ʻIsikeli

20 Pea ʻi he taʻu hono fitú, ʻi he māhina hono nimá, ʻi he ʻaho hono hongofulu ʻo e māhiná, naʻe haʻu ai ha niʻihi ʻo e kau mātuʻa ʻo ʻIsilelí ʻo tangutu hifo ʻi hoku ʻaó ke kumi faleʻi meia Sihova. 2 Naʻe hoko mai leva ʻa e folofola ʻa Sihová kiate au, ʻo pehē: 3 “Foha ʻo e tangata, lea ki he kau mātuʻa ʻo ʻIsilelí, ʻo pehē kiate kinautolu, ‘Ko e meʻa eni ʻoku folofolaʻaki ʻe he ʻEiki Hau ko Sihová: “Ko hoʻomou haʻú ke kumi faleʻi kiate au? ‘ʻOku ou fuakava ʻiate au,* ʻe ʻikai te u fai ha tali ki hoʻomou kumi faleʻí,’+ ko e fakahaaʻi ia ʻe he ʻEiki Hau ko Sihová.”’

4 “ʻOkú ke mateuteu ke fakamāuʻi kinautolu?* ʻOkú ke mateuteu ke fakamāuʻi kinautolu, foha ʻo e tangata? ʻAi ke nau ʻiloʻi ʻa e ngaahi meʻa fakalielia naʻe fai ʻe heʻenau fanga kuí.+ 5 Tala kiate kinautolu, ‘Ko e meʻa eni ʻoku folofolaʻaki ʻe he ʻEiki Hau ko Sihová: “ʻI he ʻaho naʻá ku fili ai ʻa ʻIsilelí,+ naʻá ku toe fai ha fuakava mo e* hako ʻo e fale ʻo Sēkopé, pea naʻá ku ʻai ke nau ʻiloʻi au ʻi he fonua ko ʻIsipité.+ ʻIo, naʻá ku fuakava kiate kinautolu ʻo pehē, ‘Ko au Sihova ko homou ʻOtuá.’ 6 ʻI he ʻaho ko iá naʻá ku fuakava ai te u ʻomai kinautolu mei he fonua ko ʻIsipité ki ha fonua kuó u kumi* maʻanautolu, ko e fonua ʻoku mahutafea ʻi he huʻakau mo e hone.+ Ko e fakaʻofoʻofa taha ia ʻi he* kotoa ʻo e ngaahi fonuá. 7 Naʻá ku pehē leva kiate kinautolu, ‘Ko kimoutolu taki taha kuo pau ke mou laku ʻa e ngaahi meʻa fakalielia ʻoku ʻi homou ʻaó; ʻoua ʻe ʻuliʻi kimoutolu ʻaki ʻa e ngaahi ʻaitoli fakalielia* ʻo ʻIsipité.+ Ko au Sihova ko homou ʻOtuá.’+

8 “‘“Ka naʻa nau angatuʻu kiate au pea naʻe ʻikai te nau loto-lelei ke fanongo kiate au. Naʻe ʻikai te nau laku ʻa e ngaahi meʻa fakalielia naʻe ʻi honau ʻaó, pea naʻe ʻikai te nau liʻaki ʻa e ngaahi ʻaitoli fakalielia ʻo ʻIsipité.+ Ko ia naʻá ku palōmesi ai ke huaʻi atu ʻa ʻeku ʻitá kiate kinautolu pea tuku ange kakato atu ʻa ʻeku tuputāmakí kiate kinautolu ʻi he fonua ko ʻIsipité. 9 Ka naʻá ku fai ha ngāue koeʻuhi ko hoku hingoá ke ʻoua naʻa taʻefakaʻapaʻapaʻi ia ʻi he ʻao ʻo e ngaahi puleʻanga ʻa ia naʻa nau nofo aí.+ He naʻá ku ʻai ke nau* ʻiloʻi au ʻi he ʻao ʻo e ngaahi puleʻanga ko ení ʻi heʻeku ʻomai kinautolu* mei he fonua ko ʻIsipité.+ 10 Ko ia naʻá ku ʻomai kinautolu mei he fonua ko ʻIsipité pea taki atu kinautolu ki he toafá.+

