ʻUluaki Kalonikali

5 Ko e ngaahi foha eni ʻo Lūpeni,+ ko e ʻuluaki foha ʻo ʻIsilelí. Ko e ʻuluaki fohá ia, ka koeʻuhí ko ʻene ʻuliʻi* ʻa e mohenga ʻo ʻene tamaí,+ naʻe ʻoange ai ʻa ʻene totonu ki he ʻuluaki fohá ki he ongo foha ʻo Siosifa+ ko e foha ʻo ʻIsilelí, ko ia naʻe ʻikai ke fakakau ia ʻi he tohi hohoko ki he totonu ʻo e ʻuluaki fohá. 2 Neongo ko Siutá+ naʻe māʻolunga ange ia ʻi hono fanga tokouá pea naʻe haʻu meiate ia ʻa e tokotaha ʻe hoko ko e takí,+ ko e totonu ki he ʻuluaki fohá naʻe ʻa Siosifa ia. 3 Ko e ngaahi foha ʻo Lūpeni ko e ʻuluaki foha ʻo ʻIsilelí ko Hēnoke, Palu, Hesiloni, pea mo Kalimi.+ 4 Ko e hako ʻo Sioelí ko Semaia ko hono fohá, ʻa ia ko hono fohá ʻa Koki, ʻa ia ko hono fohá ʻa Simi, 5 ʻa ia ko hono fohá ʻa Maika, ʻa ia ko hono fohá ʻa Laia, ʻa ia ko hono fohá ʻa Pēali, 6 ʻa ia ko hono fohá ʻa Piela, ʻa ia naʻe ʻave fakamālohi ʻe Tuʻi Tilikati-pilinesa+ ʻo ʻAsīliá; ko ha ʻeiki ia ʻo e haʻa Lūpení. 7 Ko hono fanga tokouá ʻo fakatatau ki he tohi hohoko ʻa honau ngaahi fāmilí, ko Sieli ʻa e ʻulú, ko Sākalaia, 8 mo Pela ko e foha ʻo ʻĀsasi ko e foha ʻo Semā ko e foha ʻo Sioelí, ʻa ia naʻa nau nofo ʻi ʻAloeli+ ʻo aʻu ki Nipo mo Pēali-meoni.+ 9 Ki he hahaké naʻá ne nofo ʻo aʻu ki he kamataʻanga ʻo e toafa ʻi he Vaitafe ʻIufaletesí,+ he ko ʻenau fanga manú naʻe hoko ʻo tokolahi ʻaupito ʻi he fonua ko Kiliatí.+ 10 ʻI he ngaahi ʻaho ʻo Saulá, naʻa nau faitau mo e haʻa Hekaʻaá pea nau ikunaʻi kinautolu, ko ia naʻa nau nofo ai ʻi honau ngaahi tēnití ʻi he kotoa ʻo e feituʻu fakahahake ʻo Kiliatí.

11 Pea naʻe nofo ʻa e hako ʻo Katá ʻo hoko atu kiate kinautolu ʻi he fonua ko Pēsaní ʻo aʻu ki Salika.+ 12 Ko Sioeli ʻa e ʻulú, hoko ai ʻa Safami, pea mo Sanei mo Safati ʻi Pēsani. 13 Pea ko honau fanga tokoua naʻe kau ki he fale ʻo ʻenau ngaahi tamaí ko Maikeli, Mēsuilame, Sipa, Siolai, Sakani, Sie, mo ʻEpa, ko e toko fitu fakakātoa. 14 Ko e ngaahi foha eni ʻo ʻApihaili ko e foha ʻo Huli ko e foha ʻo Sialoa ko e foha ʻo Kiliati ko e foha ʻo Maikeli ko e foha ʻo Sesisai ko e foha ʻo Sato ko e foha ʻo Pusá. 15 Ko Ahi ko e foha ʻo ʻApitieli ko e foha ʻo Kuní ko e ʻulumotuʻa ia ʻi he fale ʻo ʻenau ngaahi tamaí. 16 Naʻa nau nofo ʻi Kiliati,+ pea ʻi Pēsani+ mo hona ngaahi kolo takatakaí,* pea ʻi he ngaahi kaikaiʻanga kotoa ʻo Sāloní ʻo aʻu ki honau ngaahi ngataʻangá. 17 Naʻe fakakau kotoa kinautolu ʻi he tohi hohokó ʻi he ngaahi ʻaho ʻo Tuʻi Siotame+ ʻo Siutá pea ʻi he ngaahi ʻaho ʻo Tuʻi Selopoame*+ ʻo ʻIsilelí.

