka ʻo sītuʻa pea fakakekeva honau kiá, pea naʻa nau fakafisi ke fanongo. 30 Naʻá ke fakaaʻu atu hoʻo kātakí kiate kinautolu+ ʻi he laui taʻu pea hanganaki fakatokanga kiate kinautolu ʻaki ho laumālié ʻo fakafou ʻi hoʻo kau palōfitá, ka naʻa nau fakafisi ke fanongo. Faifai atu pē naʻá ke tuku kinautolu ki he nima ʻo e ngaahi kakai ʻo e ngaahi fonuá.+ 31 Pea ʻi he lahi hoʻo mēsí, naʻe ʻikai te ke fakaʻauha ʻosi+ pe liʻaki kinautolu, he ko ha ʻOtua manavaʻofa* koe mo mohu meesi.+

32 “Pea ko eni, ʻe homau ʻOtua, ʻa e ʻOtua lahi, māfimafi, mo fakamanavahē, kuó ke tauhi hoʻo fuakavá pea fakahāhā ʻa e ʻofa mateakí,+ ʻoua naʻá ke fakamaʻamaʻaʻi ʻa e faingataʻa kotoa kuo hoko kiate kimautolú, ki homau ngaahi tuʻí, ki homau kau houʻeikí,+ ki homau kau taulaʻeikí,+ mo ʻemau kau palōfitá,+ mo ʻemau fanga kuí, mo hoʻo kakai kotoa pē mei he ngaahi ʻaho ʻo e ngaahi tuʻi ʻo ʻAsīliá+ ʻo aʻu mai ki he ʻahó ni. 33 Kuó ke māʻoniʻoni ʻi he meʻa kotoa kuo hoko kiate kimautolú, he kuó ke faitōnunga; ka ko kimautolú kuo mau fai ʻa e tōʻonga fulikivanu.+ 34 Ko e meʻa ki homau ngaahi tuʻí, mo ʻemau kau houʻeikí, mo ʻemau kau taulaʻeikí, mo ʻemau fanga kuí, kuo ʻikai te nau tauhi hoʻo Laó pe tokanga ki hoʻo ngaahi fekaú pe ki hoʻo ngaahi fakamanatu* ʻa ia naʻá ke fakatokanga ʻaki kiate kinautolú. 35 Naʻa mo e taimi naʻa nau ʻi honau puleʻangá ai pea fiefia ʻi he lelei lahi naʻá ke ʻoange kiate kinautolú pea nau ʻi he fonua ʻatāloa mo mahu* naʻá ke foaki kiate kinautolú, naʻe ʻikai te nau tauhi kiate koe+ mo tafoki mei heʻenau ngaahi tōʻonga koví. 36 Ko ia ko kimautolu eni he ʻahó ni, ko e kau pōpula+—ʻio, ko e kau pōpula ʻi he fonua naʻá ke foaki ki heʻemau fanga kuí ke nau kai ʻa hono fuá mo hono ngaahi meʻa leleí. 37 Ko hono fua lahí ʻoku ʻalu ia ki he ngaahi tuʻi ʻa ē kuó ke ʻai ke nau pule kiate kimautolu koeʻuhi ko ʻemau angahalá.+ ʻOku nau puleʻi ʻa homau sinó mo ʻemau fanga monumanú ʻo fakatatau ki heʻenau fiemaʻú, pea ʻoku mau mamahi lahi.

38 “Ko ia ʻi he vakai ki he meʻa kotoa ko ení, ʻoku mau fai ha aleapau+ ʻi ha tohi, pea ʻoku fakapapauʻi ia ʻaki ʻa e sila ʻa ʻemau kau houʻeikí, ko ʻemau kau Līvaí, pea mo ʻemau kau taulaʻeikí.”+