ʻIsikeli

3 Pea naʻá ne folofola mai kiate au: “Foha ʻo e tangata, kai ʻa e meʻa ʻoku tuku atu ʻi ho ʻaó.* Kai ʻa e takainga tohí ni, peá ke ʻalu ʻo lea ki he fale ʻo ʻIsilelí.”+

2 Ko ia naʻá ku fakamanga hoku ngutú, peá ne ʻai au ke u kai ʻa e takainga tohí ni. 3 Naʻá ne toe folofola mai kiate au: “Foha ʻo e tangata, kai ʻa e takainga tohi ko eni ʻoku ou ʻoatu kiate koé, pea fakafonu ʻaki ia ho keté.” Ko ia naʻá ku kamata ke kai ia, pea naʻe melie ia ʻo hangē ko e honé ʻi hoku ngutú.+

4 Naʻá ne folofola mai kiate au: “Foha ʻo e tangata, ʻalu atu ki he fale ʻo ʻIsilelí peá ke leaʻaki ʻeku ngaahi leá kiate kinautolu. 5 He ʻoku ʻikai ke fekauʻi atu koé ki ha kakai ʻoku nau leaʻaki ha lea ʻoku faingataʻa ke mahinoʻi pe ko ha lea ʻoku ʻikai ke ʻiloʻi, ka ki he fale ʻo ʻIsilelí. 6 ʻOku ʻikai ke fekauʻi atu koé ki ha ngaahi kakai lahi ʻoku nau leaʻaki ha lea ʻoku faingataʻa ke mahinoʻi pe ko ha lea ʻoku ʻikai ke ʻiloʻi, ʻa ia heʻikai te ke mahinoʻi ʻa ʻenau ngaahi leá. Kapau te u fekauʻi atu koe kiate kinautolu, te nau fanongo kiate koe.+ 7 Ka ʻe fakafisi ʻa e fale ʻo ʻIsilelí ke fanongo kiate koe, he ʻoku ʻikai te nau fie fanongo mai kiate au.+ Ko e faʻahinga kotoa ʻi he fale ʻo ʻIsilelí ʻoku nau laʻe-fefeka mo loto-fefeka.+ 8 Vakai! Kuó u ʻai ho matá ke fefeka ʻo hangē tofu pē ko honau matá mo ho laʻé ke fefeka ʻo hangē tofu pē ko honau laʻé.+ 9 Kuó u ʻai ho laʻé ke hangē ha taiamoní, ʻo fefeka ange ʻi he maka-afí.+ ʻOua te ke ilifia ʻiate kinautolu pe manavahē ʻi honau matá,+ he ko ha fale angatuʻu kinautolu.”

10 Naʻá ne toe folofola mai kiate au: “Foha ʻo e tangata, ʻai ki ho lotó peá ke fanongo ki heʻeku ngaahi lea kotoa ʻoku ou leaʻaki kiate koé. 11 ʻAlu atu ki he lotolotonga ʻo e kau ʻave fakamālohi ʻo ho kakaí*+ peá ke lea kiate kinautolu. Tala kiate kinautolu, ‘Ko e folofola eni ʻa e ʻEiki Hau ko Sihová,’ tatau ai pē pe te nau fanongo pe fakafisi ke fanongo.”+

12 Pea naʻe ʻave au ʻe ha laumālie+ pea naʻá ku fanongo ki ha fuʻu ʻuʻulu naʻe ongo mai mei hoku tuʻá ʻo ne pehē: “ʻOfa ke hoko ʻa e lāngilangi ʻo Sihová ʻo fakahīkihikiʻi mei hono feituʻú.” 13 Naʻe ongo mai ʻa e ngaahi kapakau ʻo e ngaahi meʻamoʻuí ʻi heʻenau felaveʻaki ʻa e taha ki he taha,+ pea mo e leʻo ʻo e ngaahi veʻeteka naʻe ʻi honau tafaʻakí,+ pea naʻe ongo mai mo ha fuʻu ʻuʻulu. 14 Pea naʻe hiki au ʻe he laumālié ʻo ne ʻave au, pea naʻá ku ʻalu ʻoku ou mamahi mo ʻita hoku laumālié, pea naʻe fakaivimālohiʻi au ʻe he mālohi ʻo Sihová. 15 Ko ia naʻá ku ʻalu ki Tela-pipi ki he kakai naʻe ʻave fakamālohí, ʻa ia naʻa nau nofo ʻi he veʻe vaitafe ko Kipá,+ pea naʻá ku nofo ai ʻi he feituʻu naʻa nau nofo aí; pea naʻá ku nofo moʻutāfuʻua+ ʻi honau lotolotongá ʻi he ʻaho ʻe fitu.

