ʻIsikeli

44 Naʻá ne fakafoki mai au ʻi he hala ʻo e matapā ki tuʻa ʻo e feituʻu toputapú ʻa ia ʻoku hanga ki he hahaké,+ pea tā kuo tāpuni ia.+ 2 Naʻe folofola mai leva ʻa Sihova kiate au: “Ko e matapaá ni ʻe tāpuni ai pē. Heʻikai ke toe fakaava ia, pea heʻikai ha tangata ʻe toe hū atu ai; he ko Sihova, ʻa e ʻOtua ʻo ʻIsilelí, kuó ne hū atu ai,+ ko ia kuo pau ke tāpuni ai pē ia. 3 Kae kehe, ʻe tangutu ai ʻa e ʻeikí ke kai mā ʻi he ʻao ʻo Sihová,+ he ko ha ʻeiki ia. Te ne hū ki loto ʻi he fale-hūʻanga ʻo e matapaá, pea te ne hū atu ai ki tuʻa.”+

4 Naʻá ne ʻomi leva au ʻi he matapā ʻi he tokelaú ki he konga ki muʻa ʻo e temipalé. ʻI heʻeku vakai atú, naʻá ku sio ki he lāngilangi ʻo Sihová kuó ne fakafonu ʻa e temipale ʻo Sihová.+ Ko ia naʻá ku tō foʻohifo ki he kelekelé.+ 5 Naʻe folofola mai leva ʻa Sihova kiate au: “Foha ʻo e tangata, tokanga mai,* siofi, peá ke fanongo tokanga ki he meʻa kotoa pē ʻoku ou tala atu kiate koe ʻo fekauʻaki mo e ngaahi tuʻutuʻuni mo e ngaahi lao ʻo e temipale ʻo Sihová. Mātuʻaki tokanga ki he hūʻanga ʻo e temipalé mo e ngaahi hūʻanga kotoa ki tuʻa ʻo e feituʻu toputapú.+ 6 Kuo pau ke ke lea ki he fale angatuʻu ʻo ʻIsilelí, ‘Ko e folofola eni ʻa e ʻEiki Hau ko Sihová: “Kuo feʻunga hoʻomou ngaahi tōʻonga fakalieliá, ʻe fale ʻo ʻIsileli. 7 ʻI hoʻomou ʻomai ʻa e kau muli ʻoku taʻekamu honau lotó mo honau kakanó ki hoku feituʻu toputapú, ʻoku nau ʻuliʻi ʻa hoku temipalé. ʻOku mou ʻomi ʻa e mā, ngako ʻo e monumanú mo e toto kiate au, lolotonga ia kuo maumau ʻa ʻeku fuakavá koeʻuhí ko hoʻomou ngaahi tōʻonga fakalieliá kotoa. 8 Kuo ʻikai ke mou tokanga ki heʻeku ngaahi meʻa toputapú.+ ʻI hono kehé, ʻoku mou vaheʻi ʻa e niʻihi kehe ke nau tokangaʻi ʻa e ngaahi fatongia ʻi hoku feituʻu toputapú.”’

9 “‘Ko e folofola eni ʻa e ʻEiki Hau ko Sihová: “ʻE ʻikai ha muli ʻoku nofo ʻi ʻIsileli ʻa ia ʻoku taʻekamu ʻa hono lotó mo e kakanó ʻe hū ki hoku feituʻu toputapú.”’

