ʻIsikeli

34 Naʻe toe hoko mai ʻa e folofola ʻa Sihová kiate au, ʻo pehē: 2 “Foha ʻo e tangata, fai ha kikite ki he kau tauhi-sipi ʻo ʻIsilelí. Ke ke kikite, pea pehē ki he kau tauhi-sipí, ‘Ko e folofola eni ʻa e ʻEiki Hau ko Sihová: “ʻOiauē ʻa e kau tauhi-sipi ʻo ʻIsilelí,+ ʻa ia kuo nau fafanga pē ʻa kinautolú! ʻIkai ko e tākangá ʻoku totonu ke fafanga ʻe he kau tauhi-sipí?+ 3 ʻOku mou kai ʻa e ngakó, ʻoku mou kofuʻaki ʻa e fulufuluʻisipí, pea ʻoku mou tāmateʻi ʻa e monumanu sino tahá,+ ka ʻoku ʻikai te mou fafanga ʻa e tākangá.+ 4 Kuo ʻikai te mou fakaivimālohiʻi ʻa e vaivaí pe fakamoʻui ʻa e puké pe haʻihaʻi ʻa e laveá pe fakafoki mai ʻa ia kuo heé pe kumi kiate ia kuo molé;+ ʻi hono kehé, kuo mou pule kiate kinautolu ʻi he anga-fefeka mo e fakaaoao.+ 5 Ko ia ai, naʻa nau movetevete koeʻuhí naʻe ʻikai ha tauhi-sipi;+ naʻa nau movetevete pea hoko ko e meʻakai ki he manu fekai kotoa ʻo e vaó. 6 Naʻe hē ʻa ʻeku fanga sipí ʻi he ngaahi moʻunga kotoa pē pea ʻi he foʻi māʻolunga kotoa pē; naʻe movetevete atu ʻeku fanga sipí ʻi he funga kotoa ʻo e māmaní, ʻo ʻikai ha taha ʻe kumi kiate kinautolu pe feinga ke maʻu kinautolu.

7 “‘“Ko ia ai, ko kimoutolu kau tauhi-sipi, mou fanongo ki he folofola ʻa Sihová: 8 ‘“ʻOku ou fuakava ʻiate au,”* ko e fakahaaʻi ia ʻe he ʻEiki Hau ko Sihová, “koeʻuhi kuo hoko ʻa ʻeku fanga sipí ko e manu kuo pō, ko e meʻakai ki he manu fekai kotoa pē ʻo e vaó, he naʻe ʻikai ha tauhi-sipi, pea naʻe ʻikai ke kumi ʻa ʻeku kau tauhi-sipí ki heʻeku fanga sipí; ʻi hono kehé, naʻa nau hanganaki fafanga pē ʻa kinautolu ʻo ʻikai fafanga ʻa ʻeku fanga sipí,”’ 9 ko ia ai, ko kimoutolu kau tauhi-sipi, mou fanongo ki he folofola ʻa Sihová. 10 Ko e folofola eni ʻa e ʻEiki Hau ko Sihová: ‘Te u fakafepakiʻi ʻa e kau tauhi-sipí, pea te u kounaʻi ke nau fai ha fakamatala koeʻuhi ko ʻeku fanga sipí,* pea heʻikai te u fakaʻatā kinautolu ke nau fafanga* ʻeku fanga sipí,+ pea ʻe ʻikai kei fafanga ʻe he kau tauhi-sipí ʻa kinautolu pē. Te u fakahaofi ʻeku fanga sipí mei honau ngutú, pea heʻikai te nau kei hoko ko ha meʻakai kiate kinautolu.’”

11 “‘He ko e folofola eni ʻa e ʻEiki Hau ko Sihová: “Ko au eni, pea ko au tonu te u kumi ki heʻeku fanga sipí, pea te u tokangaʻi kinautolu.+ 12 Te u tokangaʻi ʻeku fanga sipí ʻo hangē ko ha tauhi-sipi kuó ne maʻu ʻa ʻene fanga sipi naʻe moveteveté peá ne fafanga kinautolu.+ Te u fakahaofi mai kinautolu mei he feituʻu kotoa naʻa nau movetevete ki aí ʻi he ʻaho ʻaoʻaofia mo fakapoʻuli matolu.+ 13 Te u ʻomi kinautolu mei he ngaahi kakaí pea tānaki mai kinautolu mei he ngaahi fonuá pea ʻomi kinautolu ki honau fonuá ʻo fafangaʻi kinautolu ʻi he ngaahi moʻunga ʻo ʻIsilelí,+ ʻi he veʻe vaitafé pea ʻi he veʻe nofoʻanga kotoa pē ʻi he fonuá. 14 Te u fafanga kinautolu ʻi ha kaikaiʻanga lelei, pea ko e konga fonua te nau kaikai aí ʻe ʻi he ngaahi moʻunga māʻolunga ʻo ʻIsilelí.+ Te nau tākoto ʻi ai ʻi ha konga fonua kaikaiʻanga lelei,+ pea te nau kai ʻi ha ngaahi kaikaiʻanga maʻuiʻui ʻi he ngaahi moʻunga ʻo ʻIsilelí.”

