ʻIsikeli

18 Pea naʻe toe hoko mai ʻa e folofola ʻa Sihová kiate au, ʻo pehē: 2 “ʻOku ʻuhinga ki he hā ʻa e palōveepi ko eni ʻoku mou leaʻaki ʻi he fonua ko ʻIsilelí, ‘Kuo kai kālepi mahi ʻa e ngaahi tamaí, kae maninia ai ʻa e nifo ʻo e ngaahi fohá’?+

3 “‘ʻOku ou fuakava ʻiate au,’* ko e fakahaaʻi ia ʻe he ʻEiki Hau ko Sihová, ‘heʻikai ke toe hoko atu hoʻomou leaʻaki ʻa e lea ko ení ʻi ʻIsileli. 4 Vakai! Ko e moʻui kotoa pē—ʻoku ʻaʻaku ia. Hangē ko e moʻui ʻa e tamaí ʻoku pehē pē foki ʻa e moʻui ʻa e fohá—ʻoku ʻaʻaku ia. Ko e tokotaha ko ia ʻoku faiangahalá ko ia ia ʻe maté.

5 “‘Fakakaukauloto atu ki ha tangata ʻoku māʻoniʻoni mo ne fai ʻa e meʻa ʻoku totonu mo tonú. 6 ʻOku ʻikai te ne kai ʻa e ngaahi feilaulau ki he ʻaitolí ʻi he ngaahi moʻungá;+ ʻoku ʻikai te ne ʻamanaki ki he ngaahi ʻaitoli fakalielia* ʻa e fale ʻo ʻIsilelí; ʻoku ʻikai te ne ʻuliʻi ʻa e uaifi ʻa hono kaungāʻapí+ pe mohe* mo ha fefine ʻoku puke fakamāhina;+ 7 ʻoku ʻikai te ne ngaohikoviʻi ha taha,+ ka ʻokú ne fakafoki ʻa e meʻa maluʻi kuo ʻoange kiate ia ʻe ha tokotaha fakamoʻua;+ ʻoku ʻikai te ne kaihaʻa mei ha taha,+ ka ʻokú ne ʻoange ʻene meʻakai ʻaʻaná ki he tokotaha ʻoku fiekaiá+ mo fakakofu ʻa e tokotaha ʻoku telefuá;+ 8 ʻoku ʻikai te ne hilifaki ha tupu pe ko ha totongi tupu ʻi he taʻefaitotonu,+ ka ʻokú ne fakaʻehiʻehi mei hono fai ha fakamaau taʻetotonú;+ ʻokú ne fakahoko ʻa e fakamaau totonu moʻoní ʻi he vahaʻa ʻo e tangata mo e tangata;+ 9 pea ʻokú ne hanganaki ʻaʻeva ʻi heʻeku ngaahi tuʻutuʻuní mo tauhi ʻeku ngaahi tuʻutuʻuni fakaefakamāú koeʻuhi ke ne faitōnunga ai. Ko ha tangata pehē ʻoku māʻoniʻoni pea ko e moʻoni te ne moʻui atu ai pē,’+ ko e fakahaaʻi ia ʻe he ʻEiki Hau ko Sihová.

10 “‘Kae fakakaukauloto atu ʻokú ne hoko ko ha tamai ʻa ha foha ʻa ia ko ha tokotaha kaihaʻa+ pe ko ha tokotaha fakapō*+ pe ʻokú ne fai ha taha ʻo e ngaahi meʻa kehe ko iá 11 (neongo kuo ʻikai fai ʻe he tamaí ha taha ʻo e ngaahi meʻá ni)—ʻokú ne kai ʻa e ngaahi feilaulau ki he ʻaitolí ʻi he ngaahi moʻungá, ʻuliʻi ʻa e uaifi ʻo hono kaungāʻapí, 12 ngaohikoviʻi ʻa e tuʻutāmakí mo e masivá,+ maʻu ʻa e ngaahi meʻa ʻi he kaihaʻa, ʻikai te ne fakafoki ha meʻa maluʻi, ʻokú ne hanga ki he ngaahi ʻaitoli fakalieliá,+ kau ʻi he ngaahi tōʻonga fakalielia,+ 13 maʻu ha totongi tupu ʻi he taʻefaitotonu mo hilifaki ha tupu+—ʻe ʻikai ke kei moʻui ai pē ʻa e foha ko iá. Koeʻuhi ko e kotoa ʻo e ngaahi meʻa fakalielia ko eni kuó ne faí, ko e moʻoni ʻe tāmateʻi ia. ʻE ʻi hono tumuʻakí pē ʻa hono totó.

