ʻUluaki Tuʻi

7 Pea naʻe feʻunga mo e taʻu ʻe 13 ʻa hono langa ʻe Solomone hono fale*+ ʻoʻoná, pea toki kakato ai hono falé kotoa.+

2 Pea naʻá ne langa ʻa e Fale ʻo e Vaotā ʻo Lepanoní+ ʻo kiupite* ʻe 100 hono lōloá, kiupite ʻe 50 hono fālahí, pea kiupite ʻe 30 hono māʻolungá ʻi he ʻotu pou sita ʻe fā; pea naʻe ʻi he funga poú ha ngaahi pimi sita.+ 3 Ko e falé naʻe holisi ki ʻolunga ʻaki ʻa e papa sita pea naʻe hili hifo ia ʻi he ngaahi pimi naʻe ʻi he ngaahi funga poú; naʻe 45 fakakātoa, ʻo taki 15 ʻi he ʻotu. 4 Naʻe ʻi ai ha ngaahi matapā teuteu naʻe ʻotu tolu, pea ko e matapā teuteu taki taha naʻe fehangahangai ia mo ha toe matapā teuteu ʻa ia naʻe ʻotu tolu. 5 Ko e ngaahi hūʻangá kotoa pea mo e ngaahi kaumatapaá naʻe fakaʻesia tapafā tatau,* ʻo hangē pē ko e konga ki muʻa ʻo e fanga kiʻi matapā teuteu ʻa ia naʻa nau tuʻu fehangahangai taki ʻotu tolú.

6 Pea naʻá ne langa ʻa e Holo* ʻo e Ngaahi Pou naʻe kiupite ʻe 50 hono lōloá pea kiupite ʻe 30 hono fālahí, pea naʻe ʻi ai ha falefakatolo ʻi muʻa ai mo hano ngaahi ʻotu pou pea mo hano ʻato.

7 Naʻá ne toe langa mo e Holo* ʻo e Taloní,+ ʻa ia naʻá ne faifakamaau mei aí—ʻa e Holo Fakamaauʻangá+—pea naʻa nau holisi ʻaki ia ʻa e sita mei he falikí ʻo aʻu ki he ngaahi saá.

8 Ko e fale* ko ia ke ne nofo aí, ʻi he lotoʻā ʻe tahá,+ naʻe tuʻu mavahe ia mei mui mei he Holó,* pea naʻe meimei tatau pē ʻa hona ngaohí. Naʻá ne toe langa ha fale meimei tatau mo e Holo ko ʻení maʻá e ʻofefine ʻo Feló, ʻa ia naʻe ʻomi ʻe Solomone ke hoko ko hono uaifí.+

9 Ko e ngaahi meʻá ni kotoa naʻe ngaohi ʻaki ia ha ngaahi maka totongi mamafa+ naʻe tā ʻo fakatatau ki ha fua, pea naʻe tutuʻu ʻaki ʻa e ngaahi kili tutuʻu-maka ʻi loto mo tuʻa, mei he fakavaʻé ʻo aʻu ki he ʻotu maka taupotu taha ki ʻolungá, pea mo tuʻa ʻo aʻu ki he lotoʻā lahí.+ 10 Pea ko e fakavaʻé naʻe fakatoka ʻaki ha ngaahi fuʻu maka lalahi totongi mamafa; ko e fua ʻo e ngaahi fuʻu maka ʻe niʻihi naʻe kiupite ʻe hongofulu, pea ko e ngaahi fuʻu maka ʻe niʻihi, naʻe kiupite ʻe valu. 11 Pea naʻe ʻi ʻolunga ʻi he ngaahi maká ni ha ngaahi maka totongi mamafa naʻe tā ʻo fakatatau ki ha fua, pea mo e sita foki. 12 Pea ko e lotoʻā lahí naʻe ʻaaʻi takatakai ʻaki ʻa e ʻotu ʻe tolu ʻo e maka naʻe tā pea mo ha ʻotu ʻe taha ʻo e ngaahi foʻi papa sita, ʻo hangē pē ko ia ko e lotoʻā ʻi loto+ ʻo e fale ʻo Sihová pea mo e fale-hūʻanga* ki he falé.+

13 Naʻe fekau atu ʻe Tuʻi Solomone ke ʻomai kiate ia ʻa Hailame+ mei Tāia. 14 Ko e tama ia ʻa ha fefine uitou mei he matakali ʻo Nafitalaí, pea ko ʻene tamaí ko ha tangata tufunga kopa+ mei Tāia; pea naʻá ne maʻu ʻa e pōtoʻi, mahino,+ pea mo e taukei lahi ʻi he faʻahinga ngāue kotoa pē ʻoku fai ʻaki ʻa e kopá.* Ko ia naʻá ne haʻu kia Tuʻi Solomone ʻo ne fai ʻene ngāué kotoa.

