Ua Kalonikali

1 Naʻe fakaʻaʻau ai pē ke mālohi ange ʻa e tuʻunga-tuʻi ʻo Solomone ko e foha ʻo Tēvitá, pea naʻe ʻiate ia ʻa Sihova ko hono ʻOtuá peá ne ʻai ia ke ne mātuʻaki lahi.+

2 Naʻe fai ʻe Solomone ha fekau ke ui mai ʻa ʻIsileli kotoa, ʻa e ngaahi ʻeiki ʻo e ngaahi toko afé mo e ngaahi toko teaú, ko e kau fakamāú, pea mo e kotoa ʻo e ngaahi ʻeiki ʻo ʻIsilelí kotoa, ʻa e ngaahi ʻulumotuʻa ʻo e ngaahi fale ʻo ʻenau ngaahi tamaí. 3 Pea naʻe ʻalu ʻa Solomone mo e kotoa ʻo e fakatahaʻangá ki he potu māʻolungá ki Kipione,+ he ko e feituʻu ia naʻe ʻi ai ʻa e tēniti feʻiloakiʻanga ʻa e ʻOtua moʻoní, ʻa e tēniti naʻe ngaohi ʻe Mōsese ko e sevāniti ʻa Sihová ʻi he toafá. 4 Kae kehe, naʻe ʻosi ʻohake ʻe Tēvita ʻa e ʻAʻake ʻa e ʻOtua moʻoní mei Kiliate-sialimi+ ki he feituʻu naʻe teuteu ki ai ʻe Tēvitá; naʻá ne fokotuʻu ha tēniti ki ai ʻi Selusalema.+ 5 Pea ko e ʻōlita kopa+ naʻe ngaohi ʻe Pesalili+ ko e foha ʻo ʻUli ko e foha ʻo Huá naʻe tuku ia ʻi he ʻao ʻo e tāpanekale ʻo Sihová; pea ko Solomone mo e fakatahaʻangá naʻa nau faʻa fai ha lotu ʻi he ʻao ʻo iá.* 6 Naʻe fai leva ai ʻe Solomone ha ngaahi feilaulau ʻi he ʻao ʻo Sihová, pea naʻá ne ʻohake ha feilaulau tutu ʻe 1,000 ʻi he ʻōlita kopa+ ʻo e tēniti feʻiloakiʻangá.

7 ʻI he pō ko iá naʻe hā ai ʻa e ʻOtuá kia Solomone ʻo ne folofola kiate ia: “Kole mai ʻa e meʻa ʻokú ke loto ke u foaki atu kiate koé.”+ 8 ʻI he meá ni naʻe pehē ange ʻe Solomone ki he ʻOtuá: “Kuó ke fakahaaʻi ʻa e ʻofa mateaki lahi ki heʻeku tamai ko Tēvitá,+ pea kuó ke fakanofo au ke u hoko ko e tuʻi ʻo fetongi ia.+ 9 Pea ko eni ʻe Sihova ko e ʻOtuá, tuku ke hoko ʻo falalaʻanga+ ʻa hoʻo talaʻofa naʻe fai kia Tēvita ko ʻeku tamaí, he kuó ke fakanofo au ke u hoko ko e tuʻi ki ha kakai ʻoku hangē honau tokolahí ko e efu ʻo e māmaní.+ 10 Ko ia ke ke foaki mai ha poto mo ha ʻilo+ ke tataki ʻaki ʻa e kakaí ni,* he ko hai ia ʻe lava ke ne fakamāuʻi ʻa e fuʻu kakai tokolahi ko eni ʻaʻaú?”+

11 Pea naʻe folofola ange ʻa e ʻOtuá kia Solomone: “Koeʻuhí ko e holi eni ʻo ho lotó pea kuo ʻikai te ke kole ha koloa, tuʻumālie, mo e lāngilangi pe ke mate ʻa e faʻahinga ʻoku fehiʻa kiate koé, pea kuo ʻikai te ke kole ha moʻui fuoloa,* ka kuó ke kole ha poto mo ha ʻilo ke fakamāuʻi ʻaki ʻa hoku kakai naʻá ku fakanofo koe ke ke tuʻi ki aí,+ 12 ko e potó mo e ʻiló ʻe foaki atu ia kiate koe; ka te u toe foaki atu foki kiate koe ʻa e koloa mo e tuʻumālie mo e lāngilangi ʻa ia naʻe ʻikai maʻu ʻe he ngaahi tuʻi ʻi muʻa ʻiate koé pea ʻe ʻikai maʻu ʻe ha taha ʻi he hili koé.”+

13 Ko ia naʻe haʻu ʻa Solomone mei he potu māʻolunga ʻi Kipioné,+ mei he mata tēniti feʻiloakiʻangá, ki Selusalema; pea naʻá ne pule ki ʻIsileli. 14 Naʻe tānaki ai pē ʻe Solomone ha ngaahi saliote mo ha fanga hoosi;* naʻá ne maʻu ʻa e saliote ʻe 1,400 mo e fanga hoosi* ʻe 12,000,+ pea naʻá ne tauhi ia ʻi he ngaahi kolo tukuʻanga salioté+ ʻo ofi ki he tuʻí ʻi Selusalema.+ 15 Naʻe ngaohi ʻe he tuʻí ʻa e silivá mo e koulá ʻi Selusalema ʻo hangē hono lahí ko e maká,+ pea mo e papa sitá ʻo hangē hono lahí ko e ʻulu sukamino ʻi he Sefelaʻá.*+ 16 Ko e fanga hoosi ʻa Solomoné naʻe ʻomai ia mei ʻIsipite,+ pea ko e kulupu ʻo e kau mēsianiti ʻa e tuʻí naʻa nau faʻa maʻu mai ʻa e ngaahi tākanga hoosi* ki he totongi pē ʻe taha.+ 17 Ko e saliote taki taha naʻe ʻomi mei ʻIsipité ko hono totongí ko e konga siliva ʻe 600, pea ko e totongi ʻo ha hoosi ko e konga siliva ʻe 150; pea naʻa nau ʻave leva ia ki he ngaahi tuʻi kotoa ʻo e kau Hetí mo e ngaahi tuʻi ʻo Sīliá.