Ua Kalonikali

14 Pea naʻe toka ʻa ʻĀpaia ʻo mālōlō fakataha mo ʻene fanga kuí, pea naʻa nau tanu ia ʻi he Kolo-ʻo-Tēvitá;+ pea naʻe hoko ʻa hono foha ko ʻAsá ko e tuʻi ʻo fetongi ia. ʻI hono ngaahi ʻahó naʻe nonga ai ʻa e fonuá ʻi he taʻu ʻe hongofulu.

2 Naʻe fai ʻe ʻAsa ʻa e meʻa naʻe lelei mo totonu ʻi he vakai ʻa Sihova ko hono ʻOtuá. 3 Naʻá ne toʻo ʻa e ngaahi ʻōlita mulí+ mo e ngaahi potu māʻolungá, peá ne haveki ʻa e ngaahi pou maka toputapú,+ pea tā hifo ʻa e ngaahi pou ʻakau toputapú.*+ 4 ʻIkai ko ia pē, naʻá ne tala ki Siuta ke nau kumi kia Sihova ko e ʻOtua ʻo ʻenau fanga kuí pea ke nau tauhi ʻa e Laó mo e fekaú. 5 Ko ia naʻá ne toʻo mei he kolo kotoa ʻo Siutá ʻa e ngaahi potu māʻolungá mo e ngaahi tuʻuʻanga ʻinisēnisí,+ pea naʻe hokohoko atu ʻa e Puleʻangá ʻi hono malumalú, ʻo ʻikai fakahohaʻasi. 6 Naʻá ne langa ʻa e ngaahi kolo fakakolotau ʻi Siuta,+ koeʻuhí naʻe ʻikai ke fakahohaʻasi ʻa e fonuá pea naʻe ʻikai ke fai ha tau mo ia lolotonga ʻa e ngaahi taʻu ko ení, he naʻe ʻoange ʻe Sihova kiate ia ʻa e mālōlō.+ 7 Naʻá ne pehē ki Siuta: “Tau langa ʻa e ngaahi koló ni pea takatakaiʻi ia ʻaki ʻa e ngaahi ʻā mo e ngaahi taua,+ ngaahi matapā* mo e ngaahi meʻa fakamaʻu. He ko e fonuá ʻoku kei ʻiate kitautolu ia, koeʻuhí kuo tau kumi kia Sihova ko hotau ʻOtuá. Kuo tau kumi, pea kuó ne foaki mai kiate kitautolu ha mālōlō mei hotau ngaahi fili takatakaí kotoa.” Ko ia naʻe lavameʻa ai ʻenau langá.+

8 Naʻe maʻu ʻe ʻAsa ha kau tau ʻa ia ko e kau tangata ʻe toko 300,000 mei Siuta, naʻa nau toʻo ʻa e ngaahi fuʻu pā mo e ngaahi tao. Pea naʻe haʻu mei Penisimani ʻa e kau tangata toʻa ʻi he taú ʻe toko 280,000 naʻa nau toʻo ʻa e fanga kiʻi pā* mo e ngaahi kaufana.*+

9 Ki mui ai, naʻe haʻu ʻa Sala ko e tangata ʻItiopeá ke tauʻi kinautolu mo ha kau tau ko e kau tangata ʻe toko 1,000,000 mo e saliote ʻe 300.+ ʻI heʻene aʻu ki Mālesá,+ 10 naʻe ʻalu atu ʻa ʻAsa ke tauʻi ia pea naʻa nau fakatē tau ʻi he Teleʻa Sifatá ʻi Mālesa. 11 Pea naʻe ui ʻa ʻAsa kia Sihova ko hono ʻOtuá+ ʻo ne pehē: “ʻE Sihova, ʻoku ʻikai ko ha meʻa lahi ia kiate koe pe ʻoku tokolahi pe ʻikai ha mālohi+ ʻo e faʻahinga ʻokú ke tokoniʻí. Tokoniʻi kimautolu, ʻe Sihova ko homau ʻOtua, he ʻoku mau falala atu kiate koe,+ pea ko ho huafá kuo mau haʻu ai ki he fuʻu kakaí ni.+ ʻE Sihova, ko koe ʻa homau ʻOtuá. ʻOua naʻa tuku ʻa e tangata ko e meʻa noa peé ke ne ikunaʻi koe.”+

12 Ko ia naʻe ikunaʻi ai ʻe Sihova ʻa e kau ʻItiopeá ʻi he ʻao ʻo ʻAsá pea ʻi he ʻao ʻo Siutá, pea naʻe hola ʻa e kau ʻItiopeá.+ 13 Ko ʻAsa mo e kakai naʻe ʻiate iá naʻa nau tulimui atu kiate kinautolu ʻo aʻu ki Kilai,+ pea naʻe hokohoko atu ʻa e tō ʻa e kau ʻItiopeá ʻo ʻikai ke moʻui hanau toko taha, he naʻe laiki kinautolu ʻe Sihova pea mo ʻene kau taú. ʻI he hili iá, naʻa nau ʻave ha fuʻu koloa vete* lahi ʻaupito. 14 ʻIkai ko ia pē, naʻa nau taaʻi ʻa e ngaahi kolo takatakai kotoa ʻi Kilaí, he naʻe tofuhia ʻa e ngaahi kolo ko iá ʻi he manavahē lahi kia Sihová; pea naʻa nau fai ha faʻao fakamālohi ʻi he kotoa ʻo e ngaahi koló, he naʻe lahi ʻaupito ʻa e koloa ai ke faʻaó. 15 Naʻa nau ʻohofi foki ʻa e ngaahi tēniti ʻo e faʻahinga naʻe ʻi ai ʻenau fanga monumanú, ʻo nau faʻao ha fanga sipi tokolahi mo e fanga kāmeli, pea ʻi he hili iá, naʻa nau foki ki Selusalema.