Fakamaau

8 Pea naʻe pehē ʻe he kau tangata ʻo ʻIfalemí kiate ia: “Ko e hā kuó ke fai kiate kimautolú? Ko e hā naʻe ʻikai te ke ui mai ai kimautolu ʻi hoʻo ʻalu ke tauʻi ʻa Mitianí?”+ Pea naʻa nau felāuaki lahi mo ia.+ 2 Ka naʻá ne pehē kiate kinautolu: “Ko e hā hake ha meʻa kuó u fai ʻe ala fakatatau kiate kimoutolu? ʻIkai ʻoku lelei hake ʻa e toetoenga kālepi ʻa ʻIfalemí+ ʻi he toʻu kālepi ʻa ʻApiesá?+ 3 Naʻe tuku atu ʻe he ʻOtuá ki homou nimá ʻa e ongo ʻeiki Mitiani ko ʻŌlepi mo Sīpí,+ pea ko e hā hake ai ha meʻa kuó u fai ʻe ala fakatatau kiate kimoutolu?” ʻI heʻene lea pehení, naʻa nau mokomoko hifo ai.*

4 Naʻe aʻu leva ʻa Kitione ki Sioatani ʻo ne kolosi ai. Ko ia mo e kau tangata ʻe toko 300 naʻe ʻiate iá naʻa nau helaʻia, ka naʻa nau kei tulimui atu pē. 5 Ko ia naʻá ne pehē ki he kau tangata ʻo Sūkoté: “ʻOmai muʻa ha ngaahi foʻi mā ki he kakai ʻoku muimui ʻiate aú, he ʻoku nau helaʻia pea ʻoku ou tulimui kia Sepa mo Salamuna, ko e ongo tuʻi ʻo Mitianí.” 6 Ka naʻe pehē ange ʻe he houʻeiki ʻo Sūkoté: “He kuo ʻosi ʻi ho nimá koā ʻa e ʻaofinima ʻo Sepa mo Salamuná ke mau ʻoatu ai ha mā ki hoʻo kau taú?” 7 Ko ia naʻe pehē ange ai ʻe Kitione: “Koeʻuhi ko e meʻa ko iá, ʻi he taimi pē ʻe tuku mai ai ʻe Sihova ʻa Sepa mo Salamuna ki hoku nimá, te u haha kimoutolu ʻaki ʻa e ʻakau talatala pea mo e talatalaʻāmoa ʻo e toafá.”+ 8 Pea naʻá ne ʻalu hake mei ai ki Penueli peá ne fai ʻa e kole tatau, ka naʻe ʻoange kiate ia ʻe he kau tangata ʻo Penuelí ʻa e tali tatau mo ia naʻe fai ʻe he kau tangata ʻo Sūkoté. 9 Ko ia naʻá ne toe pehē foki ki he kau tangata ʻo Penuelí: “ʻI he taimi te u foki mai ai kuó u ikuná, te u holoki ʻa e tauá ni.”+

10 Pea naʻe ʻi Kalikoa ʻa Sepa mo Salamuna mo ʻena kau taú, ko e kau tangata nai ʻe toko 15,000. Ko e faʻahinga kotoa eni naʻe toe mei he kau tau fakakātoa ʻa e kau Hahaké,+ he naʻe ʻosi tō ʻa e kau tangata toʻo heletā ia ʻe toko 120,000. 11 Naʻe ʻalu hake ai pē ʻa Kitione ʻi he hala ʻo e kau nofo tēnití ʻi he hahake ʻo Nopa mo Siokipehá+ ʻo ne ʻohofi ʻa e ʻapitangá, ʻa ia naʻe ʻikai mateuteu ki hano ʻohofi. 12 ʻI he hola ʻa Sepa mo Salamuná, naʻá ne tulimui atu ʻo ne maʻu ʻa e ongo tuʻi Mitianí, ʻa Sepa mo Salamuna, pea naʻe ʻai ai ʻa e ʻapitangá fakakātoa ke nau hohaʻatuʻu.

13 Naʻe foki leva ʻa Kitione ko e foha ʻo Sōasí mei he taú ʻi he hala ʻoku ʻalu hake ki Helesá. 14 ʻI heʻene fononga atú naʻá ne puke ai ʻo fakaʻekeʻeke ha talavou mei Sūkote. Ko ia naʻe tohi ange ʻe he talavoú kiate ia ʻa e hingoa ʻo e houʻeiki mo e kau mātuʻa ʻo Sūkoté, ko e kau tangata ʻe toko 77. 15 Ko ia naʻá ne ʻalu ki he kau tangata ʻo Sūkoté ʻo ne pehē: “Ko Sepa eni mo Salamuna ʻa ia naʻa mou manukiʻi ai au, ʻo pehē, ‘He kuo ʻosi ʻi ho nimá koā ʻa e ʻaofinima ʻo Sepa mo Salamuná ke mau ʻoatu ai ha mā ki hoʻo kau tangata kuo ongosiá?’”+ 16 Naʻá ne ʻave leva ʻa e kau mātuʻa ʻo e koló, pea naʻá ne akoʻi ʻaki ʻa e ʻakau talatala mo e talatalaʻāmoa ʻo e toafá ha lēsoni+ ki he kau tangata ʻo Sūkoté. 17 Pea naʻá ne holoki ʻa e taua ʻo Penuelí+ pea tāmateʻi ʻa e kau tangata ʻo e koló.