15 Naʻá ne haka ha ongo fuʻu pou kopa;+ ko e pou taki taha naʻe kiupite ʻe 18 hono māʻolungá, pea naʻe feʻunga mo ha afo fua kiupite ʻe 12 hono lōloá ke ne takatakaiʻi ʻa e fuʻu pou+ taki taha.* 16 Pea naʻá ne ngaohi ha ongo ʻuluʻi-pou ʻaki ʻa e kopa naʻe haka ke fokotuʻu ʻi ʻolunga ʻi he ongo fuʻu poú. Ko e ʻuluʻi-pou ʻe taha naʻe kiupite ʻe nima hono māʻolungá, pea ko e ʻuluʻi-pou ʻe taha ko eé naʻe kiupite ʻe nima hono māʻolungá. 17 Ko e ʻuluʻi-pou ʻi he fuʻu pou taki taha naʻe ʻi ai ha meʻa vangavanga fakataha mo e ngaahi sēini fīfī;+ ko e fitu ki he ʻuluʻi-pou ʻe taha pea ko e fitu ki he ʻuluʻi-pou ʻe tahá. 18 Pea naʻá ne ngaohi ʻa e ngaahi foʻi pomikānite naʻe ʻotu ua ʻo takatakai ʻi he meʻa vangavanga ʻe taha ke teuteuʻiʻaki ʻa e ongo ʻuluʻi-pou ʻi he ongo fuʻu poú; naʻá ne fai ʻa e meʻa tatau ki he ongo ʻuluʻi-poú fakatouʻosi. 19 Ko e ongo ʻuluʻi-pou ʻi he ongo fuʻu pou ʻi he veʻe fale-hūʻangá naʻe hangē hono sīpingá ha lilé pea naʻe kiupite ʻe fā hono māʻolungá. 20 Ko e ongo ʻuluʻi-poú naʻe ʻi he ongo fuʻu poú ia, ʻi ʻolunga hake pē ʻi he konga tapotopoto naʻe pipiki ki ai ʻa e meʻa vangavangá; pea naʻe ʻi ai ha foʻi pomikānite ʻe 200 ʻi he ongo ʻotú ʻo takatakai ʻi he ʻuluʻi-pou+ taki taha.

21 Naʻá ne fokotuʻu ʻa e ongo fuʻu pou ʻo e fale-hūʻanga ʻo e temipalé.*+ Naʻá ne fokotuʻu ʻa e fuʻu pou ʻi he tafaʻaki toʻomataʻú* peá ne fakahingoa ia ko Siakini,* peá ne fokotuʻu mo e fuʻu pou ʻi he tafaʻaki toʻohemá* peá ne fakahingoa ia ko Pōasi.*+ 22 Pea ko e konga ki ʻolunga ʻo e ongo fuʻu poú naʻe hangē hona sīpingá ha lilé. Ko ia naʻe kakato ai ʻa e ngāue ki he ongo fuʻu poú.

23 Pea naʻá ne ngaohi ʻa e fuʻu ʻaiʻanga vaí mei he mētale kuo haka.+ Naʻe fuopotopoto, ʻo kiupite ʻe 10 mei he ngutu ki he ngutu pea kiupite ʻe 5 hono māʻolungá, pea naʻe feʻunga mo e afo fua kiupite ʻe 30 hono lōloá ke ne takatakaiʻi ia.*+ 24 Pea naʻe ʻi ai ha ngaahi meʻa-teuteu fuopotopoto+ ʻi lalo ʻi hono ngutú, ʻo ne takatakaiʻi kotoa ia, ko e meʻa-teuteu ʻe hongofulu ki he kiupite, naʻe takatakai ʻi he fuʻu ʻaiʻanga vaí, pea ko e ʻotu ʻe ua ʻo e ngaahi meʻa-teuteu fuopotopotó naʻe haka ʻo fakafuo fakataha ia mo e fuʻu ʻaiʻanga vaí. 25 Naʻe fokotuʻu ia ʻi he fanga pulu ʻe 12,+ ko e 3 naʻe hanga ki he tokelaú, ko e 3 naʻe hanga ki he hihifó, ko e 3 naʻe hanga ki he tongá, pea ko e 3 naʻe hanga ki he hahaké; pea naʻe hili ʻa e fuʻu ʻaiʻanga vaí ʻi ʻolunga ʻiate kinautolu, pea naʻe huʻu kotoa honau konga ki muí ki loto. 26 Pea ko hono matolú ko e laulahi ʻo e lauʻinimá;* pea ko hono ngutú naʻe ngaohi ia ʻo hangē ko e ngutu ʻo ha ipú, ʻo hangē ha matalaʻi lilé. Naʻe hao ai ʻa e vai ko hono lahí ko e pate* ʻe 2,000.

