ʻIsikeli

26 ʻI he taʻu hono 11, ʻi he ʻuluaki ʻaho ʻo e māhiná, naʻe hoko mai ai ʻa e folofola ʻa Sihová kiate au, ʻo pehē: 2 “Foha ʻo e tangata, koeʻuhi kuo fai ʻe Tāia ha lau ki Selusalema+ ʻo pehē, ‘Sai ē! Ko e matapā ʻo e ngaahi kakaí kuo maumau!+ ʻE haʻu kiate au ʻa e meʻa kotoa pē, pea te u hoko ʻo tuʻumālie he ko eni kuó ne ʻauha’; 3 ko ia ai, ko e meʻa eni ʻoku folofolaʻaki ʻe he ʻEiki Hau ko Sihová: ‘Ko eni kuó u hoko ko ho fili, ʻe Tāia, pea te u ʻohake ʻa e ngaahi puleʻanga lahi ke nau tuʻu kiate koe, hangē ko hono ʻohake ʻe he tahí ʻa hono ngaahi peaú. 4 Te nau fakaʻauha ʻa e ngaahi ʻā ʻo Tāiá pea holoki ʻa hono ngaahi tauá,+ pea te u vaku ʻa e kelekelé mei ai pea ʻai ia ke ne hoko ko ha funga maka ngingila mo tekelei. 5 Te ne hoko ko ha feituʻu fakamōmoaʻanga kupenga ʻi loto tahi.’+

“‘He ko au kuó u leá,’ ko e fakahaaʻi ia ʻe he ʻEiki Hau ko Sihová, ‘pea te ne hoko ko ha koloa vete ʻa e ngaahi puleʻangá. 6 Pea ko hono ngaahi kolo ʻi he feituʻu ʻutá ʻe tāmateʻi ʻaki ʻa e heletā, pea kuo pau ke ʻilo ʻe he kakaí ko Sihova au.’

7 “He ko e meʻa eni ʻoku folofolaʻaki ʻe he ʻEiki Hau ko Sihová: ‘Ko eni te u ʻomi ʻa Tuʻi Nepukanesa* ʻo Pāpiloné mei he tokelaú+ ke ne tauʻi ʻa Tāia; ko ha tuʻi ia ʻo e ngaahi tuʻi,+ fakataha mo ha fanga hoosi,+ mo e ngaahi saliote tau,+ mo e kau tangata heka hoosi, pea mo ha kau tau ʻo ha fuʻu kau sōtia* tokolahi. 8 Te ne fakaʻauha ho ngaahi kolo ʻi he feituʻu ʻutá ʻaki ʻa e heletā, pea te ne langa ha ʻā ke ʻākoloʻi ʻaki pea fokotuʻu ha fakatafunga kelekele ke ʻākoloʻi koe pea fokotuʻu ha ngaahi pā ko ha fakaū ki hono tauʻi koé. 9 Te ne haveki ho ngaahi ʻaá ʻaki ʻene ngaahi fuʻu meʻa-teké, pea te ne holoki ho ngaahi tauá ʻaki ʻene ngaahi fuʻu tokí.* 10 Ko ʻene fanga hōsí ʻe fuʻu tokolahi ʻo nau kāpui koe ʻaki ʻa e efú, pea ko e longoaʻa ʻo e kau tau heka hōsí, mo e ngaahi veʻeteká, pea mo e ngaahi salioté te nau luluʻi ho ngaahi ʻaá ʻi heʻene hū atu ʻi ho ngaahi matapaá, ʻo hangē ha kau tangata ʻoku nau matua atu ki ha kolo kuo maumau hono ngaahi ʻaá. 11 ʻE taupātū atu ʻa e topuvaʻe ʻo ʻene fanga hōsí ʻi he kotoa ho ngaahi halá;+ te ne tāmateʻi ho kakaí ʻaki ʻa e heletā, pea ko ho ngaahi pou kaukauá ʻe movete hifo ki he kelekelé. 12 Te nau kaihaʻasi fakamālohi hoʻo ngaahi koloá, pea faʻao fakamālohi ʻa hoʻo ngaahi koloa ke fakataú,+ pea laiki hifo ho ngaahi ʻaá, pea holoki mo ho ngaahi fale fakaʻofoʻofá; pea te nau laku ki he vaí ʻa hoʻo ngaahi maká mo hoʻo ngaahi meʻa ngaohi mei he papá pea mo ho kelekelé.’

13 “‘Te u fakangata ʻa e longoaʻa ʻa hoʻo ngaahi hivá, pea ko e leʻo ʻo hoʻo ngaahi haʻapé ʻe ʻikai ke toe ongona.+ 14 Pea te u ʻai koe ke ke hoko ko ha funga maka ngingila mo tekelei, pea te ke hoko ko ha feituʻu fakamōmoaʻanga kupenga.+ ʻE ʻikai ʻaupito ke toe langa koe, he ko au, Sihova tonu, kuó u leá,’ ko e fakahaaʻi ia ʻe he ʻEiki Hau ko Sihová.

15 “Ko e meʻa eni ʻoku folofolaʻaki ʻe he ʻEiki Hau ko Sihová ki Tāiá: ‘ʻI he ongona ʻa hoʻo toó, ʻi he toʻe ʻa e faʻahinga ʻoku mei maté,* ʻi he hoko ʻa e tāmaté ʻi ho lotolotongá, ʻikai ʻe tete ai ʻa e ngaahi motú?+ 16 Ko e houʻeiki* kotoa ʻo e tahí te nau ʻalu hifo mei honau ngaahi taloní pea toʻo honau ngaahi kofu tōtōlofá* pea huʻi atu honau ngaahi kofu kuo tui-teuteú, pea ʻe maʻunimā kinautolu ʻe he* teteteté. Te nau tangutu ʻi he kelekelé mo tetetete ai pē ʻo nau sio fakamamaʻu kiate koe ʻi he fakaofoʻia.+ 17 Pea te nau hivaʻaki ha taʻanga tangi*+ kiate koe mo nau pehē atu kiate koe:

19 “He ko e meʻa eni ʻoku folofolaʻaki ʻe he ʻEiki Hau ko Sihová: ‘ʻI heʻeku ʻai koe ke ke maomaonganoa ʻo hangē ko e ngaahi kolo ʻoku ʻikai ke nofoʻí, ʻi heʻeku lōmekina koe ʻaki ʻa e ngaahi vai ʻoku tafe mālohí ʻo ʻufiʻufi koe+ ʻe he ngaahi fuʻu vai lahí, 20 te u ʻohifo foki koe, ʻo hangē pē ko ʻeku ʻohifo ʻa e kotoa ʻo e niʻihi kehé ki he luó* pea ki he feituʻu ʻoku ʻi ai ʻa e kakai ne fuoloa ʻenau maté; te u ʻai koe ke ke nofo ʻi he feituʻu māʻulalo tahá, mo e ngaahi feituʻu kehe kuo fuoloa ʻene maomaonganoá, fakataha mo e faʻahinga ʻoku ʻalu hifo ki he luó,+ koeʻuhi ke ʻoua naʻa nofoʻi koe. Pea te u fakalāngilangiʻi* leva ʻa e fonua ʻo e kau moʻuí.

21 “‘Te u fakahoko fakafokifā mai ha meʻa fakamanavahē kiate koe, pea ʻe ʻikai te ke kei hoko ʻo ʻi ai.+ Te nau kumi kiate koe, ka heʻikai ʻaupito ke toe maʻu koe,’ ko e fakahaaʻi ia ʻe he ʻEiki Hau ko Sihová.”