Ki he Kau Loma

4 ʻI heʻene peheé, ko e hā te tau leaʻaki naʻe maʻu ʻe ʻĒpalahame, ko ʻetau kuí ʻo fakatatau ki he tukufakaholo fakaekakanó? 2 Hangē ko ení, kapau naʻe lau ʻoku māʻoniʻoni ʻa ʻĒpalahame tupu mei heʻene ngaahi ngāué, ne mei ʻi ai ha ʻuhinga ke ne pōlepole ai, kae ʻikai ʻi he ʻao ʻo e ʻOtuá. 3 He ko e hā ʻa e lau ʻa e potu folofolá? “Naʻe tui ʻa ʻĒpalahame kia Sihova,* pea naʻe lau ai ia ʻokú ne māʻoniʻoni.”+ 4 Pea ki he tangata ʻoku ngāué, ʻoku ʻikai lau ʻa e totongi ʻokú ne maʻú ko ha ʻofa maʻataʻatā ka ko ha meʻa ia kuo pau* ke totongi kiate ia. 5 ʻI he tafaʻaki ʻe tahá, ki he tangata ʻoku ʻikai te ne fai ʻa e ngaahi ngāué ka ʻokú ne tui ki he Tokotaha ʻokú ne lau ʻa e tokotaha anga-taʻefakaʻotuá ʻoku māʻoniʻoní, ʻoku lau ia ʻokú ne māʻoniʻoni ʻi heʻene tuí.+ 6 Hangē pē foki ko e lea ʻa Tēvita ʻo kau ki he fiefia ʻa e tangata ʻa ia ʻoku lau ʻe he ʻOtuá ʻoku māʻoniʻoni ʻo taʻekau ai ʻa e ngaahi ngāué: 7 “Fiefia ē ko e faʻahinga kuo fakamolemoleʻi ʻenau ngaahi ngāue maumau-laó pea kuo ʻufiʻufi* ʻenau ngaahi angahalá; 8 fiefia ē ko e tangata ʻa ia ʻe ʻikai ʻaupito lau ʻe Sihova* ʻa ʻene angahalá.”+

9 Ko ia ʻoku hoko mai ʻa e fiefia ko ení ki he kakai kamú pē pe ʻoku toe kau ai mo e kakai taʻekamú?+ He ʻoku tau pehē: “Ko e tui ʻa ʻĒpalahamé naʻe lau ai ia ʻokú ne māʻoniʻoni.”+ 10 ʻI he ngaahi tuʻunga fē leva naʻe lau ai ia ʻokú ne māʻoniʻoní? ʻI he taimi naʻe kamu aí pe ʻi heʻene taʻekamú? ʻI he taimi naʻá ne kei taʻekamu aí. 11 Pea naʻá ne maʻu ha fakaʻilonga+—ʻa ia, ko e kamú—ko ha sila* ia ʻo e māʻoniʻoní ko e meʻa ʻi he tui ko ia naʻá ne maʻu lolotonga ʻene ʻi he tuʻunga taʻekamú, koeʻuhi ke ne hoko ai ko e tamai ʻa e faʻahinga kotoa ʻoku tui+ lolotonga ʻa e kei taʻekamú, koeʻuhi ke lau ai kinautolu ʻoku nau māʻoniʻoni; 12 pea koeʻuhi ke ne hoko ai ko ha tamai ʻa e fānau kamú, ʻo ʻikai ki he faʻahinga pē ʻoku nau pīkitai ki he kamú kae pehē foki ki he faʻahinga ʻoku ʻaʻeva taau ʻo molomolo muivaʻe ʻi he tui naʻe maʻu ʻe heʻetau tamai ko ʻĒpalahamé+ lolotonga ʻa ʻene kei ʻi he tuʻunga taʻekamú.