27 Pea naʻá ne ngaohi ʻa e saliote*+ kopa ʻe hongofulu. Ko e saliote taki taha naʻe kiupite ʻe fā hono lōloá, kiupite ʻe fā hono fālahí, pea kiupite ʻe tolu hono māʻolungá. 28 Pea ko e anga eni hono faʻu ʻo e ngaahi salioté: Naʻe ʻi ai hono ngaahi pāneli he tafaʻakí, pea ko e ngaahi pāneli he tafaʻakí naʻe ʻi loto ia ʻi he ngaahi ʻesia. 29 Pea ko e ngaahi pāneli ʻa ia naʻe ʻi loto ʻi he ngaahi ʻesiá naʻe ʻi ai ha fakatātā ʻo e fanga laione,+ fanga pulu, mo e ngaahi selupimi,+ pea ko e sīpinga tatau naʻe tongi ʻi he ngaahi ʻesiá. Naʻe tongi ʻi ʻolunga pea ʻi lalo ʻi he fakatātā ʻo e fanga laioné mo e fanga pulú ha ngaahi kahoa. 30 Pea ko e saliote taki taha naʻe ʻi ai hono veʻeteka kopa ʻe fā mo hono ngaahi ʻakisela kopa, pea ko hono ngaahi konga ʻe fā ʻi he tulikí naʻá ne pukepuke kinautolu. Naʻe ʻi he lalo pēsoní ʻa hono ngaahi meʻa-puke, naʻe haka fakataha mo hano ngaahi kahoa ʻi he tafaʻaki taki taha. 31 Ko e ngutuʻi pēsoní naʻe ʻi loto ia ʻi hono tapá, ʻa ia naʻe kiupite ʻe taha ki ʻolunga; pea ko hono ngutú naʻe fuopotopoto, pea ʻi hono fakatahaʻi ia mo e ngaahi meʻa-puké naʻe feʻunga ai mo e kiupite ʻe taha mo e konga ʻa e māʻolunga ʻo e tuʻuʻangá, pea ko e ngutu ʻo e salioté naʻe ʻi ai ha ngaahi tā-tongitongi. Pea ko honau ngaahi pāneli he tafaʻakí naʻe tapafā, ʻo ʻikai fuopotopoto. 32 Ko e veʻeteka ʻe faá naʻe ʻi lalo ia ʻi he ngaahi pāneli he tafaʻakí, pea ko e ngaahi meʻa-puke ʻo e ngaahi veʻeteká naʻe fakamaʻu ia ki he salioté, pea ko e māʻolunga ʻo e veʻeteka taki taha naʻe kiupite ʻe taha mo e konga. 33 Pea ko e ngaahi veʻeteká naʻe ngaohi ia ʻo hangē ko e veʻeteka ʻo e salioté. Ko honau ngaahi meʻa-puké, haeané, kahokí, pea mo e ngaahi pumú ko e ngaahi mētale haka kotoa. 34 Naʻe ʻi ai ʻa e ngaahi meʻa-puke ʻe fā ʻi he tuliki ʻe fā ʻo e saliote taki taha; ko hono ngaahi meʻa-puké naʻe haka ia ko ha konga ʻo e* salioté. 35 ʻI he konga ki ʻolunga ʻo e salioté naʻe ʻi ai ha tapa fuopotopoto naʻe vaeuaʻi kiupite hono māʻolungá, pea ʻi he konga ki ʻolunga ʻo e salioté, ko hono ngaahi ʻesiá mo hono ngaahi pāneli he tafaʻakí naʻe haka ia ko ha konga ʻo* ia. 36 ʻI hono ngaahi ʻesiá mo hono ngaahi pāneli he tafaʻakí naʻá ne tongi ai ʻa e ngaahi selupimi, mo e fanga laione, pea mo e ngaahi fuʻu paame ʻo fakatatau ki he lahi ʻo e ʻatā naʻe ʻi aí, pea takatakai+ ai ha ngaahi kahoa. 37 Ko e founga eni ʻo ʻene ngaohi ʻa e saliote+ ʻe hongofulú. Naʻe haka tatau+ kotoa kinautolu, pea tatau pē honau fuá mo honau fuó.