11 “‘“Naʻá ku ʻoange leva kiate kinautolu ʻa ʻeku ngaahi tuʻutuʻuní pea ʻai ke nau ʻiloʻi ʻa ʻeku ngaahi tuʻutuʻuni fakaefakamāú,+ koeʻuhi ko e tangata ʻa ia ʻe muimui ki aí te ne maʻu ai ʻa e moʻuí.+ 12 Naʻá ku toe ʻoange ʻa ʻeku ngaahi Sāpaté* kiate kinautolu+ ko ha fakaʻilonga ʻi he vahaʻa ʻoʻoku mo kinautolú,+ koeʻuhí ke nau ʻilo ai, ko au Sihova, ʻa e tokotaha ʻokú ne fakamāʻoniʻoniʻi kinautolú.

13 “‘“Ka naʻe angatuʻu ʻa e fale ʻo ʻIsilelí kiate au ʻi he toafá.+ Naʻe ʻikai te nau ʻaʻeva ʻi heʻeku ngaahi tuʻutuʻuní, pea naʻa nau siʻaki ʻa ʻeku ngaahi tuʻutuʻuni fakaefakamāú, ʻa ia kapau ʻe muimui ai ha tangata, te ne maʻu ai ʻa e moʻuí. Naʻa nau mātuʻaki maumauʻi ʻa ʻeku ngaahi Sāpaté. Ko ia naʻá ku palōmesi ai ke huaʻi atu ʻa ʻeku ʻitá kiate kinautolu ʻi he toafá ke fakaʻauha ʻosi ai kinautolu.+ 14 Naʻá ku fai ha ngāue koeʻuhi ko hoku hingoá ke ʻoua naʻa taʻefakaʻapaʻapaʻi ia ʻi he ʻao ʻo e ngaahi puleʻanga, ʻa ia naʻá ku ʻomai kinautolu* mei honau ʻaó.+ 15 Naʻá ku fuakava foki kiate kinautolu ʻi he toafá ʻe ʻikai te u ʻomai kinautolu ki he fonua naʻá ku foaki kiate kinautolú+—ko ha fonua ʻoku mahutafea ʻi he huʻakau mo e hone,+ ko e fakaʻofoʻofa taha ia ʻi he* kotoa ʻo e ngaahi fonuá— 16 koeʻuhi naʻa nau siʻaki ʻa ʻeku ngaahi tuʻutuʻuni fakaefakamāú, naʻe ʻikai te nau ʻaʻeva ʻi heʻeku ngaahi tuʻutuʻuní, pea naʻa nau maumauʻi ʻa ʻeku ngaahi Sāpaté, he naʻe muimui ʻa honau lotó ʻi heʻenau ngaahi ʻaitoli fakalieliá.+

17 “‘“Ka naʻá ku ongoʻi fakaʻofaʻia* ʻiate kinautolu, pea naʻe ʻikai te u fakaʻauha kinautolu; naʻe ʻikai te u fakaʻauha ʻosi kinautolu ʻi he toafá. 18 Naʻá ku pehē ki honau ngaahi fohá ʻi he toafá,+ ‘ʻOua te mou ʻaʻeva ʻi he ngaahi tuʻutuʻuni ʻa hoʻomou fanga kuí+ pe tauhi ʻenau ngaahi tuʻutuʻuni fakaefakamāú pe ʻuliʻi kimoutolu ʻaki ʻenau ngaahi ʻaitoli fakalieliá. 19 Ko au Sihova ko homou ʻOtuá. Mou ʻaʻeva ʻi heʻeku ngaahi tuʻutuʻuní, pea tauhi ʻa ʻeku ngaahi tuʻutuʻuni fakaefakamāú, pea fakahoko ia.+ 20 Pea fakatoputapuʻi ʻa ʻeku ngaahi Sāpaté,+ pea ʻe hoko ia ko ha fakaʻilonga ʻi he vahaʻa ʻoʻoku mo kimoutolú ke mou ʻilo ai ko au Sihova ko homou ʻOtuá.’+

