Fakamaau

2 Naʻe ʻalu hake leva ʻa e ʻāngelo+ ʻa Sihová mei Kilikali+ ki Pokimi peá ne pehē: “Naʻá ku ʻomai kimoutolu mei ʻIsipite ki he fonua naʻá ku fuakava fekauʻaki mo ia ki hoʻomou fanga kuí.+ ʻIkai ko ia pē, naʻá ku pehē, ‘ʻE ʻikai ʻaupito ke u maumauʻi ʻa ʻeku fuakava mo kimoutolú.+ 2 Pea ko kimoutolu, kuo pau ke ʻoua naʻa mou fai ha fuakava mo e kakai ʻo e fonuá ni+ pea te mou holoki ʻa honau ngaahi ʻōlitá.’+ Ka kuo ʻikai ke mou talangofua ki hoku leʻó.+ Ko e hā kuo mou fai ai ení? 3 Ko e ʻuhinga ia naʻá ku toe pehē ai, ‘ʻE ʻikai te u kapusi kinautolu mei homou ʻaó,+ pea te nau fakataueleʻi kimoutolu,+ pea ko honau ngaahi ʻotuá te nau tohoakiʻi kimoutolu.’”+

4 ʻI he taimi naʻe leaʻaki ai ʻe he ʻāngelo ʻa Sihová ʻa e ngaahi leá ni ki he kotoa ʻo e kau ʻIsilelí, naʻe kamata ke fākafoa leʻo-lahi ʻa e kakaí. 5 Ko ia naʻa nau ui ʻa e feituʻu ko iá ko Pokimi,* pea naʻa nau fai ai ha feilaulau kia Sihova.

6 ʻI hono fekau ʻe Siosiua ʻa e kakaí ke nau ʻalú, naʻe ʻalu taki taha ʻa e kau ʻIsilelí ki hono tofiʻa ke maʻu ʻa e fonuá.+ 7 Naʻe hokohoko atu ʻa e tauhi ʻa e kakaí kia Sihova ʻi he ngaahi ʻaho kotoa ʻo Siosiuá mo e ngaahi ʻaho kotoa ʻo e kau mātuʻa naʻa nau moʻui fuoloa ange ʻia Siosiuá pea naʻa nau mātā ʻa e ngaahi fuʻu ngāue kotoa ʻa Sihova maʻa ʻIsilelí.+ 8 Pea ko Siosiua ko e foha ʻo Nuní, ʻa e sevāniti ʻa Sihová, naʻá ne mate ʻi hono taʻu 110.+ 9 Ko ia naʻa nau tanu ia ʻi he feituʻu ʻo hono tofiʻá ʻi Timinati-helesi,+ ʻi he feituʻu moʻungaʻia ʻo ʻIfalemí, ʻi he tokelau ʻo Moʻunga Kāsí.+ 10 Ko e toʻutangata kotoa ko iá naʻe fakatahaʻi kinautolu ki heʻenau fanga kuí,* pea naʻe tupu hake ha toʻutangata ʻe taha ʻi he hili kinautolú ʻa ia naʻe ʻikai te nau ʻiloʻi ʻa Sihova pe ko e meʻa naʻá ne fai maʻa ʻIsilelí.

