Lute

4 Pea naʻe ʻalu atu ʻa Pōasi ki he matapā ʻo e koló+ ʻo ne tangutu ai. Pea vakai, naʻe ʻalu hake ʻa e tokotaha totongi huhuʻi ko ē naʻe lave ki ai ʻa Pōasí.+ Ko ia naʻe pehē ange ai ʻe Pōasi: “ʻE Meʻa, haʻu ʻo tangutu hifo heni.” Pea naʻá ne ʻalu atu ʻo tangutu hifo. 2 Naʻe ʻomi leva ʻe Pōasi ʻa e toko hongofulu ʻo e kau mātuʻa ʻo e koló+ peá ne pehē ange: “Mou tangutu hifo heni.” Ko ia naʻa nau tangutu hifo.

3 Naʻe pehē ange leva ʻe Pōasi ki he tokotaha totongi huhuʻí:+ “Ko Nāomi, ʻa ia kuó ne foki mai mei he feituʻu ʻuta ʻo Mōapé,+ kuo pau ke ne fakatau atu ʻa e konga kelekele ʻa hota tokoua ko ʻElimelekí.+ 4 Ko ia naʻá ku fakakaukau ai ke fakahā atu ia kiate koe ʻo pehē, ‘Fakatau ia ʻi he ʻao ʻo e kakaí mo e kau mātuʻa ʻo hoku kakaí.+ Kapau te ke fakatau ia, peá ke fakatau. Ka ʻo kapau ʻe ʻikai te ke fakatau ia, tala mai koeʻuhí ke u ʻiloʻi, he ʻoku ʻaʻau ʻa e totonu ke fakatau iá, pea ko au ʻoku hoko atu ʻiate koé.’” Naʻá ne tali ange: “ʻOku ou loto-lelei ke fakatau ia.”+ 5 Naʻe pehē ange leva ʻe Pōasi: “ʻI he ʻaho te ke fakatau ai ʻa e kelekelé meia Nāomí, kuo pau ke ke toe fakatau foki ia meia Lute ko e fefine Mōapé, ʻa e uaifi ʻo e pekiá, koeʻuhí ke toe fakafoki mai ai ʻa e hingoa ʻo e pekiá ki hono tofiʻá.”+ 6 ʻI he meʻá ni naʻe pehē ange ai ʻe he tokotaha totongi huhuʻí: “ʻOku ʻikai malava ke u fakatau ia, he ʻe uesia ai ʻa hoku tofiʻa ʻoʻokú. Fakatau ia ʻe koe maʻau ʻaki ʻeku totonu ke fakataú, koeʻuhí ʻoku ʻikai malava ke u fakatau ia ʻe au.”

7 Pea ko eni ʻa e tōʻonga ʻi ʻIsileli ʻi he kuonga muʻá ʻi he fekauʻaki mo e totonu ʻo e fakataú mo e fakafetongí ke fakalaoʻi ʻaki ʻa e fefakatauʻaki kotoa pē: Naʻe pau ke vete ʻe ha tangata ʻa hono senitoló+ pea ʻoange ia ki he tokotaha ʻe tahá, pea ko e anga eni ʻo hono fakapapauʻi ha aleapau* ʻi ʻIsileli. 8 Ko ia ʻi he taimi naʻe pehē ange ai ʻe he tokotaha totongi huhuʻí kia Pōasi, “Fakatau ia maʻaú,” naʻá ne vete ʻa hono senitoló. 9 Naʻe pehē leva ai ʻe Pōasi ki he kau mātuʻá pea mo e kakaí kotoa: “Ko e kau fakamoʻoni+ kimoutolu he ʻahó ni ʻoku ou fakatau meia Nāomi ʻa e meʻa kotoa ʻa ʻElimelekí mo e meʻa kotoa ʻa Kilioni mo Māloní. 10 ʻOku ou toe maʻu foki ʻa Lute ko e fefine Mōapé, ʻa e uaifi ʻo Māloní, ke hoko ko hoku uaifi ke toe fakafoki ʻa e hingoa ʻo e pekiá ki hono tofiʻá,+ koeʻuhi ke ʻoua naʻa tuʻusi ʻa e hingoa ʻo e pekiá mei he lotolotonga ʻo hono fanga tokouá pea mei he matapā ʻo e kolo ʻo hono feituʻú. Ko e kau fakamoʻoni kimoutolu ʻi he ʻahó ni.”+