14 “‘Kae fakakaukauloto atu ʻoku maʻu ʻe ha tamai ha foha ʻa ia ʻokú ne sio ki he ngaahi angahala kotoa kuo fai ʻe heʻene tamaí, pea neongo ʻene sio ki aí, ʻoku ʻikai te ne fai ʻa e ngaahi meʻa ko iá. 15 ʻOku ʻikai te ne kai ʻa e ngaahi feilaulau ki he ʻaitolí ʻi he ngaahi moʻungá; ʻoku ʻikai te ne ʻamanaki ki he ngaahi ʻaitoli fakalielia ʻo e fale ʻo ʻIsilelí; ʻoku ʻikai te ne ʻuliʻi ʻa e uaifi ʻo hono kaungāʻapí; 16 ʻoku ʻikai te ne ngaohikoviʻi ha taha; ʻoku ʻikai te ne faʻao ha meʻa maluʻi; ʻoku ʻikai te ne maʻu ha meʻa ʻi he kaihaʻa; ʻokú ne ʻoatu ʻene meʻakai ʻaʻaná ki he tokotaha ʻoku fiekaiá pea fakakofu ʻa e tokotaha ʻoku telefuá; 17 ʻokú ne fakaʻehiʻehi mei hono lōmekina ʻa e masivá; ʻoku ʻikai te ne maʻu ha totongi tupu ʻi he taʻefaitotonu pe hilifaki ha tupu; pea ʻokú ne fakahoko ʻa ʻeku ngaahi tuʻutuʻuni fakaefakamāú pea ʻaʻeva ʻi heʻeku ngaahi tuʻutuʻuní. Heʻikai mate ha tangata pehē koeʻuhi ko e faihala ʻa ʻene tamaí. Ko e moʻoni te ne moʻui atu ai pē. 18 Ka koeʻuhi naʻe faikākā ʻa ʻene tamaí, pea kaihaʻa mei hono tokouá, peá ne fai ʻa e meʻa naʻe hala ʻi he lotolotonga ʻo hono kakaí, te ne mate ʻi heʻene faihalá.

19 “‘Ka te mou pehē: “Ko e hā ʻoku ʻikai fua hia ai ʻa e fohá koeʻuhi ko e faihala ʻa ʻene tamaí?” Koeʻuhí kuo fai ʻe he fohá ʻa e meʻa ʻoku totonu mo māʻoniʻoní, kuó ne tauhi ʻa ʻeku ngaahi tuʻutuʻuní kotoa mo talangofua ki ai, ko e moʻoni te ne moʻui atu ai pē.+ 20 Ko e tokotaha ʻoku faiangahalá ko ia ia ʻe maté.+ Heʻikai ke fua hia ha foha koeʻuhi ko e faihala ʻa ʻene tamaí, pea heʻikai ke fua hia ha tamai koeʻuhi ko e faihala ʻa hono fohá. Ko e māʻoniʻoni ʻa e tokotaha māʻoniʻoní ʻe lau ia kiate ia pē, pea ko e fulikivanu ʻa e tokotaha fulikivanú ʻe lau ia kiate ia pē.+

21 “‘Ko ia kapau ʻoku tafoki ha tokotaha fulikivanu mei he ngaahi angahala kotoa kuó ne faí ʻo ne tauhi ʻeku ngaahi tuʻutuʻuní pea fai ʻa e meʻa ʻoku totonu mo māʻoniʻoní, ko e moʻoni te ne moʻui atu ai pē. Heʻikai te ne mate.+ 22 Heʻikai ha taha ʻo e ngaahi laka hala kuó ne faí ʻe kei lau kiate ia.*+ Te ne moʻui atu ai pē ʻi heʻene fai ʻa e meʻa ʻoku māʻoniʻoní.’+

