ʻIsikeli

36 “Ko e meʻa kiate koé, foha ʻo e tangata, fai ha kikite ʻo fekauʻaki mo e ngaahi moʻunga ʻo ʻIsilelí peá ke pehē, ‘ʻE ngaahi moʻunga ʻo ʻIsileli, fanongo ki he folofola ʻa Sihová. 2 Ko e folofola eni ʻa e ʻEiki Hau ko Sihová: “Kuo lea ʻa e filí kiate kimoutolu, ‘Sai ē! Naʻa mo e ngaahi feituʻu māʻolunga ʻo e kuonga muʻá kuo hoko ko homau tofiʻa!’”’+

3 “Ko ia fai ha kikite peá ke pehē, ‘Ko e folofola eni ʻa e ʻEiki Hau ko Sihová: “Koeʻuhi kuo nau ʻai ke mou maomaonganoa pea ʻohofi kimoutolu mei he tapa kotoa pē, koeʻuhí ke mou hoko ko ha tofiʻa ʻo e faʻahinga naʻe hao* ʻi he lotolotonga ʻo e ngaahi puleʻangá pea ʻoku hanganaki talanoa ʻa e kakaí ʻo fekauʻaki mo kimoutolu pea lauʻikoviʻi kimoutolu,+ 4 ko ia ai, ʻe ngaahi moʻunga ʻo ʻIsileli, fanongo ki he folofola ʻa e ʻEiki Hau ko Sihová! Ko e folofola eni ʻa e ʻEiki Hau ko Sihová ki he ngaahi moʻungá mo e ngaahi foʻi māʻolungá, ki he ngaahi vaitafé mo e ngaahi teleʻá, ki he ngaahi fokotuʻunga maumau naʻe maomaonganoá,+ pea ki he ngaahi kolo liʻaki ʻa ia kuo faʻao fakamālohi pea lumaʻi ʻe he faʻahinga naʻe hao ʻi he ngaahi puleʻanga takatakai ʻiate kinautolú;+ 5 ʻoku folofola ʻa e ʻEiki Hau ko Sihová ki he faʻahingá ni: ‘ʻI he kakaha ʻa ʻeku fuaʻá+ te u lea ki he faʻahinga naʻe hao ʻi he ngaahi puleʻangá pea ki he kotoa ʻo ʻĪtomí, ʻa e faʻahinga ʻa ia ʻi heʻenau fiefia lahi mo mātuʻaki manukí+ kuo nau taukaveʻi ko honau tofiʻa ʻa hoku fonuá, ke pule ki hono ngaahi kaikaiʻangá pea faʻao fakamālohi ia.’”’+

6 “Ko ia fai ha kikite ʻo fekauʻaki mo e fonua ko ʻIsilelí, pea lea ki he ngaahi moʻungá pea ki he ngaahi foʻi māʻolungá, ki he ngaahi vaitafé pea ki he ngaahi teleʻá, ‘Ko e folofola eni ʻa e ʻEiki Hau ko Sihová: “Vakai! Te u lea ʻi heʻeku fuaʻá pea ʻi heʻeku ʻitá, koeʻuhí kuo mou fuesia ʻa hono fakamaaʻi ʻe he ngaahi puleʻangá.”’+

7 “Ko ia ai, ko e folofola eni ʻa e ʻEiki Hau ko Sihová: ‘Ko au tonu ʻoku ou hiki ʻa hoku nimá ʻi ha fuakava ʻo pehē, ko e ngaahi puleʻanga takatakaí te nau fua ʻa honau māʻanga pē ʻonautolú.+ 8 Ka ko kimoutolu, ʻe ngaahi moʻunga ʻo ʻIsileli, ʻe tupu homou ngaahi vaʻá pea laku fua mai maʻa hoku kakai ko ʻIsilelí,+ he ʻe vavé ni ke nau foki mai. 9 He ʻoku ou ʻiate kimoutolu, pea te u tokanga atu kiate kimoutolu, pea ʻe ngoueʻi kimoutolu mo tūtuuʻi ai ʻa e tenga. 10 Te u fakatokolahi homou kakaí—ʻa e fale kotoa ʻo ʻIsilelí, ʻa hono kotoa—pea ko e ngaahi koló ʻe nofoʻi+ pea ko e ngaahi fokotuʻunga maumaú ʻe toe langa.+ 11 ʻIo, te u fakatokolahi homou kakaí mo hoʻomou fanga manú;+ te nau tupu ʻo tokolahi mo fanafanau. Pea te u ʻai ke nofoʻi kimoutolu ʻo hangē ko ia ki muʻá,+ pea te u ʻai kimoutolu ke mou lakalakaimonū ʻo lahi ange ia ʻi he kuohilí;+ pea kuo pau ke mou ʻilo ko Sihova au.+ 12 Te u ʻai ʻa e kakaí—ʻa hoku kakai ko ʻIsilelí—ke nau ʻaʻeva ʻiate kimoutolu, pea te nau tofiʻa ʻaki kimoutolu.+ Te mou hoko ko honau tofiʻa, pea heʻikai ʻaupito te mou toe ʻai kinautolu ke nau taʻefanau.’”+

