ʻUluaki Tuʻi

6 ʻI he taʻu hono 480 hili ʻa e hū ki tuʻa ʻa e kau ʻIsilelí* mei he fonua ko ʻIsipité,+ ʻi he taʻu hono fā hili ʻa e hoko ʻa Solomone ko e tuʻi ki ʻIsilelí, ʻi he māhina ko Siví*+ (ʻa ia ko e māhina hono uá), naʻe kamata ai ke ne langa ʻa e fale ʻo Sihová.*+ 2 Ko e fale ko ia naʻe langa ʻe Tuʻi Solomone maʻa Sihová naʻe kiupite* ʻe 60 hono lōloá, kiupite ʻe 20 hono fālahí, pea kiupite ʻe 30 hono māʻolungá.+ 3 Ko e fale-hūʻanga+ ʻi he konga ki muʻa ʻo e temipalé* naʻe kiupite ʻe 20 hono lōloá,* ʻo tatau mo e fālahi ʻo e falé.* Ko hono lōloa ki loto mei he konga ki muʻa ʻo e falé naʻe kiupite ʻe hongofulu.

4 Naʻá ne ngaohi ki he falé ha ngaahi matapā teuteu fāsiʻi.+ 5 ʻIkai ko ia pē, naʻá ne langa ha faʻunga fakafale ʻi he tafaʻakí ʻo faʻaki ki he holisi ʻo e falé; naʻe lele takai ia ʻi he ngaahi holisi ʻo e falé, ʻa e holisi ʻo e temipalé* pea mo e loki taupotu taha ki lotó,+ pea naʻá ne ngaohi ha ngaahi loki ʻi he tafaʻakí ʻo takatakai ai.+ 6 Ko e ʻotu taupotu taha ki lalo ʻo e ngaahi loki ʻi he tafaʻakí naʻe kiupite ʻe nima hono fālahí, ko e ʻotu ʻi lotó naʻe kiupite ʻe ono hono fālahí, pea ko e ʻotu hono tolú naʻe kiupite ʻe fitu hono fālahí, he naʻá ne ngaohi ha ngaahi fakanifo* takatakai ʻi he falé, koeʻuhí ke ʻoua naʻa toe fakamaʻu ha meʻa ki he holisi ʻo e falé.+

7 Naʻe langa ʻa e falé ʻaki ha maka naʻe ʻosi teuteu+ mei ha keliʻanga maka, ko ia naʻe ʻikai ai ke fai ha fanongo ki ha hāmala pe ko ha toki pe ko ha meʻangāue ukamea pē ʻi he falé he lolotonga hono langá. 8 Ko e hūʻanga ʻo e loki ʻi he tafaʻakí ʻa ia naʻe taupotu taha ki laló naʻe ʻi he tafaʻaki fakatonga* ia ʻo e falé,+ pea naʻe ʻalu hake ha sitepu takai ʻo aʻu ki he fungavaka ʻuluakí, pea mei he fungavaka ʻuluakí ki he fungavaka hono uá. 9 Naʻe hoko atu ai pē ʻene langa ʻa e falé ʻo fakaʻosi ia+ pea ʻato ʻa e falé ʻaki ʻa e ngaahi foʻi papa sita mo e ngaahi ʻotu lauʻipapa sita.+ 10 Naʻá ne langa ʻa e ngaahi loki ʻi he tafaʻakí ʻo ʻalu takatakai ʻi he falé,+ naʻe taki kiupite ʻe nima honau māʻolungá, pea naʻe hokoʻi ia ki he falé ʻaki ha ngaahi foʻi papa sita.

11 Lolotonga iá, naʻe hoko mai ʻa e folofola ʻa Sihová kia Solomone, ʻo pehē: 12 “Ko e meʻa ki he fale ko eni ʻokú ke langá, kapau te ke ʻaʻeva ʻi heʻeku ngaahi tuʻutuʻuní pea fakahoko ʻa ʻeku ngaahi fakamāú pea tauhi ʻa ʻeku ngaahi fekaú kotoa ʻaki hoʻo ʻaʻeva ai,+ te u fakahoko foki kiate koe ʻa ʻeku talaʻofa naʻá ku fai kia Tēvita ko hoʻo tamaí,+ 13 pea te u nofo ʻi he lotolotonga ʻo e kau ʻIsilelí,+ pea heʻikai te u siʻaki hoku kakai ko ʻIsilelí.”+

14 Naʻe hokohoko atu hono langa ʻe Solomone ʻa e falé ke fakaʻosi ia. 15 Naʻá ne langa ʻa e ngaahi holisi ʻi loto ʻo e falé ʻaki ʻa e ngaahi lauʻipapa sita. Naʻá ne ʻaofi ʻa e ngaahi holisi ʻi lotó ʻaki ʻa e papa, mei he faliki ʻo e falé ʻo aʻu hake ki he ngaahi sā ʻo e ʻaofí, pea naʻá ne ʻufiʻufi ʻa e faliki ʻo e falé ʻaki ʻa e ngaahi lauʻipapa siunipa.+ 16 Pea naʻá ne langa ha loki naʻe feʻunga mo e kiupite ʻe 20 ʻi he tafaʻaki ki mui ʻo e falé ʻaki ha ngaahi lauʻipapa sita, mei he falikí ʻo aʻu hake ki he ngaahi saá, pea naʻá ne langa ʻi loto ai* ʻa e loki taupotu taha ki lotó,+ ʻa e Potu Fungani Toputapú.+ 17 Pea ko e temipalé*+—ʻa e konga ʻi muʻa ʻo e falé—naʻe kiupite ʻe 40. 18 Ko e sita ʻi loto ʻi he falé naʻe tongi ai ʻa e ngaahi foʻi fuaʻiʻakau fuopotopoto+ pea mo e ngaahi matalaʻiʻakau.+ Naʻe sita kotoa ia; naʻe ʻikai mātā ha maka ai.