38 Naʻá ne ngaohi ʻa e pēsoni kopa+ ʻe hongofulu; ko e pēsoni taki taha naʻe lava ke hao ai ʻa e vai ko hono fuá ko e pate ʻe 40. Ko e pēsoni taki taha naʻe kiupite ʻe fā hono fuá.* Naʻe ʻi ai ʻa e pēsoni ʻe taha ki he saliote taki taha ʻe hongofulú. 39 Naʻá ne tuku leva ʻa e saliote ʻe nima ʻi he tafaʻaki toʻomataʻu ʻo e falé pea ko e nima ʻi he tafaʻaki toʻohema ʻo e falé, peá ne fokotuʻu ʻa e fuʻu ʻaiʻanga vaí ʻi he tafaʻaki toʻomataʻu ʻo e falé, ki he tonga-hahaké.+

40 Naʻe ngaohi foki ʻe Hailame+ ʻa e ngaahi pēsoni, ko e ngaahi sāvolo,+ pea mo e ngaahi poulu.+

Ko ia naʻe ʻosi ai ʻa e ngāue kotoa naʻe fai ʻe Hailame maʻa Tuʻi Solomone ʻi he fale ʻo Sihová:+ 41 Ko e ongo fuʻu poú+ pea mo e ongo ʻuluʻi-pou fuo hangē ha poulú ʻa ia naʻe ʻi he ongo fuʻu poú; ko e ongo meʻa vangavanga+ ke teuteuʻaki ʻa e ongo ʻuluʻi-pou fuo hangē ha poulú ʻa ia naʻe ʻi he ongo fuʻu poú; 42 ko e foʻi pomikānite+ ʻe 400 ki he ongo meʻa vangavangá, ko e ongo ʻotu pomikānite ki he meʻa vangavanga taki taha, ke teuteuʻaki ʻa e ongo ʻuluʻi-pou fuo hangē ha poulú ʻa ia naʻe ʻi he ongo fuʻu poú; 43 ko e saliote+ ʻe hongofulú pea mo e pēsoni+ ʻe hongofulu naʻe ʻi he ngaahi salioté; 44 ko e fuʻu ʻaiʻanga vaí+ pea mo e pulu ʻe 12 naʻe ʻi lalo ʻi he fuʻu ʻaiʻanga vaí; 45 pea mo e ngaahi kané, ko e ngaahi sāvoló, ko e ngaahi poulú, pea mo e ngaahi naunaú kotoa, ʻa ia naʻe ngaohi ʻe Hailame mei he kopa kuo fakangingila maʻa Tuʻi Solomone ki he fale ʻo Sihová. 46 Naʻe haka kinautolu ʻe he tuʻí ʻi ha ngaahi meʻa fakafuo ʻumea ʻi he vahefonua ʻo Sioataní, ʻi he vahaʻa ʻo Sūkote mo Saletaní.

47 Naʻe tuku ʻe Solomone ʻo ʻikai fua ʻa e ngaahi naunaú kotoa koeʻuhí he naʻe lahi ʻaupito ia. Ko e mamafa ʻo e kopá naʻe ʻikai ke fakapapauʻi.+ 48 Naʻe ngaohi ʻe Solomone ʻa e ngaahi naunau kotoa ki he fale ʻo Sihová: Ko e ʻōlita+ koulá; ko e tēpile koula+ ke tuku ai ʻa e mā foakí; 49 ko e ngaahi tuʻunga-maama+ koula haohaoá, ko e nima ʻi he toʻomataʻú pea ko e nima ʻi he toʻohemá ʻi muʻa ʻi he loki taupotu taha ki lotó; pea mo e ngaahi lauʻimatalá,+ ko e ngaahi māmá, pea mo e ngaahi tongí, naʻe koula;+ 50 ko e ngaahi pēsoní, ngaahi helekosí,+ ngaahi poulú, ngaahi ipú,+ pea mo e ngaahi ʻaiʻanga malalá,+ naʻe koula haohaoa; pea mo e ngaahi hīnisi ki he ngaahi matapā ʻo e fale ʻi lotó,+ ʻa ia ko e Potu Fungani Toputapú, pea ki he ngaahi matapā ʻo e fale ʻo e temipalé,+ ʻa ia naʻe koula.

51 Ko ia naʻe kakato ai ʻa e ngāue kotoa naʻe pau ke fai ʻe Tuʻi Solomone ki he fale ʻo Sihová. Naʻe fakahū mai leva ʻe Solomone ʻa e ngaahi meʻa naʻe fakatoputapuʻi+ ʻe heʻene tamai ko Tēvitá, peá ne tuku ʻa e silivá, ko e koulá, pea mo e ngaahi koloá ki he ngaahi tukuʻanga koloa ʻi he fale ʻo Sihová.+