16 ʻI he ʻosi ʻa e ʻaho ʻe fitú naʻe hoko mai kiate au ʻa e folofola ʻa Sihová:

17 “Foha ʻo e tangata, kuó u fakanofo koe ko ha tangata leʻo ki he fale ʻo ʻIsilelí;+ pea ʻi hoʻo fanongo ki ha lea mei hoku ngutú, kuo pau ke ke ʻoatu ʻeku fakatokanga ko ení kiate kinautolu.+ 18 ʻI heʻeku pehē ki ha tokotaha fulikivanu, ‘Kuo pau ke ke mate,’ ka ʻoku ʻikai te ke fai ha fakatokanga kiate ia, pea ʻikai te ke lea koeʻuhi ke fai ha fakatokanga ki he tokotaha fulikivanú ke tafoki mei hono ʻalunga fulikivanú ka ne moʻui,+ te ne mate ʻi heʻene faihalá koeʻuhi ko ʻene anga-fulikivanú,+ ka te u ʻeke ʻa hono totó kiate koe.*+ 19 Ka ʻo kapau te ke fai ha fakatokanga ki ha tokotaha fulikivanu pea ʻikai te ne tafoki mei heʻene anga-fulikivanú pea mei hono ʻalunga fulikivanú, te ne mate ʻi heʻene faihalá, ka ko hono moʻoní te ke fakahaofi ʻe koe ʻa hoʻo moʻuí tonu.+ 20 Ka ʻi he taimi ʻoku liʻaki ai ʻe he tokotaha māʻoniʻoní ʻa ʻene māʻoniʻoní peá ne fai ʻa e meʻa ʻoku halá,* te u fokotuʻu ha tūkiaʻanga ʻi hono ʻaó pea te ne mate.+ Kapau naʻe ʻikai te ke fai ha fakatokanga kiate ia, te ne mate ʻi heʻene angahalá pea ʻe ʻikai ke toe manatua ʻa ʻene ngaahi ngāue māʻoniʻoní, ka te u ʻeke ʻa hono totó kiate koe.*+ 21 Ka ʻo kapau naʻá ke fai ha fakatokanga ki he tokotaha māʻoniʻoní ke ʻoua te ne faiangahala, pea ʻikai te ne faiangahala, ko e moʻoni te ne moʻui koeʻuhí naʻe fai ha fakatokanga kiate ia,+ pea te ke fakahaofi ai ʻe koe ʻa hoʻo moʻuí tonu.”

22 Naʻe hoko mai ʻi ai kiate au ʻa e nima ʻo Sihová ʻo ne folofola mai kiate au: “Tuʻu hake ʻo ʻalu ki he teleʻa lautoká, pea te u lea atu ai kiate koe.” 23 Ko ia naʻá ku tuʻu hake ʻo ʻalu ki he teleʻa lautoká, pea vakai, naʻe ʻi ai ʻa e lāngilangi ʻo Sihová,+ ʻo hangē ko e lāngilangi naʻá ku sio ai ʻi he veʻe vaitafe ko Kipá,+ pea naʻá ku tō foʻohifo. 24 Pea naʻe hū ʻa e laumālié kiate au ʻo ne ʻai au ke u tuʻu hake,+ pea naʻá ne folofola mai kiate au ʻo pehē:

“ʻAlu pea tāpuni koe ʻi loto ʻi ho falé. 25 Ka ko koe, foha ʻo e tangata, te nau ʻai ha ngaahi maea kiate koe pea te nau haʻi ʻaki koe koeʻuhí ke ʻoua naʻa lava ke ke ʻalu atu ki honau lotolotongá. 26 Pea te u ʻai ho ʻeleló ke pipiki ki ho ʻaoʻingutú, pea te ke hoko ʻo noa ʻo ʻikai lava ke ke valokiʻi kinautolu, koeʻuhí ko ha fale angatuʻu kinautolu. 27 Ka ʻi he taimi te u lea ai kiate koé te u fakaava ho ngutú, pea kuo pau ke ke lea kiate kinautolu,+ ‘Ko e folofola eni ʻa e ʻEiki Hau ko Sihová.’ Tuku ki he tokotaha ʻoku fanongó ke ne fanongo,+ pea tuku ki he tokotaha ʻoku fakafisi ke fanongó ke ne fakafisi, koeʻuhí ko ha fale angatuʻu kinautolu.+