13 “Ko e folofola eni ʻa e ʻEiki Hau ko Sihová: ‘Koeʻuhi ʻoku nau lea kiate kimoutolu: “Ko ha fonua koe ʻokú ke keina ʻa e kakaí peá ke ʻai ho ngaahi fonuá ke ʻikai haʻanau fānau,”’ 14 ‘ko ia ai, ʻe ʻikai te ke toe keina ʻa e kakaí pe ʻai ho ngaahi fonuá ke ʻikai haʻanau fānau,’ ko e fakahaaʻi ia ʻe he ʻEiki Hau ko Sihová. 15 ‘Heʻikai te u toe tuku koe ke taʻetokaʻi ʻe he ngaahi puleʻangá pe ʻai koe ke ke fuesia ʻa e luma ʻa e kakaí,+ pea heʻikai te ke kei fakatūkiaʻi ho ngaahi fonuá,’ ko e fakahaaʻi ia ʻe he ʻEiki Hau ko Sihová.”

16 Pea naʻe toe hoko mai ʻa e folofola ʻa Sihová kiate au, ʻo pehē: 17 “Foha ʻo e tangata, ʻi he taimi naʻe nofo ai ʻa e fale ʻo ʻIsilelí ʻi honau fonuá, naʻa nau ʻai ia ke taʻemaʻa ʻaki honau ngaahi ʻalungá mo ʻenau ngaahi ngāué.+ Ko honau ngaahi ʻalungá naʻe hangē ko e taʻemaʻa ʻa e puke fakamāhiná kiate au.+ 18 Ko ia naʻá ku huaʻi atu ʻeku tuputāmakí kiate kinautolu koeʻuhi ko e toto kuo nau lilingi ʻi he fonuá+ pea koeʻuhí kuo nau ʻai ʻa e fonuá ke taʻemaʻa ʻaki ʻenau ngaahi ʻaitoli fakalieliá.*+ 19 Ko ia naʻá ku fakamovetevete kinautolu ʻi he lotolotonga ʻo e ngaahi puleʻangá pea ʻai ke nau mafola atu ʻi he lotolotonga ʻo e ngaahi fonuá.+ Naʻá ku fakamāuʻi kinautolu ʻo fakatatau ki honau ʻalungá pea fakatatau ki heʻenau ngaahi ngāué. 20 Ka ʻi heʻenau ʻalu atu ki he ngaahi puleʻanga ko iá, naʻe taʻefakaʻapaʻapaʻi ʻe he kakaí ʻa hoku hingoa māʻoniʻoní+ ʻi heʻenau pehē ʻo fekauʻaki mo kinautolu, ‘Ko e kakai eni ʻa Sihová, ka naʻe pau ke nau mavahe mei hono fonuá.’ 21 Ko ia te u fai ha tokanga ki hoku hingoa māʻoniʻoní, ʻa ia kuo taʻefakaʻapaʻapaʻi ʻe he fale ʻo ʻIsilelí ʻi he lotolotonga ʻo e ngaahi puleʻanga kuo nau ʻalu atu ki aí.”+

