Lute

3 Pea pehē ange kiate ia ʻe Nāomi ko ʻene faʻē-ʻi-he-fonó: “ʻA ʻeku taʻahine, ʻikai ʻoku totonu ke u kumi ha ʻapi* moʻou,+ koeʻuhí ke ke lakalakaimonū ai? 2 ʻIkai ko Pōasí ko hota kāinga?+ Ko ia ʻa e tokotaha naʻe ʻaʻana ʻa e kau finemui naʻá ke ngāue mo iá. Te ne ʻauʻau paʻale ʻapō ʻi he ʻauʻauʻangá. 3 Ko ia ai, kaukau pea milimili ʻaki ha lolo namu-kakala; peá ke ʻai vala* pea ʻalu hifo ki he ʻauʻauʻangá. ʻOua naʻá ke ʻai ke ʻilo ʻe he tangatá ʻa hoʻo ʻi aí kae ʻoua kuo ʻosi ʻene kaí mo ʻene inú. 4 ʻI heʻene tokoto hifó, siofi ʻa e feituʻu te ne tokoto aí; ʻalu atu leva ʻo huke ʻa e ʻufiʻufi ʻi hono vaʻé peá ke tokoto hifo. Pea te ne tala atu kiate koe ʻa e meʻa ke ke faí.”

5 Naʻá ne tali ange leva: “Te u fai ʻa e meʻa kotoa ʻokú ke lea mai ʻakí.” 6 Ko ia naʻá ne ʻalu hifo ki he ʻauʻauʻangá peá ne fai ʻa e meʻa kotoa naʻe fakahinohino ange ʻe heʻene faʻē-ʻi-he-fonó ke ne faí. 7 Lolotonga ení, naʻe kai mo inu ʻa Pōasi pea naʻe fiefia hono lotó. Naʻá ne ʻalu leva ke mohe ʻi he ngataʻanga ʻo e fokotuʻunga paʻalé. ʻI he hili iá, naʻe moulu atu ʻa Lute ʻo huke ʻa e ʻufiʻufi ʻi hono vaʻé peá ne tokoto hifo. 8 ʻI he tuʻapoó naʻe kamata ke tete ʻa e tangatá, pea naʻá ne tangutu hake ʻo ne sio ki ha fefine ʻoku tokoto ʻi hono veʻe vaʻé. 9 Naʻá ne pehē ange: “Ko hai koe?” Naʻá ne tali atu: “Ko Lute au ko hoʻo sevānití. Folahi mai ho kofú* ki hoʻo sevānití, he ko ha tokotaha totongi huhuʻi+ koe.” 10 ʻI he meʻa ko iá naʻá ne pehē ange: “ʻOfa ke faitāpuekina koe ʻe Sihova, ʻa hoku ʻofefine. Kuó ke fakahāhā hoʻo ʻofa mateaki ki mui ní ʻo lahi ange ia ʻi he ʻuluaki taimí,+ ʻi he ʻikai te ke kumi ʻa e kau talavoú, tatau ai pē pe ko e masiva pe koloaʻia. 11 Pea ko eni, ʻe hoku ʻofefine, ʻoua ʻe manavahē. Te u fai maʻau ʻa e meʻa kotoa pē ʻokú ke leaʻakí,+ he ʻoku ʻilo ʻe he tokotaha kotoa ʻi he koló* ko e fefine lelei ʻaupito koe. 12 Neongo ʻoku moʻoni ko aú ko ha tokotaha totongi huhuʻi,+ ʻoku ʻi ai ha tokotaha totongi huhuʻi ko ha kāinga ofi ange ia ʻiate au.+ 13 Nofo ʻi heni he poó ni, pea kapau te ne fakatau koe ʻi he pongipongí, ʻoku lelei! Tuku ke ne fakatau koe.+ Ka ʻo kapau ʻe ʻikai te ne fie fakatau koe, ʻoku ou fuakava ʻia Sihova ko e ʻOtua moʻuí, te u fakatau leva ʻe au koe. Tokoto hifo heni kae ʻoua kuo ʻaho.”

14 Ko ia naʻá ne tokoto hifo ʻi he veʻe vaʻe ʻo Pōasí kae ʻoua kuo ʻaho peá ne toki tuʻu hake ki muʻa ke maama feʻunga ke ʻiloʻi ai ha taha. Naʻá ne pehē ange leva: “ʻOua naʻa ʻai ke ʻilo naʻe haʻu ha fefine ki he ʻauʻauʻangá.” 15 Naʻá ne toe pehē ange: “ʻOmai ʻa e pulupulu ʻoku ʻiate koé, pea folahi mai ia.” Ko ia naʻá ne folahi atu ia, pea naʻá ne tuku ki ai ʻa e fua* paʻale ʻe ono peá ne hili atu ia kiate ia, pea ʻi he hili iá naʻe hū atu ʻa Pōasi ki he koló.

16 Naʻe ʻalu atu leva ʻa e fefiné ki heʻene faʻē-ʻi-he-fonó, pea naʻá ne pehē mai: “Naʻe fēfē,* ʻa ʻeku taʻahine?” Naʻá ne tala ange leva kiate ia ʻa e meʻa kotoa pē naʻe fai kiate ia ʻe he tangatá. 17 Naʻá ne toe pehē: “Naʻá ne ʻomai ʻa e fua paʻale ʻe ono ko ení peá ne tala mai kiate au, ‘ʻOua naʻá ke foki mola pē ki hoʻo faʻē-ʻi-he-fonó.’” 18 Ko ia naʻá ne pehē ange: “Nofo heni ʻa ʻeku taʻahine, kae ʻoua ke ke ʻilo pe ʻe iku ki he hā ʻa e meʻá ni, he ko e tangatá ʻe ʻikai manonga kae ʻoua ke ne fakaleleiʻi ʻa e meʻá ni he ʻahó ni.”