Nōmipa

6 Naʻe toe folofola ʻa Sihova kia Mōsese ʻo pehē: 2 “Lea ki he kau ʻIsilelí ʻo tala kiate kinautolu, ‘Kapau ʻe fai ʻe ha tangata pe ko ha fefine ha fuakava makehe ke nofo ko ha Nāsili*+ kia Sihova, 3 ʻoku totonu ke ne fakaʻehiʻehi mei he uainé mo e ngaahi inu ʻolokaholo kehé. ʻOku ʻikai totonu ke ne inu ʻa e huhuʻa mahi ʻo e uainé pe ko e huhuʻa mahi ʻo ha inu pē ʻoku ʻi ai ha ʻolokaholo.+ ʻOku ʻikai totonu ke ne inu ha huhuʻa pē kuo ngaohi mei he kālepí, pe kai kālepi, ʻo tatau ai pē pe ʻoku mata pe mōmoa. 4 ʻI he ʻaho kotoa ʻo ʻene Nāsilí ʻoku ʻikai totonu ke ne kai ai ha meʻa pē kuo ngaohi mei he kālepí, mei he kālepi ʻoku teʻeki ke motuʻá ʻo aʻu ki he kilí.

5 “‘ʻI he ngaahi ʻaho kotoa ʻo e fuakava ki heʻene Nāsilí ʻoku ʻikai totonu ke ʻai ai ha tele ki hono ʻulú.+ Te ne nofo toputapu ai pē ʻaki hono tuku ke tupu ʻa e fulufulu ʻo hono ʻulú kae ʻoua ke kakato ʻa e ngaahi ʻaho ʻo hono fakamavaheʻi ia kia Sihová. 6 ʻOku ʻikai totonu ke ne fakaofiofi* ki ha tokotaha mate lolotonga ʻa e ngaahi ʻaho kotoa ʻo hono fakamavaheʻi ai pē ia kia Sihová. 7 Tatau ai pē kapau ʻe mate ʻa ʻene tamaí pe ko ʻene faʻeé pe ko hono tokouá pe ko hono tuofefiné, ʻe ʻikai te ne ʻuliʻi ia,+ koeʻuhi ko e fakaʻilonga ʻo ʻene Nāsili ki hono ʻOtuá ʻoku ʻi hono ʻulú ia.

8 “‘ʻI he ngaahi ʻaho kotoa ʻo ʻene Nāsilí ʻokú ne nofo toputapu ai kia Sihova. 9 Ka ʻo kapau ʻe mate fakafokifā ha taha ʻi hono tafaʻakí+ ʻo ne ʻuliʻi ai ʻa e louʻulu ʻoku fakaʻilongaʻi ʻaki ʻa hono fakamavaheʻi ia ki he ʻOtuá,* kuo pau ke ne tele ʻa hono ʻulú+ ʻi he ʻaho ʻo hono fakamaʻá. ʻOku totonu ke ne tele ia ʻi he ʻaho hono fitú. 10 Pea ʻi he ʻaho hono valú, ʻoku totonu ke ne ʻomi ai ʻa e ongo foʻi kulukulu pe ko ha ongo lupe mui ʻe ua ki he taulaʻeikí ʻi he hūʻanga ʻo e tēniti feʻiloakiʻangá. 11 ʻE teuteu ʻe he taulaʻeikí ʻa e taha ko ha feilaulau angahala pea ko e taha ko ha feilaulau tutu pea fai ha feilaulau ʻufiʻufi angahala maʻana ʻi heʻene angahala+ ʻo felāveʻi mo e tokotaha maté. Kuo pau leva ke ne fakatoputapuʻi ʻa hono ʻulú ʻi he ʻaho ko iá. 12 Pea kuo pau ke ne toe fakamavaheʻi ia kia Sihova koeʻuhi ko e ngaahi ʻaho ʻo ʻene Nāsilí, pea te ne ʻomai ha kiʻi sipi tangata ʻi hono ʻuluaki taʻú ko ha feilaulau halaia. Kae kehe, ʻe ʻikai lau ʻa e ngaahi ʻaho ki muʻá koeʻuhí naʻá ne ʻuliʻi ai ʻa ʻene Nāsilí.