21 “‘“Ka naʻe kamata ke angatuʻu ʻa e ngaahi fohá kiate au.+ Naʻe ʻikai te nau ʻaʻeva ʻi heʻeku ngaahi tuʻutuʻuní pea naʻe ʻikai te nau tauhi mo fakahoko ʻa ʻeku ngaahi tuʻutuʻuni fakaefakamāú, ʻa ia kapau ʻe muimui ai ha tangata, te ne maʻu ai ʻa e moʻuí. Naʻa nau maumauʻi ʻa ʻeku ngaahi Sāpaté. Ko ia naʻá ku palōmesi ai ke huaʻi atu ʻa ʻeku ʻitá kiate kinautolu pea tuku ange kakato atu ʻa ʻeku tuputāmakí kiate kinautolu ʻi he toafá.+ 22 Ka naʻá ku taʻofi+ ʻa hoku nimá peá u fai ha ngāue koeʻuhi ko hoku hingoá,+ koeʻuhi ke ʻoua naʻa taʻefakaʻapaʻapaʻi ia ʻi he ʻao ʻo e ngaahi puleʻangá, ʻa ia naʻá ku ʻomi kinautolu* mei honau ʻaó. 23 Pehē foki, naʻá ku fuakava kiate kinautolu ʻi he toafá te u fakamovetevete kinautolu ʻi he lotolotonga ʻo e ngaahi puleʻangá pea ʻai ke nau mafola atu ʻi he lotolotonga ʻo e ngaahi fonuá,+ 24 koeʻuhí naʻe ʻikai te nau fakahoko ʻa ʻeku ngaahi tuʻutuʻuni fakaefakamāú pea naʻa nau siʻaki ʻa ʻeku ngaahi tuʻutuʻuní,+ naʻa nau maumauʻi ʻa ʻeku ngaahi Sāpaté, pea nau muimui* ʻi he ngaahi ʻaitoli fakalielia ʻa ʻenau fanga kuí.+ 25 Naʻá ku fakaʻatā foki kinautolu ke nau muimui ʻi he ngaahi tuʻutuʻuni naʻe ʻikai lelei mo e ngaahi tuʻutuʻuni fakaefakamaau ʻa ia naʻe ʻikai lava ke nau maʻu ai ʻa e moʻuí.+ 26 Naʻá ku tuku kinautolu ke nau hoko ʻo ʻuli ʻi heʻenau ngaahi feilaulaú—ʻi heʻenau ʻai ʻa e ʻuluaki foha kotoa pē ke fou atu ʻi he afí*+—koeʻuhí ke ʻai kinautolu ke nau ʻauha, ko ia te nau ʻilo ai ko Sihova au.”’

27 “Ko ia lea ki he fale ʻo ʻIsilelí, ʻe foha ʻo e tangata, pea tala kiate kinautolu, ‘Ko e meʻa eni ʻoku folofolaʻaki ʻe he ʻEiki Hau ko Sihová: “Naʻe peheni foki ʻa hono taʻetokaʻi au ʻe hoʻomou fanga kuí ʻaki ʻenau taʻefaitōnunga kiate aú. 28 Naʻá ku ʻomai kinautolu ki he fonua naʻá ku fuakava ke ʻoange maʻanautolú.+ ʻI heʻenau sio ki he kotoa ʻo e ngaahi foʻi māʻolungá mo e ʻuluʻakau mohu laú,+ naʻe kamata ke nau fai ʻenau ngaahi feilaulaú mo ʻenau ngaahi feilaulau fakatupu ʻitá. Naʻa nau ʻoatu ʻa e ngangatu fakahōifua* ʻo ʻenau ngaahi feilaulaú pea lilingi atu ʻenau ngaahi feilaulau inú ʻi ai. 29 Ko ia naʻá ku ʻeke ange kiate kinautolu, ‘Ko e hā ʻa e taumuʻa ʻo hoʻomou ʻalu ki he potu māʻolunga ko ení? (ʻOku kei ui ia ko e Potu Māʻolunga ʻo aʻu mai ki he ʻahó ni.)’”’+