10 “‘Ka ko e kau Līvai kuo nau hē mamaʻo meiate au+ ʻi he taimi naʻe ʻalu hē ai ʻa e kau ʻIsilelí meiate au ʻo muimui ki heʻenau ngaahi ʻaitoli fakalieliá* te nau fua ʻa e ngaahi nunuʻa ʻo ʻenau faihalá. 11 Pea te nau hoko ko e kau faifatongia ʻi hoku feituʻu toputapú ʻo tokangaʻi ʻa e ngaahi matapā ʻo e temipalé+ pea fakahoko fatongia ʻi he temipalé. Te nau tāmateʻi ʻa e monumanu ʻo e feilaulau tutu kakató mo e feilaulau maʻá e kakaí, pea te nau tuʻu ʻi he ʻao ʻo e kakaí ke fakahoko fatongia maʻanautolu. 12 Koeʻuhi naʻa nau fakahoko fatongia maʻanautolu ʻi he ʻao ʻo ʻenau ngaahi ʻaitoli fakalieliá pea naʻa nau hoko ko ha tūkiaʻanga ʻo fakatupunga ai ke faiangahala ʻa e fale ʻo ʻIsilelí,+ ko e ʻuhinga ia kuó u hiki ai hoku nimá ʻi ha fuakava ke fai ha meʻa kiate kinautolu,’ ko e fakahaaʻi ia ʻe he ʻEiki Hau ko Sihová, ‘pea te nau fua ʻa e ngaahi nunuʻa ʻo ʻenau faihalá. 13 ʻE ʻikai te nau fakaofiofi mai kiate au ke ngāue ko ʻeku kau taulaʻeiki pe fakaofiofi mai ki ha taha pē ʻo ʻeku ngaahi meʻa toputapú pe mātuʻaki toputapú, pea te nau fua ʻa honau māʻangá koeʻuhi ko e ngaahi meʻa fakalielia naʻa nau faí. 14 Ka te u ʻai kinautolu ke nau tokangaʻi ʻa e ngaahi fatongia ʻi he temipalé, ke tokangaʻi ʻa e ngāue ʻi aí mo e ngaahi meʻa kotoa pē ʻoku totonu ke fai ʻi aí.’+

15 “‘Ko e meʻa ki he kau taulaʻeiki Līvaí, ʻa e ngaahi foha ʻo Sātokí,+ ʻa ia naʻa nau tokangaʻi ʻa e ngaahi fatongia ʻi hoku feituʻu toputapú ʻi he taimi naʻe ʻalu hē ai ʻa e kau ʻIsilelí meiate aú,+ te nau fakaofiofi mai ke fakahoko fatongia kiate au, pea te nau tuʻu ʻi hoku ʻaó ke ʻomai kiate au ʻa e ngako+ mo e toto,’+ ko e fakahaaʻi ia ʻe he ʻEiki Hau ko Sihová. 16 ‘Ko kinautolu ʻa e faʻahinga te nau hū ki hoku feituʻu toputapú, pea te nau fakaofiofi mai ki heʻeku tēpilé ke fakahoko fatongia kiate au,+ pea te nau tokangaʻi ʻa honau ngaahi fatongia kiate aú.+

17 “‘ʻI heʻenau haʻu ki he ngaahi matapā ʻo e lotoʻā ʻi lotó, ʻoku totonu ke nau tui ʻa e ngaahi kofu līneni.+ ʻOku ʻikai totonu ke nau tui ha kofu fulufuluʻisipi ʻi heʻenau fakahoko fatongia ʻi he ngaahi matapā ʻo e lotoʻā ʻi lotó pe ʻi loto ai. 18 ʻOku totonu ke nau ʻai ʻi honau ʻulú ha ngaahi faʻufaʻu līneni, pea ʻoku totonu ke nau tui ha ngaahi talausese mutu līneni ke puli honau alangá.+ ʻOku ʻikai totonu ke nau tui ha vala pē te ne ʻai kinautolu ke nau pupuhaʻia. 19 Ki muʻa ke nau hū atu ki he lotoʻā ʻi tuʻá—ʻa e lotoʻā ʻi tuʻa ʻoku ʻi ai ʻa e kakaí—ʻoku totonu ke nau vete ʻa e ngaahi kofu naʻa nau fakahoko fatongia ʻakí+ pea tuku ia ʻi he ngaahi loki kai toputapú.*+ Te nau tui leva ha ngaahi kofu kehe, koeʻuhí ke ʻoua naʻa nau ʻai ke aʻu atu ha tuʻunga māʻoniʻoni ki he* kakaí fakafou ʻi honau ngaahi kofú. 20 ʻOku ʻikai totonu ke nau tele honau ʻulú+ pe tuku honau ʻulú ke loloa. Te nau kosikosi ʻa honau ʻulú. 21 Ko e kau taulaʻeikí ʻoku ʻikai totonu ke nau inu ha uaine ʻi he taimi te nau hū ai ki he lotoʻā ʻi lotó.+ 22 ʻOku ʻikai totonu ke nau ʻave ke hoko ko honau uaifi ha uitou pe ko ha fefine kuo veteʻi;+ ka te nau mali mo ha fefine kei nofo anga-maʻa ʻi he hako ʻo ʻIsilelí pe ko ha fefine naʻe mali mo ha taulaʻeiki+ kuo mate.’