19 Pea naʻá ne teuteu ʻa e loki taupotu taha ki lotó+ ʻi he loto falé ke tuku ki ai ʻa e ʻaʻake ʻo e fuakava ʻa Sihová.+ 20 Ko e loki taupotu taha ki lotó naʻe kiupite ʻe 20 hono lōloá, kiupite ʻe 20 hono fālahí, pea kiupite ʻe 20 hono māʻolungá;+ pea naʻá ne ʻaofiʻaki ia ʻa e koula haohaoa; naʻá ne ʻaofi ʻa e ʻōlitá+ ʻaki ʻa e sita. 21 Naʻe ʻaofi ʻe Solomone ʻa e loto falé ʻaki ʻa e koula haohaoa,+ pea naʻá ne tau ha ngaahi sēini koula ʻi muʻa ʻi he loki taupotu taha ki lotó,+ ʻa ia naʻe ʻaofiʻaki ʻa e koulá. 22 Naʻá ne ʻaofi ʻa e falé fakakātoa ʻaki ʻa e koula kae ʻoua kuo kakato kotoa ʻa e falé; naʻá ne toe ʻaofiʻaki ʻa e koula ʻa e ʻōlitá fakakātoa+ ʻa ia naʻe ofi ki he loki taupotu taha ki lotó.

23 ʻI he loki taupotu taha ki lotó naʻá ne ngaohi ki ai ha ongo selupimi+ mei he papa painí, ʻo na taki kiupite ʻe hongofulu hona māʻolungá.+ 24 Ko e kapakau ʻe taha ʻo e selupimí naʻe fua ko e kiupite ʻe nima, pea kiupite ʻe nima mo e kapakau ʻe tahá. Naʻe kiupite ʻe hongofulu mei he hikuhiku ʻo e kapakau ʻe tahá ki he hikuhiku ʻo e kapakau ko eé. 25 Ko e selupimi hono uá naʻe kiupite ʻe hongofulu mo ia. Naʻe lahi mo fuo tatau pē ʻa e ongo selupimí. 26 Ko e māʻolunga ʻo e selupimi ʻe tahá naʻe kiupite ʻe hongofulu, pea naʻe pehē pē mo e selupimi ʻe tahá. 27 Naʻá ne tuku leva ʻa e ongo selupimí+ ki loto ʻi he Potu Fungani Toputapú. Naʻe mafola atu ʻa e kapakau ʻo e ongo selupimí ʻo aʻu ʻa e kapakau ʻo e selupimi ʻe tahá ki he holisi ʻe tahá pea aʻu ʻa e kapakau ʻo e selupimi ʻe tahá ki he holisi ʻe tahá, pea naʻe mafola atu hona ongo kapakaú ki he loto falé, ʻo fetaulaki ʻa e ongo kapakaú. 28 Pea naʻá ne kofu ʻa e ongo selupimí ʻaki ʻa e koula.

29 Pea ʻi he kotoa ʻo e ngaahi holisi takatakai ʻo e ongo loki ʻo e falé,* naʻá ne tongi ai ʻa e ngaahi fakatātā ʻo e ngaahi selupimi,+ mo e ʻulu paame,+ pea mo e ngaahi matalaʻiʻakau.+ 30 Pea ko e faliki ʻo e ongo loki ʻo e falé naʻá ne ʻufiʻufiʻaki ia ʻa e koula. 31 Pea ko e hūʻanga ʻo e loki taupotu taha ki lotó naʻá ne ngaohi ki ai ha ongo matapā mei he papa painí, ngaahi pou ʻi he tafaʻakí, mo e ongo pou matapaá, ko ha konga ia hono nima.* 32 Ko e ongo matapaá naʻe mei he papa painí, pea naʻá ne tongi ai ʻa e ngaahi selupimi, mo e ʻulu paame, pea mo e ngaahi matalaʻiʻakau, pea naʻá ne kofuʻi kinaua ʻaki ʻa e koula; pea naʻá ne tuki ʻa e koulá ki he ngaahi selupimí mo e ʻulu pāmé. 33 Naʻá ne ngaohi pehē pē mo e ongo pou matapā mei he papa painí ki he hūʻanga ʻo e temipalé,* ʻo kau ia ki ha konga hono fā.* 34 Pea naʻá ne ngaohi ha ongo matapā mei he papa siunipá. Ko e matapā ʻe taha naʻe laumatapā ʻe ua ʻa ia naʻe fakahīnisi, pea ko e matapā ʻe tahá naʻe laumatapā ʻe ua pea naʻe fakahīnisi+ mo ia. 35 Naʻá ne tongi ai ʻa e ngaahi selupimi, mo e ʻulu paame, mo e ngaahi matalaʻiʻakau, pea kofuʻi ʻaki ʻa e koula ʻa e ngaahi tā-tongitongí.

36 Naʻá ne langa ʻa e lotoʻā ʻi lotó+ ʻaki ʻa e maka ʻotu ʻe tolu naʻe tā pea mo ha ʻotu ʻe taha ʻo e ngaahi foʻi papa sita.+

37 ʻI he taʻu hono faá, ʻi he māhina ko Siví,* naʻe ʻosi ai ʻa e fakatoka ʻo e fakavaʻe+ ʻo e fale ʻo Sihová; 38 pea ʻi he taʻu hono 11, ʻi he māhina ko Pulí* (ʻa ia ko e māhina hono valú), naʻe ʻosi ai ʻa e falé mo hono ngaahi fakaikiikí kotoa pea fakatatau ki hono palaní.+ Ko ia naʻe feʻunga mo e taʻu ʻe fitu ʻa ʻene langa iá.