18 Naʻá ne ʻeke ange kia Sepa mo Salamuna: “Ko e kau tangata fēfē naʻá mo tāmateʻi ʻi Tēpoá?” ʻI he meʻá ni naʻá na pehē: “Naʻa nau hangē pē ko koé, ko e tokotaha taki taha naʻe hā mai ʻo hangē ko e foha ʻo ha tuʻí.” 19 Naʻá ne pehē ange ai: “Ko hoku fanga tokoua kinautolu, ko e fānau ʻa ʻeku faʻeé. ʻOku ou fuakava ʻia Sihova ko e ʻOtua moʻuí, kapau naʻá mo fakahaofi ʻenau moʻuí, ne ʻikai mei pau ai ke u tāmateʻi kimoua.” 20 Naʻá ne pehē ange leva kia Sēteli ko hono ʻuluaki fohá: “Tuʻu hake, ʻo tāmateʻi kinaua.” Ka naʻe ʻikai ke unuhi ʻe he talavoú ʻene heletaá; naʻá ne ilifia, he naʻá ne kei siʻi. 21 Ko ia naʻe pehē ʻe Sepa mo Salamuna: “Tuʻu hake koe ʻo tāmateʻi kimaua, he ʻoku lau ha tangata ʻi hono mālohí.”* Ko ia naʻe tuʻu hake ʻa Kitione ʻo ne tāmateʻi ʻa Sepa mo Salamuna+ peá ne toʻo ʻa e fanga kiʻi meʻa-teuteu fuo hangē ha māhina-kalipá naʻe fakakahoa ʻi he kia ʻo ʻena ongo kāmelí.

22 Ki mui ai, naʻe pehē ange ʻe he kau tangata ʻo ʻIsilelí kia Kitione: “Pule mai koe kiate kimautolu, ʻa koe mo ho fohá pea pehē foki ki ho mokopuna tangatá, he naʻá ke fakahaofi kimautolu mei he nima ʻo Mitianí.”+ 23 Ka naʻe pehē ʻe Kitione kiate kinautolu: “Heʻikai te u pule au kiate kimoutolu, pe pule hoku fohá kiate kimoutolu. Ko Sihova ʻa e tokotaha ʻe pule kiate kimoutolú.”+ 24 Naʻe hoko atu ʻa Kitione: “Tuku muʻa ke u fai atu ha kiʻi kole ʻe taha kiate kimoutolu: Ke ʻomai ʻe he tokotaha taki taha ʻo kimoutolu kiate au ha foʻi mama-ihu mei heʻene koloa veté.” (He naʻa nau maʻu ha ngaahi foʻi mama-ihu koula koeʻuhí ko e kau ʻIsimeʻeli kinautolu.)+ 25 Naʻa nau tali ange: “Te mau mātuʻaki ʻoatu ia.” Ko ia naʻa nau folahi ha pulupulu pea naʻe lī ki ai ʻe he tangata taki taha ha foʻi mama-ihu mei heʻene koloa veté. 26 Ko e mamafa ʻo e ngaahi foʻi mama-ihu koula ko ia naʻá ne kolé ko hono fakakātoá ko e sikeli* koula ʻe 1,700, tuku kehe ʻa e fanga kiʻi meʻa-teuteu fuo hangē ha māhina-kalipá, ko e fanga kiʻi teuteu ʻo e kahoá, ko e ngaahi kofu fulufuluʻisipi vāleti naʻe tui ʻe he ngaahi tuʻi ʻo Mitianí, pea mo e ngaahi kahoa mei he fanga kāmelí.+

27 Naʻe ngaohiʻaki ia ʻe Kitione ha ʻēfoti+ pea fakaʻaliʻali ia ʻi hono kolo ko ʻŌfilá;+ pea naʻe faifeʻauaki fakalaumālie ʻa ʻIsileli kotoa ki he meʻa ko iá ʻi ai,+ pea naʻe hoko ia ko ha tauhele kia Kitione pea ki hono falé.+

28 Ko ia naʻe fakavaivaiʻi ai ʻa Mitiani+ ʻi he ʻao ʻo e kau ʻIsilelí, pea naʻe ʻikai te nau toe poleʻi kinautolu;* pea naʻe nonga ʻa e fonuá ʻi he taʻu ʻe 40 ʻi he ngaahi ʻaho ʻo Kitioné.+

29 Ko ia ai, naʻe foki ʻa Selupēali+ ko e foha ʻo Sōasí ki hono ʻapí ʻo ne nofo ai.

30 Naʻe hoko ʻa Kitione ko e tamai ʻa ha ngaahi foha ʻe toko 70,* he naʻá ne maʻu ha ngaahi uaifi tokolahi. 31 Naʻe fanauʻi foki ʻe heʻene sinifu ʻi Sīkemí ha foha kiate ia, pea naʻá ne fakahingoa ia ko ʻApimeleki.+ 32 Pea naʻe mate ʻa Kitione ko e foha ʻo Sōasí kuó ne toulekeleka ʻaupito, pea naʻe tanu ia ʻi he fonualoto ʻo Sōasi ko ʻene tamaí ʻi ʻŌfila ʻo e haʻa ʻApiesá.+

33 ʻI he mate pē ʻa Kitioné, naʻe toe faifeʻauaki fakalaumālie ʻa e kau ʻIsilelí ki he ngaahi Pēalí,+ pea naʻa nau fakanofo ʻa Pēali-peliti ke hoko ko honau ʻotua.+ 34 Naʻe ʻikai ke manatuʻi ʻe he kau ʻIsilelí ʻa Sihova ko honau ʻOtuá,+ ʻa ia naʻá ne fakahaofi kinautolu mei he nima ʻo e kotoa ʻo honau ngaahi fili takatakai ʻiate kinautolú;+ 35 pea naʻe ʻikai te nau fakahaaʻi ʻa e ʻofa mateaki ki he fale ʻo Selupēalí, ʻa ia ko Kitione ia, ke tuha mo e ngaahi lelei kotoa naʻá ne fai maʻa ʻIsilelí.+