13 He naʻe ʻikai fakafou ʻi he laó ʻa e maʻu ʻe ʻĒpalahame pe ko hono hakó ʻa e talaʻofa ke ne hoko ko e ʻea ki ha māmani,*+ ka naʻe fakafou ia ʻi he māʻoniʻoni tupu mei he tuí.+ 14 He kapau ko e ngaahi ʻeá ʻa e faʻahinga ʻoku pīkitai ki he laó, ʻe hoko ai ʻa e tuí ʻo taʻeʻaonga pea kuo fakataʻeʻaongaʻi ai ʻa e talaʻofá. 15 Ko hono moʻoní, ʻoku fakatupu ʻe he Laó ʻa e houhau,+ ka ʻi he ʻikai ʻi ai ha laó, ʻoku ʻikai foki ke ʻi ai ha maumau-lao.+

16 Naʻe maʻu ʻe ʻĒpalahame ʻa e talaʻofá koeʻuhi ko ʻene tuí, pea ko e fakahāhā foki eni ʻo e ʻofa maʻataʻatā ʻa e ʻOtuá.+ Ko ia naʻe toe maʻu ʻe hono hakó ʻa e talaʻofa ko iá.+ Naʻe ʻikai ko e faʻahinga pē ko ia naʻe pīkitai ki he Laó naʻa nau maʻu ʻa e talaʻofá, ka naʻe toe pehē foki ki he faʻahinga ʻoku nau maʻu ʻa e tuí hangē ko ʻĒpalahamé, ʻa ia ko e tamai ia ʻa kitautolu kotoá.+ 17 (Ko e meʻá ni ʻoku hangē tofu pē ia ko ia kuo tohi: “Kuó u fakanofo koe ko ha tamai ʻa e ngaahi puleʻanga lahi.”)+ Naʻe hoko eni ʻi he ʻao ʻo e ʻOtuá, ʻa ia naʻá ne tui ki aí, ʻa ia ʻokú ne ʻai ke moʻui ʻa e maté peá ne lea ʻo kau ki he ngaahi meʻa ʻoku ʻikai ʻi aí ʻo hangē ia ʻoku ʻi aí. 18 Naʻá ne ʻamanaki pea naʻá ne maʻu ʻa e tui te ne hoko ko e tamai ʻa ha ngaahi puleʻanga lahi, neongo naʻe hā ngali taʻemalava ia. Naʻá ne tui ʻo fakatatau ki he meʻa naʻe folofolaʻakí: “ʻE hoko ʻo pehē ho hakó.”+ 19 Pea neongo naʻe ʻikai fakaʻaʻau ke vaivai ʻene tuí, naʻá ne fakakaukau ki hono sinó tonu, ʻa ia naʻe hangē pē ia he taimi ko ení kuo maté (koeʻuhí naʻá ne taʻu 100 nai),+ pehē foki ki he mate* ʻa e manava ʻo Selá.+ 20 Ka koeʻuhi ko e talaʻofa ʻa e ʻOtuá, naʻe ʻikai ai te ne tālafili koeʻuhi ko haʻane taʻetui; ka naʻá ne hoko ʻo mālohi ko e meʻa ʻi heʻene tuí, ʻo ne ʻoatu ai ʻa e lāngilangí ki he ʻOtuá 21 peá ne tuipau kakato ko e meʻa kuó Ne talaʻofaʻaki maí naʻá Ne toe malava foki ke fakahoko ia.+ 22 Ko ia ai, “naʻe lau ai ia ʻokú ne māʻoniʻoni.”+

23 Kae kehe, ko e lea ko ia, “naʻe lau ai ia ʻokú ne māʻoniʻoni,” naʻe ʻikai hiki ia kiate ia tokotaha pē,+ 24 ka naʻe toe pehē foki kiate kitautolu, ʻa e faʻahinga ʻoku lau ʻe he ʻOtuá ʻoku māʻoniʻoní, koeʻuhí ʻoku tau tui kiate Ia ʻa ia naʻá ne fokotuʻu hake ʻa Sīsū ko hotau ʻEikí mei he maté.+ 25 Naʻe tuku atu ia koeʻuhi ko ʻetau ngaahi faihalá+ pea naʻe fokotuʻu hake koeʻuhi ke lau ai kitautolu ʻoku tau māʻoniʻoni.+