15 “‘“Ko au tonu te u fafanga ʻa ʻeku fanga sipí,+ pea ko au tonu te u ʻai kinautolu ke nau tākotó,”+ ko e fakahaaʻi ia ʻe he ʻEiki Hau ko Sihová. 16 “Ko ia naʻe molé te u kumi ki ai,+ ko ia naʻe heé te u fakafoki mai, ko ia naʻe laveá te u haʻihaʻi, pea ko e vaivaí te u fakaivimālohiʻi; ka ko ia ʻoku sinó pea mo ia ʻoku mālohí te u fakaʻauha ʻosi. Te u fafangaʻaki ia ʻa e fakamaau.”

17 “‘Ko e meʻa kiate kimoutolú, ʻa ʻeku fanga sipí, ko e folofola eni ʻa e ʻEiki Hau ko Sihová: “ʻOku teu ke u fai ha fakamaau ʻi he vahaʻa ʻo e sipi ʻe taha mo e sipi ʻe taha, ʻi he vahaʻa ʻo e fanga sipi tangatá mo e fanga kosi tangatá.+ 18 ʻOku ʻikai koā ke feʻunga ʻa hoʻomou kai ʻi he ngaahi kaikaiʻanga mātuʻaki lelei tahá? Te mou toe tāmalaki koā ʻa e toenga ʻo hoʻomou ngaahi kaikaiʻangá? Pea ʻi he hili ʻa e inu ʻi he vai tasilo tahá, te mou toe ʻuliʻi koā ʻa e vaí ʻaki hoʻomou taulaka holo aí? 19 ʻE kai koā ʻeku fanga sipí he taimí ni he kaikaiʻanga kuo mou tāmalakí pea inu ʻi he vai naʻa mou ʻuliʻi ʻi hoʻomou taulaka holo aí?”

20 “‘Ko ia ai, ko e folofola eni ʻa e ʻEiki Hau ko Sihová kiate kinautolú: “Ko au eni, pea ko au tonu te u fai ha fakamaau ʻi he vahaʻa ʻo ha sipi sino mo ha sipi tutue, 21 he naʻa mou hanganaki teke ʻaki homou tapaʻiketé mo homou alanga muʻá, pea naʻa mou hanganaki tua ʻaki homou meʻatuí ʻa kinautolu kotoa ʻoku puké kae ʻoua kuo mou fakamovetevete atu kinautolu ki he mamaʻó. 22 Pea te u fakahaofi ʻa ʻeku fanga sipí, pea heʻikai te nau kei hoko ko ha manu ke pō;+ pea te u fai ʻa e fakamaau ʻi he vahaʻa ʻo e sipi mo e sipi. 23 Te u fokotuʻu ha tauhi-sipi ʻe taha kiate kinautolu,+ ko ʻeku sevāniti ko Tēvitá,+ pea te ne fafanga kinautolu. Ko ia tonu te ne fafanga kinautolu pea hoko ko honau tauhi.+ 24 Pea ko au Sihova te u hoko ko honau ʻOtua,+ pea ʻe hoko ʻa ʻeku sevāniti ko Tēvitá ko ha ʻeiki ʻi honau lotolotongá.+ Ko au, Sihova tonu, kuó u leá.

25 “‘“Pea te u fai ha fuakava ʻo e melino mo kinautolu,+ pea te u toʻo mei he fonuá ʻa e fanga manu fekaí,+ koeʻuhí ke nau nofo malu ʻi he toafá pea mohe ʻi he vaotaá.+ 26 Te u ʻai kinautolu pea mo e feituʻu takatakai ʻi hoku feituʻu māʻolungá ko ha tāpuaki,+ pea te u ʻai ke tō hifo ʻa e ʻuhá ʻi hono taimi totonu. ʻE ngangana hifo ʻa e ngaahi tāpuakí ʻo hangē ko e ʻuhá.+ 27 ʻE laku fua mai ʻa e ʻuluʻakau ʻo e ngoué, pea ʻe ʻomi ʻe he kelekelé ʻa hono fuá,+ pea te nau nofo malu ʻi he fonuá. Pea kuo pau ke nau ʻiloʻi ko Sihova au ʻi heʻeku fesiʻi ʻenau ngaahi ʻioké+ pea fakahaofi kinautolu mei he faʻahinga naʻa nau fakapōpulaʻi kinautolú. 28 ʻE ʻikai te nau kei hoko ko ha meʻa ke pō ʻe he ngaahi puleʻangá, pea ʻe ʻikai ke keina kinautolu ʻe he fanga manu fekai ʻo e māmaní, pea te nau nofo malu, ʻo ʻikai ha taha te ne ʻai kinautolu ke nau ilifia.+

29 “‘“Te u fokotuʻu maʻanautolu ha ngoue ongoongoa, pea ʻe ʻikai te nau kei mate mei he honge ʻi he fonuá,+ pea ʻe ʻikai ke kei fakamaaʻi kinautolu ʻe he ngaahi puleʻangá.+ 30 ‘Pea kuo pau ke nau ʻilo ko au, ʻa Sihova ko honau ʻOtuá, ʻoku ou ʻiate kinautolu pea ko kinautolú, ʻa e fale ʻo ʻIsilelí, ʻa hoku kakaí,’+ ko e fakahaaʻi ia ʻe he ʻEiki Hau ko Sihová.”’

31 “‘Ko e meʻa kiate kimoutolu, ʻa ʻeku fanga sipí,+ ʻa e fanga sipi ʻoku ou tokangaʻí, ko e kau tangata pē kimoutolu, pea ko au ʻa homou ʻOtuá,’ ko e fakahaaʻi ia ʻe he ʻEiki Hau ko Sihová.”