23 “‘ʻOku totonu ke nau fakahinohinoʻi ʻa hoku kakaí ʻo fekauʻaki mo e kehekehe ʻi he meʻa ʻoku toputapú mo e meʻa ʻoku anga-mahení; pea te nau akoʻi kiate kinautolu ʻa e kehekehe ʻi he meʻa ʻoku taʻemaʻá mo e meʻa ʻoku maʻá.+ 24 ʻOku totonu ke nau hoko ko e kau fakamaau ʻi ha meʻa fakalao;+ kuo pau ke nau fakamāuʻi ia ʻo fakatatau ki heʻeku ngaahi tuʻutuʻuni fakaefakamāú.+ ʻOku totonu ke nau tauhi ʻa ʻeku ngaahi lao mo ʻeku ngaahi tuʻutuʻuni ʻo fekauʻaki mo e kotoa ʻo ʻeku ngaahi kātoangá+ pea fakatoputapuʻi ʻa ʻeku ngaahi Sāpaté. 25 ʻOku ʻikai totonu ke nau fakaofiofi ki ha tangata pē kuo mate, he te nau hoko ai ʻo taʻemaʻa. Kae kehe, ʻe ngofua pē ke nau taʻemaʻa kapau ko ʻenau tamaí, faʻeé, fohá, ʻofefiné, tokouá, pe ko hanau tuofefine ʻoku teʻeki ke mali kuo maté.+ 26 Pea ʻi he hili ʻa e fakamaʻa ʻa ha taulaʻeiki, te nau lau mei ai ha ʻaho ʻe fitu maʻana. 27 ʻI he ʻaho te ne hū ai ki he potu toputapú, ki he lotoʻā ʻi lotó, ke faifatongia ʻi he potu toputapú, te ne ʻoatu ai ʻa ʻene feilaulau angahalá,’+ ko e fakahaaʻi ia ʻe he ʻEiki Hau ko Sihová.

28 “‘Pea ko eni ʻa honau tofiʻá: Ko au ʻa honau tofiʻá.+ ʻOku ʻikai totonu ke mou ʻoange kiate kinautolu hanau tofiʻa ʻi ʻIsileli, he ko au ʻa honau tofiʻá. 29 Ko kinautolu ʻa e faʻahinga te nau kai ʻa e feilaulau meʻakaí,+ mo e feilaulau angahalá, mo e feilaulau halaiá,+ pea ko e meʻa kotoa pē kuo foaki līʻoa ʻi ʻIsileli ʻe ʻanautolu ia.+ 30 Ko e lelei taha ʻo e ʻuluaki fua kotoa pē kuo motuʻá mo e ngaahi faʻahinga meʻaʻofa kotoa pē meiate kimoutolú ʻe maʻu ia ʻe he kau taulaʻeikí.+ Pea ʻoku totonu ke mou ʻoatu ʻa e ʻuluaki fua ʻo hoʻomou uité ki he taulaʻeikí.+ ʻE ʻai ʻe he meʻá ni ke nofo ʻa e tāpuakí ʻi ho falé.+ 31 ʻOku ʻikai totonu ke kai ʻe he kau taulaʻeikí ha manupuna pe ko ha manu pē naʻe maʻu kuo mate pe haehae ʻe ha manu.’+