30 “Ko ia lea ki he fale ʻo ʻIsilelí, ‘Ko e meʻa eni ʻoku folofolaʻaki ʻe he ʻEiki Hau ko Sihová: “ʻOku mou ʻuliʻi koā kimoutolu ʻo hangē ko e meʻa ko ia naʻe fai ʻe hoʻomou fanga kuí ʻi heʻenau muimui ʻi heʻenau ngaahi ʻaitoli fakalieliá ke fai ha feʻauaki fakalaumālie mo kinautolú?+ 31 Pea ʻoku mou kei ʻuliʻi koā kimoutolu ʻo aʻu mai ki he ʻahó ni ʻaki hono ʻoatu ʻo e ngaahi feilaulau ki he kotoa ʻo hoʻomou ngaahi ʻaitoli fakalieliá, ʻi hono ʻai homou ngaahi fohá ke nau fou atu ʻi he afí?*+ ʻOku totonu koā ke u fai ha tali ʻi he taimi tatau ki hoʻomou kumi faleʻí, ʻe fale ʻo ʻIsileli?”’+

“‘ʻOku ou fuakava ʻiate au,’* ko e fakahaaʻi ia ʻe he ʻEiki Hau ko Sihová, ‘ʻE ʻikai te u fai ha tali ki hoʻomou kumi faleʻí.+ 32 Pea ko e meʻa ʻoku mou fakakaukau ki ai* ʻi hoʻomou pehē, “Tuku ke mau hangē ko e ngaahi puleʻangá, hangē ko e ngaahi fāmili ʻi he ngaahi fonua kehé, ʻa ia ʻoku nau lotu ki he* ʻakaú mo e maká,”+ ʻe ʻikai ʻaupito ke hoko ia.’”

33 “‘ʻOku ou fuakava ʻiate au,’* ko e fakahaaʻi ia ʻe he ʻEiki Hau ko Sihová, ‘Te u pule ko e tuʻi kiate kimoutolu ʻaki ha nima mālohi, mo ha nima kuo mafao atu, pea ʻi hono huaʻi atu ʻa ʻeku ʻitá.+ 34 Te u ʻomai kimoutolu mei he ngaahi kakaí pea tānaki fakataha kimoutolu mei he ngaahi fonua ʻa ia kuo fakamovetevete kimoutolu ki ai ʻaki ha nima mālohi, mo ha nima kuo mafao atu, pea ʻi hono huaʻi atu ʻa ʻeku ʻitá.+ 35 Te u ʻomi kimoutolu ki he toafa ʻo e ngaahi kakaí pea te u faifakamaau kiate kimoutolu ʻi ai, mata ki he mata.+

36 “‘Hangē ko ʻeku faifakamaau ki hoʻomou fanga kuí ʻi he toafa ʻo e fonua ko ʻIsipité, ʻe pehē ʻa ʻeku faifakamaau kiate kimoutolú,’ ko e fakahaaʻi ia ʻe he ʻEiki Hau ko Sihová. 37 ‘Te u ʻai kimoutolu ke mou ʻalu atu ʻi he lalo tokotoko ʻo e tauhi-sipí+ pea ʻomi kimoutolu ke mou ʻi he malumalu* ʻo e fuakavá. 38 Ka te u toʻo meiate kimoutolu ʻa e kau angatuʻú mo e faʻahinga ʻoku laka hala kiate aú.+ He te u ʻomi kinautolu mei he fonua naʻa nau nofo muli aí, ka heʻikai te nau hū ki he fonua ʻo ʻIsilelí;+ pea kuo pau ke mou ʻilo ai ko Sihova au.’