13 “‘Ko e lao leva eni fekauʻaki mo e tokotaha Nāsilí: ʻI heʻene fakakakato ʻa e ngaahi ʻaho ʻo ʻene Nāsilí,+ ʻe ʻomi ai ia ki he hūʻanga ʻo e tēniti feʻiloakiʻangá. 14 Kuo pau ke ne ʻoatu ʻi ai ʻene feilaulau kia Sihová: ʻA e kiʻi sipi tangata taʻemele ʻe taha ʻi hono ʻuluaki taʻú ko ha feilaulau tutu,+ ko e lami fefine taʻemele ʻe taha ʻi hono ʻuluaki taʻú ko ha feilaulau angahala,+ ko e sipi tangata taʻemele ʻe taha ko ha feilaulau feʻinasiʻaki,+ 15 ko ha kato ʻo e mā taʻelēvani fuo hangē ha foʻi mamá mei he mahoaʻa lelei kuo natu ʻaki ʻa e lolo, ko e mā manifinifi taʻelēvani kuo valiʻaki ʻa e lolo, fakataha mo honau feilaulau meʻakaí+ mo honau ngaahi feilaulau inú.+ 16 ʻE ʻoatu ia ʻe he taulaʻeikí ʻi he ʻao ʻo Sihová pea te ne ʻohake ʻa ʻene feilaulau angahalá mo ʻene feilaulau tutú. 17 Te ne foaki ʻa e sipi tangatá ko ha feilaulau feʻinasiʻaki kia Sihova fakataha mo e kato ʻo e ngaahi foʻi mā taʻelēvaní, pea ʻe ʻoatu ʻe he taulaʻeikí ʻa hono feilaulau meʻakaí+ mo hono feilaulau inú.

18 “‘Kuo pau leva ke tele ʻe he Nāsilí ʻa e fulufulu kuo teʻeki ke kosi ʻo hono ʻulú*+ ʻi he hūʻanga ʻo e tēniti feʻiloakiʻangá, pea te ne toʻo ʻa e fulufulu ʻo hono ʻulú ʻa ia ne tupu lolotonga ʻa ʻene Nāsilí ʻo ʻai ia ki he afi ʻa ia ʻoku ʻi lalo ʻi he feilaulau feʻinasiʻakí. 19 Pea ko e taulaʻeikí kuo pau ke ne toʻo ha alanga muʻa kuo haka+ mei he sipi tangatá, ko e foʻi mā taʻelēvani fuo hangē ha foʻi mamá ʻe taha mei he kató, mo e foʻi mā manifinifi taʻelēvani ʻe taha, ʻo ʻai ia ki he ongo ʻaofinima ʻo e Nāsilí hili ʻene tele ʻa e fakaʻilonga ʻo ʻene Nāsilí. 20 Pea ko e taulaʻeikí kuo pau ke ne hapai ia ki muʻa mo mui ko ha feilaulau hapai ʻi he ʻao ʻo Sihová.+ Ko e meʻa toputapu ia ki he taulaʻeikí, fakataha mo e fatafata ʻo e feilaulau hapaí mo e alanga kuo foaki ko ha meʻaʻofá.+ ʻI he hili iá, ʻe lava ke inu uaine ʻa e tokotaha Nāsilí.

21 “‘Ko e lao eni fekauʻaki mo e Nāsili+ ʻokú ne fai ha fuakavá: Kapau ʻokú ne fuakava pea lava ke ne fai ha feilaulau kia Sihova ʻa ia ʻoku mahulu atu ia ʻi he ngaahi fiemaʻu ki heʻene Nāsilí, kuo pau leva ke ne fakahoko ʻa ʻene fuakavá koeʻuhi ko ʻene tokanga ki he lao ʻo ʻene Nāsilí.’”

22 Naʻe folofola leva ʻa Sihova kia Mōsese ʻo pehē: 23 “Tala kia ʻĒlone mo hono ngaahi fohá, ‘Ko e founga eni ʻoku totonu ke mou tāpuakiʻi+ ai ʻa e kakai ʻo ʻIsilelí. Te mou lea kiate kinautolu:

24 “ʻOfa ke tāpuakiʻi koe+ ʻe Sihova mo maluʻi koe.

25 ʻOfa ke ʻai ʻe Sihova ke ulo mai ʻa hono fofongá kiate koe,+ pea ʻofa ke ne hōifua mai kiate koe.

26 ʻOfa ke hiki hake ʻe Sihova ʻa hono fofongá kiate koe pea ʻoatu kiate koe ʻa e melinó.”’+

27 Pea kuo pau ke nau ʻai hoku huafá ki he kakai ʻo ʻIsilelí,+ ke u tāpuakiʻi ai kinautolu.”+