11 Ko ia naʻe fai ʻe he kau ʻIsilelí ʻa e meʻa naʻe kovi ʻi he vakai mai ʻa Sihová pea naʻa nau tauhi* ki he ngaahi Pēalí.+ 12 Ko ia naʻa nau liʻaki ai ʻa Sihova, ko e ʻOtua ʻo ʻenau ngaahi tamaí, ʻa ia naʻá ne ʻomai kinautolu mei he fonua ko ʻIsipité.+ Pea naʻa nau muimui ki he ngaahi ʻotua kehé, ʻa e ngaahi ʻotua ʻo e kakai takatakai ʻiate kinautolú,+ pea naʻa nau punou hifo kiate kinautolu pea fakahouhauʻi ai ʻa Sihova.+ 13 Naʻa nau liʻaki ʻa Sihova pea tauhi kia Pēali mo e ngaahi ʻīmisi ʻAsitelotí.+ 14 ʻI he meʻá ni naʻe kakaha ai ʻa e houhau ʻa Sihová ki ʻIsileli, ko ia naʻá ne tuku atu ai kinautolu ki he kau ʻave fakamālohi, ʻa ia naʻa nau ʻave fakamālohi kinautolú.+ Naʻá ne fakatau atu kinautolu ki he nima ʻo e ngaahi fili takatakai ʻiate kinautolú,+ pea naʻe ʻikai kei malava ke nau matuʻuaki ʻa honau ngaahi filí.+ 15 ʻI ha feituʻu pē naʻa nau ʻalu ki ai, ko e nima ʻo Sihová naʻe ʻikai ʻiate kinautolu, peá ne ʻomai ha fakatamaki kiate kinautolu,+ ʻo hangē tofu pē ko e folofola ʻa Sihová pea hangē tofu pē ko e fuakava ʻa Sihova kiate kinautolú,+ pea naʻa nau faingataʻaʻia lahi.+ 16 Ko ia naʻe fokotuʻu ai ʻe Sihova ʻa e kau fakamaau ʻa ia te nau fakahaofi kinautolu mei he nima ʻo honau kau ʻave fakamālohí.+

17 Ka naʻe aʻu ʻo nau fakafisi ke fanongo ki he kau fakamāú pea naʻa nau faifeʻauaki ki he ngaahi ʻotua kehé pea punou hifo kiate kinautolu. Naʻe vave ʻenau afe mei he ʻalunga ʻa ia naʻe ʻaʻeva ai ʻenau fanga kuí, ʻa e faʻahinga naʻa nau talangofua ki he ngaahi fekau ʻa Sihová.+ Naʻe ʻikai te nau fai ʻa e meʻa ko iá. 18 ʻI ha taimi pē naʻe fokotuʻu ai ʻe Sihova ha kau fakamaau kiate kinautolú,+ naʻe kau ʻa Sihova mo e fakamaau ko iá pea fakahaofi kinautolu mei he nima ʻo honau ngaahi filí ʻi he ngaahi ʻaho kotoa ʻo e fakamāú; he naʻe ongoʻi fakaʻofaʻia*+ ʻa Sihova ʻi heʻenau toʻe koeʻuhi ko e faʻahinga naʻa nau lōmekina kinautolú+ mo e faʻahinga naʻa nau ngaohikoviʻi kinautolú.

19 Ka ʻi he taimi naʻe mate ai ʻa e fakamāú, naʻa nau toe faihala lahi ange ʻi heʻenau ngaahi tamaí ʻi heʻenau muimui ki he ngaahi ʻotua kehé, ʻo tauhi kiate kinautolu mo punou hifo kiate kinautolu.+ Naʻe ʻikai ke nau liʻaki ʻenau ngaahi tōʻongá mo ʻenau anga-fefeká. 20 Naʻe faai atu pē ʻo kakaha ʻa e houhau ʻa Sihová ki ʻIsileli,+ peá ne folofola: “Koeʻuhi kuo maumauʻi ʻe he puleʻangá ni ʻa ʻeku fuakava+ naʻá ku tuʻutuʻuni ki heʻenau fanga kuí pea kuo nau talangataʻa kiate au,+ 21 ko au foki ʻe ʻikai te u kapusi mei honau ʻaó naʻa mo ha taha ʻo e ngaahi puleʻanga ʻa ia naʻe toe ʻi he hili ʻa e mate ʻa Siosiuá.+ 22 Naʻe hoko ení ke siviʻi ai pe ʻe tauhi ʻe ʻIsileli ʻa e ʻalunga ʻo Sihová+ ʻaki ʻenau ʻaʻeva ai ʻo hangē ko ia naʻe fai ʻe heʻenau ngaahi tamaí.” 23 Ko ia naʻe tuku ai pē ʻe Sihova ke toe ʻa e ngaahi puleʻangá ni. Naʻe ʻikai te ne kapusi vave kinautolu, pea naʻe ʻikai te ne tuku kinautolu ki he nima ʻo Siosiuá.