18 Ko e haʻa Lūpení, mo e haʻa Katá, pea mo e vaeua ʻo e matakali ʻo Manasé naʻe toko 44,760 ʻa e kau tangata toʻa ʻi heʻenau kau taú ʻa ia naʻa nau toʻo pā mo e heletā mo e ngaahi kaufana,* pea naʻe akoʻi kinautolu ʻi he taú. 19 Naʻa nau faitau mo e haʻa Hekaʻaá,+ mo e hako ʻo Situá, mo e hako ʻo Nāfisí,+ pea mo e hako ʻo Nōtapí. 20 Pea naʻe faitokonia kinautolu ʻi heʻenau faitau mo kinautolú, ko ia naʻe tuku atu ai ʻa e haʻa Hekaʻaá mo e faʻahinga kotoa naʻe kau mo kinautolú ki honau nimá, he naʻa nau ui tokoni ki he ʻOtuá ʻi he taú, pea naʻá ne tali ʻenau kōlengá koeʻuhí he naʻa nau falala kiate ia.+ 21 Naʻa nau puke ʻenau fanga manú—ko e fanga kāmeli ʻe 50,000, fanga sipi ʻe 250,000 mo e fanga ʻasi ʻe 2,000—pea pehē ki he kakai ʻe toko 100,000. 22 Naʻe tō ʻo mate ʻa e tokolahi, koeʻuhí he ko e ʻOtua moʻoní+ ia naʻe faitaú. Pea naʻa nau nofo ʻi honau feituʻú ʻo aʻu ki he taimi ʻo e ʻave fakamālohí.+

23 Ko e hako ʻo e vaeua ʻo e matakali ʻo Manasé+ naʻa nau nofo ʻi he fonuá mei Pēsani ki Pēali-heamoni mo Senili pea mo Moʻunga Heamoni.+ Naʻa nau tokolahi ʻaupito. 24 Ko e ngaahi ʻulumotuʻa eni ʻo e ngaahi fale ʻo ʻenau ngaahi tamaí: Ko ʻĒfeli, ʻIsi, ʻEliela, ʻAsilili, Selemaia, Hotevia, pea mo Satieli; ko e kau tangata toʻa ʻi he taú, pea ko e kau tangata ongoongoa, pea ko e ngaahi ʻulumotuʻa kinautolu ʻo e ngaahi fale ʻo ʻenau ngaahi tamaí. 25 Ka naʻa nau taʻefaitōnunga ki he ʻOtua ʻo ʻenau fanga kuí pea nau faifeʻauaki ki he ngaahi ʻotua ʻo e ngaahi kakai ʻo e fonuá,+ ʻa ia naʻe fakaʻauha ʻosi ʻe he ʻOtuá mei honau lotolotongá. 26 Ko ia ko e ʻOtua ʻo ʻIsilelí naʻá ne ʻai ʻa e fakakaukau ki he loto* ʻo Tuʻi Puli ʻo ʻAsīliá+ (ʻa ia, ko Tuʻi Tilikati-pilinesa+ ʻo ʻAsīliá) peá ne ʻave fakamālohi ai ʻa e faʻahinga ʻo e haʻa Lūpení, mo e haʻa Katá, pea mo e vaeua ʻo e matakali ʻo Manasé pea ʻomi kinautolu ki Hala, Hapoa, Halā, pea mo e vaitafe Kōsaní,+ ʻa ia ʻoku nau ʻi ai ʻo aʻu mai ki he ʻahó ni.