22 “Ko ia ai, lea ki he fale ʻo ʻIsilelí, ‘Ko e folofola eni ʻa e ʻEiki Hau ko Sihová: “ʻOku ʻikai koeʻuhi ko kimoutolu ʻoku ou fai ai ʻa e meʻá ni, ʻe fale ʻo ʻIsileli, ka koeʻuhi ko hoku hingoa māʻoniʻoní, ʻa ia naʻa mou taʻefakaʻapaʻapaʻi ʻi he lotolotonga ʻo e ngaahi puleʻanga kuo mou ʻalu atu ki aí.”’+ 23 ‘Ko hono moʻoní te u fakamāʻoniʻoniʻi ʻa hoku hingoa lahí,+ ʻa ia naʻe taʻefakaʻapaʻapaʻi ʻi he lotolotonga ʻo e ngaahi puleʻangá, ʻa ia naʻa mou taʻefakaʻapaʻapaʻi ʻi honau lotolotongá; pea kuo pau ke ʻilo ʻe he ngaahi puleʻangá ko Sihova au,’ ko e fakahaaʻi ia ʻe he ʻEiki Hau ko Sihová,+ ‘ʻi he taimi ʻe fakamāʻoniʻoniʻi ai au ʻi homou lotolotongá ʻi honau ʻaó. 24 Te u toʻo kimoutolu mei he ngaahi puleʻangá pea fakatahatahaʻi mai kimoutolu mei he kotoa ʻo e ngaahi fonuá pea ʻomi kimoutolu ki homou fonuá.+ 25 Te u afuhi kimoutolu ʻaki ʻa e vai maʻa, pea te mou maʻa;+ te u ʻai kimoutolu ke mou maʻa mei hoʻomou taʻemaʻa+ kotoa pē pea mei he kotoa ʻo hoʻomou ngaahi ʻaitoli fakalieliá.+ 26 Te u foaki kiate kimoutolu ha loto foʻou+ pea ʻai ki loto kiate kimoutolu ha laumālie foʻou.+ Te u toʻo ʻa e loto-maká+ mei homou sinó kae ʻoatu kiate kimoutolu ha loto fakaekakano.* 27 Te u ʻai hoku laumālié ki loto kiate kimoutolu, pea te u ʻai kimoutolu ke mou ʻaʻeva ʻi heʻeku ngaahi tuʻutuʻuní,+ pea te mou tauhi mo fai ki heʻeku ngaahi tuʻutuʻuni fakaefakamāú. 28 Pea te mou nofo ʻi he fonua naʻá ku foaki ki hoʻomou fanga kuí, pea te mou hoko ko hoku kakai pea te u hoko ko homou ʻOtua.’+

29 “‘Te u fakahaofi kimoutolu mei hoʻomou taʻemaʻa kotoa pē pea te u tala ki he uité ke laku fua lahi, pea ʻe ʻikai te u ʻomi ha honge kiate kimoutolu.+ 30 Te u ʻai ke lahi ʻa e fua ʻo e ʻakaú pea mo e fua ʻo e ngoué, ke ʻoua ʻaupito naʻa mou toe fuesia ʻa e fakamā ʻo e hongé ʻi he lotolotonga ʻo e ngaahi puleʻangá.+ 31 Pea te mou manatu ki homou ngaahi ʻalunga koví mo hoʻomou ngaahi ngāue naʻe ʻikai leleí, pea te mou fakaliliʻa kiate kimoutolu koeʻuhí ko hoʻomou hiá mo hoʻomou ngaahi tōʻonga fakalieliá.+ 32 Ka ke mou ʻiloʻi eni: ʻOku ʻikai te u fai ʻa e meʻá ni koeʻuhi ko kimoutolu,’+ ko e fakahaaʻi ia ʻe he ʻEiki Hau ko Sihová. ‘Ka ke mou mā mo ongoʻi ngalivale koeʻuhí ko homou ʻalungá, ʻe fale ʻo ʻIsileli.’

33 “Ko e folofola eni ʻa e ʻEiki Hau ko Sihová: ‘ʻI he ʻaho te u fakamaʻa ai kimoutolu mei he kotoa ʻo hoʻomou hiá, te u ʻai ʻa e ngaahi koló ke nofoʻi+ mo e ngaahi fokotuʻunga maumaú ke toe langa.+ 34 Ko e fonua maomaonganoa naʻe tuku liʻaki ʻo sio ki ai ʻa e tokotaha kotoa ʻoku fou atu aí ʻe ngoueʻi ia. 35 Pea ʻe pehē ʻe he kakaí: “Ko e fonua maomaonganoá kuo hoko ʻo hangē ko e ngoue ʻo ʻĪtení,+ pea ko e ngaahi kolo naʻe maumau mo liʻaki pea holokí kuo fakakolotauʻi mo nofoʻi+ ia he taimí ni.” 36 Pea ko e toenga ʻo e ngaahi puleʻanga takatakai kiate kimoutolú kuo pau ke nau ʻilo ko au, Sihova tonu, kuó u langa ʻa e meʻa naʻe holokí, pea kuó u tō ʻa e meʻa naʻe liʻakí. Ko au Sihova tonu, kuó u leá, pea kuó u fai ia.’+

37 “Ko e folofola eni ʻa e ʻEiki Hau ko Sihová: ‘Te u tuku foki ʻa e fale ʻo ʻIsilelí ke nau kole mai ke u fai ʻa e meʻá ni maʻanautolu: Te u fakatokolahi honau kakaí ʻo hangē ha fanga sipí. 38 Hangē ko ha fuʻu tokolahi ʻo ha kau māʻoniʻoni, hangē ko e fanga sipi ʻo Selusalema* lolotonga ʻa ʻene ngaahi kātoangá,+ ko e ngaahi kolo naʻe maumaú ʻe hoko ʻo fonu ʻi he fuʻu kakai tokolahi;+ pea kuo pau ke nau ʻilo ko Sihova au.’”