23 “‘He ʻoku ʻi ai haʻaku teitei leleiʻia ʻe taha ʻi he mate ʻa ha tokotaha fulikivanu?’+ Ko e fakahaaʻi ia ʻe he ʻEiki Hau ko Sihová. ‘ʻIkai ʻoku ou saiʻia ange ke ne tafoki mei hono ngaahi ʻalungá pea moʻui atu ai pē?’+

24 “‘Ka ʻi he taimi ʻoku liʻaki ai ʻe he tokotaha māʻoniʻoní ʻa ʻene māʻoniʻoní peá ne fai ʻa e meʻa ʻoku halá,* ʻo ne fai ʻa e ngaahi meʻa fakalielia kotoa ʻoku fai ʻe he tokotaha fulikivanú, te ne moʻui? Heʻikai manatua ha taha ʻo e ngaahi ngāue māʻoniʻoni naʻá ne faí.+ Koeʻuhi ko ʻene taʻefaitōnungá mo e angahala kuó ne faí, te ne mate.+

25 “‘Ka te mou pehē: “Ko e founga ʻa Sihová ʻoku taʻetotonu.”+ Fanongo mai muʻa, ʻe fale ʻo ʻIsileli! Ko ʻeku foungá koā ʻoku taʻetotonú?+ ʻIkai ko hoʻomou ngaahi foungá pē ʻoku taʻetotonú?+

26 “‘ʻI he taimi ʻoku liʻaki ai ʻe he tokotaha māʻoniʻoní ʻa ʻene māʻoniʻoní peá ne fai ʻa e meʻa ʻoku halá peá ne mate koeʻuhí ko ia, te ne mate ʻi heʻene faihala pē ʻaʻaná.

27 “‘Pea ʻi he taimi ʻe tafoki ai ʻa e tokotaha fulikivanú mei he fulikivanu kuó ne faí ʻo ne kamata ke fai ʻa e meʻa ʻoku totonu mo māʻoniʻoní, te ne haofaki ai ʻa ʻene moʻuí tonu.+ 28 ʻI heʻene ʻiloʻi peá ne tafoki mei he ngaahi laka hala kotoa kuó ne faí, ko e moʻoni te ne moʻui atu ai pē. Heʻikai te ne mate.

29 “‘Ka ʻe pehē ʻe he fale ʻo ʻIsilelí: “Ko e founga ʻa Sihová ʻoku taʻetotonu.” ʻOku moʻoni koā ʻoku taʻetotonu ʻa ʻeku ngaahi foungá, ʻe fale ʻo ʻIsileli?+ ʻIkai ko hoʻomou ngaahi foungá pē ʻoku taʻetotonú?’

30 “‘Ko ia ai, te u fakamāuʻi ʻa e tokotaha taki taha ʻo kimoutolu ʻo fakatatau ki heʻene ngaahi foungá,+ ʻe fale ʻo ʻIsileli,’ ko e fakahaaʻi ia ʻe he ʻEiki Hau ko Sihová. ‘Mou tafoki, ʻio, mou tafoki fakaʻaufuli mei he kotoa ʻo hoʻomou ngaahi laka halá, koeʻuhi ke ʻoua te nau hoko ko ha tūkiaʻanga ke mou halaia ai. 31 Liʻaki atu meiate kimoutolu ʻa e ngaahi laka hala kotoa kuo mou faí+ pea mou hoko ʻo maʻu* ha loto foʻou mo ha laumālie foʻou,+ he ko e hā ke mou mate aí,+ ʻe fale ʻo ʻIsileli?’

32 “‘ʻOku ʻikai haʻaku leleiʻia ʻe taha ʻi he mate ʻa ha taha,’+ ko e fakahaaʻi ia ʻe he ʻEiki Hau ko Sihová. ‘Ko ia mou foki mai ka mou moʻui.’”+