11 ʻI he meʻá ni naʻe pehē ai ʻe he kakai kotoa naʻe ʻi he matapā ʻo e koló pea mo e kau mātuʻá: “Ko e kau fakamoʻoni kimautolu! ʻOfa ke tuku ʻe Sihova ʻa e uaifi ʻoku hū ki ho falé ke ne hangē ko Lesielí pea hangē ko Liá, ʻa ia naʻá na fakatou langa ʻa e fale ʻo ʻIsilelí.+ ʻOfa ke ke lakalakaimonū ʻi ʻEfalata+ pea fokotuʻu ha hingoa lelei* ʻi Pētelihema.+ 12 ʻOfa ke hoko ho falé ʻo hangē ko e fale ʻo Pēlesi,+ ʻa ia naʻe fanauʻi ʻe Tema kia Siutá, fakafou ʻi he hako ʻe foaki atu ʻe Sihova kiate koe ʻi he finemui+ ko ení.”

13 Ko ia naʻe ʻave ai ʻe Pōasi ʻa Lute pea naʻá ne hoko ko hono uaifi. Naʻá ne mohe* mo ia, pea naʻe tuku ʻe Sihova ke ne feitama peá ne fanauʻi ha tamasiʻi. 14 Naʻe pehē leva ʻe he kau fefiné kia Nāomi: “Ke fakafetaʻia ʻa Sihova, ʻa ia kuo ʻikai te ne tuku koe ʻo taʻeʻiai hao tokotaha totongi huhuʻi he ʻahó ni. ʻOfa ke fakahīkihikiʻi ʻa hono hingoá ʻi ʻIsileli! 15 Kuó ne* fakaivifoʻou* hoʻo moʻuí pea te ne tokoni kiate koe ʻi hoʻo taʻumotuʻá, koeʻuhí kuo fanauʻi ia ki he uaifi ʻo hoʻo tamá, ʻa ia ʻokú ne ʻofa ʻiate koe+ pea ʻoku lelei ange ia kiate koe ʻi ha tama ʻe toko fitu.” 16 Naʻe ʻomi ʻe Nāomi ʻa e kiʻi tamá ʻo ne fua ia ʻi hono fatafatá, pea naʻá ne tokangaʻi ia.* 17 Naʻe ʻai leva ʻe he kau fefine ʻi he kaungāʻapí hano hingoa. Naʻa nau pehē, “Kuo fanauʻi ha tama kia Nāomi,” pea naʻa nau fakahingoa ia ko ʻŌpeti.+ Ko ia ʻa e tamai ʻa Sese,+ ko e tamai ʻa Tēvitá.

18 Pea ko e laine hohoko fakafāmili eni* ʻo Pēlesí:+ Naʻe hoko ʻa Pēlesi ko e tamai ia ʻa Hesiloni;+ 19 naʻe hoko ʻa Hesiloni ko e tamai ia ʻa Lame; naʻe hoko ʻa Lame ko e tamai ia ʻa ʻAminatape;+ 20 naʻe hoko ʻa ʻAminatape+ ko e tamai ia ʻa Naʻasoni; naʻe hoko ʻa Naʻasoni ko e tamai ia ʻa Salemone; 21 naʻe hoko ʻa Salemone ko e tamai ia ʻa Pōasi; naʻe hoko ʻa Pōasi ko e tamai ia ʻa ʻŌpetí; 22 naʻe hoko ʻa ʻŌpeti ko e tamai ia ʻa Sesé;+ pea naʻe hoko ʻa Sese ko e tamai ia ʻa Tēvitá.+