39 “Ko e meʻa kiate kimoutolú, ʻe fale ʻo ʻIsileli, ko e meʻa eni ʻoku folofolaʻaki ʻe he ʻEiki Hau ko Sihová: ‘ʻAlu ʻa e tokotaha taki taha ʻo kimoutolu ʻo tauhi ʻa ʻene ngaahi ʻaitoli fakalieliá.+ Ka ʻi he hili iá kapau heʻikai te mou fanongo kiate au, te u siʻaki kimoutolu. Pea ʻe ʻikai leva te mou kei taʻefakaʻapaʻapaʻi ʻa hoku hingoa māʻoniʻoní ʻaki hoʻomou ngaahi feilaulaú mo hoʻomou ngaahi ʻaitoli fakalieliá.’+

40 “‘He ʻi hoku moʻunga tapú, ʻi ha moʻunga māʻolunga ʻo ʻIsileli,’+ ko e fakahaaʻi ia ʻe he ʻEiki Hau ko Sihová, ‘ʻa e feituʻu ʻe tauhi ai au ʻi he fonuá,+ ʻe he fale kotoa ʻo ʻIsilelí, ʻe kinautolu kotoa. Te u leleiʻia ʻiate kinautolu ʻi ai, pea te u fiemaʻu hoʻomou ngaahi meʻaʻofá mo e ʻuluaki fua ʻo hoʻomou ngaahi feilaulaú, ʻa e kotoa ʻo hoʻomou ngaahi meʻa toputapú.+ 41 Koeʻuhi ko e ngangatu fakahōifuá,* te u leleiʻia ai ʻiate kimoutolu ʻi he taimi te u ʻomi ai kimoutolu mei he ngaahi kakaí pea tānaki fakataha kimoutolu mei he ngaahi fonua ʻa ia kuo fakamovetevete kimoutolu ki aí;+ pea ʻe fakamāʻoniʻoniʻi au ʻi homou lotolotongá ʻi he ʻao ʻo e ngaahi puleʻangá.’+

42 “‘Pea kuo pau ke mou ʻilo ko Sihova+ au ʻi he taimi te u ʻomi ai kimoutolu ki he fonua ʻo ʻIsilelí,+ ki he fonua ʻa ia naʻá ku fuakava ke foaki ki hoʻomou fanga kuí. 43 Pea te mou manatu ai ki hoʻomou tōʻongá pea mo e kotoa ʻo hoʻomou ngaahi ngāue ʻa ia naʻa mou ʻuliʻi ai kimoutolú,+ pea te mou fakaliliʻa ʻiate kimoutolu* koeʻuhi ko e ngaahi meʻa kovi kotoa naʻa mou faí.+ 44 Pea kuo pau ke mou ʻilo ko Sihova au ʻi he anga ʻo ʻeku fakafeangai kiate kimoutolu koeʻuhi ko hoku hingoá,+ ʻo ʻikai fakatatau ki hoʻomou tōʻonga fulikivanú pe fakatatau ki hoʻomou ngaahi tōʻonga koví, ʻe fale ʻo ʻIsileli,’ ko e fakahaaʻi ia ʻe he ʻEiki Hau ko Sihová.”

45 Pea naʻe toe hoko mai ʻa e folofola ʻa Sihová kiate au, ʻo pehē: 46 “Foha ʻo e tangata, hanga ho matá ki he feituʻu tongá pea talaki ki he tongá, pea fai ha kikite ki he feituʻu vaotā ʻo e tongá. 47 Lea ki he vaotā ʻo e tongá, ‘Fanongo ki he folofola ʻa Sihová. Ko e meʻa eni ʻoku folofolaʻaki ʻe he ʻEiki Hau ko Sihová: “Ko eni ʻoku ou ʻai ke puho atu ha afi kiate koe,+ pea te ne keina ʻa e ʻakau mata kotoa pea mo e kotoa ʻo e ʻakau mōmoa ʻiate koé. ʻE ʻikai ke tāmateʻi ʻa e ulo ʻo e afí,+ pea ko e mata kotoa pē ʻe māngia ai, mei he tongá ki he tokelaú. 48 Pea ʻe vakai ki ai ʻa e kakano* kotoa ko au, Sihova tonu, kuó u tutuʻaki ia ʻa e afí, ko ia ʻe ʻikai lava ke tāmateʻi.”’”+

49 Pea naʻá ku pehē: “ʻOiauē, ʻe ʻEiki Hau Sihova! ʻOku nau pehē ʻo fekauʻaki mo au, ‘ʻIkai ko ʻene leaʻaki pē ha ngaahi tupuʻa?’”*