Ki he Kau Kalētia

2 ʻIkai ngata aí, naʻe ʻai kimoutolu ʻe he ʻOtuá ke mou moʻui, neongo naʻa mou mate ʻi hoʻomou ngaahi faihalá mo e ngaahi angahalá,+ 2 ʻa ia naʻa mou ʻaʻeva ai ʻi he taimi ʻe taha ʻo fakatatau ki he fokotuʻutuʻu ko eni* ʻo e māmaní,+ ʻo fakatatau ki he tokotaha pule ʻo e mafai ʻoku ʻi he ʻeá,+ ʻa e laumālie+ ko ia ʻoku ngāue he taimí ni ʻi he ngaahi foha ʻo e talangataʻá. 3 ʻIo, ʻi honau lotolotongá naʻa tau tōʻongafai ai ʻa kitautolu kotoa ʻi he taimi ʻe taha ʻo fehoanaki mo e ngaahi holi ʻa hotau kakanó,+ ʻo fakahoko ʻa e fiemaʻu ʻa e kakanó mo ʻetau ngaahi fakakaukaú,+ pea naʻa tau hoko fakanatula ai ko e fānau ʻo e houhau+ ʻo hangē tofu pē ko e toengá. 4 Ka ko e ʻOtuá, ʻi heʻene mohu ʻi he mēsí,+ koeʻuhi ko ʻene ʻofa lahi ʻa ia naʻá ne ʻofa ʻaki kiate kitautolú,+ 5 naʻá ne ʻai kitautolu ke tau moʻui fakataha mo e Kalaisí, neongo naʻa tau mate ʻi heʻetau ngaahi faihalá+—ʻi he ʻofa maʻataʻataá kuo fakahaofi ai kimoutolu. 6 ʻIkai ko ia pē, naʻá ne fokotuʻu fakataha hake kitautolu ʻo ʻai ke tau nofo fakataha ʻi he ngaahi potu fakahēvaní ʻi he fāʻūtaha mo Kalaisi Sīsuú,+ 7 koeʻuhí ke ne fakahāhā ai ʻi he fokotuʻutuʻu ka hoko maí* ʻa e hulu fau ʻo ʻene ʻofa maʻataʻataá ʻi heʻene ʻaloʻofa* kiate kitautolu ʻi heʻetau fāʻūtaha mo Kalaisi Sīsuú.

8 ʻI he ʻofa maʻataʻatā ko ení kuo fakahaofi ai kimoutolu fakafou ʻi he tuí,+ pea ʻoku ʻikai ke hoko ʻa e meʻá ni ʻi haʻamou ngāue; ʻi hono kehé, ko e meʻaʻofa ia ʻa e ʻOtuá. 9 ʻOku ʻikai ʻaupito ke hoko ia tupu mei ha ngaahi ngāue,+ koeʻuhi ke ʻoua naʻa maʻu ai ʻe ha taha ha ngaahi ʻuhinga ke ne pōlepole ai. 10 Ko kitautolú ko e ngāue ʻa e toʻukupu ʻo e ʻOtuá* pea naʻe fakatupu+ kitautolu ʻi he fāʻūtaha mo Kalaisi Sīsuú+ ki he ngaahi ngāue lelei, ʻa ia naʻe tomuʻa fakapapauʻi ʻe he ʻOtuá kiate kitautolu ke tau ʻaʻeva ai.

11 Ko ia ai, manatuʻi naʻe ʻi ai ʻa e taimi, ko kimoutolu kakai ʻo e ngaahi puleʻangá ʻi he tukufakaholo fakaekakanó, naʻe ui ko e “taʻekamu” ʻe he faʻahinga naʻe ui ko e “kamu,” ʻa ia ʻoku fai ʻi he kakanó ʻe he nima ʻo e tangatá. 12 ʻI he taimi ko iá naʻe ʻikai te mou ʻilo ʻa Kalaisi, naʻa mou mavahe mei he puleʻanga ʻo ʻIsilelí, ko e kau sola ki he ngaahi fuakava ʻo e talaʻofá;+ naʻe ʻikai haʻamou ʻamanaki pea naʻe ʻikai te mou ʻilo ʻa e ʻOtuá ʻi he māmaní.+ 13 Ka ʻi he taimí ni ʻi he fāʻūtaha ko ia mo Kalaisi Sīsuú, ko kimoutolu ʻa ia naʻa mou mamaʻo ʻaupito ki muʻa mei he ʻOtuá, kuo mou hoko ʻo ofi ko e meʻa ʻi he taʻataʻa ʻo e Kalaisí. 14 He ko ia ʻa hotau melinoʻangá,+ ʻa e tokotaha naʻá ne ʻai ʻa e ongo kulupu ʻe uá ʻo tahá+ pea ko ia naʻá ne fakaʻauha ʻa e ʻā ʻi he vahaʻá ʻa ia naʻá ne ʻā-vahevaheʻi kinauá.+ 15 Fakafou ʻi hono feilaulauʻi ʻa hono sinó, naʻá ne fakataʻeʻaongaʻi ai ʻa e ngaahi lao mo e ngaahi fekau naʻe ʻi he Lao ʻa Mōsesé, ko e meʻa eni naʻá ne fakatupunga ʻa e fetāufehiʻaʻaki ʻi he vahaʻa ʻo e ongo kulupú. Hili ia ʻene ngaohi meiate kinautolu ha kulupu foʻou. Ko e moʻoni ko e ongo kulupú fakatouʻosi ko ʻene kau ākonga,+ pea naʻe fai ʻe Kalaisi ha fakamelino ʻi hona vahaʻá, 16 pea ke ne fai ai ha fakalelei kakato ʻo e ongo kakaí fakatouʻosi ʻi he sino pē taha ki he ʻOtuá fakafou ʻi he ʻakau fakamamahí,*+ koeʻuhi naʻá ne tāmateʻi ʻa e fetāufehiʻaʻakí+ fakafou ʻiate ia tonu. 17 Pea naʻá ne haʻu ʻo talaki ʻa e ongoongo lelei ʻo e melinó kiate kimoutolu ʻa ia naʻa mou mamaʻó, mo e melino ki he faʻahinga ʻoku ofí, 18 koeʻuhi fakafou ʻiate ia, ko kitautolu ʻa e ongo kakaí fakatouʻosi, ʻoku tau fakaofiofi tauʻatāina atu ai ki he Tamaí ʻi he laumālie pē taha.

19 Ko ia ʻoku ʻikai te mou kei hoko ko ha kau sola mo ha kau muli,+ ka ko kimoutolú ko e kaungā-tangataʻifonua+ ʻo e kakai tapú pea ko e kau mēmipa ʻo e fāmili ʻo e ʻOtuá,+ 20 pea kuo langa hake kimoutolu ʻi he funga makatuʻunga ko e kau ʻapositoló mo e kau palōfitá,+ lolotonga ia ko Kalaisi Sīsū tonu ʻa e maka-tuliki ʻo e makatuʻungá.+ 21 ʻI he fāʻūtaha mo iá, ʻoku hoko ai ʻa e falé fakakātoa, ʻi heʻene fehokotaki lelei fakatahá,+ ʻo ʻalu hake ʻo hoko ko ha temipale māʻoniʻoni moʻo Sihova.*+ 22 ʻI he fāʻūtaha mo iá, ʻoku toe langa hake ai foki mo kimoutolu ʻo mou hoko ko ha feituʻu maʻá e ʻOtuá ke ne ʻafio ai ʻi he laumālie.+